Esperanza con el Ciudad que Nunca Queda Destrozao

1. Cosa ya habla si Jesus que hay sucede con el Jerusalem?

CUANTO dia antes muri si Jesucristo, ya dale le un detallao profecia acerca na destrozo del Jerusalem y del templo de este. Uno na maga detalle que ya habla le amo que llega el tiempo, el ciudad de Jerusalem hay queda “encirculao de maga soldao.” (Luc. 21:20) Ya menciona tambien le kanila que si puede sila mira con este maga soldao, necesita sila sale dayun alla. Ya sucede el cosa ya habla si Jesus. Ya encircula el maga Romano soldao con el Jerusalem.—Luc. 21:21, 22.

2. Cosa ya habla si apostol Pablo que debe hace el maga Cristiano na Judea y Jerusalem?

² Cuanto año antes encircula el maga Romano soldao con el Jerusalem, ya escribi si apostol Pablo un carta para na maga hermano na Judea y na Jerusalem. Ese carta amo el libro de Maga Hebreo. Ya escribi le se para ayuda kanila que queda preparao na cosa hay sucede—el destrozo del Jerusalem. Ya habla le que aquellos quien quierre salva debe queda preparao deja con el diila maga casa y maga negocio. Mas pa, ya habla si Pablo kanila: ‘Nuay kita un ciudad permanente aqui na mundo, pero ta esperanza kita con el ciudad que hay vene.’—Heb. 13:14, El Nuevo Testamento.

3. Cosa el “ciudad tiene fundacion que . . . nunca ay queda destrosao” y porque kita ta esperanza con ese?

³ Posible, ya gangguia con el maga Cristiano quien ya sale na Jerusalem y Judea. Pero ya salva sila. Ahora ta gangguia tambien kanaton el maga gente cay gendeh kita ta pricura tene comfortable vida ni ta confia que el maga gente puede solva con el maga problema na mundo. Ya iscuji kita hace con ese cay sabe kita que cerca ya destroza con el sistema de este mundo. Ta esperanza kita con el “ciudad tiene fundacion que . . . nunca ay queda destrosao” que amo el ‘ciudad que hay vene’—el Reino del Dios.a (Heb. 11:10, El Nuevo Testamento; Mat. 6:33) Na cada subtitulo de este articulo hay considera kita: (1) si paquemodo el consejo de Pablo ya ayuda con el maga Cristiano del primer siglo que continua esperanza con el ‘ciudad que hay vene,’ (2) si paquemodo si Pablo ya ayuda kanila para prepara na cosa hay sucede y (3) si paquemodo puede ayuda kanaton ahora el cosa le ya habla.

CONFIA CON EL QUIEN NUNCA ABANDONA CONTIGO

4. Porque importante el Jerusalem para na maga Cristiano?

⁴ Importante el Jerusalem para na maga Cristiano. Porque? Cay alli ya establicia del 33 C.E. con el Cristiano congregacion del primer siglo y talli tambien na ese ciudad el cuerpo gobernante. Mas pa, manada Cristiano el tiene casa y maga propiedad na ese lugar. Maskin pa ansina, ya habla si Jesus con el de suyu maga siguidores que debe sila sale na Jerusalem y maskin na Judea.—Mat. 24:16.

5. Paquemodo ya ayuda si Pablo con el maga Cristiano para prepara na cosa hay sucede?

⁵ Para queda preparao el maga Cristiano na cosa hay sucede, ya ayuda kanila si Pablo que entende si cosa ya el mirada de Jehova na ciudad de Jerusalem. Ya hace kanila acorda si Pablo que para con Jehova, gendeh mas sagrao el templo y el maga sacerdote. Maskin el maga sacrificio que ta ofrece alli gendeh mas aceptable para con Ele. (Heb. 8:13) El templo na Jerusalem gendeh mas centro del puro adoranza. Mas pa, manada de aquellos quien ta queda na ese ciudad nuay acepta con el Mesias poreso hay destroza con el Jerusalem y con el templo.—Luc. 13:34, 35.

