IKADUHANG BASAHON SA MGA CRONICAS

1 Ang pagkahari ni Solomon nga anak ni David milig-on pag-ayo, ug si Jehova nga iyang Diyos nag-uban kaniya ug naghimo kaniya nga gamhanan kaayo.+

2 Gipatawag ni Solomon ang tibuok Israel, ang mga pangulo sa kada 1,000 ug sa kada 100, ang mga maghuhukom, ug ang tanang pangulo sa tibuok Israel, ang mga pangulo sa mga banay.* 3 Unya si Solomon ug ang tibuok kongregasyon miadto sa taas nga dapit sa Gabaon+ kay atua didto ang tolda nga tagboanan sa matuod nga Diyos, ang tolda nga gihimo ni Moises nga alagad ni Jehova didto sa kamingawan. 4 Apan gidala ni David ang Kaban sa matuod nga Diyos gikan sa Kiriat-jearim+ ngadto sa dapit nga giandam ni David alang niini; siya nagpatindog ug tolda alang niini sa Jerusalem.+ 5 Ug ang halaran nga tumbaga*+ nga gihimo ni Bezalel+ nga anak ni Uri nga anak ni Hur gibutang sa atubangan sa tabernakulo ni Jehova; ug si Solomon ug ang kongregasyon mag-ampo atubangan niini.* 6 Karon si Solomon nagtanyag didto ug mga halad sa atubangan ni Jehova, ug siya nagtanyag ug 1,000 ka halad nga sinunog sa halaran nga tumbaga+ sa tolda nga tagboanan.

7 Niadtong gabhiona ang Diyos nagpakita kang Solomon ug miingon kaniya: “Pangayo kon unsay gusto nimong ihatag nako kanimo.”+ 8 Busa si Solomon miingon sa Diyos: “Ikaw nagpakitag dakong maunongong gugma sa akong amahan nga si David,+ ug ikaw naghimo kanakong hari puli kaniya.+ 9 Karon, Oh Jehova nga Diyos, hinaot nga ang imong saad sa akong amahan nga si David mapamatud-ang kasaligan,+ kay ikaw ang naghimo kanako nga hari sa katawhan nga sama ka daghan sa abog sa yuta.+ 10 Hatagi ako karon ug kaalam ug kahibalo+ sa pagdumala niini nga katawhan,* kay kinsay makahukom niining imong dakong katawhan?”+

11 Unya ang Diyos miingon kang Solomon: “Kay kini ang gitinguha sa imong kasingkasing ug wala ka mangayog katigayonan, mga bahandi, ug dungog o kamatayon niadtong nagdumot kanimo, o kaha taas nga kinabuhi,* apan ikaw nangayog kaalam ug kahibalo sa paghukom sa akong katawhan nga ibabaw kanila gihimo ko ikaw nga hari,+ 12 ang kaalam ug kahibalo igahatag kanimo; apan ihatag usab nako kanimo ang katigayonan ug mga bahandi ug dungog nga wala mabatoni ni bisan kinsang hari nga nauna kanimo ug dili usab mabatonan ni bisan kinsang hari nga mosunod kanimo.”+

13 Busa si Solomon migikan sa taas nga dapit sa Gabaon,+ gikan sa atubangan sa tolda nga tagboanan, ug miadto sa Jerusalem; ug siya nagmando sa Israel. 14 Si Solomon nagpadayon sa pagtigom ug mga karo ug mga kabayo;* siya dunay 1,400 ka karo ug 12,000 ka kabayo,*+ ug iya kining gibutang sa mga siyudad sa mga karo+ ug sa Jerusalem duol sa hari.+ 15 Ang hari nakabaton ug plata* ug bulawan sa Jerusalem nga sama ka daghan sa mga bato,+ ug kahoyng sedro nga sama ka daghan sa mga kahoyng sikomoro sa Sepela.+ 16 Ang mga kabayo ni Solomon gipalit gikan sa Ehipto,+ ug ang mga negosyante sa hari mamalit ug mga kabayo nga dinaghan.*+ 17 Ang matag karo nga gikan sa Ehipto mokantidad ug 600 ka pirasong plata, ug ang usa ka kabayo mokantidad ug 150; unya ila kining ibaligya sa tanang hari sa mga Hitihanon ug sa mga hari sa Sirya.

