Juan
16 Kumuinchi entsa ñullanu tsandimiya, tsaa de-iꞌ puinu uwatala dewapanaꞌ inu keranguenu pensa pirechu deeve tenñundiyu. 2 Chaꞌ waku wakudinu yatala ñullanu jukaꞌlarenchinguenu detsuve, tsenmin mun ñullanu tuteꞌ bain Dioschi uraa kentsuyu tyatyainu tinbu bain janu tsuve. 3 Tsaaren in Apanu bain, inu bain kerajdetuꞌ mityaa, tsanguenu detsuve. 4 Kayu tsaa pullaindyuren ñullanu tsandiꞌ dewainmiya, bene tsaa puinmala, iya yumaa tsandimuwaave tyaꞌ demandengasa tenñundiyu tsandimi.
Umanbeleren ñullanu tsandiꞌ waintyumiya, i ñuiba bulu chuꞌ mityaa tsaawaayu. 5 Tsaaren challaa, inu engu eemu rukuba bulu manchunu yaꞌ junga miintsuꞌ mityaa, ñullanu tsandiꞌ wainyu. Tsaanuren naa mu bain inu ne: ¿Nukaa miindu iyu? ¿tiꞌ pakeꞌmeraa kibanguiꞌtu deeyu? 6 Tsejturen iya tsandiꞌ pañu llakindyanchee yuj dellakindyave. 7 Naa tsa detyañu bain, iya enu miiñaa ñuichi kayu uranu juve; uwain anbutindyuyu. Iya enu miityushu juntsaa, ñullanu Balelamu Espíritu jan jutyuve ñuiba bulu punu, tsaaren iya miishu juntsaa, iya eenu tsuyu. 8 Balelamu Espíritu jamee ujcha lan chumu chachillanu dekeemijakareꞌ tsaave tyakaanu tsuve, maa ujcha lantsuñu bain, maa kuipa tajtuñu bain, tsenmin maa Dioschi kavitu inu juñu bain. 9 Ujcha lantsumiya, inu keranguityun mityaa tsaave. 10 Ti kuipaba tajtuya iyaa juntsayu, matyu juntsa narai katawamiya iya in Apaꞌ junga miinmala ñulla inu mangatatyumee mijanu detsuve. 11 Tsenmin Dioschi kavitu inuu jumuya entsa tunu mandanguen chuꞌ firuꞌ kekaamaa juntsa juꞌ yumaa tsaa kavitu iꞌ kuipa ma puu juñuba mijakaanu tsuve.
12 Ñullanu panu kayu pureꞌ tanayu tennaren, challaya pakeen jutyuve, ñuichi ma puitaanuuñuꞌ mitya. 13 Dioschi naajuñuba wainmu Espíritu naa-uwanu jaꞌ bain, yaa kumuinchi Dioschiya naajuñuba ñullanu de-aseetanguikaanu tsuve. Ya maali pensangueꞌ patyumujchi, ti naajaa yanu depañu mereꞌ bain, juntsaa panu tsuve, tsenmin ajkesha tyee puinuu juñu bain tsa tsandinu tsuve. 14 Ya inaa tsamantsaa katakaanu juve, ñullanu ti mijakareꞌ bain i kuñu tene mijakaakaa kenu juꞌ mitya. 15 Kumuinchi in Apachi juushu juntsaa naa inchi bain juve. Tsenñuꞌ mityandiyu entsa Espíritu ñullanu inchi jumuchee mijakaanu tsuve tintsumi.
16 Wajtunuren ñulla inu mangatatyui puituren, bene manen wajtun jeke mangatanu detsuve, timi.
Llakindyandu bain masundyanu dejuve.
17 Tsenñu mantsa disipulula yaitala vetaꞌ vetaꞌ entsandi pakeꞌmeela: ¿Entsanditu tyee titundin? ¿Nenñaa wajtunun lala yanu mangatan dejutyuve titun, manen bene mangatanu detsuve titundin? Tsenmin: In Apaꞌ junga yaba bulu manchunu miintsuyu, titu, ¿naa titundin? 18 Tsenmin, “wajtunuren” tiititu, ¿naa titundi tsa tsandimi? Tyee pantsuñuba aseeta ityuve, tiitila.
