Génesis
Esaú mijaindyuren Jacobya Dioschi uraꞌ imi.
27 Isaac pureꞌ rukuunchiren yaꞌ kapuka tsaa dejuwalaꞌ pajtekeꞌ tiba katatyui tiyami. Tsejtu ma malu yaꞌ kasna Esaúnu mikatu entsandimi: ¡Apa! timi.
Tsenñu Esaú: Enu jayu, tikami.
2 Tsenñu Isaac entsandimi: Iya yumaa pureꞌ rukuuyu, tsejtu naama peyaꞌba jei peyanuuren tsanayu. 3 Tsaꞌ mitya ñuꞌ arku bain, yaꞌ tsuta bain kakeꞌ jeenbaasha jisa tenve, ka ti animaañuba inchi kanu. 4 Tsejtu bene inchi uu finuke luguu keꞌ, inu naaju mujmuñuba juntsangue keꞌ tajaꞌ kuwaka, iya finutsu. Tsenmala ñunu Dioschi uraꞌ isa tiꞌ panu tsuyu,* kayu peyaiꞌmujchiren, timi.
5 Tsenñu Rebeca meenami naa Isaac Esaúnu tsandintsuñuba. Tsejtu Esaú jeenbaasha yaꞌ apachi tyeeba miꞌkenu jiinmalaren, 6 Rebeca yaꞌ na Jacobnu mikatu entsandimi: Ñuꞌ apa ñuꞌ naatala Esaúba kuinda kentsu challaren merakeꞌ dyaiyu, tsenñu entsandingayu: 7 Ti animaañuba tuteꞌ maade, tsangueꞌ inchi uu finuke luguu kide, iya finutsu, tsenmala iya ñunu Yavéꞌ ajuushan Dioschi uraꞌ isa tiꞌ panu tsuyu, kayu peyaiꞌmujchiren, tingayu. 8 Tsaꞌ mitya, apa, uraꞌ meedide in palaanu: 9 Chibu punu veetasha jiꞌ pai chibu kailla kayu ura tene kalaꞌ taade; tsenmala iya ñuꞌ apachi uu finuke luguu kenu tsuyu, matyu naaju ya mutyamuuñuba juntsanguenu tsuyu. 10 Tsenmala ñaa yaꞌ junga tajinu tsuve ya finutsu. Tsanguenmalaa ya kayu peyaiꞌmujchiren ñunu Dios uraꞌ kisa tiꞌ paꞌnu tsuve, timi.
11 Tsenñu Jacob yaꞌ amanu tsandimi: Tsaaren in naatalaya yaꞌ bulu pijunbeeñuba, iyaa tsa jutyuyu. 12 Tsaꞌ mitya, apa inu taꞌkashu juntsaa, naa iya anbukentsuñuba mijanu tsuve; tsejtu Diosnu inu uraꞌ kisa tiꞌ paꞌtyumujchi, firuꞌ iinuuya paꞌnu tsuve, timi.
13 Tsenñu yaꞌ ama tsandimi: Naa ñuꞌ apa tsandiꞌ Dioschi firuꞌ isa tyaꞌ pañuba, inaa tsaisa. Tsaꞌ mitya ñuya iya naatiñuba juntsangueꞌ pai chibu kailla kaide, timi.
14 Tsenñu Jacob jitu pai chibu kailla kaꞌ tajaꞌ yaꞌ amanu kuwañu, yaꞌ ama uu finuke luguu ketu, Isaac naaju mutyamuñuba juntsangue kemi. 15 Tsejtu bene yaꞌ uñaku Esaúchi yasha uukareꞌ tanañu jali, kayu ura jumaa kalareꞌ yaꞌ benna Jacobnu pandemi. 16 Tsanguetu bene kaa chibu kika jumulaa Jacobꞌ tyaapatala bain, naa kutu tyullatala bain dedishukaami, matyu ju chutyundalaya. 17 Tsejtu naa juntsa luguu bain, naa yaꞌ keñu pan bain kuwaꞌ eemi yaꞌ apanu tajiꞌ kuwanutsu.
18 Tsenñu Jacob yaꞌ apaꞌ puinsha vitu: ¡Apa! timi.
Tsenñu Isaac pakatu: Enu entsanayu. ¿Ñu mujtuuyu, apa? timi.