2 Karon si Solomon nagsugo nga tukoron ang balay alang sa ngalan ni Jehova+ ug ang balay* alang sa iyang gingharian.+ 2 Si Solomon nagpilig 70,000 ka lalaki ingong mga trabahador,* 80,000 ka lalaki ingong mga magtatabas ug bato sa kabukiran,+ ug 3,600 ingong ilang mga tigdumala.+ 3 Dugang pa, si Solomon nagpadalag mensahe ngadto kang Hiram+ nga hari sa Tiro: “Buhata alang kanako ang imong gibuhat alang kang David nga akong amahan dihang nagpadala ka kaniyag kahoyng sedro sa pagtukod ug balay* nga kapuy-an.+ 4 Karon ako magtukod ug balay alang sa ngalan ni Jehova nga akong Diyos, sa pagbalaan niini alang kaniya, sa pagsunog ug humot nga insenso+ sa iyang atubangan, ug usab alang sa halad nga tinapay*+ nga regular nga ginatanyag ug sa mga halad nga sinunog, sa buntag ug gabii,+ sa mga Igpapahulay,+ sa bag-ong mga bulan,+ ug sa panahon sa mga pista+ ni Jehova nga among Diyos. Kini maoy obligasyon sa Israel hangtod sa panahong walay tino. 5 Ang balay nga akong tukoron dako, kay ang among Diyos mas labaw kay sa ubang mga diyos. 6 Ug kinsa may makahimo sa pagtukod ug balay alang kaniya? Kay ang kalangitan ug ang langit sa mga langit dili paigo kaniya,+ busa kinsa man ko nga magtukod ug balay alang kaniya? Ang ako lang mahimo mao ang pagtukod ug balay alang sa pagpaaso ug mga halad sa iyang atubangan. 7 Karon padad-i kog artesano nga hanas sa paggamag mga butang gikan sa bulawan, plata, tumbaga,+ puthaw, purpura* nga delana,* dagtom-pula nga panapton, ug asul nga hilo ug kinsa mahibalong mokulit. Siya magtrabaho sa Juda ug sa Jerusalem uban sa akong hanas nga mga artesano, nga gitagana ni David nga akong amahan.+ 8 Ug padad-i kog mga kahoy nga sedro, junipero,+ ug algum+ gikan sa Lebanon, kay nahibalo ko pag-ayo nga ang imong mga alagad eksperyensiyado sa pagputol sa mga kahoy sa Lebanon.+ Ang akong mga alagad moduyog sa pagtrabaho sa imong mga alagad+ 9 sa pag-andam ug daghan kaayong kahoy alang kanako, kay ang balay nga akong tukoron dako gyod kaayo. 10 Ania, magtagana kog pagkaon alang sa imong mga alagad+ nga mamutol sa mga kahoy: 20,000 ka cor* nga trigo, 20,000 ka cor nga sebada, 20,000 ka bath* nga bino, ug 20,000 ka bath nga lana.”