6. Porque puede gayot ayuda con el maga Cristiano el cosa ya habla si Pablo na Maga Hebreo 13:5, 6?

⁶ Cuando ya escribi si Pablo para na maga Hebreo, enbuenamente el vida del maga gente na Jerusalem. Gane, el un Romano escritor na aquel tiempo ya habla que el Jerusalem amo “el de con todo conocido ciudad na parte Este.” El maga Judio de diferente maga lugar ta anda alla cada año para celebra maga fiesta. Por causa con ese, ta tiene grande incuntrada el maga negocio na ciudad. Asigurao, el cuanto Cristiano ta beneficia tambien con ese. Posible, amo se el razon si porque si Pablo ya habla kanila: “No pone ya lang el di ustedes pensamiento con el cen. Esta contento con el que tiene ustedes.” Despues, ya menciona le con el bonito asiguranza de Jehova que puede incuntra na Escritura: “Nunca [yo] ay deja ni abandona con ustedes.” (Le con el Maga Hebreo 13:5, 6, El Nuevo Testamento; Deut. 31:6; Sal. 118:6) El maga Cristiano quien ta queda na Jerusalem y na Judea ta necesita gayot con este asiguranza. Porque? Cay corto tiempo despues sila ricibi este carta, necesita sila deja con el diila maga casa, maga negocio y otro pa maga propiedad. Mas pa, posible sila enfrenta maga dificultad na lugar onde sila anda.

7. Porque ahora pa lang debe ya kita hace fuerte con el diaton confianza con Jehova?

⁷ Leccion para kanaton: Sabe kita que cerca ya el grande tribulacion y hay destroza ya con el sistema de este maga cosas. (Mat. 24:21) Poreso igual na maga Cristiano del primer siglo, debe kita esta alerto y queda preparao. (Luc. 21:34-36) Durante el grande tribulacion, posible necesita kita deja con el cuanto o con el todo del diaton maga propiedad. Na ese tiempo, necesita kita confia que nunca si Jehova abandona con el de suyu maga siervo. Pero ahora pa lang, maskin nuay pa el grande tribulacion, tiene ya kita el oportunidad para dale mira si onde kita ta pone con el diaton confianza. Puede kita pregunta na diaton mismo cuerpo, ‘El de mio maga decision ba y maga plano na vida ta dale mira que ta confia yo con Dios y gendeh na riqueza?’ (1 Tim. 6:17) Maskin pa puede ayuda kanaton el maga leccion na cosa ya sucede del primer siglo, mas pa el cosa kita experiencia na grande tribulacion. Si ansina, paquemodo kita sabe si cosa gayot kita hace si principia ya el grande tribulacion?

OBEDECE CON AQUELLOS QUIEN TA GUIA

8. Cosa instruccion ya dale si Jesus con el de suyu maga dicipulo?

⁸ Cuanto año despues sila ricibi con el carta de Pablo, ya mira el maga Cristiano que el maga Romano soldao ya encircula ya con el ciudad de Jerusalem. Cuando ya sucede se, sabe el maga Cristiano que necesita ya sila sale na ciudad cay cerca ya con ese destroza. (Mat. 24:3; Luc. 21:20, 24) Pero onde sila anda? Ya habla lang si Jesus kanila: “Si quien talla na Judea, escapa para na monte.” (Luc. 21:21) Ciendo manada monte na ese lugar, paquemodo sila sabe si onde sila anda?

