Éxodo

Moisésnu Dios mikami.

3 Moisésya, Madián tusha chachillaꞌ mitya Diosnu kalen jimu ruku, yaꞌ anchapa Jetróchi uveja juula bain, chibu juula bain washkemuꞌ mitya, ma malu tiba den chutyuin tena dapullaꞌ jimishtitu, Diosaꞌ kuyi tinu Horebbi* jimi. 2 Tsenñu junu Yavéꞌ* anjee, main daꞌchichii kejtala, ñi unwatinsha uinaꞌ katawami. Tsenñu Moisés tejangueetu, naa juntsa daꞌchisha ñi llukendun, ikaindyuñuba katami. 3 Tsejtu “¡Tyee indaa ne tsaatun!” tyaꞌ, nejtaa daꞌchi ikaindyuñuba uraꞌ mijanu tyatu, kayu kalen jiꞌ keenu tyami.

4 Tsenñu Moisés uraꞌ keenu tyaꞌ junga kalen jintsuñu, Yavé katatu, juntsa daꞌchibiren yanu patu: ¡Moisés! ¡Moisés! timi.

Tsenñu Moisés pakatu: Enu entsanayu, timi.

5 Tsenñu Dios tsandimi: Kalen jatyude, matyu ñuꞌ uinashu juntsa tuya inchin juu tu juñuꞌ mitya, ñuꞌ sandalia kalaakide, timi.

6 Tsejtu kayu paꞌ jindu: Iyaa ñuꞌ apaꞌ Diosyu. Iyaa naa Abrahamchi bain, naa Isaacchi bain, naa Jacobchi bain, yalaꞌ Diosyu, timi.

Tsandiñu Moisés meetu, yaꞌ kajuru dukikemi, matyu Diosnu keenu jeetyaꞌ mitya, 7 tsenñu Yavé kayu paꞌ jindu tsandimi: Egiptosha chumu in chachilla naa-i taaju indetsuñuba narana keenamuyu. Tsenmin yalanu taawasha kekaamula firuꞌ dekiñu naati uꞌtandindetsuñu bain meemeekiyu, tsenmin yala naake taaju kendetsuñu bain iya miyu. 8 Tsaꞌ mityaa iya, Egipto chachillaꞌ tyaapanu yalanu livee kenu pajayu. Tsangueꞌ yalanu juntsa tunu mangalareꞌ, tsamantsa aawa, mika aa ura tusha mandaꞌnu tsuyu, naa chuꞌpi bain, naa mishki bain pi juꞌ shillaꞌ jin tsainu tusha, matyu Canaánnu seraꞌ jimula bain, Hetnu seraꞌ jimula bain, Amornu seraꞌ jimula bain, Fereznu seraꞌ jimula bain, Hevenu seraꞌ jimula bain, naa Jebúsnu chumula bain, chunu tusha. 9 Matyu Israel chachilla uꞌtandindetsuñu iya meeyu, tsenmin naa Egipto chachilla yalanu firuꞌ kiikendetsuñu bain katayu. 10 Tsaꞌ mitya miide, ñunaa faraónꞌ junga me-eenu tsuyu, tsenmalaa ñu Egiptobi inchi Israel chachillanu mangalaajinutsu, timi.

11 Tsenñu Moisés Diosnu tsandimi: ¿Tsen iya muwa faraónꞌ ajuusha jiꞌ, Israel chachillanu Egipto tubi mangalareꞌ maanu? timi.

12 Tsenñu Dios pakatu: Iyaa ñuba bulu nenu tsuyu, tsenmin entsaa iya ñunu eeñu keewara junu tsuve: Ñu in chachillanu Egiptonu mangalaatu, entsa kuyinaa kumuinchi ñulla inu aawa kureꞌ keewaanu dejuve, timi. 13 Tsenñu Moisés pakatu: Tsejtu iya Israel chachillaꞌ junga jitu: Ñullaꞌ tinbu rukulaꞌ Dios inu eeve, tinmala, yala tsandenna: ¿Tsen, juntsa ti mumun? detinmala, ¿iya naati pakanujtuuwa? timi.

14 Tsenñu Dios pakatu: IYAA JUNTSA JUMUYU, tide. Tsenmin Israel chachillanu entsandide: IYA JUNTSAYU timu inu ñullaꞌ junga eeve, tide, timi.

15 Tsejtu Dios kayu Moisésnu paꞌ jindu tsandimi: Israel chachillanu entsa bain tsandide: Yavé,* ñullaꞌ tinbu rukulaꞌ Dios, matyu Abrahamchi bain, naa Isaacchi bain, naa Jacobchi bain Dios jumaa inu eeve, tide. Tsajuꞌ, entsaa naa-uwanuba tsanamu in mumu junu tsuve, tsenmin entsa mumunaa naa-uwanuba naa ñuꞌ nala bain, naa ñunu bene seraꞌ jimu paandela bain paka pakakenu detsuve. 16 Tsaꞌ mitya jiꞌ Israel bale rukulanu dewaꞌkaatu tsandide: Yavé, ñullaꞌ tinbu rukulaꞌ Dios, matyu Abrahamchi bain, Isaacchi bain, naa Jacobchi bain jumu Dios, inu katawatu entsandive: Ñullanu keetaditu, naa ñulla Egiptobi naa-i firuꞌ indetsuñu bain katayu, tive. 17 Tsenmin entsa bain tsandive: Ñulla Egiptobi taaju indetsuñuba livee kenu tsuyu. Tsangueꞌ naa Canaánnu seraꞌ jimula bain, Hetnu seraꞌ jimula bain, Amornu seraꞌ jimula bain, Fereznu seraꞌ jimula bain, Hevenu seraꞌ jimula bain, naa Jebúsnu chumula bain chunu tusha taꞌnu tsuyu; jungaa naa chuꞌpi bain, naa mishki bain pi juꞌ shillaꞌ jin tsainu tusha. 18 Tsandinmala Israel bale rukula ñunu meenguenu detsuve; tsenmala ñu yaiba bulu Egipto reinu jiꞌ keejitu entsandide: Yavé, hebreo chachillaꞌ Dios, lalanu katawañu, lalaꞌ Dios Yavénu animaa tuteꞌ keewaajinu lalanu tiba den chutyuinsha pen malu neepachi jikaaka, tide. 19 Tsaaren naa tsandiñu bain, Egipto reinu deranchi kindyuya ñullanu eren jutyuñu bain iya yumaa nara miyu. 20 Tsaaren iya in pudee keewareꞌ, Egipto tusha peyainuu jumula dekeꞌ keewareꞌ keenbashinguekaanu tsuyu, tsanguenmala faraónren ñullanu me-eꞌlaanu tsuve. 21 Tsenmin Egipto chachillanu, ñulla miinu uwanu uraꞌ tyaꞌ keekenuke tirenu tsuyu, tsenmalaa ñulla maluꞌ miindu tyanjuu mijiꞌnudetsu. 22 Tsajuꞌ supula main main yaꞌ ya keetaa chumu supulanu bain, naa juntsalaba bulu chumu shinbulanu bain, yalaꞌ yasha lushi kenu jeruchi tyeeba keñu juula bain, naa uruchi keñu juula bain, naa naraa jali juula bain kuwaka tiꞌ paꞌdei. Tsejtu juntsachee naa ñulla unbeena kaillanu juu bain, naa supu naꞌmalanu juu bain pandenu dejuve. Ñulla entsanguitaa, Egipto chachilla ti detañu bain, tsaa tiba dechipakeꞌ mijiinu dejuve, timi.