Hechos

Pablo Corinto pebulubi

18 Bene entsaiꞌ puitu Pablo Atenas pebulubi malutu, Corinto pebulusha miimi. 2 Tsejtu junu ma judío ruku yaꞌ mumu Áquila, Ponto tusha awamunu katami. Tsaaren yaa yaꞌ shinbu Priscilaba Italia tusha chuturen demalaꞌ maañu wajtumi, matyu Claudio, romanolachi kayu aa uñi jumu, kumuinchi judío chachillaya Roma pebulunu maluꞌ miidei tiꞌ uudenguiñuꞌ mitya. Tsenñu Pablo yaiba buudimi. 3 Tsejtu yala tyee kemu deeñuba ya bain tsanguen chumuꞌ mitya, yalaꞌ yanu chutu yaiba bulu taawasha keꞌ animaa juchi kityumee, yaꞌ kikachi yapaya kiikila. 4 Tsaaren saaduma lekanu malumee chaꞌ waku wakudinu yasha jitu, judíolanu bain, naa judío chachi jutyulanu bain Diosaꞌ kuinda kiikemi, Jesúsnu dekeenguisa tyatu. 5 Tsaaren Silas, Timoteoba Macedonia tusha puꞌ jitu, naa Pablo malumere judíolanu Diosaꞌ mika ura kuinda kes netu Dioschi Miꞌkeꞌ Kayamuya Jesúsya juntsañuba tsaa tene mijakaantsuñuba katala. 6 Tsenñuren judío chachilla Pablonu keenguindyaiꞌtu kentsureꞌ depañu, Pablo yaꞌ jalinu ujtupe depajtyan piꞌshiꞌ, yala tyee de-iñuba yaa kuipajtuyu tiꞌ keewaatu tsandimi: Ñullan tyee de-iꞌba kuipa deeve, iyaa kuipa jun jutyuyu. Tsaꞌ mitya entsa ajkeshaya, judío chachi jutyulaꞌ jungaa jiꞌ Diosaꞌ palaa mijakaanu tsuyu, timi.

7 Tsejtu chaꞌ waku wakudinu yasha maluꞌ miitu, ma ruku Ticio Justo mumuꞌ yashaa jimi, juntsa ruku judío chachi jutyuren judíolaꞌ Diosnu balengureꞌ keewaamu ruku jumi, tsenmin yalaꞌ waku wakudinu ya kelubi chunamu jumi. 8 Tsenñu judíolaꞌ waku wakudinu yasha bale pumu ruku main Crispo mumu, kumuinchi yaꞌ bululaba Bale Rukunu keranguila. Tsenmala Corintosha chumula bain Diosaꞌ mika ura kuinda meetu pureꞌ chachilla kerangueꞌ mungaakutila.

9 Manguepe Pablo kipin tsa-iñu, Bale Ruku katawatu tsandimi: Jeetyatyude, dyaꞌkatyumujchi in uraꞌ kuinda kayu mijakares jintsude, 10 matyu iya ñubaren puyu; tsenñuꞌ mitya muba ñunu tiba firuꞌ kenu dejutyuve. Entsa pebulunu in chachi pureꞌ chudenave, timi. 11 Tsenñu Pablo, Corinto pebulunu ma añu medya chudiꞌ yalanu Diosaꞌ kuinda mijakaami.

12 Tsenñuren Galión, Acaya tusha uñi chunu uranu, judíola waꞌdiꞌ jiꞌ Pablonu kaꞌ kavitu kensha detajitu, 13 uñinu tsandila: Entsa ruku Moisésꞌ wandya leichiya tsanguenuu jutyunun, Diosnu tsangue aawa kuredei tiꞌ tsanguenu mijakares nentsuve, tila.

14 Tsenñu Pablo panundiyantsuren, Galión uñi, judíolanu patu tsandimi: Uwain tyeeba tsamantsa urajtu juu kikeꞌbanguiñu, tsa jutyuꞌba jaiba kerandendyuu kikeꞌbanguiñuya, ñulla, judío chachi jumulanu meedichuyu. 15 Tsaaren ne ñuitala naake mijakaantsuñuba juntsaa jumulanaa laapuꞌ ne tsandindetsuꞌ mitya, ñullaꞌ leichee paꞌ ñui tene naakenaꞌba tsanguidei; inaa tsaatalaya mijandendyuve, timi.

