Éxodo
Ishu tene pureimi.
10 Yavé, Moisésnu tsandimi: Faraónnu mijiꞌ keejide. Iya yanu bain, naa yaꞌ bale chachillanu bain meedin jutyungue tireyu, tsejtaa yalaꞌ kejtsapala Diosyaa tsanguekaantsuve tyainuu jumula dekeꞌ keewaanu juꞌ mitya, 2 tsenmalaa ñu bene naa ñuꞌ nalanu bain, naa ñuꞌ pañalanu bain, iya Egiptoꞌ chullanu naake dekeꞌ balenguutyuñu bain, naa iyaa tsanguekaantsuve tyainuu juula bain dekeꞌ keewaamuñuba ñu wandinuu junu tsuve. Tsanguenmalaa ñulla mijanu detsuve naa iyaa Yavéñu bain, timi.
3 Tsenñu Moisés, Aarónba faraónꞌ junga jiꞌ keetu tsandila: Hebreo chachillaꞌ Dios Yavé entsandive: ¿Naamaa ñu in ajuusha balengurajtuyu tyanujtuuyu? In chachillanu mandyaikeꞌ eede yala inu aawa kureꞌ keewaajinudetsu; 4 matyu tsandiñuren ñu meetyuꞌ yalanu me-eetyushu juntsaa, ayuren ñuꞌ tusha ishu pureꞌ mikakenu tsuyu. 5 Tsenñu ishularen pureitu tsaa tu kataatyui paijnu detsuve. Tsejtu isha puka pajaꞌ demushaketyuushu juntsa jayu laramulanuya millangue finu detsuve, tsenmin kumuinchi jeenbaasha chumu chitala bain tape millangue finu detsuve. 6 Tsenmin naa ñuꞌ yasha bain, naa ñuꞌ bale chachillaꞌ yasha bain, naa kumuinchi Egipto chachillaꞌ yatala bain tyuwainu detsuve. ¡Tsejtu naa ñuꞌ apala bain, naa ñuꞌ aa-apala bain chunu tinbunu naa-uwanuba tsaintsu kataꞌ kerajtunu juꞌ, naa chai bain tsaintsu kataatyu juuya iꞌ puinu tsuve! timi.
Tsejtu Moisés depaꞌ dyatu, faraónꞌ yasha putun yateꞌ malumi. 7 Tsenñu faraónꞌ bale chachilla tsandila: ¿Naama jina entsa unbere lalanu tiba tajtungue tirenuu kentsunujtun? Tsamantsa bale ruku faraón, ¿nenñaa entsa chachillanu yalaꞌ Dios Yavénu aawa kureꞌ keewaajinudetsu me-eetyumi? Ñuya chaiba mijaindyuꞌba jumee tenve naa Egipto tuya tsaa tituba de-iintsuñuba, tila.
8 Tsenñu faraón, Moisésnu bain, Aarónnu bain mamikatu tsandimi: Jiꞌ ñullaꞌ Dios Yavénu aawa kureꞌ keewaadei. Tsaaren mumu jinu juꞌ bain inu wainkai, timi.
9 Tsenñu Moisés pakatu: Lalaya naa lalaꞌ kailla bain, derukuula bain, naa unbeenala bain, supu naꞌmala bain, millai jinu detsuyu, tsenmin naa lalaꞌ uveja, lalaꞌ chibu, naa lalaꞌ wagaa juula bain millai jinu detsuve, matyu lala Yavéchi tsamantsaa fandangu kenu dejuꞌ mitya, timi.
10 Tsenñu faraón tsandimi: ¡Ñulla naake firuꞌ kenu tyandetsuñuba ma narai katawave! ¿Ka, Yavé ñullanu bulu miyaꞌ jichuve pensa dejuu, tsenmin i bain ñullanu ñuꞌ kaillaba bulu de-eechuve pensa dejuu? 11 Ne tsaindetsuyu pensaa kityudei, matyu ñulla unbee rukulan ji-iꞌ, Yavénu aawa kureꞌ keewaadei, tsanguenu tyandetsuꞌ mitya, timi.
Tsanditu faraón, junu yalanu ajaa keꞌ mangalaakaami.
12 Tsenñu Yavé, Moisésnu entsandimi: Ñuꞌ tyaapa Egiptosha usakide, tsenmala ishu pureꞌ ja-iꞌ, kumuinchi entsa tu tenasha chi chumulanuya millangaanu detsuve, isha puka pajatun dekityuushu juntsa chi laramulanuya, timi.
