Éxodo
8 manen Moisésnu Yavé entsandimi: Faraónnu mangueejitu, Yavé entsandive, tide: In chachillanu me-eede, tsenmala yala jiꞌ, inu aawa kureꞌ keewaanudetsu. 2 Tsaaren ñu tsanguiꞌshu juntsaa, ñuꞌ tusha patata tene erekeꞌ ñullanu taaju de-iwaanu tsuyu. 3 Pisha patata tene tyuwainu tsuve, tsejtu defaleꞌ ñuꞌ yasha dejiꞌ, naa kasnu sukusha bain, naa ñuꞌ tsunjuusha bain, naa ñuꞌ bale chachillaꞌ yasha bain, naa ñuꞌ chachillaꞌ yasha bain, naa pan akaanu urnusha bain, naa pan bejta puntsumisha bain vinu detsuve. 4 Tsajuꞌ patatala ñuꞌ jandaa yangueꞌkera, naa ñuꞌ bale chachillaꞌ jandaa yangueꞌkera, naa kumuinchi ñuꞌ chachillanu bain yannu detsuve, tive, timi.
5 Tsejtu Yavé Moisésnu manbatu: Aarónnu yaꞌ tyutyan chaꞌli, naa pisha bain, naa pijulatala bain, naa pi pusutala bain usakide, tide, tsenmala jundala patata defaleꞌ Egipto tusha tyuwai janudetsu, timi.
6 Tsenñu Aarón juntsanguiñu, patata pureꞌ faledekeꞌ, Egipto tusha tyuwaila. 7 Tsenñu mirukula bain yalaꞌ pudeechi tsaren ketu, yai bain Egipto tusha patata pureꞌ mikakila. 8 Tsenñu faraón, Moisésnu bain, Aarónnu bain mikatu tsandimi: Yavénu paꞌ, naa in junga bain, naa in chachillaꞌ junga bain patata demanbirekide, tidei, tsenmala iya ñuꞌ chachillanu me-eenu tsuyu, animaa tuteꞌ Yavénu keewaajinudetsu, timi.
9 Tsenñu Moisés faraónnu tsandimi: Tsen, ¿naamaa pasa tenguen tsenmalaa naa ñuꞌ junga bain, naa ñuꞌ bale chachillaꞌ junga bain, naa ñuꞌ chachillaꞌ junga bain patata manbuiꞌnudetsu, tsejtu Nilo pishan pudinudetsu? timi.
10 Tsenñu faraón: Ayuren tsanguisa tenve, tiñu, Moisés pakatu: Uwain ñu naati paꞌñuba tsainu tsuve, tsenmalaa muba Yavé, lalaꞌ Dios tsaa dejutyuñuba ñu mijanu tsuve. 11 Tsejtu kumuinchi patata ñuꞌ yasha bain, naa ñuꞌ bale chachillaꞌ yasha bain, naa ñuꞌ chachillaꞌ yasha bain patata demangataatyuꞌ pishan pudinu detsuve, timi.
12 Tsenñu Moisés, Aarónba faraónꞌ chunu yanu demaluꞌ miitu, bene Moisés, Yavéba kuinda ketu, faraónꞌ junga eeñu patata deme-eesa tiꞌ paꞌmi. 13 Tsenñu Moisés naati paꞌñuba Yavé juntsanguiñu, kumuinchi patatala, naa yasha bain, naa ya keetala chaꞌ neinsha bain, naa jeenbaasha bain pumula tsaa millai peyala. 14 Tsenñu chachilla patata pemula dekaꞌ waꞌkaañu, nukaba peꞌtyayanguintsumi. 15 Tsaaren faraón tiba bulla jutyu mandiyaimin, Moisésnu bain, Aarónnu bain meenguindyatyui tiyami, Yavé naatiñuba juntsaitu.
Juju tene pureimi.
16 Tsenñu Yavé, Moisésnu manbatu: Aarónnu tsandide, yaꞌ tyutyan chaꞌli usakeꞌ juntsachi tu ñiyuyulanu vilikide, tide, juntsa tu ñiyuyu Egipto tusha tsaa juju tene tiyainudetsu, timi.
17 Tsenñu yala tsanguitu, Aarón yaꞌ tyutyan chaꞌli yaliꞌ tu ñiyuyulanu vilinmalaren, kumuinchi Egipto tushaya tsaa juju tene falekeꞌ, naa chachillanu bain, naa animaalanu bain fifikila. 18 Tsenñu mirukula bain yalaꞌ pudeechi juju faawaanu keturen, naaken tsaala, tsanguendetsuren chachillanu bain, naa animaalanu bain juju fifikila. 19 Juntsaiñu mirukula faraónnu tsandila: ¡Uwain entsaa Diosyaa tsanguiñuve! tila.
