Juan
Jesúsnu yaꞌ naatalala keranguityula.
7 Entsaa iꞌ depuitu Jesús Galilea tutalan neitu, Judea tushaa nenu kityu jujuumi, jungaa judío bale rukula yanu tuꞌnu miꞌkes nendetsuñuꞌ mitya. 2 Tsejtu tsaita nentsuren judío chachillachi yapaya keꞌ fandangu kiikenu tinbu yumaa jantsuñuꞌ mitya, 3 yaꞌ naatalala yanu entsandila: Vee mujtaa luꞌ jiꞌ, ñu tyeenguiikemu juꞌba tsangue keewares nede; Judeashaa jide, tsenmalaa ñuꞌ bendaa nemula bain ñu tyeenguentsuñuba katanudetsu. 4 Matyu muchiba uwain daj rukuve tikutinu tyashu juntsaa, naa ti bain ne pantsu juundene kityuwa deeve. Tsaꞌ mitya ñu tsa tsanguemuya muba dekeenaa tsangueꞌ keewaawaakide, tila.
5 Tsaaren yaꞌ naatalala tsandilaya, yai bain yanu keranguityu deꞌ mityaa, tsandila. 6 Tsenñu Jesús entsandimi yalanu: Fandangu jinu juꞌba ñuichiya naaju malunu kiñuba tsaren juuñu bain, inchiya tsanguenu malu kayu jaindyuve. 7 Ñullaya ujcha lan chumu chachillachi tyutyakayan dejutyuve, tyutyamiya inaa tyutyamu deeve, yalaꞌ kiikentsumunu tsanguetaa uraꞌ kindetyaa tiꞌ, iya ma entsangue de-aseetanguikareꞌ keewaawaa kentsuñuꞌ mitya. 8 Ñullaa fandangu jidei, iya jin jutyuyu; chaiba kayu inchiya tsanguenu ura jaindyuve, timi.
9 Jesús entsanditu Galileabi shuwaimi.
Jesús bain fandangu jimi.
10 Tsejturen yaꞌ naatalala umaa dejiñu, Jesús bain bene maali fandangu kinsha jiꞌ pantsuu punañunami. 11 Tsenñu juntsa fandangu kenu malutala yanu judío bale rukula miꞌkes nenchin juutu entsa entsandila: ¿Juntsa ruku nukaa puñanga? tiitila.
12 Tsenmin naaju chachilla bain junu pumulaa yanu laapuꞌ kuinda tene kiiketu, mantsaa: Aa uraꞌ rukuve, detiñun, mantsalaya: Tiꞌ mityaaba ne uraꞌ rukuu juba jutyuve, chachillanu anbukuinda keranguikares nenun balee rukuve, tiitila. 13 Tsejturen naa mu bain, naatinu tyaꞌ bain, tsandi panu jutyu dus panchi tene jujuula, judío bale rukulanu jelanchiren.
14 Fandangu nan malu kemu dejuꞌba yumaa ma kejtaa jingue kindetsunu uranu, Jesús aa elesha chunu juusha avindaa tenasha jiꞌ chachillanu mijakaantsumi. 15 Tsenñu judío bale rukula mika keenbashindu entsa entsandila: Tsen, ¿nejtaa tsamantsa mitun entsa ruku naa nukaba kiika viꞌmujchiba? tiitila.
16 Tsandindetsuñu Jesús entsandimi: Iya mijakaakentsaashu juntsa in pensasha faamu jutyuve, inu engu eemu rukuꞌ mijakarave. 17 Matyu mun Dios naakesa tyañu bain tsanguenu tyamulaya, aseetanguenu dejuve in mijakaakintsaashu juntsa, uwain Dioschi mijakarañu bain, naa ne maali in pensasha kalarañu bain. 18 Mun maali yaꞌ pensachi tsandindyaꞌ ne patintsushu juntsaa, chachillachi daj katawachi tyataa tsandimu deeve, tsaaren mun yanu eemu rukunaa chachillachi uraꞌ katakaachi tyaꞌ kemuya, uwain uraꞌ kentsuve, tsenmin yanuya naatiꞌ ne uraꞌ kendyuve tinuba dejutyuve.
19 ¿Moisésya ñullanu lei kumuwaatyuka? Tsaanuren ñulla muba juntsa leinu meepungui kityu deeve. ¿Nenñaa ñulla inu tuꞌnu tenguen? timi.
