Apocalipsis
De-insha jumu mandishpai muute
8 Llupu Kaa Uveja entsaba mandishpai maiꞌnamu muute de-insha jumu mushkeꞌ jaꞌlenmalan selusha tsaa mika medya uraa ma dijtsaa pajtyaiꞌ dijtsalei tiyawa. 2 Tsenñu Diosaꞌ ajuusha mandishpai anjee uinamulanu juipunu tyujtyu main main dekuñu katawayu. 3 Tsenmala kama anjee bain, aindyunguikaantsumi juꞌkenu keesha aindyunguikaantsumi puꞌ juꞌkentsumi uru shulla taa jiꞌ uidiwa. Tsenñu juꞌkeꞌ aindyunguikaantsumi pureꞌ kuwadekiwa, aindyunguikaantsumi juꞌkentsumi uruchi jumunu reilaꞌ chuchudinu chunjuu ajuusha chumunu tsureꞌ keewaanutsu, matyu Diosaꞌ chachilla, Diosnu pakaꞌ kuinda kendetsu, juntsa kuindaba bulu ikakaakeñunguenu. 4 Tsenñu anjee yaꞌ tyaapachin aindyunguikaantsumi puꞌ juꞌkentsumi tanaꞌ junu puꞌ juꞌkiñu entsa aindyu ñivijcha, Diosaꞌ chachillaꞌ keñu kuindaba bulu luwa Diosaꞌ ajuusha. 5 Tsenñu anjee juntsa juꞌkeꞌ aindyunguikaantsumi punu uru shulla mangaꞌ, Dioschi juꞌkenunu tsumu ñinbuka dekaꞌ puꞌ tsaa tusha kepukiwa, tsenmalan waratiꞌ kuidya bain jelekendiꞌ, pidya pidya keꞌ, naa kala bain kiwa.
Ajkeꞌ taapai juipunu tyujtyu jumula
6 Mandishpai anjeela juipunu tyujtyu main main tanamula, umaa pakaanu detiyawa.
7 Ajkeꞌ anjee yaꞌ juipunu tyujtyu pakaawa, tsenmalan kaiꞌsha isha puka ñiyuyu keraa bain, naa ñi bain asaba yandaa tene tusha dekepuñu pajtyawa, tsejtu tusha dekepunmalan, tunu pen pela veleꞌ keekiñunguiñuya, manbaateya tsaa dejupeiwa, naa chi bain jundala chumulaya tsaa dejupedeiwa. Tsenmin kumuinchi lushkatata tapela bain tsaa dejupedeiwa.
8 Entsaba pallu jumu anjee yaꞌ juipunu tyujtyu pakaanmalan, ñiren ma aa kuyi kera lluꞌwara tsaa lamaasha kepudekiwa, tsenmala pen pela veleꞌ keekiñunguiñuya, manbaate lamaaya tsaa asa tene tiyaiwa. 9 Tsenñu lamaasha pumulanu pen pela veleꞌ keekiñunguiñuya, manbaateya tsaa depeya deiwa, naa baaku lamaasha nentsumulanu bain pen pela veleꞌ keekiñunguiñuya, manbaateya tsaa millai demushawa.
10 Entsaba pema jumu anjee yaꞌ juipunu tyujtyu pakaanmalan, tsamantsa aa makara tu ñillu llukan tsajuꞌ, unsururuu entsa tusha pajtyaꞌ, pijula jumulanu, naa tusha faamu pi jumulanu bain tsaa pen pela veleꞌ keekiñunguiñuya, manbaateya jandala pajtyawa. 11 Juntsa tsaimu makara Saa mumuwa. Tsenñu pinu pen pela veleꞌ keekiñunguiñuya, manbaate pijulaya tsaa pi saa tene tiya deiwa; tsenñu entsa pi sañuꞌ mitya, muba kushnu juiꞌtu, pureꞌ chachi peya deiwa.
12 Entsaba taapallu jumu anjee yaꞌ juipunu tyujtyu pakaanmalan, pen pela veleꞌ keekiñunguiñuya, manbaate pajta bain, naa manbaate kepe pajta bain, naa manbaate makarala bain tsaa danguityu tiya deiwa. Tsaiꞌ pen pela veleꞌ keekiñunguiñuya, manbaate kepe bain, manbaate mandala bain dandajtu tiya deiwa.
13 Tsaiñu ke-eena, kaiꞌsha selu kejtala main jullayu jekachi nendu entsandi daran pañu meewayu: ¡Mika taaju iꞌ puinu dejuve! ¡Mika taaju iꞌ puinu dejuve! ¡Mika taaju iꞌ puinu dejuve! ¡Tusha chumu chachillachi umaa kayu naajuchunga kama pen anjeela yalaꞌ juipunu tyujtyu pakaanu jumula depakaanmalaya! tiꞌ daran pawa.