Colosenses
2 Naa iya ñullaꞌ mitya bain, naa Laodicea pebulunu keranguemulaꞌ mitya bain, naa veela inu kerajtu chachillaꞌ mitya bain tsamantsangue deraꞌ kentsuñuba demijasa tenve. 2 Iya entsangue deraꞌ ken chumiya ñullaꞌ pensa sunden mandiyaꞌ demiisa tenñaa tsanguentsuyu, tsejtaa ñuitala estyaꞌ keewareꞌ buluu dechuꞌ, naake aseetanguenuu juñuba juntsai detiyaꞌ deechuꞌ demijasa tenñu, tsejtaa Dioschi tyee munuba wandyajtu juwaañuba juntsa narake aseetanguenudetsu, ura pañuya Cristonu laapuꞌ pañu kuindaa juntsave, 3 tsajuꞌ naa-i aseetaju tiyanu juu bain, naa-i mi tiyanu juu bain yaꞌ mityaa juntsainuu dejuve. 4 Entsandiꞌ ñullanu pamiya naa mu bain ñullanu uumerati paꞌ anbukuinda dekeranguikaatyusa tenñaa tsandintsuyu. 5 Tsajuꞌ naa iya ñullaꞌ kejtsapala putyuꞌ bain, in aamaya ñullaꞌ junga puve, tsejtu mika sunden juyu ñulla deechuꞌ dejuꞌ, uwain Cristonu bain naake uraꞌ keengues jindetsuꞌba tsaaren jindetsuñu.
Cristo kasa chachi juu tiremu.
6 Tsajuꞌ, ñulla Jesucristonaa ñullaꞌ Bale Ruku juu tiremiya, yachi naaju chudiꞌ jintsunuu juñuba juntsaa jintsudei, 7 tsejtu cheeba juꞌ yanu telele eekiñu dejuꞌ, uraꞌ keengues jindu deraꞌ chunañuu jintsudei; ñullanu naake demijakaañuba juntsaa jindu, tsenmin naa-uwanuba Diosba kuinda keꞌ tiba yuj uraꞌ kive tiitindu.
8 Tejan keenaꞌ jaiba depashkatyuꞌ, naajulaa Cristoꞌ kuinda jutyuꞌ ne chachilla tyee ken chumu deeñuba juntsaatalaa depaꞌ, naa entsa tusha firuꞌ kikaamu espiritulanu bain meenguemu deeñu, yaichi anbutikayanu kityudei.*
9 Tsajuꞌ Cristo chachi tiyaꞌ nakayañu, Dios naaju tsamantsaa juñu bain, Cristaa chaiba juntsaa juve. 10 Tsenmin ñulla Cristoba buunataa ñuichi tiba milla dejuve, matyu Cristaa naa pudee ta espiritulachi bain, naa bale rukulachi uñi juñuꞌ mitya. 11 Tsenmin ñulla Cristoꞌ mityaa Dioschi señas iiñuu dejuve, tsaaren chachilla naake señas kemu deeñuba juntsaa dejutyuꞌ, Cristonu dekeenguiñu lalaꞌ ujcha kenu pensa manguendyan jutyungue tiretaa, Dios lalanu yachi señas kikeñuu kive. 12 Tsenmin ñulla mungaramee Cristoba bulu menaiñuu de-ive, tsejturen yaba buluren mangujtaiñuu de-ive, ñulla Cristonu mangujtemu Diosaꞌ pudeenu dekeengueꞌ mitya. 13 Tsenmin ñulla kaspeleya ñullaꞌ ujchaꞌ mityaren peyaañuu juuwa deeve, ñulla judío dejutyuꞌ, ñullaꞌ ujcha kiikenu tyanu pensa naakekaanu tyañuba tsanguen chumu deꞌ mitya; tsaanuren challaya Dios ñullanu Cristoba bulu chunu tireve yaꞌ mityan ñullanu ujcha manbitsaatu. 14 Diosya naa lala deneenave tiñuu jumu kiikanu bain yaa paangueꞌ tiba jutyungue tireve, Cristonu lalaꞌ mitya kuusanu tuꞌvikaatu. 15 Tsanguetu naa pudee ta espiritulanu bain, naa mandanguen chumu espiritulanu bain, Dios Cristoꞌ mityaren tsaa balejtu jungue dekureꞌ keewaave, yalanu pullaꞌ, peesu chachi juu shilingue de-uikareꞌ miyaꞌ jiꞌ keewaren tsanguikaatu.
16 Tsaꞌ mitya naa judío chachillaya tsa tsanguemu deeñuren, ñullaa tsa dekityuꞌ, ne ti fidekiñuꞌ mitya bain, ne ti kujchi dekiñuꞌ mitya bain, tsa jutyuꞌba, añumee ti fandangu kenuu juñuba ñulla tsa dekiꞌñu bain, naa kepe pajta kasa mafaañuꞌ mitya fandangu dekiꞌñu bain, tsa jutyuꞌba, naa saaduma lekanu malu juuñuba ñullaa tsa dekiꞌñu bain, ne muba ñullanu paviya detiꞌ naꞌbaasa depatyusa. 17 Tsajuꞌ entsa ti bain jumulaya jangumanashu juntsa juuñuu tene judeeve, tsaaren Cristonaa tiba naajuꞌba entsai katawamu juve. 18 Naa ñulla tyeeba kakenuu dejuñuba, ne mu bain tenbityamu juuñungue keewareꞌ, anjeelanu aawa kureꞌ keewaamu dejuꞌ, naa kipiiñu-iꞌ tyeeba kataꞌ pamu deeyu tyaꞌ, ne chaꞌ pensachiren tsamantsa miyu tyaꞌ dajtyamulaꞌ mityan* ne ñulla tiba kan jutyuu tiwaranu de-ityusa. 19 Yalaya mishu juuñuu jumu, tsenmin kumuinchi bulunu deenawaamu Cristochi uuden juu dejutyuve. Cristaa kumuinchi bulunu tiba detyuipunaꞌ buunanuu tireꞌ, vetaꞌ vetaꞌ uraꞌ iinuu tiremu juve, tsajuꞌ deelawareꞌ bulunu tyuipunakareꞌ, Dios naajusa tyañuba juntsangue awakareꞌ jintsumu juve.
20 Tsajuꞌ ñulla Cristoba bulu peyaiñu de-iꞌ, yumaa entsa tusha firuꞌ kekaamu espiritulachiya* uuden juu dejutyuve. Tsaaba ¿nejtaa ñulla chai bain entsa tusha chumula naakemu deeñuba tsanguen chunu kiikendetsuꞌ: 21 “Aantsa taꞌkatyude, aantsa fityude, ñuꞌ tyaapachi kaꞌ tadityude” tinu uudennu tsanguenu kiikendetsuyu? 22 Tsajuꞌ kumuinchi entsa uuden jumulaya ne chachillaꞌ tiba kiiken chunutala tene mijakaraa ne judeeve. Tsenmin entsa uuden jumulaya tiba den talandetsunmalaya de-iimulanu tene laapuꞌ pakayaa ne judeeve. 23 Uwain tiba entsaa uuden jumula aseeta juñuꞌ keewara deeve, matyu naa keenguenutala bain, naa daj pensajtu tirenu bain juuñuu juꞌ mitya, tsenmin bulunu taaju kikareꞌ puiteꞌ uraꞌ kikaakeñuu tirekaamu juve, tsejturen chachillaꞌ tiba firuꞌ kenu pensanuya tsanguekaatyungue tirenuya jutyuve.