11 Niana si Hiram nga hari sa Tiro nagpadalag sulat ngadto kang Solomon, nga nag-ingon: “Kay si Jehova nahigugma sa iyang katawhan, siya naghimo kanimo nga ilang hari.” 12 Unya si Hiram miingon: “Madayeg unta si Jehova nga Diyos sa Israel, nga naghimo sa langit ug sa yuta, kay iyang gihatagan si Haring David ug maalamong anak+ nga may kaalam ug pagsabot,+ kinsa magtukod ug balay alang kang Jehova ug balay alang sa iyang gingharian. 13 Karon magpadala kog hanas nga artesano nga may pagsabot, si Hiram-abi,+ 14 nga anak sa usa ka babayeng Danhanon apan ang iyang amahan taga-Tiro; siya eksperyensiyado sa paggamag mga butang gikan sa bulawan, plata, tumbaga, puthaw, bato, kahoy, purpura nga delana, asul nga hilo, maayong klase nga panapton, ug dagtom-pula nga panapton.+ Siya makahimo sa tanang matang sa mga kinulit ug makahimo sa bisan unsang disenyo nga ihatag kaniya.+ Siya magtrabaho uban sa imong hanas nga mga artesano ug sa hanas nga mga artesano sa akong ginoong si David nga imong amahan. 15 Karon hinaot ipadala sa akong ginoo ang trigo, sebada, lana, ug bino nga iyang gisaad sa iyang mga alagad.+ 16 Ug mamutol mig mga kahoy gikan sa Lebanon+ sumala sa gikinahanglan nimong gidaghanon, ug dad-on namo kini kanimo ingong mga gakit agi sa dagat paingon sa Jope;+ ug ikaw ang magdala niini sa Jerusalem.”+

17 Unya giihap ni Solomon ang tanang lalaki nga langyawng residente sa yuta sa Israel,+ sama sa gihimo ni David nga iyang amahan,+ ug nahibaloan nga dihay 153,600. 18 Busa iyang gitudlo ang 70,000 kanila ingong mga trabahador,* ang 80,000 ingong mga magtatabas ug bato+ sa kabukiran, ug ang 3,600 ingong mga tigdumala sa pagtrabaho sa katawhan.+

3 Unya gisugdan ni Solomon ang pagtukod sa balay ni Jehova+ didto sa Jerusalem sa Bukid sa Moria,+ diin si Jehova nagpakita kang David nga iyang amahan,+ sa dapit nga giandam ni David diha sa giokanan ni Ornan+ nga Jebusihanon. 2 Siya nagsugod pagtukod sa ikaduhang adlaw sa ikaduhang bulan, sa ikaupat nga tuig sa iyang paghari. 3 Ug ang pundasyon nga gipahimutang ni Solomon sa pagtukod sa balay sa matuod nga Diyos may gitas-ong 60 ka maniko ug may gilapdong 20 ka maniko,+ sumala sa kanhing sukod.* 4 Ang portiko* sa atubangan may gilapdong 20 ka maniko, nga parehas sa gilapdon sa balay, ug 20 ka maniko* ang gihabogon niini; ug ang sulod niini gihaklapan ug purong bulawan.+ 5 Ang dakong balay iyang gihaklapan ug kahoyng junipero. Dayon gihaklapan niya kinig maayong klase nga bulawan,+ ug unya iyang gidekorasyonan kinig mga hulagway sa kahoyng palma+ ug mga kadena.+ 6 Dugang pa, iyang gidekorasyonan ang balay ug nindot nga bililhong mga bato;+ ug ang bulawan+ nga iyang gigamit maoy bulawan gikan sa Parvaim. 7 Iyang gihaklapan ug bulawan ang balay, ang mga salagunting, ang mga bakanan, ang mga bungbong niini, ug ang mga pultahan niini;+ ug nagkulit siyag mga kerubin diha sa mga bungbong.+

8 Karon iyang gihimo ang Labing Balaan nga lawak;*+ 20 ka maniko ang gitas-on niini, nga parehas sa gilapdon sa balay, ug 20 ka maniko ang gilapdon niini. Iya kining gihaklapan ug 600 ka talanton* nga maayong klase nga bulawan.+ 9 Ang gibug-aton sa bulawan alang sa mga lansang maoy 50 ka siklo;* ug ang mga lawak sa atop iyang gihaklapan ug bulawan.

