Éxodo
Firuꞌ dekiñu naake uraꞌ tseꞌkaanu juꞌba
23 Naa-uwanuba anbukuinda wandis netyude, naa firuꞌ kes nemu kuipa tañu bain, bale rukulaꞌ ajuusha ne yaꞌ mitya uraꞌ kekaanu anbukuinda keꞌ patyude. 2 Firuꞌ kenu tyamulaa aa dejuꞌ ti dekiñuba ñu bain tsanguiveteꞌ firuꞌ kemishtityude. Naa-uwanu kavitu keꞌ mantseꞌkaanu depaꞌ, ñunu bain depakaañuba mantsala firuꞌ kekaanu tyaꞌ naadetiñuba tsandiveꞌtyude; uraaya kiveꞌde. 3 Tsenmin kavitu kendu bain, ne pure chachi deeñuꞌ mityaa, yalanu kemishtichi tenñu, veranu firuꞌ kikenuu kityude.
4 Naa ñuꞌ kundaa rukuchi wagara juu, tsa jutyuꞌba, buru juu piyañu kataakeꞌ bain, yanu manguwade. 5 Tsandenna ñunu tyutyamuꞌ animaa buli puita llaiꞌkaratu tsujiꞌ pandainsha ma punañu katamiya, jandala tsumu buli mangaveꞌtyuu jutyude, naa ñunu tyutyamu chachiꞌ animaa juñu bain.
6 Ne pure chachi deeñaa, deechu tajdetu kureꞌ firuꞌ kavitu kityude.
7 Anbutitun naꞌbaasa depañun, juntsanu meengueꞌ ti kuipaba tajtu rukunun tutanuu kuipa putyude, matyu kuipa ta rukunuya kuipa tajtu kurenu jutyuyu.
8 Main firuꞌ kenduren yachi uraa kisa tyaꞌ, ñunu tyeeba kuwañuba katyude. Tsanguikutishu juntsaa deechuꞌ kavitu kityu tiyainu juve, tsejtu kuipa tajtulanaa kuipa juu faawareꞌba tsanguenu juve.
9 Vee tusha chumu jaꞌ ñuiba chumulanu firuꞌ ken chutyudei, kaspele ñui bain ñullaꞌ tu jutyu Egiptosha chumuwaatu, naa-indu chumuwa dejuꞌba mideꞌ mitya.
Lekanu lei
10 Mandishmain añuya tyeeba wajkeꞌ kaꞌ fin chude, 11 tsaaren mandishpai añu tiyanmalaya juntsa añunuya taawasha mantyuꞌ tsangaade maali imunu pure chachilla kaꞌ finudetsu, tsenmala tsa dekiñu laraꞌba iñuya ti jeen animaa bain finudetsu. Tsenmin naa uva vijtyalanu bain, naa ulibu vijtyalanu bain tsaren kide.
12 Mandishmain maluya ti taawashaba kide, tsaaren mandishpai malunuya lekade, tsenmalaa naa ñuchi taawasha kemu wagara bain, buru bain lekanudetsu, tsenmin naa ñuchi manda-iꞌ taawasha kemu chachilla bain, naa vee tusha jaꞌ chumu taawasha kemu chachilla bain lekaꞌ dera manganudetsu.
13 Tsaꞌ mitya iya ñullanu naatiñuba tsa tsangue meenguidei, tsejtu naa-uwanuba ñullaꞌ fiꞌpakichiya vee dyuslanu pakan chutyudei, tsajuꞌ yalaꞌ mumunu depatyusa.
Añumee pen bijee fandangu jumula
14 Añumee pen bijee inu balengureꞌ keewaanu fandangu kenu dejuve. 15 Ajkeꞌ kemiya pujkikarentsumi putyu pan fifikenu fandangu kenu dejuve iya ñullanu naakidei tiñuba tsanguetu. Mandishpai maluꞌ mitya fandangu kenu dejuve, tsejtu pan bain fintsumiya pujkikarentsumi putyu juuya fifikidei. Entsa fandangu kemiya Abib chuꞌchayanu naaju malutalaa tsanguenuu juñuba kenu dejuve, juntsa chuꞌchayanaa Egiptosha chutun malaꞌ maamuwa deꞌ mitya. Tsajuꞌ, ne mun inu jaꞌ keejaꞌ bain tiba tajtuuya jan dejutyuve.
16 Kama fandangu jumiya, ñulla vijpaasha trigu wajñu deseepuꞌ iñu ajkeꞌ kataa fandangu kenu dejuve.
Tsenmala kama fandangu bain jumiya ma añu de-insha ñullaꞌ wajka kiya kumuinchi puka de-iꞌ puiñu kaꞌ dyataa fandangu kenu dejuve. 17 Kumuinchi unbee rukulaya ma añunu entsa pen fandangu jumulanu Bale Rukuꞌ ajuusha, matyu in ajuusha jijiinu dejuve.
