Salmo

Ngadto sa direktor. Salmo sa mga anak ni Kore.+

47 Kamong tanang katawhan, ipakpak ang inyong mga kamot.

Singgit mo sa kadaogan ngadto sa Diyos uban ang mga hugyaw sa kalipay.

2 Kay si Jehova nga Labing Hataas maoy kahibulongan;+

Siya ang bantogang Hari sa tibuok yuta.+

3 Gipasakop niya kanato ang mga katawhan;

Gibutang niya ang kanasoran sa ilalom sa atong mga tiil.+

4 Gipili niya alang kanato ang atong panulondon,+

Ang garbo ni Jacob, nga iyang gihigugma.+ (Selah)

5 Misaka ang Diyos samtang ang katawhan malipayong naninggit;

Misaka si Jehova samtang ang katawhan naghuyop sa budyong.*

6 Pag-awit mog mga pagdayeg* sa Diyos, pag-awit mog mga pagdayeg.

Pag-awit mog mga pagdayeg ngadto sa atong Hari, pag-awit mog mga pagdayeg.

7 Kay ang Diyos maoy Hari sa tibuok yuta;+

Pag-awit mog mga pagdayeg ug pagpakitag lawom nga pagsabot.

8 Ang Diyos nahimong Hari ibabaw sa kanasoran.+

Ang Diyos naglingkod sa iyang balaang trono.

9 Ang mga pangulo sa mga katawhan nagtigom

Uban sa katawhan sa Diyos ni Abraham.

Kay ang mga magmamando* sa yuta iya sa Diyos.

Siya gibayaw pag-ayo.+