10 Unya diha sa Labing Balaan nga lawak* naghimo siyag duha ka kinulit nga mga kerubin, ug iya kining gihaklapan ug bulawan.+ 11 Ang katibuk-ang gitas-on sa mga pako sa mga kerubin+ maoy 20 ka maniko; ang usa ka pako sa unang kerubin lima ka maniko ang gitas-on ug misangko sa bungbong sa balay, ug ang usa pa ka pako niini lima ka maniko ang gitas-on ug midapat sa usa ka pako sa laing kerubin. 12 Ug ang usa ka pako sa laing kerubin lima ka maniko ang gitas-on ug misangko sa pikas bungbong sa balay, ug ang usa pa ka pako niini lima ka maniko ang gitas-on ug midapat sa usa ka pako sa unang kerubin. 13 Ang nagbukhad nga mga pako niini nga mga kerubin maoy 20 ka maniko; ug kini nagbarog nga nag-atubang sa sulod.*

14 Naghimo usab siyag kortina+ nga gama sa asul nga hilo, purpura nga delana,* dagtom-pula nga panapton, ug maayong klase nga panapton, ug gibordahan kinig mga kerubin.+

15 Unya naghimo siyag duha ka haligi+ atubangan sa balay, 35 ka maniko ang gitas-on, ug ang uloulo sa ibabaw sa matag haligi maoy lima ka maniko.+ 16 Ug naghimo siyag mga kadena nga samag mga kuwentas, ug gibutang kini sa ibabaw sa mga haligi, ug naghimo siyag 100 ka disenyo nga pormag prutas nga granada ug gibutang kini sa mga kadena. 17 Gipahimutang niya ang mga haligi sa atubangan sa templo, ang usa sa tuo* ug ang usa sa wala;* ang diha sa tuo gitawag niyag Jakin* ug ang diha sa wala Boaz.*

4 Unya naghimo siyag halaran nga tumbaga,+ nga 20 ka maniko ang gitas-on, 20 ka maniko ang gilapdon, ug 10 ka maniko ang gihabogon.

2 Naghimo siyag Dagatdagat*+ nga hinulma nga metal. Lingin kini, ug 10 ka maniko ang diyametro sa baba niini ug 5 ka maniko ang gihabogon niini, ug nagkinahanglag 30 ka maniko nga pisi aron malibot kini.+ 3 Ug sa ubos niini dihay naglibot nga dekorasyon nga pormag mga pakwan,+ 10 sa matag usa ka maniko palibot sa Dagatdagat. Duha ka laray ang mga pakwan ug gilakip kini paghulma dihang giumol ang Dagatdagat. 4 Kini nagpatong sa 12 ka torong baka,+ 3 ang nag-atubang sa amihanan, 3 ang nag-atubang sa kasadpan, 3 ang nag-atubang sa habagatan, ug 3 ang nag-atubang sa sidlakan; ug ang Dagatdagat nagpatong kanila, ug silang tanan nagtalikdanay. 5 Ug ang gibag-on niini usa ka dapal;* ug ang baba niini sama pagkabuhat sa baba sa kopa, samag bulak nga lirio. Kini kasudlag 3,000 ka bath* nga tubig.

6 Dugang pa, siya naghimog 10 ka kawakawa alang sa paghugas, ug iyang gibutang ang 5 sa tuo ug ang 5 sa wala.+ Ilang hugasan diha niana ang mga butang nga gigamit alang sa halad nga sinunog.+ Apan ang Dagatdagat maoy alang sa mga saserdote sa ilang paghugas.+

7 Unya siya naghimog 10 ka tangkawan* nga bulawan,+ sumala sa instruksiyon,+ ug gibutang kini sa templo, 5 sa tuo ug 5 sa wala.+

8 Siya naghimo usab ug 10 ka lamesa ug gibutang kini sa templo, 5 sa tuo ug 5 sa wala;+ ug siya naghimog 100 ka panaksang bulawan.