13 Tsenñu Moisés yaꞌ tyutyan chaꞌli Egiptosha usakemi, tsenmalan Yavé pajta lainbi ishuwa juyikaañu, naa mandala bain, naa kepe bain juyitintsumi. Tsenñu ayunchi, juntsa ishuwa juyintsumuren ishu pureꞌ tajaimi, 14 tsenñu Egipto tusha tsamantsaila, matyu naa-uwanuba tsaintsu kerajtula, tsenmin naa-uwanuba tsama-intsu kataan jutyuve. 15 Juntsaitu tsamantsai dejaꞌ dishkeꞌ naa tuba kataatyui jala, tsejtu isha puka jaꞌ dyañu laramu chi chumulanu bain, naa finu pukalanu bain tsaa defikila. Tsanguetu Egipto tusha tape juu chumulanuya millangareꞌ, naa jeenbaasha bain, naa chitala bain lushkatataa kataamulanuya millangaala.
16 Tsenñu faraón manen Moisésnu bain, Aarónnu bain jeke demamikatu tsandimi: Ñullaꞌ Dios Yavénu bain, ñullanu bain ujcha layu, 17 tsaaren entsa bijeeꞌ mityaya inu ujcha demanbitsaleꞌ, in mitya ñullaꞌ Dios Yavéba kuinda kiidei, tsenmalaa entsa jelekenuu firuꞌ peya tsantsaya lalanu manbakaꞌ me-eenutsu, timi.
18 Tsenñu Moisés faraónꞌ yasha puꞌ mafaamin, Yavéba kuinda kemi. 19 Tsenñu Yavé juntsa ishuwanu masmiꞌ majuyikaakenmalan, tsaa pajta vinsha laꞌ, pajta lainsha majuyikeꞌ, juntsa ishulanu Ungalala lamaasha* tene detajiꞌ kepukemi. Tsanguiñu Egiptosha naa ma ishuba mangataraiꞌla. 20 Tsenñuren Yavé manen faraónnu meedin jutyungue tiwaañu, Israel chachillanu me-eetyumi.
Tsamantsai dishpaijmi.
21 Tsenñu Yavé, Moisésnu tsandimi: Ñuꞌ tyaapa selusha usakide, tsenmalan kumuinchi Egipto tusha dishpaijñu, tsamantsai yapijuruꞌ tiyaꞌ taꞌkakenuu tiyainu tsuve, timi.
22 Tsenñu Moisés yaꞌ tyaapa kaiꞌsha uskenmalan, kumuinchi Egipto tusha tsamantsai dishpaijmi, 23 tsenñu pen malu tsaiñu, naa mu bain yaꞌ keetala chumunu katanu jutyuu tiyaila, tsenmin naa ne kujpaꞌ neinu bain jutyula. Tsaaren Israel chachillaꞌ chuinshaya dishpajtyaindyumi.
24 Tsenñu faraón manen Moisésnu maanu mandanguitu tsandimi: Yavénu aawa kureꞌ keewaanu jitu, naa ñullaꞌ shinbulanu bain, ñullaꞌ kaillanu bain taꞌdei, tsaaren kumuinchi uvejalanu bain, chibulanu bain, naa wagaalanu bain enu shuikidei, timi.
25 Tsandiñuren Moisés pakatu: Tsaaren, lalaꞌ Dios Yavéchi tuteꞌ keewaanu animaa bain, juꞌkeꞌ keewaanu animaa bain meneste jukeeñuꞌ mitya, lalanu lalaꞌ animaalanu bain tajikaanuu juve. 26 Tsajuꞌ lalaꞌ animaala bain laabaren bulu jinu detsuve. Maliiba shuwan dejutyuve, lalaꞌ Dios Yavénu aawa kureꞌ keewaanu entsa animaalanaa miꞌkeꞌ kanu dejuꞌ mitya, tsenmin lala kayu jiꞌmujchiya mijdetuyu naaju animaalaa tuteꞌ juꞌkeꞌ Yavénu keewaanu dejuꞌba, timi.
27 Tsenñu Yavé faraónnu meedin jutyungue tiwaañu, Israel chachillanu me-eetyumi. 28 Tsenmin faraón, Moisésnu tsandimi: ¡Enu maluꞌ miide, tsejtu jundaa inu majaꞌ mangueejadaa; matyu uwaindiyu, ñu naama in junga majaꞌ keejaꞌba peyanbera inu tsuve! timi.
29 Tsenñu Moisés pakatu: Uraꞌ pave, naa-uwanuba ñuꞌ ajuusha majaꞌ mangatawan jutyuyu, timi.