19 Tsenñu Jacob pakatu: Iya ñuꞌ ajkeꞌ na, Esaúyu. Iya yumaa ñu naakenu mandangueñuba tsanguiyu. Tsaꞌ mitya kujpaꞌ chudiꞌ in kaꞌ taañu animaa panda fide, tsejtu Diosnu inu uraꞌ kisa tiꞌ paꞌde, timi.
20 Tsenñu Isaac pakeꞌmeetu: Tsen ¿naa kitaa ura jeke katatunguiyu, apa? timi.
Tsenñu Jacob pakatu: Ñuꞌ Dios Yavé inu jeke katakaañuꞌ mityaa tsanguiyu, tikami.
21 Tsenñu Isaac tsandimi: Kalen ja-iꞌ inu taꞌkakaaka, naa uwain ñu in na Esaúñuba mijanu tenve, timi.
22 Tsenñu Jacob yaꞌ apaꞌ junga kalen jiiñu, Isaac taꞌkeetu tsandimi: Pamiya Jacob pan tsandituren, tyaapaya uwain Esaúꞌ tyaapa deeve, timi. 23 Tsejtu keengatyumi, yaꞌ pejpelaya pijun juutu, yaꞌ naatala Esaúchi kera deeñuꞌ mitya. Tsejtu Dioschi uraꞌ isa tinundiyandu, 24 manbakeꞌmeetu entsa mandimi: ¿Uwain ñu in na Esaúyu? timi.
Tsenñu: Jeen, iya Esaúyu, tikami Jacob.
25 Tsenñu yaꞌ apa tsandimi: Tsaaya, apa, ñuꞌ jeendaa jiꞌ kañu alla taade fichi, tsejtu iya ñunu Dios uraꞌ kisa tiꞌ paꞌnu tsuyu, timi.
Tsenñu yaꞌ apanu Jacob panda kuwatu, binu bain tajiꞌ kuwañu, Isaac panda fiꞌ, binu bain kujchimi. 26 Tsejtu bene tsandimi: Apa, engu kalen ja-iꞌ inu estikika, timi. 27 Tsenñu Jacob estiꞌ kalen miꞌnajiñu, Isaac yaꞌ jali aindyu ishkatu, entsandi paꞌ Dioschi uraꞌ isa timi: Uwain, entsaya in naꞌ aindyuve, Dioschi uraꞌ iwara jeenbala aindyu jun tsaave.
28 Diosya selusha pumu shuwa ñuchi jakaakasa, ñuꞌ puꞌ wajkala bain uraꞌ de-isa, naa trigu juula bain, naa uva juula bain pureꞌ ideisa.
29 Pureꞌ chachilla ñuchi tiba kiikemu dejusa; tsandityuꞌba, naaju chachilla bain ñuꞌ ajuusha deteedisa. Ñuꞌ paandelanu bain uudenguen chude; ¡Yala ñuꞌ ajuusha deteedisa!
Mun ñunu Dioschi firuꞌ isa detiꞌba, yalaa firuꞌ de-isa; tsenmin mun ñunu Dioschi uraꞌ isa detiꞌba, yalaa uraꞌ de-isa, timi.
30 Tsejtu Isaac Jacobnu Dioschi uraꞌ isa tiꞌ depaꞌ dyañu, Jacob yaꞌ apaꞌ chuinsha puꞌ malun iinmalaren, Esaú jeendaa puꞌ maami. 31 Tsejtu ya bain uu finuke luguu keꞌ, yaꞌ apaꞌ junga tajitu entsandimi: Apa, umaa kujpaꞌ, ñuꞌ naꞌ jeendaa jiꞌ aingañu alla fide, tsejtu inu Dioschi uraꞌ ikaaka, timi.
32 Tsenñu Isaac pakeꞌmeetu: ¿Ñu mujtuuyu? timi.
Tsenñu: Iya ñuꞌ ajkeꞌ na Esaúyu, tikami.
33 Tsandiñu Isaac wapanbashiimi, tsaiꞌ depiꞌshikendu tsandimi: Tsaaya, ¿maa jeendaa jiꞌ aingaꞌ majaꞌ inu juntsa alla luguu tajaꞌ kutunguen? Tsenñu iya ñu kayu majaindyuren yumaa tiba defiꞌkeeyu, tsenmin yanaa Dios uraꞌ kisa tiꞌ paꞌyu. Tsaꞌ mitya challa yaa yumaa Dioschi uraꞌ inu tirave, timi.