9 Dayon iyang gihimo ang hawanan+ sa mga saserdote+ ug ang dakong hawanan*+ ug ang mga pultahan sa hawanan, ug iyang gihaklapan ug tumbaga ang mga pultahan niini. 10 Ug iyang gibutang ang Dagatdagat sa tuo nga dapit, sa habagatan-sidlakan.+

11 Gihimo usab ni Hiram ang mga sudlanag abo, mga pala, ug mga panaksan.+

Busa nahuman ni Hiram ang buluhaton nga iyang gihimo alang kang Haring Solomon diha sa balay sa matuod nga Diyos:+ 12 ang duha ka haligi+ ug ang pormag panaksan nga mga uloulo diha sa ibabaw sa duha ka haligi; ang duha ka ginambat+ sa pagtabon sa duha ka pormag panaksan nga uloulo nga diha sa ibabaw sa mga haligi; 13 ang 400 ka granada+ alang sa duha ka ginambat, duha ka laray sa mga disenyo nga pormag prutas nga granada alang sa matag ginambat, sa pagtabon sa duha ka pormag panaksan nga uloulo nga diha sa ibabaw sa mga haligi;+ 14 ang 10 ka kareton* ug ang 10 ka kawakawa diha sa mga kareton;+ 15 ang Dagatdagat ug ang 12 ka torong baka sa ilalom niini;+ 16 ug ang mga sudlanag abo, mga pala, mga tenedor,+ ug ang tanan nilang galamiton nga gigama ni Hiram-abiv+ sa pinasinaw nga tumbaga alang kang Haring Solomon alang sa balay ni Jehova. 17 Kini gihulma sa hari sa hulmahan nga yutang kulonon diha sa distrito sa Jordan taliwala sa Sucot+ ug Zereda. 18 Kining tanang galamiton gihimo ni Solomon nga dinaghan; ang gibug-aton sa tumbaga wala mahibaloi tungod sa kadaghan.+

19 Gihimo ni Solomon ang tanang galamiton+ alang sa balay sa matuod nga Diyos: ang halaran nga bulawan;+ ang mga lamesa+ alang sa halad nga tinapay;+ 20 ang mga tangkawan ug mga lampara niini nga purong bulawan,+ nga pasigaon atubangan sa kinasulorang lawak sumala sa sugo; 21 ug ang mga bulak, mga lampara, ug mga kimpit, nga gama sa bulawan, sa labing puro nga bulawan; 22 ang mga pangpalong, panaksan, kopa, ug mga insensaryo, nga gama sa purong bulawan; ug ang entrada sa balay, ang sulod nga pultahan niini alang sa Labing Balaan,+ ug ang mga pultahan sa balay sa templo, nga gama sa bulawan.+

5 Busa natapos ni Solomon ang tanang buluhaton nga kinahanglan niyang himoon alang sa balay ni Jehova.+ Unya gipangsulod ni Solomon ang mga butang nga gibalaan ni David nga iyang amahan,+ ug iyang gibutang ang plata, bulawan, ug ang tanang galamiton diha sa mga tipiganag bahandi sa balay sa matuod nga Diyos.+ 2 Niadtong panahona, gitigom ni Solomon ang mga ansiyano sa Israel, ang tanang pangulo sa mga tribo, ang mga pangulo sa mga banay* sa Israel. Sila nangadto sa Jerusalem aron dad-on ang kaban sa pakigsaad ni Jehova gikan sa Siyudad ni David,+ nga mao, ang Zion.+ 3 Ang tanang lalaki sa Israel nagtigom atubangan sa hari panahon sa pista* nga ginahimo sa ikapitong bulan.+

