Marcos
Gerasasha chumunu firuꞌ buꞌchulla me-eꞌlaami.
(Mateo 8.28-34; Lucas 8.26-39)
5 Tsejtu Jesús juntsa aa pusu bejkusha yaꞌ disipululaba tyakatu, Gerasa tusha jila. 2 Tsaiꞌ detyakatu, neiꞌba Jesús baakusha puꞌ tusha luinmalan, ma ruku Dioschi urajtu kuraa tiremu buꞌchulla puu jumu ujkun mennainsha puꞌ faleꞌ, Jesúsꞌ junga kalen jimi, 3 ya junga ujkun mennainshaa chumuꞌ mitya. Tsaaren mu bain juntsa rukunu naa jeru chuwachi juu bain teetsureꞌ tadinu jutyu jujuula, 4 matyu pureꞌ bijee jeru chuwachi, naa tyaapasha bain, naa neepasha bain narake deteeñuba, tsaa dedaa-ee-eekiñuꞌ mitya, mu bain naakeꞌ teleꞌ tsangaanuba jutyu jujuula. 5 Tsenñu naa-uwanuba, naa mandala bain, naa kepe bain ujkun mennandala neꞌkera, naa kuyitala bain luꞌ utis neneimi, tsenmin maaliren shupukachi bain dewanaa chiꞌka chiꞌkakemi. 6 Tsaaren Jesúsnuya baatala kata-eekemiren tsaa yangachi jiꞌ Jesúsꞌ neepasha telediꞌ 7 entsandi uiꞌmi: ¡Jesús, aa kaiꞌsha chumu Diosaꞌ Na, inu bulla kijatyuka! ¡Tsantsaya Diosaꞌ mitya inu taaju iwareꞌ puiwaatyuka! timi.
8 Juntsa ruku entsandi pamiya, Jesús yanu ajkeꞌ patu: ¡Dioschi urajtu kuraa tiremu buꞌchulla, entsa unberenu mandyaikeꞌ maluꞌ miide! tiñuꞌ mityaa tsandimi.
9 Tsejtu Jesús juntsa rukunu entsandi pakeꞌmeemi: Ñu, ¿ti mumuyu? timi. Tsenñu juntsa ruku: Iya Sera mumuyu, lalaya tsamantsa sera dejuꞌ mityaa, tsaa mumu deeyu, timi.
10 Tsejtu Jesúsnu entsa tenanuya yalanu manguelareꞌ me-eetyukai titu, uꞌta uꞌtandila.
11 Tsejtu junu yalaꞌ keesha ma kuyi keetala, kuꞌchi pureꞌ punaꞌ panda fin de-uinañu, 12 juntsa dyabulula uꞌtandindu tsandila: Kuꞌchilanaa lalanu me-eepuka, tsenmala lala yalanaa viꞌ machunu detsuyu, tila.
13 Tsa detiñu Jesús tsaikaañu, juntsala Dioschi urajtu kuraa tiremu buꞌchullala chaꞌ rukunu demaluꞌ miitu tsaa kuꞌchilanu tene maviila. Tsenñu kumuinchibi mika 2.000 kuꞌchi jumula tsaa yangachi tene jiꞌ lanbaꞌ kujtusha depajtyaꞌ pisha dechukakila.
14 Tsenñu kuꞌchi washkemu chachilla denepiyaꞌ mijiꞌ, pebulusha bain, naa jeendaa chumu chachillanu bain tyee iñuba dekuindakiila. Tsenñu tyee iñu detiñanga tyatu chachilla keenu jila. 15 Tsejtu Jesúsꞌ puinbi dejitu, dyabulu pureꞌ puu unbere uraꞌ mandiyaꞌ tiba jutyu jali manbanaa chuna katajila. Tsejtu chachilla jeetyala. 16 Tsenñu naa-itaa juntsa dyabulu pumu unbere uraꞌ mandiñu bain, tsenmin kuꞌchilanu bain tyee iñuba, keenamulaya juntsandi wainla veelanu. 17 Tsenñu junu chumu chachilla, Jesúsnu, juntsa tenanu maluꞌ vee mujtu miide, tiꞌ papatila.
18 Tsa detiñu, Jesús baakusha mavimi miinu, tsenñu dyabulu puu jumuren uraꞌ mandiyamu ruku yanu bulu miyaꞌ jika tiꞌ pami, 19 tsenñuren Jesús meetyuꞌ entsandimi: Ñuꞌ yashaa mijiꞌ, ñuꞌ paandelanu Bale Ruku ñuꞌ mitya tyeenguiñu bain, ñunu naa-i tenbityaꞌ uraꞌ manñu bain, mijiꞌ juntsa kuinda kide, timi.
20 Tsandiñu juntsa ruku miitu, Jesús yanu tyee kiñuba Decápolisnu chumu pebululanuya, tsaa dekuindakes neimi; tsenñu kumuinchi chachilla mika meenbaishla.
