Juan
Jesúsnu peesu kala.
(Mateo 26.47-56; Marcos 14.43-50; Lucas 22.47-53)
18 Tsandi depaꞌ dyatu Jesús yaꞌ disipululaba junu maluꞌ mijiꞌ, Cedrón pijuusure bejkusha miimi. Tsenñu junu ma vijtya juñu, Jesús yaꞌ disipululaba vimi. 2 Tsenñu Judas, Jesúsnu peesu kakaanu jumu ruku bain juntsa tenanu kerami, Jesús junu yaꞌ disipululaba den waku wakudimuwaañuꞌ mitya. 3 Tsenñu Judas romano suutadulanu ma bulu miyaꞌ jiꞌ, naa chachillaꞌ mitya Diosnu kalen jimulaꞌ bale rukula, fariseolaba de-eeñu aa elesha washkemu chachillanu bain tsai demiyaꞌ jimi. Tsejtu vinguenun jutyuu, mantsa lanpara taa, mantsa tu ñillu taa jila. 4 Tsa deiñu Jesúsya tyee inu juꞌba yumaa demiꞌ mitya, yala dejiñu tyuitaꞌtu, yaa ajkeꞌ entsandimi: ¿Munaa miꞌkes nendu deiyu? timi. 5 Tsenñu yala pakatu: Nazaretsha chumu Jesúsnu miꞌkes nendu deiyu, tila.
Tsenñu Jesús tsandimi: Iyaa juntsayu, timi.
Tsenñu Judas, Jesúsnu peesu kakaamu ruku bain junu jimulaba bulu pumi. 6 Tsejtu Jesús neiꞌba: Iyaa juntsayu, tinmalan yala bengaꞌ mitya tene demanguikeꞌ tsaa detsujiila. 7 Tsenñu Jesús manen yalanu entsa mandimi: ¿Munaa miꞌkes nendu deiyu? timi. Tsenñu yai bain entsa mandila: Nazaretsha chumu Jesúsnu miꞌkes nendu deiyu, mandikala.
8 Tsa detiñu Jesús entsa mandimi: Yumaa iyaa juntsayu, tiyu. Ñulla inaa miꞌkes nendetsushu juntsaa, entsa iba bulu nemulanuya me-eedei, timi.
9 Tsaa puimiya, Jesús: Apa, ñu inu kuwakisu juntsa chachillaya, maliiba piyaindetyuve, tiñu, ya naatiñuba tsainuu juñuꞌ mityaa, tsaa puive. 10 Simón Pedro ma peeniya tanaꞌ mitya, peeniya muyaa chitiꞌ chachillaꞌ mitya Diosnu kalen jimulaꞌ kayu aa bale rukuchi manda-iꞌ taawasha kemu Malco mumunu tsaa yaꞌ urandya pungui daapukemi. 11 Tsanguiñu Jesús, Pedronu entsandimi: Ñuꞌ peeniya ma-uukaakide, in Aparen tsaa mutyaꞌ inu tsamantsa taaju iwaanu kentsuba, ¿nejtaa i tsaa in jutyuwa? timi.
Jesús, Anásꞌ ajuubi
(Mateo 26.57-68; Marcos 14.53-54; Lucas 22.54)
12 Juntsa ma bulu jumu suutadula, yalanu mandanguemu bale rukuba, tsenmin aa elesha washkemu chachilla judío chachillaba bulu Jesúsnu peesu kaꞌ telekila. 13 Tsejtu Anásya, Caifásꞌ anchapawaañuꞌ mitya, yaꞌ yashaa ajkeꞌ tajila. Juntsa tinbunu entsa Caifásya chachillaꞌ mitya Diosnu kalen jimulaꞌ kayu aa balewaami. 14 Entsa Caifásya kaspele judíolanu, Jesúsnu laapuꞌ patu tsandimuwaami: Kumuinchi chachilla depeyain jutyu, juntsan mitya ma rukuren peyaiñu uraave, timuwaami.
Pedro: Jesúsnu kerajtuyu, timi.
