Génesis
Dinanu Siquem firuꞌ kemi.
34 Lía Jacobnu nakaꞌ kuwañu naꞌma Dina, juntsa tenanu chumu pannalaꞌ junga yaa jimi. 2 Tsenñu juntsa tenanu chumu bale ruku Hevenu seraꞌ jimu chachi Hamorꞌ na Siquem katatu, tsaa deranchi tsudimi juntsa naꞌmaba, tsangueꞌ tsaimishtimi. 3 Tsangueturen juntsa naꞌmanu tsamantsa mutyatu, yanu bain juntsa naꞌma mutyaꞌ keekenuuya kiikeꞌ estyakutyanu mitya mityakemi. 4 Tsejtu Siquem yaꞌ apa Hamornu tsandimi: Yaꞌ apalaꞌ junga jiꞌ entsa naꞌmanu paꞌde. Yanu supunganu tenve, timi.
5 Naa Jacobya yaꞌ naꞌma Dinanu Siquem deranchi tsaiñuba mijaturen, yaꞌ nala jeenbasha yaꞌ animaalaba depuñuꞌ mitya, majaindetyuya tiba paviikiꞌmi. 6 Siquemchi yaꞌ apa Hamor, Jacobꞌ junga jiꞌ keemi, yaba kuinda kenu.
7 Tsenñu Jacobꞌ nala jeenbaasha putun demaatu, tyee iñuba mijala, tsejtu tsamantsai ajaavila, matyu Siquemya Jacobꞌ naꞌmaba tsutu, Israelnu balejtu kurekeñuuya keꞌ, naatenñuba, tsanguen jutyuunuren tsangueñuꞌ mitya.
8 Tsenñuren Hamor yaiba kuinda ketu tsandimi: In na Siquem Dinanu tsamantsa estyave. Tsaꞌ mitya tsantsaya, yanu supungudei. 9 Tsaiꞌ lalaꞌ paande tiyadei. Tsaishu juntsaa lala ñullaꞌ naꞌmalanu supunganuu tiyanu dejuyu, tsenmala ñui bain lalaꞌ naꞌmalanu supunganuu tiyanu dejuve. 10 Tsejtu laaba chudei. Matyu entsa tenanuya ñuichi chunu ainatyuve. Tsaꞌ mitya enu dechuꞌ, ti kenu tenñuba dekeꞌ, atin chuꞌ, naa tu bain atiꞌkadei, timi.
11 Tsenñu Siquem bain, Dinaꞌ apanu, naa yaꞌ naatalalanu bain tsandimi: Iya ñuichi uraꞌ katawañuya inu kuwakai tiꞌ uꞌtandinu tenve. Tsaꞌ mitya ti inu depaꞌñu bain kuwanu tsuyu. 12 Matyu veela naake paꞌmuwa deeñuba juntsanu pullandi depakeꞌ, naa ñulla inu lushi bain, naa kayu tiba pureꞌ pakidekiñu bain kuwanu tsuyu; inchiya nejuuve, tsaaren juntsa naꞌmanu inu supungukai, timi.
13 Tsenñuren Siquemya Dinanu tsaa deranchi tsaimishtiñuꞌ mitya, Jacobꞌ nala Hamornu bain, naa yaꞌ nanu bain anbutitun 14 entsandila: Ma unbere Dioschi señas jutyunuya, lalaya lalaꞌ tsujkinu kunu dejutyuyu, matyu tsanguishu juntsaya, laachiya tsamantsai yujpeyanuu juve. 15 Tsaꞌ mitya lala tsaa, kumuinchi unbeenalaya Dioschi señas indene iishu juntsaa, uwain tsanguenu dejuyu. 16 Tsaishu juntsaa, uwain ñulla lalaꞌ naꞌmalanu supunganu dejuve, tsenmala laa bain ñullaꞌ naꞌmalanu supunganu dejuyu. Tsaiꞌ ñuiba dechudiꞌ ma bulu chachi juu tiyainu detsuyu. 17 Tsaaren ñulla lala tsandi depañun, Dioschi señas de-ityushu juntsaa, enu maluꞌ mijiꞌ lalaꞌ tsujkinu mandakikenu detsuyu, tila.
