Éxodo
Diosaꞌ babuu kemi.
37 Tsenmin Besalel akasia chichi babuu ketu, barenchiya pai tyabulu kama kejtaa tyabulu, bungunchiya ma tyabulu kama kejtaa tyabulu, tsenmin katyunchi bain ma tyabulu kama kejtaa tyabulu juu kemi. 2 Tsejtu naa juusha bain, naa avindala bain uru tene piꞌwareꞌ maiꞌtekeꞌ, kelutalaya uruchiren chuwa pijtekaren tsangueꞌ maiꞌtemi. 3 Tsenmin uru piꞌwareꞌ, taapai tuti bain kemi, babuuchi taapai neepa jumulanu eengaanu, pai neepa kelusha pai tuti eengareꞌ, masku pai neepa kelusha pai tuti eengaakenu. 4 Tsenmin akasia chi tene, yaliꞌ tanenu chaꞌli ketu, uruchi tene maiꞌtekemi. 5 Tsejtu babuunu kelu kelu pumu tutilanu putu yaliꞌ tajiinuke tiremi.
6 Tsenmin ma taꞌpa bain duꞌkaanu uruchi tene kemi, barenchiya pai tyabulu kama kejtaa tyabulu, bungunchiya ma tyabulu kama kejtaa tyabulu jumi. 7 Tsenmin duꞌnamu taꞌpanu, jaꞌchi puu muute juundene pallu keꞌ, kapash kapash maatilluchin urunu tsangue muute dekemi. 8 Tsejtu duꞌkaanu taꞌpanu jaꞌchi puu muute dekeꞌ mainya, masku kapasha, kamainya kama kapasha juumi, tsejtu juntsa duꞌnamu taꞌpa jaꞌchi puu muute jumulaba main juumi. 9 Tsejtu yalaꞌ jaꞌchiya jaꞌwaranaꞌ duꞌnamu taꞌpa jandala dishuna chula. Tsejtu yaitala kajuꞌtalanatun kajuuya duꞌnamu taꞌpasha keepuna chula.
Dioschi keewaanu pan tsuununu kemi.
10 Besalel akasia chichi, tyeeba tsuunu taꞌpa llaijkara bain main kemi, barenchiya pai tyabulu, bungunchiya ma tyabulu, tsenmin katyunchiya ma tyabulu kama kejtaa tyabulu jumi. 11 Tsejtu uru piꞌwareꞌ juntsachi tene maiꞌtekeꞌ, kelutalaya uruchiren chuwa pijtekaren tsangueꞌ maiꞌtemi, 12 tsangueꞌ kelutala maiꞌtenu paki taapai tyamishu bungu keꞌ pumi. Tsenmin juntsa jandala uruchiren chuwa pijtekaren tsangueꞌ maiꞌtemi.
13 Tsenmin uru tene piꞌwareꞌ taapai tuti keꞌ, kelush kelush taapai neepa jumulanu eengareꞌ 14 tuti jumula kuyi kalen kalen jungue pumi, tsejtaa entsa tuti jumulanu chaꞌli ñaliꞌ, tyeeba tsuunu taꞌpa llaijkara jumunu yaliꞌ taji tajiinu. 15 Juntsa tyeeba tsuunu taꞌpa llaijkara tajintsumi yaꞌ tutinu ñalinu chaꞌli, akasia chee kaꞌ ketu juntsa chaꞌlinu uru tene maiꞌtekemi. 16 Tsenmin taꞌpa llaijkara jandala tiba meneste inu tsumula bain uruchi tene juula: naa palatu juula bain, naa aa kuchara juula bain, naa aa shulla muute juula bain, tsenmin naa chachilla Diosnu dekeewaañu binu puntsumi kaa shulla muute juula bain.
Ñillu chujtintsumi usjaꞌtee aa lanpara uruchi tene kemi.
17 Tsenmin Besalel, naa ñillu chujtintsumi usjaꞌtee jumu aa lanpara bain uruchi tene kikeꞌ, mainnuren naa yaꞌ uinainsha bain, naa yaꞌ bulu jumu bain, naa yaꞌ kupa juula bain, naa yaꞌ llullu tyuinanu basu bain, naa yaꞌ llullu tape juuñuu bain junuren tsangue dekeꞌ, maatilluchi tene viliꞌ millangue juntsa muute dekemi, petse petse tyuipuiꞌmujchiren. 18 Juntsa ñillu chujtintsumi usjaꞌtee jumu aa lanparanu kelumeemee pen tyaapa falajuꞌ, kumuinchibi pai kelubiya mandishmain tyaapa pumi. 19 Entsa mandishmain tyaapa jumula main main pen basu puꞌ, almendru llullu keraa juꞌ, llullu tyuinanu basu bain, llullu yaꞌ tape bain puumi. 20 Tsenmala aa lanpaa luraren taapai basu puꞌ, almendru llullu kerajuꞌ, llullu tyuinanu basu bain, llullu yaꞌ tape bain puumi. 21 Tsejtu pai tyaapa tyuidinu panbeemeemee llullu tyuinanu basu puundene juumi. 22 Tsejtu naa llullu tyuinanu basu bain, naa ñillu chujtinu tyaapala bain tyuipuñuꞌ jutyuꞌ ma bulu juumi. Juntsa ñillu chujtiꞌ chakaantsumiya uruchi tene jujuꞌ maatilluchi tene villaꞌ jumi. 23 Tsenmin naa junu chujtintsumi mandishpai lanpaa jumula bain, naa michanu majtadimu jeru juula bain, naa yaꞌ kaa palatu juula bain uruchi tene dekemi. 24 Entsa ñillu chujtintsumi usjaꞌtee jumu aa lanpara bain, naa junu tiba meneste-imula bain dekenu, kumuinchibi 33 kilu uru tene menestenguila.
Aindyunguikaantsumi juꞌkenunu kemi.
25 Tsenmin Besalel aindyunguikaantsumi juꞌkenunu bain kemi akasia chichi. Naa barenchi bain, bungunchi bain ma tyabulu jujuꞌ paree juumi, tsenmin katyunchiya pai tyabulu jumi. Tsejtu junu kachu muute usnamula, aindyunguikaanu tsureꞌ juꞌkenunuba jaiba tyuipujtuꞌ main juula. 26 Tsangueꞌ dyatu naa jandala bain, naa yaꞌ kachulanu bain, naa kelutala bain uruchi tene maiꞌtekemi, tsenmin kelutalaya uruchiren chuwa pijtekaren tsangueꞌ maiꞌtemi. 27 Tsenmin junu uru chuwa maiꞌta panbeenu, uru tuti puꞌ pai kelusha main main pumi, tsejtaa junu pai tuti jumulanu pai chaꞌli jumula main main puꞌ juntsanu kaꞌ yaliꞌ taji tajiinu. 28 Juntsa chaꞌli jumula akasia chichee keꞌ uru tene maiꞌtekemi.
Diosaꞌ muli bain, juꞌkenu aindyu bain kemi.
29 Tsenmin Besalel naa Dioschin juu tirendu menestenguentsumi muli bain, naa juꞌkeꞌ aindyunguikaantsumi tene juu bain keꞌ, aindyu kemi, matyu pindyupi kemula naakemu deeñuba tsanguetu.