Éxodo
Diosaꞌ pupunanu yapaya, Dioschin juu tirela.
40 Moisésnu Yavé manbatu tsandimi: 2 Ajkeꞌ chuꞌchayachi, ajkeꞌ malunu, in pupunanu yapaya, tsandityuꞌba, iba waꞌdinu yapaya, dekujteꞌ chujtinu juve. 3 Tsejtu iya chachillanu vetaꞌ vetaꞌ tsanguedaa tiñu keewara babuu juntsa yapaya juusha punu juve, tsejtu daayadimu jali juntsanu dishuꞌ yangaanu juve. 4 Tsenmin naa tyeeba tsuunu taꞌpa llaijkara bain junga taviꞌ, uraꞌ dekide; naa ñillu chujtintsumi usjaꞌtee jumu aa lanpara bain jungaren taviꞌ, uraꞌ dekide. 5 Tsenmin aindyunguikaantsumi juꞌkenunu uruchi keñu jumuya, vetaꞌ vetaꞌ tsanguedaa tiñu keewara babuu ajuusha chujtide, tsenmin in pupunanu yapaya vinusha daayadimu jali bain yangaade. 6 Tsenmin bene in pupunanu yapaya, tsandityuꞌba, iba waꞌdinu yapaya juukapa ajuusha, animaa tsureꞌ juꞌkenunu jumu taviꞌ chujtide. 7 Tsejtu aa paila jumu ufeenda tsureꞌ juꞌkenunu, iba waꞌdinu yapayaba pensangueꞌ, kejtaa tenatala chujtikide, tsangueꞌ pi pukide. 8 Tsenmee naa chaꞌ neneinsha bain kenu de-uikareꞌ chiꞌkaatu, junga vinsha daayadimu jali bain yangaade.
9 Tsejtu bene inchin juu tirendu menestenguentsumi muli katu, in pupunanu yapayanu yuutsuude, tsenmin tyee junga detsuñuba juntsa jandala bain. Entsanguitaa kumuinchi junga tiba tsumulanu inchin juu tene detirenu tsuve. Tsenmalaa inchin juu tena tiyanu tsuve. 10 Tsenmin inchin juu tirendu menestenguentsumi muli, ufeenda tsureꞌ juꞌkenunu bain, naa tiba juntsa jandala tsumulanu bain yuutsuude. Tsanguenmalaa ufeenda tsureꞌ juꞌkenunu tsamantsa inchin juu tiyanu tsuve. 11 Tsenmin naa aa pailanu bain, naa yaꞌ chujtintsuminu bain juntsa muli yuutsuude, tsejtaa inchin juu detirenu tsuve.
12 Tsanguetu bene Aarónnu bain, naa yaꞌ nalanu bain, iba waꞌdinu yapaya juukapasha tajitu depitsaade. 13 Tsangueꞌ inchin juu jumu jali Aarónnu pandede, tsejtu bene yaꞌ jandala muli yuutsuude, tsanguetaa chachillaꞌ mitya inu kalen jimu rukunu inchin juu tirenu. 14 Tsejtu bene yaꞌ nalanu bain demikatu, yalanu bain juntsa bareree tainsha punu jali pandede. 15 Tsejtu yalanu bain muli yuutsuude, Aarónnu naakenu juꞌba juntsaju, tsenmalaa yai bain chachillaꞌ mitya inu kalen jimula inchin juu tiyanudetsu. Entsangueꞌ yalanu juntsa muli yuutsuunmalaa, naa-uwanuba inchi chachillaꞌ mitya inu kalen jimula junu detsuve, naa yalanu seraꞌ jimula bain, timi.
16 Tsenñu Moisés Yavé yanu kumuinchi naakide tiñuba tsanguemi. 17 Tsejtu Egiptosha demaluꞌ miiñu ma añu depullaꞌ kama añu manbeepunu chuꞌchayanu, ajkeꞌ malunu Diosaꞌ pupunanu yapaya kujtaꞌ chujtyami. 18 Tsejtu Moisés, Diosaꞌ pupunanu yapaya uikaanu, naa yaꞌ yatyutya panbeesha deendanamu paki juula bain, naa yaꞌ taꞌpa juula bain, naa yaꞌ taꞌpa deengaanu chaꞌli juula bain, yaꞌ yatyutya juula bain depuꞌ uikaami. 19 Tsejtu Diosaꞌ pupunanu yapaya juusha pumu linu jali chiꞌkareꞌ, naa juntsa jandala yapayanu vikaantsumi ju jali bain chiꞌkareꞌ, naa juntsanu vikaantsumi kika juula bain devikaami, yanu Yavé naakide tiñuba tsanguetu.