16 Tsejtu yaꞌ kavitu kensha depunuren tsaa deme-eꞌlaakemi. 17 Tsenmalan kumuinchi judío chachi jutyula dewaꞌdiꞌ chaꞌ waku wakudinu yasha bale pumu ruku Sóstenesnu dekaꞌ bandachi dekikila kavitu kiikenu ajuusha. Tsa dekiñu bain Galiónya jaiba mijapetse kiꞌmi.

Pablo entsaba pen bijee Diosaꞌ kuinda mijakaanu jimi.

18 Pablo Corinto pebulubi jayaa wanchutu bene keranguemu naatalalanu: Miinu detsuyu titu, Priscila bain, Áquila bain Pabloba bulu jila Siria tusha. Tsejtu Pablo Cencreas pebulunu kayu baakunu maviꞌ miityumujchin, yaꞌ achuwa daakutiꞌ viishikemi, Diosaꞌ mitya tsanguenbera kenu tsuyu tiꞌ pamuwaatu. 19 Tsaiꞌ miindu Éfeso pebulunu jitu, Priscilanu bain, Áquilanu bain deshuikeꞌ, Pablo judíolaꞌ waku wakudinu yasha vitu yaiba bulu kuinda kiikentsumi. 20 Tsenñu mantsa junu pumula kayu junu wanchude detiñuren: Miinu tsuyu, titu, 21 Diosren tsaa mutyañuya bene majaꞌ mangueenu tsuyu, timi. Tsanditu Pablo baakunu maviꞌ Éfeso pebulunu maluꞌ miimi.

22 Tsaiꞌ Cesarea pebulubi miitu, Jerusalénsha bain mijiꞌ kerangueꞌ waku wakudimulanu mangueejimi. Tsejtu Siria tusha Antioquía pebulunu miimi. 23 Tsaiꞌ junu mijiꞌ chutu, Galacia tusha bain, Frigia tusha bain mangueres nemi junu keranguemu naatalalanu sunden pensa mandiwares nendu.

Apolo Éfesobi Jesúsnu laapuꞌ paꞌ mijakaami.

24 Juntsa tinbutala, ma judío ruku yaꞌ mumu Apolo, Alejandría pebulunu chumu Éfeso pebulubi jimi. Yaa uraꞌ kuinda kenu mimin, Diosaꞌ pilla kiika jumulanu bain uraꞌ aseeta jumi. 25 Tsenmin yaa veelachi yumaa, Bale Ruku naaken chusa tyañuba tsanguenu mijakaraꞌ mitya, Jesúsꞌ mitya kuinda kiikendu yuj sunden papatimi yalanu uraꞌ aseetanguikaanu, naamika yaa Juan Mungaamu naake mungaamuwaañuba juntsaatalan aseeta juuwa juꞌba. 26 Tsejtu Apolo chaꞌ waku wakudinu yasha jelajtu mijakareꞌ papatintsuñu, Priscila Áquilaba meenatu, Apolonu masku kapasha kaꞌ jiꞌ, Dios naakesa tyañuba juntsaa kayu uraꞌ kuinda kila. 27 Tsenñu Apolo, Acaya tusha bain jinu tyañu, keranguemu naatalala ti juuñuba dekuwaꞌ eela. Tsenmin junga chumu keranguemu naatalalanu kiika piikila: Apolo janmala uraꞌ mikadei, titu. Tsenñu junga jitu, Diosren estyaꞌ tsanguikaañu keranguemu tiyaꞌ chumulanuya pureꞌ balelamishtikemi, 28 matyu Apolo junga chumu judíolaba muba demeenaren vetaꞌ vetaꞌ kuinda keꞌ paꞌ uraꞌ papatiñu tsa jutyuve tiꞌ panu jutyu juju deeñuꞌ mitya, tsenmin Diosaꞌ pilla kiikanu keewareꞌ papatiꞌ Dioschi Miꞌkeꞌ Kayamuya uwain Jesúsya juntsave tiꞌ mijakaakaa keñuꞌ mitya.