19 Jesús naa yanu pakeꞌmeenu detyañuba mijatu entsandimi: ¿Iya ñullanu: Wajtunuren ñulla inu mangatatyui puituren, bene manen wajturen jeke mangatanu detsuve tyeeshu juntsanu paviikendaa tsandindetsuu ñui tene? 20 Uwaindiyu ñullaya dewareꞌ uꞌtandindetsunmala, ujcha lan chumu chachillaya sundyantsunu dejuve. Ñulla naa tsaiꞌ dellakindyañu bain, juntsa llaki bene ñuichi sundyanutsumu tiyainu tsuve. 21 Ma shinbu yachi yumaa nakanu ura jañu kityanchin naa-in tsandyamuve, tsaaren neiꞌba nakamin naa kityandu bain manbashinchi iimuve, entsa tusha ma kaana kayañuꞌ mitya. 22 Tsaꞌ mitya tsaave, naa challa ñui bain llaki juu dechuꞌ bain, inu bene mangatamee masundyanu detsuve; tsejtu tsaiꞌ desundyañu muba ñullanu juntsa sundenga pensa pirekaan dejutyuve.
23 Tsenmin juntsa malunuya ñulla yumaa muba inu tiba pakeꞌmeenu dejutyuve. Uwaindiyu ñulla, tin in mitya in Apanu paki dekiñu bain ya juntsanguenu tsuve. 24 Chaikama ñulla tiba in mitya tiꞌ pakindetyuve. Paꞌdei, tsejtaa kanu detsuve, tsaiꞌ tsamantsa sunden puidei.
Jesucristaa tusha tiba jumulanu depullaa.
25 Ñullanu entsandiꞌ kuinda kendu challaya laapuꞌ patu tene kuinda kiikiyu, tsaaren wajturen ma tinbu janu tsuve ne laapuꞌ papatibandiꞌmujchi in Apa naajuñuba tsaa achakaliti panu malu. 26 Juntsa malunaa ñulla in mitya yanu paꞌnu detsuve, tsenmala iya jungajte in Apanu ñullaꞌ mitya paki pakikenu jukeen jutyuve, 27 matyu in Aparen ñullanu mika estyamuñuꞌ mitya. Ñullanu mika estyamuve, ñulla inu estyamu dejuꞌ, Diosnaa iya laꞌ jamuve tyaꞌ keranguemu deeñuꞌ mitya. 28 Iya, in Apa Diosnaa laꞌ jaꞌ entsa tusha jayu, tsaaren challa entsa tunu mashuikeꞌ in Apaꞌ junga miintsuyu.
29 Tsandiñu yaꞌ disipulula entsandila: Uwain, tinuba laapuꞌ paiꞌtaa umaa aseetanguen pave. 30 Umaa demijayu ñu naa tiba demiiñuba. Tsaꞌ mitya chachilla ñunu pakeꞌmeemeedekisa menestejtuve ñu yalaꞌ pensa mijanu. Tsaañuꞌ mityaa, lalaya ñu uwain Diosaꞌ junga faleꞌ jamuve tenna keranguemu deeyu, tila.
31 Tsa detiñu Jesús entsandikami: Tsejtu, ¿umaa challaa dekeranguiyu? 32 Ñulla inu maali deshuikeꞌ naꞌbaasa deshajaraꞌ jiinu malu jantsuve, ura patiñuya, yumaa jave. Tsaaren naa tsa deiñu bain iya maali putyuyu, in Apaa iba bulu puve. 33 Kumuinchi entsa ñullanu tsandimiya iba bulu dejuꞌ tiba bulla jutyu uraꞌ dechusa tenñundiyu tsandimi. Entsa tusha ñulla mika taajuꞌ chunu detsuve, tsaaren ¡bensa ityudei! Iya entsa tusha tiba firuꞌ jumunu puiyu.