Génesis
Adán Evaba Diosnu meenguiꞌla.
3 Yavéchi, matyu Dioschi imu jeendaa nemu ajaa animaalanu pensanguiñuya piñee kayu bibumi. Tsaꞌ mitya supu shinbunu tsandimi: ¿Tsejtu Dios ñullanu vijpalanu chudenashu juntsa chinu puka namulaa, naaju bain fityudei, tii? timi.
2 Tsenñu supu shinbu pakatu: Lalaya naaju chinu puka kaꞌ findenñuba kaꞌ finuu dejuyu, 3 tsaaren vijtya kejtaa chunashu juntsa chinuya Dios lalanu naa taꞌkabainguityudei tiñuꞌ mitya, kaꞌ finu dejutyuyu, matyu tsanguishu juntsaa peyanu dejuve tiñuꞌ mitya, timi.
4 Tsenñu supu shinbunu piñi tsandimi: Anbudave, ñulla peyan dejutyuve. 5 Matyu Diosya naama ñulla juntsa chinu puka dekaꞌ fiꞌ bain ñullaꞌ kapuka dedanwareꞌ, naaju urañu bain, naaju urajtuñu bain demijaꞌ, Dios tsaa tiyanu dejuñuba miꞌ mityaa tsandive, timi.
6 Tsenñu supu shinbu juntsa chinu namu puka ne keranchiya uu finuuve tyaꞌ mujkereꞌ, aseetaju tiyachi tyaꞌ mitya, fiꞌkera tyami. Tsejtu manbuka wallaꞌ chitiꞌ fitu, yaꞌ rukunu bain kuñu, ya bain fimi. 7 Tsenmalan juntsa uwanu yalaꞌ kapuka dedanguiñu, naa yala pallu tsaa chaꞌtene ju dejuꞌba kayu narai mijaꞌ yujtyala. Tsejtu iguera tapee dekaꞌ detyundyuꞌ teleꞌ juntsachi dishukila.
8 Tsejtu bene unbee ruku bain, yaꞌ shinbu bain kependuꞌ ishuwa juyinu uratala Yavé Dios vijtyasha nentsuñuba demeetu, chi kejtsapala yangachi tene jiꞌ pantsudila, matyu Yavé Dios yalanu katatyusa tyatu. 9 Tsenñuren unbee rukunu Yavé Dios tsandimi: ¿Nuka naanayu? timi.
10 Tsenñu chaꞌ ruku pakatu tsandimi: Ñu vijpalasha nentsuñu meetu, chaꞌtene juꞌ mityaa, jeetenñu pantsudiyu, timi.
11 Tsenñu Dios tsandimi: ¿Tsen maa ñunu chaꞌtene juuve tin? ¿Tsaaya, ñunu fityude tyeesu juntsa chinu namu pukaa kaꞌ fii? timi.
12 Tsenñu chaꞌ ruku tsandimi: Ñu iba chunu tiꞌ kuwakishu juntsa shinbu inu juntsa puka kuwañaa fiyu, timi.
13 Tsenñu supu shinbunu Yavé Dios tsandimi: ¿Nenñaa tsanguiyu? timi.
Tsandiñu juntsa shinbu: Inu piñi anbutiñun, juntsa puka tsangueꞌ fikeeñuve, timi.
14 Tsenñu piñinu Yavé Dios tsandimi: Ñuꞌ juntsanguen mitya, mika firuꞌ inu tsuve, ñuꞌ chungamaya kumuinchi animaatala ñaa firuꞌ iꞌ taaju imu junu tsuve. Entsa malu ajkeshaa shillaꞌ nenchi tene neinu tsuve, tsenmin ñuꞌ chungamaya malumere tu llujpee fin chunu tsuve. 15 Tsenmin ñunu chaꞌ shinbuba vetaꞌ vetaꞌ kundaa juu tirenu tsuyu, tsenmin naa ñunu seraꞌ jimula bain, naa entsa shinbunu seraꞌ jimula bain naa-uwanuba tsaren kundaa juu chunu detsuve. Tsaꞌ mitya yanu seraꞌ jimu ñuꞌ mishunu ijchaa teenu tsuve. Ñuya yaꞌ nenbujkuwanaa lluidiꞌ finu tsuve, timi.
16 Tsejtu chaꞌ shinbunu entsandimi: Naviꞌ nakandu taajuꞌ iinuke tirenu tsuyu; nakanu uwanu kityandaa ñuꞌ kaillanu kanu tsuve. Ñuꞌ rukunu meneste jujuunu tsuve, tsenmala yaa ñunu mandanguen chunu tsuve, timi.
17 Tsenmin unbee rukunu bain entsandimi: Ñuꞌ shinbunu meediꞌ, juntsa chinu imu puka fityude tiñun fiñuꞌ mitya, ñuꞌ kuipaꞌ mityaren entsa tu mika firuꞌ juu junu tsuve. Tsaꞌ mitya ñuꞌ chungamaya tsamantsa daran taawasha ketaa tyeeba wajkeꞌ de-iwaatu kaꞌ fin chunu tsuve. 18 Tunu naa puchi bain, naa pu chuu tape bain awanu detsuve, tsenmin jeenbaasha chumu kiya juula bain ñu fin chunu tsuve. 19 Tsaꞌ mitya taawasha ketu llashkapa chipinbee netaa panda fin chunu tsuve, ñun peyaꞌ tu mandiꞌmujchiya, matyu turen ñu chachi tiyamuꞌ mitya, turen mandinu tsuve, timi.
20 Tsejtu juntsa chaꞌ ruku Adán yaꞌ shinbunu Eva mumu pumi, matyu yaa kumuinchi chachillachi yaꞌ amañuꞌ mitya. Eva titu “chumu” titundive.
21 Yavé Dios, unbee rukunu bain, yaꞌ shinbunu bain animaa kika jali dekeꞌ kuwaꞌ pandemi. 22 Tsejtu tsandimi: Umaa chachi bain lala tsaa ma tiyaive, matyu naaju urañu bain, naaju urajtuñu bain miꞌ mitya. Tsaꞌ mitya naa chuwaanu tiremu chinu bain ta-ereꞌ puka kaꞌ fimiya, naa-uwanuba tsana chunu tiyaꞌba inu juve, timi. 23 Tsejtu Yavé Dios, chaꞌ rukunu Edén vijtyasha mangalaatu, yanu keꞌ kujteñu tunuren taawasha kenu pukemi. 24 Tsejtu chachinu mangalareꞌ dyatu, vijpalanu uidiꞌ pensanguiñuya pajlanu pasha, anjee keraalanu dewashkaami, tsenmin ma peeniya, ñi lluꞌwaraaya, juntsa miñunu nutsa kelushaba luꞌtetintsunu pumi, tsenmalaa chuwaawaa kemu chisha muba kalen jiꞌnudetsu.