20 Tsenñu chachilla entsandila: ¡Ura ñu dyabuluchi ma kayaamee tenve! ¿Maa ñunu tuꞌnu detyan? tila.
21 Tsenñu Jesús kayu paꞌ jindu tsandimi: Ñulla tsamantsa jatsandyaꞌ inu mika dekeenbaishve, lekanu malunu iya ma bijee tyeeba kikiñun. 22 Tsaaren ñullanu Moisés Dioschi señas inu demandanguiñu (ura patiñuya Moisésya tsaa mandanguindyu, ñullaꞌ aa-apala tinbunuren yumaa tsanguentsumuwa deeñu), ñulla naa saaduma lekanu maluꞌbaasa ¿tsanguemu dejutyuu? 23 Ñulla Moisésꞌ wandya lei naatiñuba tsanguenu tyanchin saaduma lekanu malunun Dioschi señas kiikemulaba, ¿inu tsamantsa ajaa tenguee, naa lekanu maluñu bain iya ma rukunu uraꞌ mandireñuba? 24 Naa-uwanu kavitu keꞌ bain kayu uraꞌ mijturen kuipa putyudei; uwain tsaañuba uraꞌ aseetanguitaa kidei, timi.
Jesús nukaa faleꞌ jamu juꞌba wainmi.
25 Tsenñu mantsa Jerusalénbi chulla, yai tene vetaꞌ vetaꞌ pakeꞌmeranjui depaishtu entsandintsula: Tsen, ¿entsa rukunaa tuꞌnu miꞌkes nendetsutyuu? 26 Juntsanashaaka junu chaꞌ kejtsapala kuinda kiken uinami, tsaaren naa muba yanu bulla kindetyuve. ¿Naa bale rukula bain uwain entsaa Dioschi Miꞌkeꞌ Kayamuve tyaꞌ, yai bain umaa keranguituden, bulla kiꞌla? 27 Tsaaren Dioschi Miꞌkeꞌ Kayamu janmalaya nukaa jaꞌ tsaiñuba muba minu dejutyuve, tsaanuren lala mideeyu entsa rukuya nukaa faleꞌ jamuñu bain, tiitila.
28 7:28-29 Tsejtu tsandindetsuñu Jesús meenatu, aa elesha chunu jurusha avindala puꞌ mijakarentsuꞌ mitya, kayu daran palaachi paꞌ entsandimi: ¿Tsejtu uwain ñulla inu kera dejuu, tsenmin iya nuka jamuñu bain midejuu? Tsaaren iya maali ne tsaiꞌ jachi tenñu jaindyuyu engu; ya naatiꞌba uwaindive tyakaanuu jumu rukaa inu engu eeñu iyu tsaiꞌ jami. Ñullaa juntsa rukunu kerajdetuve, tsaanuren iya yaꞌ jungaa faleꞌ, ya eeñu jamuꞌ mitya, yanu kerayu, timi. 29 ——
30 Tsandiñu judío bale rukula peesu kanu tyatun, naa muba yanu ne taꞌkajiiba iꞌla, kayu Jesúschi peesu kayanu tinbu jaindyuñuꞌ mitya. 31 Naa tsaañu bain, pureꞌ chachi Jesúsnu keenguiketu entsandinchin juula: ¿Entsa rukuꞌ kiikishu juntsa, matyu Diosyaa tsanguekaantsuve tyainuu keꞌ keewara jumu, Dioschi Miꞌkeꞌ Kayamu jatu kayu pullaa kichunga? tiitila.
Fariseo chachilla Jesúsnu peesu kanu kila.
32 Tsejtu chachilla tsandindetsuñu, fariseo chachilla demeetu, chachillaꞌ mitya Diosnu kalen jimulaꞌ bale rukulaba debuudiꞌ aa elesha washkemu chachillanu eela Jesúsnu peesu kanu. 33 Tsa deiñu Jesús entsandimi: Iya chaikama ñuiba bulu puꞌba, wajturen inu eemu rukuꞌ junga miinu tsuyu. 34 Tsenmala ñulla inu mamiꞌkituren kataiꞌnu detsuve, iya nukaa punuuñu bain ñulla junga janu dejutyuꞌ mitya, timi.