(Mateo 26.69-70; Marcos 14.66-68; Lucas 22.54-62)
15 Simón Pedro vee disipuluba Jesúsꞌ bendaa jintsula. Tsejtu juntsa disipuluya chachillaꞌ mitya Diosnu kalen jimulaꞌ kayu aa bale rukuba keraꞌ mitya, yaa tsaa Jesúsba bulu ya juusha vinchi iiñuren, 16 Pedroya avindaa shuwami juukapabi. Tsenñu chachillaꞌ mitya Diosnu kalen jimulaꞌ kayu aa bale rukuchi kera disipulu mafaleꞌ, ya juukapa washnamu shinbunu patu, Pedronu juusha mikakaami. 17 Tsenñu juukapa washnamu shinbu Pedronu entsandi pakeꞌmeemi: ¿Ñu bain entsa rukuꞌ disipulu jutyuu? timi.
Tsandiñu Pedro: Iyaa juntsa jutyuyu, tikami.
18 Junu ishtyuintsuñuꞌ mitya, taawasha kemu chachilla aa elesha washkemu chachillaba, ñi juikareꞌ juntsa ñingueluu delulan uinala. Tsenñu Pedro bain ishtyatu, yaiba bulu ñinguelu uinami.
Diosnu kalen jimu aa bale ruku Jesúsnu pakeꞌmeemi.
(Mateo 26.59-66; Marcos 14.55-64; Lucas 22.66-71)
19 Anás, ya bain tsaren chachillaꞌ mitya Diosnu kalen jimulaꞌ kayu aa bale ruku tikayamu, Jesúsnu yaꞌ disipululanu laapuꞌ paꞌ pakeꞌmeemi, tsenmin ti naajaa mijakaakaa keñu bain. 20 Tsenñu Jesús entsandikami: Iya naa muba demeenaren entsandi papatimuyu; naa-uwanu mijakareꞌ bain chaꞌ waku wakudinu yasha, naa aa eleshasha bain, jungaa iya mijakaakaa kemuyu, jundala kumuinchi judío chachillaꞌ waku wakudinusha. Tsaꞌ mitya iya naa ti bain ne pantsuu kuinda juu kindyuyu. 21 Tsen, ¿nendiyu inaa pakeꞌmeemi? Inu meemeenamulanaa pakeꞌmeede. Yalaa minu dejuve iya naatis nemuuñu bain, timi.
22 Tsejtu Jesús tsandiꞌ dyañu, main aa elesha washkemu ruku tsaa Jesúsnu fiꞌpakinu paikaꞌ entsandimi: ¿Chachillaꞌ mitya Diosnu kalen jimulaꞌ kayu aa bale rukunuba aantsandi pakanu juu? timi.
23 Tsenñu Jesús yanu entsandimi: Iya firuꞌ pañuya wainka, naatitaa tsandiñuba; tsaaren iya patyeeshu juntsa uraꞌba jushu juntsaya, ¿nenñaa inu kiyu? timi.
24 Tsenñu Anás Jesúsnu telaa chachillaꞌ mitya Diosnu kalen jimulaꞌ kayu aa bale ruku Caifásꞌ jungaa eemi.
Pedro manen anbutimi.
(Mateo 26.71-75; Marcos 14.69-72; Lucas 22.58-62)
25 Tsaa puintsun Pedroya junu, ñinguelunun lulan uinami. Tsenñu entsandi pakeꞌmeela: ¿Ñu bain juntsa rukuꞌ disipulu jutyuu? tila.
Tsa detiñu Pedro anbukureketu entsandimi: Juntsa jutyuyu, timi.
26 Tsenñu chachillaꞌ mitya Diosnu kalen jimulaꞌ kayu aa bale rukuchi taawasha kemu main, Pedrochi pungui daavimu rukuꞌ paande, entsandi pakeꞌmeemi: ¿Junga vijpaasha ñunu yaba bulu kataindyuwa? timi.
