Tito
Uraꞌ chusa tindu
1 1:1-2 Iya, Pablo, Dioschi taawasha kemu rukuyu, tsenmin Jesucristoꞌ mitya kuinda kenu laraꞌ eramu rukuyu, matyu Dioschi miꞌkeꞌ kaya chachillanu Jesúsꞌ uudenchi uraꞌ dekeenguikaanu mijakares nenu eramu ruku. Tsenmin naa-uwanuba Diosba uraꞌ chunuu juushu juntsatala uwain tsainu juve tenna juꞌ, naajuñu bain entsaave tiꞌ mijakares nemu rukuyu; naa entsa tu juba jutyunu uwanuren anbutityu Dios uwain naa-uwanuba chuwaanbera kenu tsuyu tiꞌ tsandi pamuwaañu. 2 —— 3 Tsejtu challa tsanguenuu tinbu jañu, Dios tyee kenu paꞌba juntsa lalanu keemijakaantsuve, lalanu livee kemu Dios inu kuinda kes nede tiñu kuinda kikentsaashu juntsaꞌ mityaren. 4 Ura in na juuñuu, iya tsaa keranguemu Tito, ñunu entsa kiika piikentsuyu. Lalaꞌ Apa Dios bain, lalanu livee kemu Jesucristo bain ñunu estyaꞌ keewareꞌ, tiba bulla jutyu sunden chujtisa tenve.
Creta ishlabi Tito ti kenu juꞌba tsanguenu shuwami.
5 Ñunu Creta ishlabi shuikemiya, tyee uraꞌ kenundiyandu bain kayu kenuu juñu, juntsa dekisa tenñaa tsangueꞌ shuikiwayu. Tsenmin iya ñunu tyee kide tiñu bain juntsangueꞌ, pebulumeemee keranguemulaꞌ bale rukula faawareꞌ chujtisa tenñaa tsangueꞌ ñunu shuikiwayu. 6 Juntsa keranguemulaꞌ bale rukulaya naꞌbaasa pakayatyu ruku junu dejuve, ma shinbun miyaju; yaꞌ nala bain Diosnu keranguemu junu dejuve,* ne firuꞌ kes nemu nala deeve tikayaimu jun dejutyuve, tsenmin pañu merajtu deeve tikayaimu bain jun dejutyuve. 7 Matyu keranguemulanu washkemu bale rukuya Dioschin tsaa tiraꞌ washnaꞌ keenamuꞌ mitya, naꞌbaasa pakayatyu ruku junu juve, uudenguenun tyaimu chachi jutyu, ajaa chachi jutyu, viñamu jutyu, vinguenu ajchuu jutyu, tsenmin anbukeꞌ lushi laanu pensa bain jutyu ruku junu juve. 8 Tsajuꞌ, naa-uwanu yaꞌ yanu tsunu dejañu bain uraꞌ mikamu ruku junu juve, tsenmin tiba uraa tene kiikemu chachi, uraꞌ pensa, Dios naakesa tyañuba tsanguen chumu, Dioschin juu chachi, tsenmin maaliren firuꞌ juu in jutyu chachi junu juve. 9 Tsenmin uwain anbuda jutyu kuinda mijakara jumunaa keetadiꞌ, naatiñuba tsangue meedimu ruku junu juve. Tsejtaa veelanu bain juntsa mika ura kuindachi uumiꞌteꞌ sunden pensa mandiwaanuu junu, tsenmin masmiꞌ veraꞌ pamu chachillanu bain juntsa kuindachee uwain tsaave pensa kekaanuu junu juve.
10 Masmiꞌ paꞌ meenguityu chachillaya pureꞌ judeeve, tsaaren kayu judío chachillaa Dioschi señas idei tin chumula dejuꞌ, paiꞌñuba uraa kuindaa keꞌ chachillanu anbuda keranguekaamu rukula deeve. 11 Yalaya mijakaanuꞌ jutyuu kuindaba demijakareꞌ, uraꞌ kiꞌmujchin lushi laanun ne tsa tsa dekeꞌ, vee vee bulu chumu chachillanu mushakeñuuya kiidekeñuꞌ mitya, yalaꞌ fiꞌpaki duꞌkaakeñuuya keñu uranu juve.
12 Junu Creta ishlabi chumuren, ma unbere, yalaꞌ dyusaꞌ mitya pamu ruku, yalanu laapuꞌ patu entsandimuwaave: Creta ishlaꞌ chullaya naa-uwanuba anbutimu, firu animaa juuñuu, ti fiꞌba jayu findyatyu, tsenmin lamu chachi deeve, timuwaave. 13 Juntsanditu uwain uraꞌ pamuwaave. Tsaꞌ mitya yalanu daran uleꞌ nepade, tsenmalaa Diosnu uraꞌ keenguenutala ne firuꞌ pensaa jutyuꞌ juntsaaren jintsunudetsu, 14 tsenmin judío chachillaꞌ ne pensachi dekalaañu kuindatala bain mijapetse kityuꞌ, anbuda jutyu kuindanu meenguityu chachilla naa naakidei detiñuba meenguiꞌnudetsu.
15 Naajulaba Dioschi ura kura chachillachiya tiba ura kura tene judeeve, tsaaren Dioschi urajtu kuraa dejuꞌ, Diosnu keenguityu chachillachiya tiba urajtu kura tene judeeve, matyu naa pensa bain, naa yalaꞌ tenbuꞌ pensa bain Dioschi urajtuu tiya deiꞌ mitya. 16 Yalaa Diosnu kera deeyu tituren, yalaꞌ tiba kiikeñu jumulaa uwain tsa jutyuñuba mijakaamu juve; tsajuꞌ tyuten masmiꞌ papatimu chachi dejuꞌ, tiba uraa kikenuu jutyu chachi deeve.