1 Corintios
Jesucristo kuusanu tuꞌviꞌ peyañu kuinda
2 Keranguemu naatalala, iya ñullanu Dios tyee kenu juꞌba juntsa wandiꞌ mijakarajtu kuinda mijakaanu jitu, ne balelan miinu palaa paꞌ, ne tsamantsa uraꞌ aseetajuꞌ keewareꞌ mijakarendyuyu. 2 Tsejtu ñuiba bulu putu ne vera juubillaya tiba pensanguiiken jutyu shuwaꞌ, Jesucristonu laapuꞌ panu tiyaꞌ, kuusanu tuꞌviꞌ peyañu kuindaa kayu mijakaanu pensangueꞌ ma tsanguiwayu. 3 Matyu ñullaꞌ junga jatu ti kenu juꞌba mijtu juꞌ, jelanchin depiꞌshikaraaya jamuwaayu. 4 Tsaiꞌ ñullanu paꞌ Diosaꞌ palaa mijakaandu ne tsamantsa uraꞌ aseetajuꞌ panu palaa paꞌ ñullanu keenguikarendyuyu, ura pañuya Espíritu Santo tsanguikaañaa Dios tsangueꞌ keenguikaave, 5 tsenmalaa ñullaꞌ uwain tsaave tyaꞌ keenguenu pensa chachillaꞌ mijakara palaanaa keetadiꞌ keenguityumujchi, Dios tsanguikaañaa tsaiꞌ keenguenudetsu.
Dios yaꞌ Espírituchi chachillanu keengayakutimuve.
6 Naa tsaañu bain, yumaa aseeta dejuꞌ uwain tsaave tyaꞌ puluꞌ keenguemulanuya kayu uraꞌ aseetajuꞌ palaachi pamu deeyu. Tsaaren entsa tuꞌ chumulaꞌ aseetajuꞌ panu palaachi patyu deeyu, naa entsa tunu uudenguen chumulaꞌ aseetajuꞌ panu palaachi bain patyu deeyu, matyu yalaa jayu jayu de-iꞌ piyantsunu dejuve. 7 Lalaya ñullanu mijakareꞌ patu tsamantsa uraꞌ aseetajuꞌ palaachee Dios tsandikaañu pamu deeyu. Juntsa kuinda Dios kayu entsa tuba kiꞌmujchiren yaa tyee kenu juꞌba pantsuraa tanañu jumuren, yaba bulu balenguran chusa tyataa lalanu juntsa wandiꞌ mijakaave. 8 Entsa uraꞌ aseetaju kuinda juushu juntsanu entsa tunu mandanguen chumu balelaya mu bain aseetanguityuwa deeve, matyu aseetangueꞌbanguituya lalaꞌ tsamantsaa Bale Rukunu kuusanu tuꞌpuꞌ tuꞌtyuchu deeve. 9 Tsaaren Diosaꞌ Kiikanu naatinga entsandishu:
Diosya yanu estyamulachiya
naa muba kataꞌ kerajtunu juu bain,
naa meraꞌ kerajtunu juu bain,
naa pensangueꞌ kerajtunu juu bain
juntsaaya dekeꞌ keenave,* tiꞌ pillave.
10 Matyu entsaalaa Dios, Espíritunu tsanguikareꞌ lalanu demijakaakaave, Espírituya tiba demii juꞌ, naa Diosaꞌ pensanu bain tsamantsa tanshan katapumu juꞌ mitya. 11 ¿Naaju chachillaa asu ma chachi tyee pensa juñuba midejun? Ya tyee pensa juñuba juntsa chachinu pumu pensan miive. Tsaren juve Diosnu bain, ya tyee pensa juñuba yaꞌ Espíritu Santoren miive. 12 Lalaya entsa tusha firuꞌ jumu espiritu kaindetyuyu, Diosnu faleꞌ jamu Espíritu jumaa dekayu, tsenmalaa Dios tsanguendyaꞌ lalaꞌ mitya tyee uraa kiñuba lala mijanudetsu. 13 Tsejtu Dios lalaꞌ mitya tyee keñuba juntsaatala kuinda ketu, ne lalaꞌ aseetajuꞌ panu pensachi patyumujchi, lalanu Diosaꞌ Espíritu tyee mijakaamuñuba juntsa aseetajuꞌ panu palaachee Espíritu tsandikaañu pamu deeyu.
14 Diosaꞌ Espíritu tajtu ne chachillaya tiba Espíritunu faleꞌ jamunuya jaiba aseetanguityu deeve. Yaichiya juntsaatala kuinda jumulaya naꞌbaasa pas nemu palaa kuraa ne juuve, tsenmin naakeꞌ aseetanguenuba dejutyuve, Diosaꞌ Espíritu tajdetuꞌ naakeꞌ aseetanguen tsaa dejuꞌ mitya. 15 Tsaaren Diosaꞌ Espíritu ta chachillaya ti bain aseetangueꞌ mijamu deeve, naamika yalanuya yala naa naadejuñuba mu bain aseetangueꞌ mijanu dejutyuñuba. 16 Matyu Diosaꞌ Kiikanu entsa pillave:
¿Maa Bale Ruku naaju pensañuba mi dejun?
¿Maa yanu mijakaakenuu dejun?* tive.
Tsaave, tsaanuren lalaya Cristo naake pensanguemuñuba juntsa pensaa tadeeyu.