9 Dayon iyang gihimo ang hawanan.+ Para sa habagatang bahin sa hawanan, naghimo siyag koral nga kortina nga hinimo sa maayong klase nga linubid nga lino, 100 ka maniko.+ 10 Kini dunay 20 ka haligi ug 20 ka suksokanang patongan nga tumbaga. Ang mga kaw-it sa mga haligi ug ang mga pangsumpay* niini maoy plata. 11 Sa amihanang bahin, 100 ka maniko sab ang koral nga kortina. Ang 20 ka haligi niini ug ang 20 ka suksokanang patongan niini maoy tumbaga. Ang mga kaw-it sa mga haligi ug ang mga pangsumpay* niini maoy plata.