Tsenñuren faraón meenguityu jutu, yalanu meenguiꞌmi, matyu Yavé naajunu tsuve timuwaañuba juntsaatu.
Vitutu tene pureimi.
20 Tsenñu Yavé manen Moisésnu tsandimi: Dishkepenene kujpaꞌ, faraón ayu kepenene pisha vinmala jiꞌ katawatu entsandide: Yavé entsandive: In chachillanu eede, tsenmala yala inu aawa kureꞌ keewaajinudetsu. 21 Tsaaren ñu yalanu mandyaikeꞌ me-eetyushu juntsaa, iya ñuꞌ junga bain, naa ñuꞌ bale chachillaꞌ junga bain, naa ñuꞌ chachillaꞌ junga bain, naa yalaꞌ yasha bain vitutu tene eekenu tsuyu. Tsenñu kumuinchi Egipto chachillaꞌ yatalaya vitutu pureinu detsuve, naa tutala bain. 22 Tsaaren tsaa puinu uwanu Gosen tusha, in chachillaꞌ chunu tushaya tsaa iwaanu jutyuyu, tsenmalaa ñu mijanutsu, naa iya, Yavé, entsa tunu chuñu bain. 23 Tsenmin in chachillanuya ñuꞌ chachillaba manbarejuu taaju iwaanu jutyuyu. Tsaaren entsaya ayu malunaa tsaa iꞌ puinu tsuve, tide, timi.
24 Tsenñu Yavé naatiꞌba juntsanguiñu, vitutu naa faraónꞌ yasha bain, naa yaꞌ chachillaꞌ yasha bain tsaa pureila; tsejtu kumuinchi juntsa tenashaya vitutu tene tyuwaimi. Tsejtu juntsa tushaya tituba dekikentsula.
25 Tsenñu faraón Moisésnu bain, Aarónnu bain mikatu tsandimi: Ñullaꞌ Diosnu animaa tuteꞌ keewaajidei, tsaaren entsa Egipto tunuya luiꞌmujchin tsanguidei, timi.
26 Tsenñu Moisés tsandimi: Tsanguenu dejutyuyu, lala Yavénu kuwanu animaa judeeshu juntsalaya, Egiptoꞌ chullachiya tsangueꞌ tuꞌnu animaa dejutyuꞌ, yalanu kentsure kenuu juñu, lalanu tsanguentsu dekatashu juntsaa, shupukachi tyaꞌkenu dejuve. 27 Tsaañuꞌ mityaa tiba den chutyuin tenasha pen malu neepachi jitu, jungaa lalaꞌ Dios Yavénu animaa tuteꞌ keewaanu detsuyu, ya naakesa tyañuba juntsanguetu, timi.
28 Tsenñu faraón tsandimi: Iya ñullanu, ñullaꞌ Dios Yavénu animaa tuteꞌ keewaanudetsu me-eꞌlareꞌ eenu tsuyu tiba den chutyuin tenasha, tsaaren yuj bareꞌ jinu dejutyuve. Tsenmin in mitya bain Diosnu pakadei, timi.
29 Tsenñu Moisés tsandimi: Challa neiꞌba enu maluꞌ miimin Yavénu naa ñuꞌ junga bain, naa ñuꞌ bale chachillaꞌ junga bain, naa ñuꞌ chachillaꞌ junga bain ayu malu kumuinchi juntsa vitutulanu demanbirekide tinu tsuyu, tsaaren manen ñu lalanu anbutiꞌ tiba den chutyunu tenasha Yavénu kuwanu animaa tuteꞌ keewaajikaanu jutyuꞌ lalaꞌ chachillanu me-eren jutyuyu tityusa tenve, timi.
30 Tsejtu Moisés faraónꞌ yasha puꞌ mafaamin, Yavéba kuinda kemi. 31 Tsenñu Yavé, Moisés yanu naati paꞌñuba juntsanguiñu, kumuinchi vitutu, naa faraónꞌ junga pumula bain, naa yaꞌ bale chachillaꞌ junga pumula bain, naa yaꞌ chachillaꞌ junga pumula bain demijiila. 32 Tsenñuren manen faraón meenguindyatyui tiyatu, Israel chachillanu me-eetyumi.