Tito
Keenguemu chachilla naajunu deeñuba
3 Keranguemu chachillanu mandengaapuꞌ, naa uñilanu bain, naa bale rukulanu bain meenguen chunu dejuve tiꞌ manbade, tsenmin naa-uwanuba tyee uraa kiikenuu juñuba juntsa bain kiveꞌnun jutyuu chunanu dejusa. 2 Mu bain munuba kentsureꞌ patin dechutyusa, muba vinbatin dechutyuꞌ, tiba bulla jutyu uraꞌ chumishtimu dejusa, naa munu bain mika tenbi puꞌ uraꞌ kiikemu dejusa, tide.
3 Laa bain kaspeleya ti kenduba aseeta jutyu, pañu meetyu, tujlaa nentsumu dejuꞌ tyee kiikeꞌ sunden puinu tenñu bain tsaaya ken dechuꞌ juntsachee uuden in chumu chachi juu chumuwa deeyu. Tsajuꞌ tiba firuꞌ kiiken chumu deju, kishtyamu deju, tyuten chachi, tsenmin vetaꞌ vetaꞌ tyutenganchin juu chunamuwa deeyu. 4 Tsaawa deeñuba, lalanu livee kemu Dios, naa naake uraa kenu juꞌ bain, tsenmin naa-i estyamu juꞌ bain chachillanu tsa tsangue dekeewareꞌ 5 livee kemuwaave. Tsangueꞌ livee ketu ne lala uraa dekiñaa livee keꞌ lalanu manbitsaleꞌ kasa na demangayaiñuu tireindyuve, tsangueꞌ Espíritu Santochi kasa manchudiñuu tiretu mika tenbityanchin tsanguive. 6 Tsenmin tsangueꞌ Dios lalanu Espíritu Santo kuwatu, livee kemu Jesucristoꞌ mityaa tsangueꞌ esa putyu kuwaꞌ pureꞌ kuwakeñuu kive, 7 tsenmalaa ya tsangueꞌ lalanu mika uraꞌ keꞌ ya naakesa tyaꞌba tsanguen chumu kuraa tirenmala, lala naa-uwanuba Diosba uraꞌ chunuu tiyanu jumu kanu keenanudetsu.
8 Entsa iya patintsaashu juntsa uwain tsaave. Tsaꞌ mitya entsaatala den papatisa tenve, tsenmalaa Diosnu keenguemulaya tiba uraa ken chunudetsu. Entsaa kenu jumulaa kumuinchi chachillachi ura dejuꞌ tsa tsanguen chunuu jumu deeve. 9 Tsaaren paiꞌñuba ne uraa palaatala bain, naa yumaa chumu rukulanu laapuꞌ kuinda juutala bain, naa Moisésꞌ wandya lei juutala bain depaꞌ vinbatinu kityude, tsaa jumulaya paiꞌñuba ne uraa kuinda ne judeeñuꞌ mitya. 10 Mun Diosnu keenguemuutala kundaa tyawareꞌ deveekaanu kiñuba, tsanguemunu naa pai bijeeñuba uleꞌ uraꞌ mandirenu kide. Tsenñun ma uraꞌ mandityuunmalaya juntsa rukunu keeminchaa tiyade. 11 Juntsaashu juntsaa ñu aseetanguenu juve, tsaa chachiya urajtu juꞌ, maali yaꞌ ujchaꞌ mityaren kavitu iꞌ kuipa viiñuu-indaa tsaañu bain.
Pablo entsa entsangue dekide timi.
12 Iya Artemasnu, tsa jutyuꞌba, Tíquiconu ñuꞌ junga eenmalaya, ñu bain Nicópolis pebulubi inu keenu janbera inu kide, juntsa pebulunaa shu tinbu puinu pensa juyu. 13 Leichi aseetaju ruku Zenasnu bain, Apolonu bain, ñu tyee kuwaꞌ kemishtikenuu juꞌ bain tsanguisa tenve, tyee menestenguenuu dejuñu bain juntsa dekuwade, tsenmalaa yala tiba yamuj inuꞌ jutyuuya nuka jinu juꞌba jinudetsu. 14 Tsenmin lalaꞌ chachilla tiba uraa kiikenu demijasa, tsejtaa menestendyainu tinbutala bain tyeeba kuwamu chachi detiyaꞌ, yala tibanguiꞌmujchi dechutyuꞌ tsaanchi balenudetsu.
De-insha palaa
15 Kumuinchi iba bulu pumula ñunu uraꞌ chusa tindetsuve. Keranguen chumula, laachi estyaꞌ uraꞌ keranu chachi judeeshu juntsalanu uraꞌ dechusa tide. Dios kumuinchi ñullanu estyaꞌ keewaasa tenve.