18 Tsenñu Hamor bain, naa yaꞌ na bain, yala naadetiñu bain tsaaya uraa tyala. 19 Tsejtu Siquem, matyu keediꞌmujchi juntsanguenu shuwami, Jacobꞌ naꞌmanu tsamantsai mutyaꞌ mitya. Tsenmin Siquemya, yaꞌ buluutala kayu bale chachi jumi. 20 Tsenñu Hamor, yaꞌ na Siquemba pebulu vinu juukapasha jila, yalaꞌ waꞌdiꞌ kuinda kendala, tsejtu junu juntsa pebuluꞌ chullanu entsandila: 21 Entsa rukula laaba uraꞌ chachi deeve, tsaꞌ mitya laaba bulu dechusa. Tsejtu yai bain entsa tenanu tyeeba keꞌ atin dechusa, matyu tuya yala nuka chundetyañuba purenañuꞌ mitya; tsenmala lala yalaꞌ naꞌmalanu supunganuu dejuyu. Tsenmala naa yai bain lalaꞌ naꞌmalanu supunganuu dejuve. 22 Tsaaren laaba ma bulu chachi juu tiyanu shuwalaya, kumuinchi lala unbee rukulaya Dioschi señas de-iꞌ, yala naakemuwa deeñuba juntsa dekiñaa, laaba chunu shuwanu depave. 23 Tsenñu lala tsanguenu depashu juntsaa, kumuinchi yala ti detañu bain, naa animaala bain laachi tiyanu dejuve, tsaꞌ mitya lala uwain Dioschi señas inuu jukeeve tinun judeeyu, tsenmalaren yala laaba chunu dejuve, tila.
24 Tsenñu kumuinchi juntsa pebulunu chumu unbee rukula, matyu suutadu jiinuu añu juulaya, naa Hamor bain, yaꞌ na Siquem bain naadetiñuba: Uwain tsaaya tsanguiñu urave, tila, tsejtu kumuinchi tsaa Dioschi señas de-ikutikila.
25 Tsejtu juntsa rukula Dioschi señas de-itu kayu kiya ma-ujtuwarendetyuren, Jacobꞌ nala, Simeón bain, Leví bain, matyu Dinaꞌ kayala, pen malu insha pebulusha dejitu, tsanguendenaa tyaꞌ pensaba jutyu dechuren, peeniya taa jiꞌ, kumuinchi unbee rukulanu detutekila. 26 Tsenmin Hamornu bain, naa yaꞌ na Siquemnu bain detuteꞌ, bene Dinanu Siquemꞌ yasha mangalaajiꞌ mijiila. 27 Tsenñu Jacobꞌ nala kayu vejanla bain dejiꞌ, peyaꞌ tsumulanu dekataꞌ jitu, yaichi tiba tañu jumulaya millangue kala, yalaꞌ tsujkinu tsangueꞌ dekuñu vejmiꞌ demantu. 28 Tsejtu naa uveja juula, naa wagaa juula, naa buru juula bain dekakeꞌ mijiila, matyu pebulusha ti dekataꞌ bain, naa jeenbaasha ti dekataꞌ bain dekakeꞌ mijiila. 29 Tsenmin yatala bain ti kataꞌba detaranguila, tsangueꞌ kaillanu bain, naa shinbulanu bain deranchi dekaꞌ mijiila. 30 Tsenñu Jacob, Simeónnu bain, Levínu bain entsandimi: Ñulla inu firuꞌ shuikikaadekive. Tsa dekiñu ñullaꞌ kuipaꞌ mityan inu Canaánnu seraꞌ jimu chachilla bain, naa Fereznu seraꞌ jimu chachilla bain kundaa tyanu dejuve. Tsenmala iya aa chachi miyajtuñuꞌ mitya, yala debuudishu juntsaa inu vingueꞌ pullaꞌ, inu in chachillaba bulu millangaanu detsuve, timi.
31 Tsenñu yala entsandi pakala: ¿Tsejtu Siquemya lalaꞌ tsujkinu naꞌbaasa tsa tsaimu shinbu juuñungue kiikenu juu? tila.