18 Naa-uwanu animaa tuteꞌ keewareꞌba, yaꞌ asa, pujkikarentsumi puu panba buungareꞌ keewaanu jutyuve. Yaꞌ muli bain ayunchi laakaatyude.
19 Ti buikiya iñu bain, ajkeꞌ katu kayu ura tene kaꞌ, in yasha, matyu ñuꞌ Dios, Yavéꞌ yasha taji tajiinu dejuve.
Chibu kaillanu yaꞌ amaꞌ chuꞌpichi akaatyudei.
Yavéꞌ anjee
20 Inu meedikai, iya ñullaꞌ ajuusha in anjee main eenu tsuyu ñullaꞌ jingura ñullanu washkenutsu, tsenmin iya ñuichi yumaa dekeꞌ tanañu tenasha miyaꞌ jinutsu. 21 Yanu keeminchaa jutyudei; ya naatiñuba meenguidei; pañu meetyu jutyudei, yaa in mitya tsanguis nendu, ñullaꞌ kundaa keñu jumula manbitsaanuu jutyuñuꞌ mitya. 22 Tsaaren uwain yanu meediꞌ, iya naatiñuba tsanguishu juntsaa, ñullaꞌ kundaalaba kundara junu tsuyu, tsejtu mun ñullanu tyeeba kenu dekiñu bain, iyaa yalanu tsa mannu tsuyu. 23 In anjee ñullaꞌ ajkesha puu jimishtitu, Amornu seraꞌ jimulaꞌ chuinsha bain, Hetnu seraꞌ jimulaꞌ chuinsha bain, Fereznu seraꞌ jimulaꞌ chuinsha bain, Canaánnu seraꞌ jimulaꞌ chuinsha bain, Hevenu seraꞌ jimulaꞌ chuinsha bain, Jebúsnu chumulaꞌ chuinsha bain miyaꞌ jinu tsuve, tsenmala entsa chachillanu millangaanu tsuyu. 24 Ñullaya yala naakemu deeñuba tsanguityuꞌ, yalaꞌ chi dyuslanu teedityudei, naa aawa kureꞌ keewaanu bain kityudei; tsa jutyuꞌ, yalaꞌ chi dyuslanu demushakeꞌ, naa yalaꞌ aawa kureꞌ keewaanu shupukalanu bain tsaa desenaa-eekidei. 25 Tsaaren inu, ñullaꞌ Dios Yavénu, aawa kureꞌ keewaawaakidei. Tsenmala iya ñullaꞌ panda bain, naa kushnu pi bain uraꞌ ikaanu tsuyu. Diipeya juu bain ñullaꞌ junga pukaan jutyuyu, ñullanu diluwaren jutyu. 26 Tsenmin naa supula bain na shuikenu dejutyuꞌ, naa navityuu bain jun dejutyuve. Tsenmin teꞌ peyan jutyu tireꞌ, pureꞌ malu chukaanu tsuyu.
27 Naajulanu bain ñullaꞌ ajuushaya jeetyainuke tirenu tsuyu, ñulla naaju pebulutala deviñuba ti ken tsaa detirenu tsuyu, tsenmin ñullaꞌ kundaala ñullanu dekatamin nepiyainuu tirenu tsuyu. 28 Ñulla nuka pullaꞌ jindetsuñu bain ñullaꞌ ajkesha tyeeba yalanu jeetyawaakenuu eenu tsuyu, tsenñu naa Hevenu seraꞌ jimu chachilla bain, naa Canaánnu seraꞌ jimu chachilla bain, naa Hetnu seraꞌ jimu chachilla bain dejeetyaꞌ nepiyanu detsuve. 29 Tsaaren ma añunuren yalanu dekelaakenu jutyuyu, tsenmalaa muba chutyuu detiyanmala, tusha jeenbala firuu tiyaiꞌnutsu, naa jeenbaasha chumu animaala bain deseraꞌ ñullanu firuꞌ kiꞌnudetsu. 30 Matyu ñullaꞌ chuinsha jayu jayu manguelaaken tsunu tsuyu, ñulla na dekaꞌ seraꞌ main main tu dekanbera. 31 Ñullaꞌ tu yumaa señas depuu tanayu. Entsaave: Ungalala tinu lamaabi jumin Filistea tusha chumulaꞌ lamaabi juve, tsenmin tiba den chutyuin tenabi jumin, Éufrates pibi juve. Iya ñullanaa jundaa chumu chachillanu ñullaꞌ tyaapanu kuwanu tsuyu, tsenmala ñullaꞌ ajuusha jukaꞌlaanu detsuve.
32 Ñulla entsa chachillaba buudiꞌ vetaꞌ vetaꞌ uraꞌ ken chunu tiyatyudei, naa yalaꞌ dyuslaba bain. 33 Tsenmin entsa chachillanu ñullaꞌ tusha tsangaanu kityudei, matyu yala ñullanu mandinbu yalaꞌ dyusnu teediꞌ aawa dekureꞌ keewaakaañu, inu kundaa keꞌ ujcha delaꞌ tyuꞌlekaraiñuu in jutyu, timi.