35 Tsandiñu judío bale rukula yai tene vetaꞌ vetaꞌ pakeꞌmeran juutu entsandintsula: Tsen, ¿entsa ruku nukaa jiñaa lala mangataiꞌnu dejuwa? Tsandenna, ¿yalaꞌ tu jutyusharen judíola chudenashu junga jiꞌ, naa judío chachi jutyulanu bain kuinda mijakares nenaandin tsandimi? 36 Tsen, ¿tyeenditundin: Ñulla inu mamiꞌkituren kataiꞌnu detsuve; tsenmin: I nukaa puñu bain ñullaa junga janu dejutyuve, timi? tiitila.
Naa-uwanuba chumishtimu Espíritu janu tsuve.
37 Fandangu de-inu malusha, kayu bale malunu, Jesús uidiꞌ patu daran palaachi entsandimi: Mun pi mujñuba in junga jaꞌ kushdei. 38 Naatinga Diosaꞌ Kiikanuren, Mun inu keranguemulaꞌ tenbukashaya chumishtimu piren pijulaaba pun tsananu tsuve, tiꞌ pillashu, tsaanu juve inu keranguemulanuya, timi.
39 Tsaaren Jesús tsanditu, yanu keranguemulaya bene Espíritu kanu detsuve titaa tsandimi. Juntsa uwanuya Espíritu kayu jaindyumi, Jesús kayu peyaꞌ mangujtaꞌ selusha maluꞌ tsamantsa balen chachi mandiyaindyuñuꞌ mitya.
Jesúsꞌ mityaren chachilla naꞌbaasa pensa juu tiyaila.
40 Jesús tsandiꞌ dyañu mantsala yanu meenamulaya entsandila: Uwain entsa rukaa janu keedenaashu juntsa Diosaꞌ mitya pamu rukuñuve, tiitila.
41 Tsenmala veela bain: Entsaa Dioschi Miꞌkeꞌ Kayamuve, tiitila; tsenmala kayu veelaya: Entsaa verave, Dioschi Miꞌkeꞌ Kayamuya Galileasha chumu chachi jun jutyuve. 42 Diosaꞌ Kiikanu, Dioschi Miꞌkeꞌ Kayamuya rei Davidnu seraꞌ jamu chachillanaa faleꞌ janu juve tiꞌ pillave. Tsenmin rei David milla Belén pebulunaa chumuwaañuꞌ mitya, juntsa pebulubiee faanu juve tiꞌ pillave, tiitila.
43 Tsaiꞌ chachilla Jesúsꞌ mityaren main main vee vee pensa juu tiyaila.44 Tsejtu mantsala Jesúsnu peesu kaꞌ jinu pensa dekituren, muba tsanguiꞌla.
Judío bale rukula Jesúsnu keranguiꞌla.
45 Aa elesha washkemu chachilla naa fariseola bain, naa chachillaꞌ mitya Diosnu kalen jimulaꞌ bale rukula bain waꞌnainsha miila. Tsa deiñu juntsa balela yalanu entsandi pakeꞌmeela: ¿Nenñaa dekaꞌ taatyuyu? tila.
46 Tsenñu aa elesha washkemu chachilla entsandikala: Jayuuba naa munu bain, juntsa ruku naati pamuñuba ne tsandi pantsu meraꞌ kerajtuwa deeyu, tikala.
47 Tsa detikañu fariseola entsandila: ¿Naa ñui bain yumaa yachi anbukuinda ikutiꞌ dechiꞌkayaa? 48 ¿Tsejtu lalaꞌ bale rukula bain, naa fariseola bain mallee yanu dekeranguiwa? 49 Keranguindetyuyu. Tsaaren juntsa chachilla yanu keranguikindetsushu juntsalaya, Moisésꞌ wandya lei mijtu chachi, Dioschi kavitu iꞌ kuipa ma puu chachi jumula deeve, tila.
50 Tsa detiñuren ma ruku Nicodemoya, naa ya bain fariseo bale chachi juꞌ bain, ma bijee Jesúsnu katanu jiꞌ ma mityakiimu rukuya entsandimi: 51 ¿Tsejtu lalaꞌ leiya ma ruku ti firuꞌ kikeñu bain, pakeꞌmeraꞌ mijaba iꞌmujchin kuipa punuu juve tin? timi.
52 Tsandiñu yala entsa mandikala: ¿Tsaashu juntsaa, ñu bain Galileasha chumuu? Diosaꞌ Kiikanu tejan miꞌkeꞌkerakide; tsejtu ñu katanu tsuve maliiba Diosaꞌ mitya pamu rukulaya Galileashaa faatyuwa deeñu bain, tila.
53 Tsandiꞌ dyatu bene main main yalaꞌ yasha miila.