4 Busa ang tanang ansiyano sa Israel nangadto, ug gialsa sa mga Levihanon ang Kaban.+ 5 Ilang gidala ang Kaban, ang tolda nga tagboanan,+ ug ang tanang balaang galamiton nga didto sa tolda. Gidala kini sa mga saserdote ug mga Levihanon.* 6 Si Haring Solomon ug ang tibuok nga katigoman sa Israel, nga gipatawag sa pagpakigkita kaniya, didto atubangan sa Kaban. Daghan kaayong karnero ug baka ang gihalad+ nga kini dili na maihap sa kadaghan. 7 Unya gidala sa mga saserdote ang kaban sa pakigsaad ni Jehova ngadto sa dapit niini, ngadto sa kinasulorang lawak sa balay, ang Labing Balaan, sa ilalom sa mga pako sa mga kerubin.+ 8 Busa ang mga pako sa mga kerubin nagbukhad ibabaw sa nahimutangan sa Kaban, mao nga ang Kaban ug ang mga yayongan+ niini nalandongan sa mga kerubin. 9 Tag-as kaayo ang mga yayongan maong ang mga tumoy niini makita gikan sa Balaan sa atubangan sa kinasulorang lawak, apan dili kini makita sa gawas. Ug atua kini didto hangtod niining adlawa. 10 Walay laing sulod ang Kaban gawas sa duha ka papan nga gibutang ni Moises niini didto sa Horeb,+ dihang si Jehova naghimog pakigsaad+ uban sa katawhan sa Israel samtang sila nanggula sa Ehipto.+

11 Dihang ang mga saserdote nanggula gikan sa balaang dapit (kay ang tanang saserdote nga atua didto nagbalaan na man sa ilang kaugalingon,+ bisag unsa man ang ilang dibisyon),+ 12 ang tanang Levihanon nga mga mag-aawit+ nga sakop ni Asap,+ Heman,+ Jedutun,+ ug sa ilang mga anak nga lalaki ug sa ilang mga igsoong lalaki nagbesti ug maayong klaseng panapton, nga naggunit ug mga simbal, dekuwerdas nga mga instrumento, ug mga alpa; sila nagtindog sa sidlakan sa halaran, ug uban kanila ang 120 ka saserdote nga nagpatingog sa mga trompeta.+ 13 Sa higayon nga ang mga tigtrompeta ug ang mga mag-aawit nagkahiusa* sa pagdayeg ug pagpasalamat kang Jehova, ug sa nadunggan ang tingog sa mga trompeta, mga simbal, ug sa ubang instrumento sa musika samtang sila nagdayeg kang Jehova, “kay siya maayo; ang iyang maunongong gugma molungtad hangtod sa hangtod,”+ ang balay, ang balay ni Jehova, napuno sa panganod.+ 14 Ang mga saserdote wala na makapadayon sa ilang buluhaton tungod sa panganod, kay ang balay sa matuod nga Diyos napuno sa himaya ni Jehova.+

6 Niadtong panahona si Solomon miingon: “Oh Jehova, ikaw nag-ingon nga mopuyo ka sa kangitngit.+ 2 Karon nagtukod kog halangdong balay alang kanimo, usa ka permanenteng puy-anan nga imong puy-an hangtod sa hangtod.”+

3 Unya ang hari miatubang ug mitan-aw sa tibuok kongregasyon sa Israel nga nagtindog didto, ug sila iyang gipanalanginan.+ 4 Siya miingon: “Madayeg unta si Jehova nga Diyos sa Israel, ang usa nga pinaagi sa iyang baba misaad sa akong amahan nga si David ug nagtuman niini pinaagi sa iyang mga kamot, nga nag-ingon, 5 ‘Sukad sa adlaw nga akong gipagawas ang akong katawhan gikan sa yuta sa Ehipto, wala ko magpilig usa ka siyudad gikan sa tanang tribo sa Israel nga akong tukorag balay diin didto magpabilin ang akong ngalan,+ ug wala ko magpilig tawo nga mahimong pangulo sa akong katawhang Israel. 6 Apan akong gipili ang Jerusalem+ diin magpabilin ang akong ngalan, ug akong gipili si David nga mangulo sa akong katawhang Israel.’+ 7 Ug tinguha sa kasingkasing sa akong amahan nga si David ang pagtukod ug balay alang sa ngalan ni Jehova nga Diyos sa Israel.+ 8 Apan si Jehova miingon sa akong amahan nga si David, ‘Tinguha sa imong kasingkasing ang pagtukod ug balay alang sa akong ngalan, ug maayo nga gitinguha kini sa imong kasingkasing. 9 Apan dili ikaw ang magtukod sa balay, kondili ang imong anak nga lalaki nga matawo kanimo mao ang magtukod sa balay alang sa akong ngalan.’+ 10 Gituman ni Jehova ang iyang gisaad, kay mipuli ko sa akong amahan nga si David ug ako naglingkod sa trono sa Israel,+ sumala sa gisaad ni Jehova.+ Gitukod usab nako ang balay alang sa ngalan ni Jehova nga Diyos sa Israel, 11 ug didto nako gibutang ang Kaban nga nasudlan sa pakigsaad+ nga gihimo ni Jehova uban sa katawhan sa Israel.”