9. Porque posible gendeh asigurao el maga Cristiano si onde monte sila anda? (Mira tambien con el mapa.)

⁹ Considera con el cuanto monte donde puede era anda el maga Cristiano: el maga monte de Samaria, el maga monte na Galilea, el Monte de Hermon, el maga monte de Lebanon y el maga monte na otro lao del Rio de Jordan. (Mira con el mapa.) Dol lejos na peligro el cuanto maga ciudad na ese maga monte. Por ejemplo, el ciudad de Gamla talli na un alto monte que bien dificil para anda. Poreso para na cuanto maga Judio, dol favorable anda na ese lugar cay lejos este na peligro. Pero, alli ya tiene grabe guerra entre na maga Judio y maga Romano, y manada de aquellos quien ta queda alli el ya muri.b

10-11. (a) Na cosa manera posible ya guia si Jehova con el maga Cristiano? (Maga Hebreo 13:7, 17) (b) Paquemodo ya beneficia el maga Cristiano cay ya obedece sila con aquellos quien ta guia? (Mira tambien con el letrato.)

¹⁰ El un historian que si Eusebius ya habla: “El congregacion na Jerusalem ya ricibi un direccion estaba na maga iscujido hombre con quien ya revela el Dios si cosa hace; ya manda kanila . . . sale na Jerusalem antes pa principia el guerra y anda na ciudad de Perea que ta llama Pela.” Entonces, grande el posibilidad que ya usa si Jehova con aquellos quien ta guia na congregacion para dale direccion na maga Cristiano. Un buen lugar el Pela que onde sila puede anda cay gendeh este bien lejos na Jerusalem y medio facil lang para anda alla. Mas pa, mayoria del maga gente na ese lugar gendeh Judio. Poreso, ese ciudad gendeh envuelto na rebellon contra na maga Romano.—Mira con el mapa.

¹¹ Aquellos maga Cristiano quien ya anda para na maga monte ya aplica con el consejo de Pablo que “queda obediente con aquellos quien ta guia” na congregacion. (Le con el Hebreo 13:7, 17, NWT.) Como resulta, ya salva sila. Claro este ta dale mira que nuay gayot si Jehova abandona con aquellos quien ta esperanza con el “ciudad tiene fundacion que . . . nunca ay queda destrosao”—el Reino del Dios.—Heb. 11:10, El Nuevo Testamento.

12-13. Paquemodo si Jehova ya guia con el de suyu maga siervo durante el maga dificil tiempo?

¹² Leccion para kanaton: Ta usa si Jehova con aquellos quien ta guia na congregacion para dale maga especifico direccion con el de suyu maga siervo. Manada maga ejemplo ya menciona na Escritura si paquemodo si Jehova ya usa con el maga fiel hombre para guia con el de suyu maga siervo durante el maga dificil tiempo. (Deut. 31:23; Sal. 77:20) Manada tambien kita ta mira maga evidencia ahora que ta continua si Jehova usa con aquellos quien ta guia.

¹³ Por ejemplo, cuando yan COVID-19 pandemic, ya dale maga direccion na congregacion “aquellos quien ta guia.” Ya ricibi maga instruccion el maga anciano si paquemodo puede continua obtene el maga hermano y hermana con el diila espiritual necesidad. Corto tiempo lang despues principia el pandemia, ya puede kita hace con el asemblea de region na mas de 500 lengguaje por medio na Internet, TV y radio. Primer vez se ya sucede! Claro que ya continua kita ricibi con el maga espiritual comida y como resulta, ya esta kita unido. Puede kita asigura que maskin cosa dificultad kita enfrenta na futuro, hay continua si Jehova ayuda con el aquellos quien ta guia para hace maga justo decision. Puera na obediencia y confianza con Jehova, cosa pa otro maga calidad el puede ayuda kanaton para prepara na grande tribulacion y para puede hace maga justo decision na ese tiempo?

DALE MIRA AMOR Y QUEDA HOSPITABLE

14. Asegun na Maga Hebreo 13:1-3, cosa maga calidad debe cultiva el maga Cristiano cuanto año antes destroza con el Jerusalem?

