1 Timoteo

Eleshanu bale ruku pumula naajunu deeñu bain

3 Entsa palaa uwain tsaave: Mun keranguemulanu washkemu bale ruku tiyanu tyaꞌba, mika uraa taawasha kenu pensa juve. 2 Tsaaren mun keranguemulanu washkemu bale ruku tiyaꞌba muchiba naꞌbaasa pakayatyu ruku junu juve; ma supuren miyaju, kidandajtu, ti kenduba pensangueꞌ kemu, uraꞌ kiiken chumu, yaꞌ yanu tsunu dejañu bain naa-uwanuba uraꞌ mikamu; mijakaanu bain mi; 3 viñatyu, jei kidandai tiyaꞌ peletu kiikemu jutyu, uraꞌ ruku, bulla kityu nejuu, tsenmin lushinun aa pensaa jutyu ruku junu juve. 4 Naa yaꞌ yasha bain deechuꞌ kikaren chumu ruku junu juve, naa yaꞌ nala bain uraꞌ meenguemu juu na miyaꞌ, naaju uraꞌ junuu dejuñuba tsaanu dejuve; 5 tsaaren yaꞌ yanu chumulanun uraꞌ miyaꞌ chunuba mijtuu jushu juntsaa, ¿naa ketaa Jesucristoꞌ mitya Diosnu kerangueꞌ waku wakudimulanaa uraꞌ miyaꞌ chunuu junu jun? 6 Tsaꞌ mitya mun elesha bale chachi tiyaꞌba Diosnu challan keranguikemu rukaa tsaa tiyanu jutyuve, tsandenna tsaa tiyayu tyaꞌ dajtyamiya Dyabulu naa-itaa kuipa vimuuñu bain juntsaa iꞌba imive. 7 Tsenmin naa Diosnu keranguityu chachillachi bain balenguraꞌ uraꞌ keramu rukaa junu juve; tsa juiꞌshu juntsaa, tituba dekuraꞌ Dyabuluchi firuꞌ kenu pensa iꞌba inu juve.

Eleshasha tyeeba kiveten pumula naajunu deeñuba

8 Tsenmin keranguemulachi tyeeba kemula bain muchiba balenguraꞌ uraꞌ katawamu junu dejuve, ti kenu paꞌba padanda kityu dejuꞌ tsa tsanguemu, viñatyu, tsenmin anbukeꞌ lushi laanu pensa bain jutyu ruku junu dejuve. 9 Tsenmin tyee pantsunamunun Dios keewaañu juntsanu kerangueꞌ mijamu dejuꞌ bain juntsaaren jindetsuꞌ, tenbukasha tiba firuꞌ pensajtu jintsudei. 10 Tsajuꞌ kayu yala tsaa taawasha kindetyuren, ajkeꞌ kemiya yala naadejuñuba mijanu keꞌ keenu dejuve, tsejtaa yala uwain naꞌbaasa pakayatyu deeshu juntsaa bene juntsa taawasha kikaanuu junu dejuve. 11 Tsenmin naa supula bain tsaren balengurainuuya junu dejuve, naꞌbaasa kuinda mereꞌ mawandis nen jutyu, nejuu junu, tsenmin ti paꞌ bain tsa tsanguemu junu dejuve. 12 Tsenmin keranguemulachi tyeeba kemu rukulaya ma shinbun miyaanu dejuve, naa yaꞌ kaillanu bain naa naake uraꞌ kiikenuu juñuba tsa tsangue uraꞌ kemu dejuꞌ, naa yaꞌ yanu bain tsaren uraꞌ kiiken chumu junu dejuve. 13 Tsajuꞌ, mu bain yaichi eleshasha tyeeba kivetenu taawashanu uraꞌ keꞌ jindetsushu juntsaa, muchiba uraꞌ keramu ruku tiyanu dejuve, tsenmin Jesucristonu uraꞌ keengueꞌ jindetsuꞌ mityan kayu uraꞌ kuraa tiyaꞌ tiba bulla jutyu uraꞌ chunu dejuve.

Dios tyeenguenu tyamuwaañuba Cristonaa juntsaa puimi.