Apocalipsis

Llupu Kaa Uvejaren jaꞌlekenuu kiika

5 Tsenmin kaiꞌsha reiꞌ chuchudinu chunjuunu chumu ruku yaꞌ uran dyaapasha ma kiika tanawa. Entsa kiika, ajuusha bain, benesha bain pillaawa, tsenmin jaꞌlen jutyu mandishpai muutechi nara maiꞌkara katawayu. 2 Tsenmin ma pude anjee bain katawayu. Tsenñu juntsa anjee jelekenu daran palaachi entsandi pakeꞌmeewa: ¿Maa tsanguenuu jutu juntsa jaꞌlen jutyu maiꞌkara muute demushkeꞌ entsa kiikanu jaꞌlechunga? tiꞌ pakeꞌmeemeekiwa. 3 Tsenñu naa kaiꞌsha chulla bain, naa tusha chulla bain, naa yumaa peyaꞌ mennamula bain, muba tsanguenuu dejutyuꞌ juntsa kiikanu jaꞌlenu dejutyuꞌ, naa keekenu bain dejutyuwa. 4 Tsenñu iya pureꞌ warendintsuwayu, muba tsanguenuu jutyuꞌ juntsa kiikanu jaꞌlekenu bain, naa keekenu bain dejutyuñuꞌ mitya. 5 Tsenñu Diosaꞌ chachillaꞌ ma bale ruku inu entsandiwa: Waatyude, enu main Judánu seraꞌ jamu paande Leun mumu ruku, matyu rei David millanu shuꞌkeꞌ seraꞌ jamu, yaa tinuba depullaꞌ mitya, entsa kiikanu mandishpai maiꞌnamu muute mushkeꞌ jaꞌlenuu juve, tiwa.

6 Tsenñu ke-eetu, naa taapai bibu chumulaꞌ kejtsapala bain, naa Diosaꞌ chachillaꞌ 24 bale rukula bain uinanu kejtsapala, reiꞌ chuchudinu chunjuu keesha main llupu kaa uveja tutaꞌ Diosnu keewaraꞌ dyaiñuu uina katañu, mandishpai kachu ma puu, naa kapuka bain mandishpallu ma puuwa. Juntsa mandishpai kapukalaya, Dioschi tu kuraa eramu mandishpai espiritu jumulaa tsa deewa. 7 Tsejtu juntsa Llupu Kaa Uveja junga jitu, reiꞌ chuchudinu chunjuunu chumu rukuꞌ uran dyaapasha tananu kiikanu kakiwa. 8 Tsejtu juntsa kiika kanmalan, taapai bibu chumula, naa Diosaꞌ chachillaꞌ 24 bale rukula bain Llupu Kaa Uvejaꞌ ajuusha teledediwa. Tsejtu chaita rukula main main arpa tamin, naa uru shulla bain juꞌkeꞌ aindyunguikaantsumi yalluu taandene dejuwa. Tsaaren entsa uru shullanu juꞌkeꞌ aindyunguikaantsumiya yaꞌ chachilla Diosnu paka pakakiñu palaa deeve. 9 Tsejtu kasa beesa mantu entsa entsandila:

Uwain ñuya tsanguenuu juꞌ mitya, juntsa kiika kanu tsuve,

naa maiꞌnamu muute bain demushkeꞌ jaꞌlenu tsuve,

matyu ñaa chachillaꞌ mitya peyaꞌ, ñuꞌ asa deshajaa-ereꞌ,

naa vee vee seraꞌ jimu paandelanu bain,

naa vee vee palaachi pamu chachillanu bain,

naa yai tene ma bululu iꞌ chumu chachillanu bain,

naa vee vee ma uñichi uuden juu chumu chachillanu bain

livee inuu keñu Dioschi tene tiyanuu dejuꞌ mitya.

10 Tsenmin tsangueꞌ juntsalanu ma bulu yaꞌ chachi detireꞌ,

chachillaꞌ mitya Diosnu kalen jimula tene tirekive, lalaꞌ Dioschi manda-iꞌ taawasha kenu.

Tsenmala yala entsa tusha mandangueꞌ washkenu detsuve, tiidetiwa.

11 Iya keenaren bene reiꞌ chuchudinu chunjuu keesha, matyu bibu chumula, Diosaꞌ chachillaꞌ 24 bale rukulaba uinanu keetala anjee pureꞌ yatana de-uinawa, matyu pureenchiren mikan jutyuu uinaꞌ paꞌ jelekendindetsu meewayu. 12 Tsejtu daran palaachi entsa entsa detiwa:

Llupu Kaa Uveja tutaꞌ Diosnu keewaramuya,

matyu tsanguekutyanuu juꞌ mitya,

ti kenu tyaꞌ bain kemu keewarasa,

naa ne bale juu bain,

naa aseetanguikaamu juu bain,

naa deelawaakenuu juu bain,

naa bale kuranu juu bain keewarasa.

Tsenmin tsamantsaa keewarasa,

tsenmin tsamantsa ura rukuve tikayasa Llupu Kaa Uvejaya, tiidetiwa.

13 Tsenmala kumuinchi Dioschi imulaya, naa kaiꞌsha chulla bain, naa tusha chulla bain, naa lamaasha pumula bain, naa yumaa peyaꞌ mennamula bain, matyu kumuinchi entsa detiñu meewayu:

Reiꞌ chuchudinu chunjuunu chumu bain,

naa Llupu Kaa Uveja bain,

tsamantsa ura ruku deeve tikayanuu dejuꞌ,

naa bale kuranu bain dejuve.

Naa tsamantsaa keewara bain,

naa ti kenu tyaꞌ bain kemu dejuꞌ,

naa-uwanuba tsanguemu keewarasa, tiidetiwa.

14 Tsenmala taapai bibu chumulaa: Uwain tsaasa tenve, tiidetiwa, tsenmala Diosaꞌ chachillaꞌ 24 bale rukulaya telediꞌ Diosnu aawa dekureꞌ keewaawa.