¹⁴ Si sucede ya el grande tribulacion, bien importante que dale mira que ta ama gayot kita con el diaton maga hermano y hermana. Para hace se, necesita kita sigui con el ejemplo del maga Cristiano de Jerusalem y Judea cay pirmi sila ta ama con uno y otro. (Heb. 10:32-34) Pero cuanto año antes el destrozo del Jerusalem, ya anima kanila que necesita sila queda mas hospitable y mas “ama con uno y otro como hermano y hermana.”c (Le con el Maga Hebreo 13:1-3.) Ansina tambien el cosa kita debe hace mientras ta queda ya mas cerca el fin de este sistema.

15. Porque debe queda hospitable y dale mira amor el maga Cristiano despues sila sale na Jerusalem?

¹⁵ El maga Romano soldao que ya encircula con el Jerusalem bigla lang yan atras. Poreso, ya puede escapa el maga Cristiano. Pero poco lang el cosa sila ya puede lleva. (Mat. 24:17, 18) Por causa con ese, necesita sila man ayudajan mientras ta viaja para na maga monte y maskin cuando talla ya sila ta queda. Asigurao aquel tiempo, tiene sila “maga necesidad na vida.” Poreso, manada sila oportunidad para suporta con uno y otro y queda bondadoso. Si hace sila se, ta dale sila mira que hospitable sila y deverasan ta ama con uno y otro.—Tito 3:14.

16. Paquemodo kita dale mira el diaton amor para na maga hermano y hermana quien ta necesita ayuda? (Mira tambien con el letrato.)

¹⁶ Leccion para kanaton: El amor el ta manda move kanaton para asisti con el diaton maga hermano y hermana quien necesita ayuda. Por ejemplo, por causa na reciente maga guerra y calamidad, manada del diaton maga hermano y hermana el ya queda maga refugee. Pero manada siervo de Jehova el ya asisti kanila na diila material y espiritual necesidad. Ansina el cosa ya experiencia el un hermana de Ukraine quien ya deja con el de suyu casa por causa na guerra. Ele ya habla: “Ya puede gayot yo mira si paquemodo si Jehova ya guia y ya ayuda kanamon por medio del maga hermano y hermana. Bien bueno gayot sila kanamon y ya ayuda sila kanamon cuando talla kame na Ukraine, na Hungary y maskin ahora que taqui ya kame na Germany.” Si hospitable kita con el diaton maga hermano y hermana y ta ayuda kanila, ta permiti kita con Jehova que usa kanaton para dale diila necesidad.—Prov. 19:17; 2 Cor. 1:3, 4.

17. Porque ahora pa lang necesita ya kita queda hospitable y cultiva amor para na maga hermano y hermana?

¹⁷ Asigurao que na futuro, mas necesita kita el ayuda del uno y otro si compara na diaton tiempo ahora. (Hab. 3:16-18) Poreso ahora pa lang, ta enseña ya kanaton si Jehova si paquemodo cultiva amor para na maga hermano y hermana y queda hospitable. Ese maga calidad puede gayot ayuda kanaton na futuro.

SI COSA SUCEDE NA FUTURO

18. Paquemodo kita puede imita con el maga Hebreo Cristiano del primer siglo?

¹⁸ El historia ta dale mira que cuando ya destroza con el Jerusalem, el maga Cristiano quien ya obedece y ya anda para na maga monte ya salva. Ya abandona sila con el ciudad pero nuay gayot kanila abandona si Jehova. Quetal na diaton tiempo ahora? No sabe kita si cosa gayot sucede na futuro. Pero sabe kita que debe kita queda preparao obedece como cosa ya habla si Jesus. (Luc. 12:40) Talli tambien el maga consejo de Pablo que puede kita le na Maga Hebreo. Puede se ayuda kanaton ahora igual si paquemodo se ya ayuda con el maga Cristiano del primer siglo. Mas pa, si Jehova mismo el ya promete con el cada uno kanaton que nunca le deja o abandona kanaton. (Heb. 13:5, 6) Ojala continua kita esperanza con el ciudad que nunca hay queda destrozao—el Reino del Dios—y experiencia de este bendicion hasta para cuando.—Mat. 25:34.