12 Unya siya mitindog atubangan sa halaran ni Jehova sa atubangan sa tibuok kongregasyon sa Israel, ug iyang gibayaw ang iyang mga kamot.+ 13 (Kay si Solomon naghimog plataporma nga tumbaga ug gibutang kini sa tunga sa hawanan.*+ Ang gitas-on niini maoy lima ka maniko,* ang gilapdon niini lima ka maniko, ug ang gihabogon niini tulo ka maniko; ug siya nagtindog didto.) Ug siya miluhod sa atubangan sa tibuok kongregasyon sa Israel ug gibayaw ang iyang mga kamot sa langit,+ 14 ug siya miingon: “Oh Jehova nga Diyos sa Israel, walay Diyos nga sama nimo sa langit o sa yuta, nga nagatuman sa pakigsaad ug nagapakitag maunongong gugma sa imong mga alagad kinsa nag-alagad kanimo sa tibuok nilang kasingkasing.+ 15 Gituman nimo ang imong gisaad sa imong alagad nga si David nga akong amahan.+ Ikaw ang nagsaad niini pinaagi sa imong baba, ug niining adlawa imo kining gituman pinaagi sa imong kamot.+ 16 Ug karon, Oh Jehova nga Diyos sa Israel, tumana ang imong gisaad sa imong alagad nga si David nga akong amahan dihang ikaw miingon: ‘Kanunay nga dunay kaliwat nimo sa akong atubangan nga maglingkod sa trono sa Israel, kon ang imong mga anak mag-amping sa ilang pagkinabuhi pinaagi sa pagsubay sa akong balaod,+ sama sa imong paglakaw sa akong atubangan.’+ 17 Ug karon, Oh Jehova nga Diyos sa Israel, hinaot nga matuman ang imong gisaad ngadto sa imong alagad nga si David.

18 “Apan mopuyo ba gayod ang Diyos uban sa katawhan dinhi sa yuta?+ Tan-awa! Dili makaigo kanimo ang kalangitan, oo, ang langit sa mga langit;+ unsa pa kaha kining balaya nga akong gitukod!+ 19 Karon hatagig pagtagad ang pag-ampo sa imong alagad ug ang iyang hangyo alang sa pabor, Oh Jehova nga akong Diyos, ug pamatia ang pagtuaw alang sa tabang ug ang pag-ampo sa imong alagad nganha kanimo. 20 Hinaot nga bantayan sa imong mga mata kining balaya adlaw ug gabii, ang dapit nga imong giingon nga diha nimo ibutang ang imong ngalan,+ aron mamati sa pag-ampo sa imong alagad nga giampo paatubang niining dapita. 21 Ug pamatia ang mga pangaliyupo sa imong alagad alang sa tabang ug ang mga pangaliyupo sa imong katawhang Israel dihang sila moampo paatubang niining dapita,+ ug hinaot nga maminaw ka gikan sa imong puloy-anan, gikan sa kalangitan;+ oo, hinaot maminaw ka ug mopasaylo.+

