Éxodo

Uruchi keñu wagaa muute

32 Tsejtu Moisés kuyisha lutun teꞌ manbajaindyuñu, Israel chachilla Aarónꞌ junga jitu tsandila: Kujpaꞌ, lalanu dyus muute keꞌ kunun tsaave, tsenmalaa ajkesha miyaꞌ miinutsu, matyu lalanu Egiptosha mangalaamu Moisés tyee iñuba mijakeetyuñuꞌ mitya, tila. 2 Tsenñu Aarón pakatu: Tsaaya, ñullaꞌ shinbulanu bain, naa ñullaꞌ naꞌmalanu bain, naa unbee nalanu bain uru pun-erara pumulanu delaakareꞌ tajaꞌ inu kuwakai, timi.

3 Tsenñu kumuinchi uru pun-erara pumulaya delareꞌ Aarónnu tajiꞌ kuwala. 4 Tsenñu katu uru depiꞌwareꞌ, urunu taawasha kiikenu jeruchi ma wagaa muute kemi. Tsenñu chachilla tsandila: Israel chachilla, entsaa ñulla Egiptosha dechuren mangalareꞌ maamu dyusve, tila.

5 Tsenñu Aarón chachilla naa-indetsuñuba keetu, wagaa muute ajuusha ufeenda tsureꞌ juꞌkenunu main keꞌ chujtiꞌ uiꞌtu, tsandimi: Ayu maluya, Yavéꞌ mitya fandangu kidaa, timi.

6 Tsejtu juntsa ayunchi dishkepenene dekujtu, animaa tuteꞌ juꞌkeꞌ keewaala, tsenmin naa ufeenda juula bain keewaala Diosba uraꞌ mandiyanu. Tsejtu bene chachilla dechudiꞌ panda fiꞌ, kujchila, tsanguetu bene naꞌbaasa sunden puinu kujpala.

7 Tsenñu Moisésnu Yavé tsandimi: Manbajtyaide, ñu Egiptosha mangalaakishu juntsa chachilla firuꞌ juu detiya deive. 8 Iya naaken chudei tiñuba juntsanu jei demanbashñuve, tsejtu uru tene depiꞌwareꞌ, ma wagaa muute ketu, juntsanaa aawa kureꞌ dekeewareꞌ, naa animaa juula bain detuteꞌ keewareꞌ entsandindetsuve: Israel chachilla, entsaa ñulla Egiptosha dechuren mangalareꞌ maamu dyusve, tiidetive, timi.

9 Tsenmin Moisésnu Yavé kayu pandu tsandimi: Entsa chachilla naadejuñuba iya keekeenayu, tsenñu uwain jaiba pañu meetyu chachi deeve. 10 Tsaꞌ mitya umaya tsamantsa ajaa tenñu yalanu millangaanu juñu, inu daatadinu kityuka. Tsaaren ñunuya tsamantsangue chachi deseewaanu tsuyu, timi.

11 Tsenñu Moisés, yaꞌ Dios Yavénu yaꞌ ajara jayu mandyaꞌkasa tyaꞌ patu tsandimi: Yavé, ¿nenñaa ñuꞌ chachilla Egiptosha dechuñuren ñuꞌ pudeechi keꞌ mangalara jumulanuba, tsamantsa ajaatyaꞌ firuꞌ kenujtuuyu? 12 Ñu tsanguishu juntsaa, Egiptoꞌ chulla entsandinu dejuve: Diosya entsa chachillanu butyu tenasha detuꞌnu juꞌ mityaa mangalaañuve, matyu tsangueꞌ detuteꞌ pirenu juꞌ mityaa tsanguiñuve, tinu dejuve. Tsajuꞌ ñu ajaa tenñaa chachillanu firuꞌ kenu pensa kendu bain, juntsa pensaya manbirede. 13 Ñunu meengueꞌ ñuchi tiba kiikemu chachilla, Abrahamnu bain, Isaacnu bain, naa Israelnu bain mandengakide. Ñuren maali pakaꞌ tsanguenbera kenu tsuyu titu, yalanu entsandimuwaave: Ñullanu seraꞌ jimu chachillanu tsamantsangue seewareꞌ, selusha makara chun tsangue seenguikaanu tsuyu, tsenmin ñullanu seraꞌ jimulanu naaju tu jumulaa kuwanu pamuwa juꞌba juntsa tu dekuwanu tsuyu, tsenmala yalaa dekaꞌ naa-uwanuba yaichi juu tananu dejuve, timuwaave, timi.

14 Tsenñu Yavé, naa yaꞌ chachillanu firuꞌ kenu pensa paꞌba, tsanguen jutyu mashuwami. 15 Tsenñu Moisés kuyisha puturen manbajantsumi pai shupuꞌ taꞌpanu Dios naaken chudei tiñuba juntsa palaa kelush kelush pillaa jumula taju. 16 Juntsa shupuꞌ taꞌpa Diosren kemi, tsenmin yaren junu depiikemi.