20 Tsejtu bene Moisés, Dios naaken chudei tiñuba juntsa pilla shupuka taꞌpa katu, babuu juusha pumi; tsejtu juntsa babuunu bain yaꞌ yaliꞌ nentsumi chaꞌli bain kelutala deputu, naa yaꞌ taꞌpa bain jandala tsuumi. 21 Tsanguetu Diosaꞌ pupunanu yapaya jurusha tavitu, daayadimu jali babuunu dishuꞌ yangaami, yanu Yavé naakide tiñuba tsanguetu.
22 Tsejtu tyeeba tsuunu taꞌpa llaijkara katu, Diosba waꞌdinu yapayasha taviꞌ nurte pasha tsuumi, tsaaren juntsa babuunu daayanamu jali avindaa pasha tsurekemi. 23 Tsejtu juntsa tyeeba tsuunu taꞌpa llaijkara jandala, Yavénu keewara pan uraꞌ keꞌ detsuumi, yanu Yavé naakide tiñuba tsanguetu.
24 Tsenmin naa ñillu chujtintsumi usjaꞌtee jumu aa lanpara bain taviꞌ Diosba waꞌdinu yapayasha chujtimi, tyeeba tsuunu taꞌpa llaijkara chunu ajuu, masku kelusha, sur pasha. 25 Tsanguetu Yavéꞌ ajuusha lanpaa uraꞌ dekeꞌ chujtimi, yanu Yavé naakide tiñuba tsanguetu.
26 Tsenmin uruchi keñu aindyunguikaantsumi juꞌkenunu bain Diosba waꞌdinu yapaya jurusha taviꞌ chujtimi, babuunu daayanamu jali ajuusha. 27 Tsejtu aindyunguikaantsumi juꞌkemi, yanu Yavé naakide tiñuba tsanguetu.
28 Tsejtu bene Moisés Diosaꞌ pupunanu yapaya vinu juukapasha daayadimu jali yangaami. 29 Tsanguetu bene ufeenda tsureꞌ juꞌkenunu jumu bain Diosaꞌ pupunanu yapaya vinu juukapa keesha, tsandityuꞌba, Diosba waꞌdinu yapaya keesha chujtimi; tsejtu animaa tuteꞌ, juntsa jandala juꞌkeꞌ keewaami, tsenmin naa pan kenu llujpe juu bain tsureꞌ juꞌkeꞌ Diosnu ufeenda keewaami, yanu Yavé naakide tiñuba tsanguetu.
30 Tsejtu aa pailanu Diosba waꞌdinu yapaya jumu, tsenmin ufeenda tsureꞌ juꞌkenunu chumuba pensangueꞌ keeñuya, juntsa kejtaa tenabi chujtiꞌ pi tyuwake pumi, pitsaatsaa kenudetsu. 31 Tsenñu junaa naa Moisés bain, naa Aarón bain, naa yaꞌ nala bain pi kalareꞌ naa tyaapa bain, neepa bain pitsaala. 32 Tsejtu naa Diosba waꞌdinu yapayasha vindu bain, naa ufeenda tsureꞌ juꞌkensha kalen jindu bain pitsaatsaa kila, Moisésnu Yavé naakide tiñuba tsanguetu.
33 Tsejtu bene Moisés chaꞌ neneinusha kenu, ufeenda tsureꞌ juꞌkenu kelutala, matyu Diosaꞌ pupunanu yapaya kelu kelu, yatyutya de-uikareꞌ daaluꞌtekaanu jali bain dechiꞌkaami, tsejtu chaꞌ neneinu vinu juukapasha bain daayadimu jali yangaami. Entsanguitaa Moisés yaꞌ taawasha dekeꞌ dyami.
Diosba waꞌdinu yapaya kaiꞌtala ñivish lura pajami.
34 Tsenñu ñivish lura paijtu, Diosba waꞌdinu yapayanu dishukemi. Tsejtu Yavéꞌ tsamantsaa keewara jumu yaꞌ pupunanu yapayanu tsaa yalluimi. 35 Tsenñu Moisés naa-iꞌ Diosba waꞌdinu yapayasha vin tsaa tiyaimi, matyu ñivish lura pajaꞌ tsaa dishukeñu, Yavéꞌ tsamantsaa keewara jumu yaꞌ pupunanu yapayasha yalluiñuꞌ mitya.
36 Israel chachilla yalaꞌ nengamaya, naa-uwanu Diosaꞌ pupunanu yapayasha juntsa ñivish lura maluꞌ miiñuba, yalaꞌ buli mangaꞌ bendaa miji mijiila, 37 tsaaren juntsa ñivijcha maluꞌ mijindyushu juntsaa, yai bain tsa tsanala, tsejtu juntsa ñivijcha maluꞌ mijinbera keekeenala. 38 Tsajuꞌ naa-uwanuba Israel chachillaꞌ jingamaya, Yavéꞌ ñivijcha Diosaꞌ pupunanu yapaya kaiꞌtala tsa tsanami, naa mandala bain, naa kepe bain. Tsaaren kepeya juntsa ñivijcha ñillu chakaraa tiya tiyaimi.