Jairoꞌ naꞌma bain, main dii shinbu bain
(Mateo 9.18-26; Lucas 8.40-56)
21 Jesús baakusha maviꞌ pusu bejkusha mandyakajiñu chachilla pureꞌ mawakudila. Tsenñu yaa pi keesha punami. 22 Tsananu uwanu, chaꞌ waku wakudinu yasha bale pumu ruku Jairo mumu jiꞌ, Jesúsnu katamin tsaa yaꞌ neepasha telediꞌ 23 uꞌtandiꞌ entsandimi: In naꞌma ma peyaintsuve; tsantsaya jaꞌ ñuꞌ tyaapachi taꞌkade, tsenmala uraꞌ mandiyaꞌ chunutsu, timi.
24 Tsandiñu, Jesús juntsa rukuꞌ bendaa jintsumi, tsenñu vee chachilla bain pureꞌ jiindu yaꞌ keetala ujkijtuu jiintsula. 25 Tsenñu ma shinbu asa senduwaraa dilu chuturen 12 añu ma iintsumu shinbu bain chachillaꞌ kejtsapala pumi. 26 Juntsa shinbu naa dilu uraꞌ mandiremulaꞌ junga bain neneindu, tsenmin naa yaꞌ tananu lushi bain dekikeꞌba uraꞌ mandiyaba indyuꞌ mika taaju ken chuꞌ kayu ne firuꞌ iintsumi. 27 Tsenñu juntsa shinbu, Jesús tyeengues neneiñuba kuinda mijatu, yaꞌ junga jiꞌ chaꞌ kejtsapalan bulu jindu, Jesúsꞌ benesha miꞌna jiꞌ yaꞌ jalinu taꞌkakemi, 28 yaꞌ pensaya: “Yaꞌ jalinu taꞌkaketun uraꞌ mandiyanu tsuyu”, tyaꞌ mitya. 29 Tsejtu uwain tsaimi, jai kapanu taꞌkakemin asa jaa tsanamuren tsaa mandyawaakemi, tsejtu juntsa shinbu umaa dii peya yaꞌ bulunu manbireyu tyami.
30 Tsenñu Jesús, yaꞌ bulunu pudee luꞌ jiñu mijatu, chachillaꞌ janu benesha mangue-ereꞌ pakeꞌmeetu: ¿Maa in jalinu taꞌkan? timi.
31 Tsenñu yaꞌ disipulula tsandila: Tsen, ñunu kelush kelush ujkijtuu ma jaindetsushuba, ¿naa titundiyu: Maa inu taꞌkan? timi, tila.
32 Tsa detiñuren Jesús, yaꞌ keetala kalen uinamu chachillanu kerentsumi, maa yanu tsangueꞌ taꞌkañuba mijanu. 33 Tsenñu juntsa shinbu yanu tyee iñuba narai mijaꞌ mitya, jelanchin dejullukendu, Jesúsꞌ ajuubi telena jitu naa-in chumuwa juꞌba millandi kuinda kemi. 34 Tsenñu Jesús tsandimi: Kaa naꞌma, ñu uwain tsainu tsuyu tyaꞌ keengueꞌ mityaa, uraꞌ mandiyañuve. Tiba bulla jutyu miide; yumaa ñuꞌ dii peya uraꞌ mandiyave, timi.
35 Jesús juntsa shinbunu kayu paꞌ jintsuren, chaꞌ waku wakudinu yasha bale pumu rukuꞌ yasha puꞌ jamula entsandila juntsa bale rukunu: Ñuꞌ naꞌma yumaa peyave. ¿Tsaꞌ mitya tyeenguinaa mashturunu kayu bulla kentsunu juyu? tila.
36 Tsenñu Jesús yalanu meetu, chaꞌ waku wakudinu yasha bale pumu rukunu tsandimi: Jeetyatyude, inu uwain tsanguenu tsuve tyaꞌ keranguide, timi.
37 Tsejtu Jesús juntsa rukuba jindu, veelanuya miyaꞌ jityumujchi Pedronu bain, Santiagonu bain, Santiagoꞌ benna Juannu juntsalanun miyaꞌ jiimi. 38 Tsaiꞌ chaꞌ waku wakudinu yasha bale pumu rukuꞌ yasha dejitu, chachilla watiꞌ wareꞌ fidyatindetsu katajila. 39 Tsejtu Jesús ya juusha vitu chachillanu tsandimi: ¿Nendetiyu wareꞌ tsamantsa fidyatintsula? Juntsa naꞌma peyaiꞌmujchi, ne kasuꞌtsunave, timi.
40 Jesús tsandiñu junu pumu chachillaya ne uukapundila. Tsenñu Jesús millangue avindala deme-eꞌlaatu pemu kaa naꞌmaꞌ tsuinsha vindu, yaꞌ apalanu bain, yaba bulu miyaꞌ jiñu chachillanu bain juntsalaban viimi. 41 Tsaiꞌ vitu juntsa kaa naꞌmaꞌ tyaapanu kaketu tsandimi: Talita kun, timi; tsandishu juntsaa: Kaa naꞌma, ñunu mangujpade tintsuyu, titu.
42 Jesús tsandinmalan, juntsa kaa naꞌma, 12 añu juu jumu, mangujpaꞌ manedundaimi. Tsenñu kumuinchi chachilla yuj keenbaishla. 43 Tsenñu Jesús juntsa chachillanu tsandimi: Tyee iñuba jayuuba munuba kuinda kityudei, tiꞌ patu, bene juntsa kaa naꞌmanu panda mafikaadei, timi.