1 Corintios
Keranguemu jutyu balelaꞌ jungaya kavitu ken jutyu
6 Naa-uwanu ñui tene peletu faawarekeꞌba, ¿nenñaa keranguemu bale rukulaꞌ jungaa kavitu kenu dejityuꞌ, Diosnu kerajtu bale rukulaꞌ jungaa kavitu keꞌ, juntsa peletu mantseꞌkaanu jijideiyu? 2 ¿Ñulla mijdetuu Diosnu keranguemu chachillaa, entsa tusha chumu ne chachillanu kavitu kenuu dejuñu bain? Tsaꞌ mitya ñullaa entsa tusha chumu chachillanu kavitu kenuu dejushu juntsaa, ¿nejtaa ñulla entsa kaa peletu juulanuba kavitu keꞌ mantseꞌkaanu dejutyuyu? 3 ¿Ñulla mijdetuu naa anjeelanu bain lalaa kavitu kenuu dejuꞌba? Tsaashu juntsaa, ¿nejtaa kayu entsa tusha lalaꞌ peletu faawaratalaa kavitu keꞌ mantseꞌkaakenuu dejutyuwa? 4 Tsaꞌ mitya ñulla ti peletu faawarekeꞌ bain ¿nenñaa keranguemulachiya tiba juñuꞌ kurajtu chachillanaa, kavitu kenu balen chachi kujte kujtedekiyu? 5 Matyu ñullanu entsandimiya deyujpesa tenñundiyu: ¿Tsejtu ñulla keranguemu naatalaatalaren main kayu aseetajuu juꞌ kavitu keꞌ mantseꞌkaakenuuba dejutyuu? 6 ¡Tsa jutyumee, kayu keranguemu naatalaatalaren vejmiꞌ vinbatityu dejuꞌ, jungajte juntsa peletu kavitu kenu, Diosnu keenguityu balelaꞌ jungaa jimu deeve!
7 Tsaꞌ mitya ne ñui tene peletu faawaraaren ñulla naaju uraꞌ dejutyuñuba entsangue keewarentsuve. Tsaashu juntsaa, ¿ne ñulla urajtu juu de-iñaa, kayu uran jutyun? ¿Ne anbutikayaꞌ taraiñaa kayu uran jutyun, keranguemu naatalaatalaren peletu kiiken chutyumujchi? 8 Tsaanuren ñullaa tsa dejutyuꞌ, keranguemu naatalaatalaren firuꞌ kikenaꞌ bain, taanguikenaꞌ bain tsa tsa dekive. 9 ¿Ñulla mijdetuu naa firuꞌ chachillaa Diosnu yalaꞌ rei juu tananu dejutyuñu bain? Tsaꞌ mitya ne maaliren anbukuinda iiñuu in chutyudei, matyu naa muꞌbaasa tsa tsaimula bain, naa chi dyuslanu aawa kureꞌ keewaamula bain, naa vee matsaimula bain, naa supu juuñuu tyaꞌ tsaimishtimula bain, naa unbee rukuutalaren tsa tsanguemula bain, 10 naa taamula bain, naa kayu tiba aa tadichi tyamula bain, naa viñamula bain, naa chachillanu tituba firuꞌ pas nemula bain, naa anbutituren bibuꞌ paꞌ taanguemula bain Diosnu yalaꞌ rei juu tananu dejutyuve. 11 Ñui bain mallee kaspele tsaawa deeve, tsaaren challaya ujcha demanbitsalaꞌ Dioschin juu chachi detiyave, tsenmin ti kuipaba tajtu detiyave, lalaꞌ Bale Ruku Jesucristo tsanguikaañu, Diosaꞌ Espírituꞌ mitya.
Lalaꞌ bulu Dioschin juuve.
12 Uwain mantsa chachilla: Iya ti kenu tenñuba kenuu juyu, timu deeve. Uwain tsaave, tsaaren laachi kumuinchi urandene dejutyuve. Uwain i bain ti kendenñuba tsanguenuu juyu, tsaaren tsaanchi chiꞌkayaꞌ tsa tsanguenuu jutyuyu. 13 Entsa bain entsandimu deeve: Pandaya peshuchive, tsenmala peshu bain pandachive, tsaaren entsala Dioschiya millai de-inu tsuve, timu deeve. Tsaaren lalaꞌ buluya naꞌbaasa tsa tsaintsumu jutyuve, matyu lalaꞌ buluya Bale Rukuchive, tsenmala Bale Ruku bain lalaꞌ bulunu washkemuve. 14 Matyu Dios lalaꞌ Bale Rukunu naakenga peyañuren mangujteshu, tsanguenuu juꞌ lalanu bain tsarenguenu tsuve. 15 ¿Tsejtu ñulla mijdetuu ñullaꞌ bulu, Cristoꞌ buluren tsaañuba? Tsajuꞌ lala Cristoꞌ bulun dejushu juntsaa, ¿muꞌbaasa tsa tsaimu shinbuba tsudinuu dejuwa? ¡Uwain tsa jutyuve! 16 ¿Tsejtu ñulla mijdetuu ma unbere naꞌbaasa tsa tsaimu shinbuba tsaitu, tsaa yaba ma bulu juuñuu tiyaimuñu bain? Matyu Diosaꞌ Kiikanuya ma ruku yaꞌ shinbuba laapuꞌ patu entsandive: Yala pallu main juuñuu tiyainu detsuve,* tive. 17 Tsaaren mun Bale Rukuba buudiꞌ bain yaꞌ tenbukasha Bale Rukuba main juu tiyaimuve.
18 Tsaꞌ mitya naꞌbaasa tsa tsainu kityudei. Matyu vee ujcha judeeshu juntsalaa ñullaꞌ bulunu tsamantsangue firuꞌ kityuve, tsaaren mun naꞌbaasa tsa tsaishu juntsaa yaꞌ bulunun ujcha lantsuve. 19 ¿Tsejtu ñulla mijdetuu ñullaꞌ bulu Diosaꞌ pupunanu ya juuñuunmala, Diosaꞌ kuwañu Espíritu Santo ñullaꞌ bulunaa chuñuba? ¿Tsenmin ñullaꞌ bulu ñuichi jutyuñuba mijdetuu? 20 Diosya ñullanu atiꞌkakiñunguive. Tsaꞌ mitya ñullaꞌ buluchi Diosnu balengureꞌ keewaadei.