34 Tsenñu Esaú yaꞌ apa tsandiñu meenatu, pureꞌ llakindyaꞌ wareꞌ uiꞌtu entsandimi: ¡Diosnu paꞌ inu bain uraꞌ kisa tide, apa! timi.
35 Tsenñu Isaac tsandimi: Yumaa ñuꞌ benna jaꞌ inu anbuda keranguikaañuve, tsejtu yaa Dioschi uraꞌ inutsumi ñuchi jumunun kakeñunguive, timi.
36 Tsenñu pakatu: ¡Mikan Jacob* mumu depuñuve, timi Esaú, matyu yumaa pai bijee inu entsanguentsuve! Ajkeꞌ bijeenuya in avenju na deechu jumaa inu chipakeñunguive, tsenmala umaya Dioschi uraꞌ inu jumu bain yaren mangave, timi. Tsejtu bene yaꞌ apanu entsandimi: ¿Dioschi kayu vera uraꞌ inutsumi juuya inchiba laakarendyuyu? timi.
37 Tsenñu Isaac pakatu tsandimi: Iya Jacobnu naa ñunu bain uudenguenu tirekiyu, tsenmin kumuinchi yaꞌ paandelanu bain yachi tiba kiikemu chachi juu tene detireyu, naa trigu bain, naa binu bain pureꞌ iwaakisa tiyu. Tsaꞌ mitya ¿challa ñuꞌ mityaya tyeenguenuu juwa, apa? timi.
38 Tsenñu Esaú patindu entsandimi: ¿Tsejtu ma bijeeren Dioschi uraꞌ isa tiꞌ patinuu jujuu, apa? ¡Diosnu, inu bain uraꞌ kisa tiꞌ paꞌde! timi.
Tsejtu manen utiꞌ mawaami.
39 Tsenñu yaꞌ apa Isaac tsandimi: Ura tu chutyuinsha baasha chunu tsuve, naa selusha bain shuwa pajatyuinsha.
40 Ñuꞌ peeniyachee vinguen chunu tsuve, ñuꞌ naatalachi taawasha kiikemu tiyanu tsuve. Tsaaren ñu bene tsanguen chutu veraꞌ tyamiya, yachi uuden ma-in chutyu tiyanu tsuve, timi.
Jacob nepimi.
41 Tsenñu jumalan Esaú tsaa Jacobnu kerandyatyuu tiyaimi, matyu yaꞌ apa yanaa Dios uraꞌ kisa tiꞌ paꞌñuꞌ mitya, tsejtu entsangue pensanguiikemi: “Wajtunuren apa peyanmalaya llakinguenu detsuyu; tsaaren tsaa depuimiya in naatala Jacobnu tuꞌnu tsuyu”, tyatyaimi.
42 Tsenñuren naa yaꞌ avenju na Esaú ti kenu pensanguentsuñuba Rebecanu dewainñu mijatu, yaꞌ kayi na Jacobnu mikatu entsandimi: Ñuꞌ uñaku Esaú ñunu tuteꞌ vejmiꞌ mannu tyantsuñuba mijade. 43 Tsaꞌ mitya, apa, inu meedika, challaren Harán pebulusha nepiyade, in naatala Labánꞌ yasha. 44 Tsejtu junga tsanade, ñuꞌ naatala ajara de-ishpuitendyuya, 45 tsenmin ñu yanu naakiñuba juntsan mitya vejmiꞌ manguen jutyuu tiyanbera junga tsanade. Tsenmala ñu maanu ura tiyanmala bene iya mawainnu tsuyu, ¡matyu ma malunun ñullanu pallu depirekindendyuve! timi.
46 Bene Rebeca Isaacnu entsandimi: Jaiba uraꞌ chukeetyuve, Hetnu seraꞌ jimu paande naꞌmalanu Esaú supungaꞌ chudishu juntsalaꞌ mityaren. Tsaꞌ mitya Jacob bain entsa Hetnu seraꞌ jimu paande naꞌmala enu Canaán tunu chumu naadejuñuba juntsaalanu supungaꞌ chushu juntsaa, iya peñuba ne uraave, timi.