Awit ni Solomon
1 Ang labing maanindot nga awit,+ nga iya ni Solomon:+ 2 “Hinaot siya mohalok kanako sa mga halok sa iyang baba,+ kay ang imong mga pahayag sa pagmahal mas maayo pa kay sa bino.+ 3 Humot ang alimyon sa imong mga lana.+ Ang imong ngalan sama sa lana nga gibubo.+ Mao nga ang mga dalaga nahigugma kanimo. 4 Ikuyog mo ako;+ managan kita. Ang hari nagdala kanako sa iyang sulod nga mga lawak!+ Maglipay kita ug magmaya diha kanimo. Atong hisgotan ang imong mga pahayag sa pagmahal nga labaw pa sa bino.+ Takos lamang nga sila nahigugma kanimo.+
5 “Ako babayeng maitom, apan matahom, Oh kamong mga anak nga babaye sa Jerusalem,+ sama sa mga tolda sa Kedar,+ apan sama sa mga tabil sa tolda+ ni Solomon. 6 Ayaw kamo pagtan-aw kanako tungod kay ako maitom, tungod kay ako nainitan sa adlaw. Ang mga anak nga lalaki sa akong inahan nasuko kanako; ila akong gitudlo nga magbalantay sa mga parasan, bisan tuod ang akong parasan,+ ang akoa, wala nako bantayi.
7 “Sultihi ako, Oh ikaw nga gihigugma sa akong kalag,+ kon asa ikaw magbantay sa panon,+ kon asa ikaw magpapahulay sa mga karnero panahon sa kaudtohon. Kay ngano man nga ako mahimong ingon sa usa ka babaye nga nagtaptap sa pagbangotan taliwala sa mga panon sa kahayopan sa imong mga kauban?”
8 “Kon ikaw wala mahibalo, Oh ikaw nga labing matahom taliwala sa kababayen-an,+ subaya ang mga tunob sa panon ug pasibsiba ang imong mga nating kanding daplin sa mga balongbalong sa mga magbalantay.”
9 “Gipakasama ko ikaw sa akong bayeng kabayo sa mga karo ni Paraon,+ Oh akong hinigugma.+ 10 Ang imong mga aping matahom taliwala sa mga sinalapid nga buhok, ang imong liog nga gikulentasan ug mga lobitos.+ 11 Mga lukong nga bulawan among himoon alang kanimo,+ uban sa mga samag-butones nga plata.”
12 “Samtang ang hari anaa sa iyang lingin nga lamesa ang akong nardo+ nagpaalimyon sa kahumot niini.+ 13 Ang akong minahal alang kanako sama sa usa ka puntil nga mira;+ taliwala sa akong dughan+ siya magpalabay sa kagabhion. 14 Ang akong minahal alang kanako sama sa usa ka pungpong sa henna,+ taliwala sa mga parasan sa En-gedi.”+
15 “Tan-awa! Ikaw matahom, Oh akong hinigugma.+ Tan-awa! Ikaw matahom. Ang imong mga mata ingon nianang sa mga salampati.”+
16 “Tan-awa! Ikaw matahom,+ akong minahal, makapahimuot usab. Ang atong higdaanan+ usab maoy mga dahon. 17 Ang mga sagbayan sa atong dakong balay maoy mga sedro,+ ang atong mga salagunting maoy mga kahoyng junipero.