27 Tsandiñu Pedro manen anbuda mangurekenu uwanu, wallapa utindimi.
Jesús Pilatoꞌ ajuusha
(Mateo 27.1-2, 11-14; Marcos 15.1-5; Lucas 23.1-5)
28 Jesúsnu Caifásꞌ junu demangalareꞌ romano uñiꞌ yasha tajila. Tsaindetsu yumaa ma dedandakentsumi. Tsaaren judío chachillaa juntsa uñiꞌ ya juusha vindyula; judío chachi jutyulaꞌ yasha vishu juntsaya, Dioschi urajtu kuramu deꞌ mitya. Tsenmin yumaa Dapullaꞌ livee kiñu fandangu panda finundiyandetsuꞌ mitya, tsa indyaiꞌla, matyu vishu juntsaa, juntsa panda finu dejutyuꞌ mitya. 29 Tsenñu Pilato, uñi juwaꞌ mitya, yalanu faleꞌ keetu entsandi pakeꞌmeemi: ¿Tiꞌ mityaa entsa rukunu kuipa pundetsuyu? timi.
30 Tsenñu: Firuꞌ ken chachi juiꞌñuya, ñuꞌ junga tajaꞌ kuiꞌchu deeyu, tikala.
31 Tsa detiñu Pilato entsandimi: Mandajiꞌ ñullaa, ñullaꞌ lei naatiñuba juntsanguidei, timi.
Tsenñu judíola entsandila: Tsaaren lala judío chachillaya munuba tutekenuu dejutyuyu, tila.
32 Jesús naa-i peyanu juꞌ bain, * naatimuwaañuba tsaa puitaa tsaimi. 33 Pilato, ya juusha mavitu Jesúsnu mikaꞌ entsandi pakeꞌmeemi: ¿Ñaa judíolaꞌ reiyu? timi.
34 Tsenñu Jesús entsandimi: ¿Ñu maallee inu aantsa pakeꞌmeentsuu? ¿Veela tsa detiñaa tsandintsuu? tikami.
35 Tsenñu Pilato tsandimi: ¿Tsejtu iba judío chachii? Ñuꞌ chachillaa, chachillaꞌ mitya Diosnu kalen jimulaꞌ bale rukulaba buluu ñunu inu detajaꞌ kushaaka. ¿Ñu ti faateru kiyu? timi.
36 Tsandiñu Jesús entsandimi: Entsa tusha chumu rei nukaa faamu deeñu bain, i bain ne tsaiꞌ faamu rei jutyuyu. Tsaaba juñuya inu judío balelanu kakaren jutyu, in mitya vinguikenuu chachi jumulaa vinguichu deeve. Tsaꞌ mitya entsa tushaa iya rei tiyaꞌ faleꞌ mandanguen chumu jutyuyu, timi.
37 Tsandiñu Pilato entsa mandimi: ¿Tsaashu juntsaa, ñaa reituuyu? timi.
Tsenñu Jesús entsandimi: Ñuren inu reive tintsuve. Matyu in taawashaya uwain tsaave tiꞌ kuinda kenu jumaa juntsave. Ura patiñuya tsanguenaa iya nakayayu; tsanguenaa entsa tusha jayu. Naajulaba juntsa uwain tsaave tinu kuindanu estyamulaya in palaanu meenguemu deeve, timi.
38 Tsenñu Pilato entsandimi: ¿Ti naajaa juntsa uwain tsaave tinu kuindan? timi.
Jesúsnu tuꞌnu shuwala.
(Mateo 27.15-31; Marcos 15.6-20; Lucas 23.13-25)
Tsandi depakeꞌmeraꞌ dyatu, Pilato avindala mafaleꞌ judíolanu manbatu tsandimi: Iya naa ti kuipaba kataindyuyu entsa rukunu. 39 Tsaaren Dapullaꞌ livee kiñu fandangu janmala ñulla ma peesu pumunu me-eꞌlaakaanu inu paki pakikemu chachi deꞌ mitya, ¿naa detiyu, judíolaꞌ reinaa mandyaikeꞌ me-eenu juwa? timi.
40 Tsenñu yala manen jui manbaishtu entsandila: ¡Juntsanuya jayuuba! ¡Barrabásnaa mandyaikide! tiitila. Tsaaren Barrabásya firuꞌ kemu chachimi.