17 Chachilla jutindetsuñu Josué meetu Moisésnu tsandimi: Vinguenu uranu chachilla naati uiꞌmu deeñuba kajnaꞌ chuinsha juntsandindetsuve, timi.

18 Tsenñun Moisés tsandimi: Vingueꞌ puitu beesanguiñu bain jutyu, naa bensa-iꞌ dellakintseꞌtuwara beesa bain jutyuve; entsaya vee beesave, timi.

19 Tsejtu Moisés yalaꞌ kajnaꞌ chunu tenasha kalen miitu, naa uru wagaa bain, tsenmin chachilla bain beelangueꞌ tsanguindetsu kataꞌ ajaatyatu, yaꞌ tyaapanu Diosaꞌ lei pilla shupuka taa jinduren tusha deleetyatyukemi, kuyi demavitu. 20 Tsenmin juntsa uru wagaa kaꞌ, tsaa ñichi dejupeketu, ñiyuyuke de-iliꞌ, pisha deshajaraꞌ kepuꞌ, juntsa pi Israel chachillanu kushkaami. 21 Tsejtu Moisés, Aarónnu bain tsandimi: ¿Entsa chachilla ñunu tyee dekiñaa, ñu yalanu tsamantsangue ujcha lawaatunguiyu? timi.

22 Tsenñu Aarón pakatu: Bale ruku, inu tsamantsai ajaatyatyuka, ñuya mive naa entsa chachillaya firuꞌ kenu pensan judeeñuba. 23 Yala inu entsa detiwa: Lalanu dyus muute keꞌ kunun tsaave, tsenmalaa ajkesha miyaꞌ miinutsu, matyu lalanu Egiptosha mangalaamu Moisés tyee iñuba mijakeetyuñuꞌ mitya, detiwa. 24 Tsenñu yalanu tsandiwayu: Tsaaya, mun uru detanaꞌba inu kuwakai, tiwayu. Tsenñu inu uru dekuwañu, ñinbaasha kepuñu, ¡entsa wagaa muute faave! timi.

25 Tsenñu Aarónren tsanguikaañu, Israel chachilla naꞌbaasa ne kikendetsuꞌ, naa yalaꞌ kundaalachi bain naꞌbaasa depakayaꞌ uukaviinuu judeeñu Moisés katatu, 26 yalaꞌ kajnaꞌ chunu tena viviinsha uiditu entsandi uiꞌmi: ¡Mun Yavéba debuunaꞌ bain iba buudijadei! timi.

Tsenñu Levínu seraꞌ jimu chachillaya kumuinchi yaba tene buudila. 27 Tsenñu Moisés yalanu tsandimi: Yavé, Israel chachillaꞌ Dios entsandive: Ñulla main main peeniya dekaꞌ, veela pudenashu junga mijiꞌ, kajnaꞌ chunu tena viviinu kapash kapash dapuitu, naa ñullaꞌ naatala deeñu bain, naa ñuichi uraꞌ keranu chachi deeñu bain, naa ñullaꞌ yapaya keetala chumu deeñu bain, unbee nalanuya tuꞌdei, tive, timi.

28 Tsenñu Levínu seraꞌ jimu chachilla Moisés naakidei tiñuba tsa dekiñu, juntsa malunu 3.000 unbee rukulaa peyala. 29 Tsenñu chachillanu Moisés tsandimi: Ñullanu uma Yavé yachi tiba kiikenu tirenu miꞌkeꞌ kave; yaa ñullanu yachi uraꞌ de-ikaave, matyu naa ñullaꞌ kailla deeñu bain, naa ñullaꞌ naatala deeñu bain, kundaa dekiñuꞌ mitya, timi.

30 Juntsa ayunchi chachillanu Moisés tsandimi: Ñulla tsamantsaa ujcha delave. Tsaañu bain, manen kuyisha Yavéꞌ puinsha malunu tsuyu, tsejtaa tsanguekaanuutuya ñullaꞌ ujchaꞌ mitya manbitsaakaanu, timi.

31 Tsejtu manen Moisés, Yavéꞌ puinsha malutu tsandimi: Uwain entsa chachilla, uruchin dyus muute dekitu tsamantsaa ujcha delave. 32 Tsaañuꞌ mitya ñuya yalaꞌ ujcha manbitsaade tiꞌ uꞌtandinu tenve; tsaaren ñu yalanu ujcha manbitsaatyushu juntsaa, in mumu ñuꞌ kiikanu piikeꞌ tanashu juntsanu mamushkide, timi.

33 Tsenñun Yavé tsandimi: Naajulaa inu ujcha delañuba, juntsalanun in kiikanu mamushakenu tsuyu. 34 Tsaꞌ mitya miitu, iya nukaa juntsa chachillanu miyaꞌ jide tiñuba, junga miyaꞌ jide. In anjee ñunu miyaꞌ jinu tsuve. Tsenmin yalanu taaju iwaanu malu janmalaya, iya yalaꞌ ujchaꞌ mitya taaju de-iwaanu tsuyu, timi.

35 Tsejtu Yavé chachillanu taaju depuiwaami, Aarónnu tsangueꞌ wagaa muute dekikaañu, juntsan mitya.