22 “Kon ang usa ka tawo gisumbong nga nakasala sa iyang isigkatawo ug siya iyang papanumpaon,* ug samtang nailalom sa panumpa* siya moadto sa imong halaran niining balaya,+ 23 hinaot nga maminaw ka gikan sa kalangitan ug molihok ug mohukom sa imong mga alagad pinaagi sa pagbalos sa tawong daotan ug pagsilot kaniya sumala sa iyang gibuhat+ ug pinaagi sa pagpahayag sa tawong matarong nga siya inosente* ug sa pagganti kaniya sumala sa iyang pagkamatarong.+

24 “Ug kon ang imong katawhang Israel mapildi sa kaaway kay sila nagpadayon sa pagpakasala batok kanimo,+ ug sila mobalik ug himayaon nila ang imong ngalan+ ug sila moampo+ ug mohangyo kanimo niining balaya alang sa pabor,+ 25 hinaot nga maminaw ka gikan sa kalangitan+ ug pasayloon nimo ang sala sa imong katawhang Israel ug dad-on silag balik sa yuta nga imong gihatag kanila ug sa ilang mga katigulangan.+

26 “Dihang ang kalangitan matakpan ug dili moulan+ kay sila nagpadayon sa pagpakasala batok kanimo,+ ug sila moampo paatubang niining dapita ug himayaon nila ang imong ngalan ug talikdan nila ang ilang sala kay imo silang gipaubos,*+ 27 hinaot nga maminaw ka gikan sa kalangitan ug pasayloon nimo ang sala sa imong mga alagad, sa imong katawhang Israel, kay tudloan nimo sila bahin sa maayong dalan nga angay nilang subayon;+ ug magpaulan+ ka sa imong yuta nga gihatag nimo sa imong katawhan ingong panulondon.

28 “Kon may gutom sa yuta,+ o kamatay,+ makapagbang kainit, agup-op,+ mga dulon, o kusog mokaon nga mga dulon*+ o kon ang ilang mga kaaway molikos diha sa bisan unsa nga siyudad sa yuta*+ o may motunghang laing matang sa hampak o sakit,+ 29 bisan unsang pag-ampo,+ bisan unsang hangyo alang sa pabor+ nga himoon ni bisan kinsang tawo o sa tibuok nimong katawhang Israel (kay ang matag usa nahibalo sa iyang hampak ug sa iyang kasakit)+ dihang ilang bayawon ang ilang mga kamot paatubang niining balaya,+ 30 hinaot nga maminaw ka gikan sa kalangitan, ang imong puloy-anan,+ ug hinaot nga magpasaylo ka;+ ug gantihan nimo ang matag usa sumala sa tanan niyang dalan, kay ikaw nahibalo sa iyang kasingkasing (ikaw lang gyod ang nahibalo sa kasingkasing sa tawo),+ 31 aron sila mahadlok kanimo pinaagi sa paglakaw sa imong mga dalan sa tanang adlaw nga sila buhi sa yuta nga imong gihatag sa among mga katigulangan.

32 “Maylabot usab sa langyaw nga dili bahin sa imong katawhang Israel kinsa moanhi gikan sa layong yuta tungod sa imong bantogang ngalan*+ ug sa imong kusgang kamot ug gamhanang bukton, ug siya moanhi ug moampo paatubang niining balaya,+ 33 hinaot nga mamati ka gikan sa kalangitan, ang imong puloy-anan, ug imong himoon ang tanan nga ihangyo kanimo sa langyaw, aron ang tanang katawhan sa yuta mahibalo sa imong ngalan+ ug mahadlok kanimo, sama sa imong katawhang Israel, ug ilang mahibaloan nga ang imong ngalan ania niining balaya nga akong gitukod.

34 “Kon ipadala nimo ang imong katawhan aron makiggubat sa ilang mga kaaway, bisan asa pa kini,+ ug sila moampo+ kanimo paatubang niini nga siyudad nga imong gipili ug paatubang sa balay nga akong gitukod alang sa imong ngalan,+ 35 hinaot nga imong paminawon gikan sa kalangitan ang ilang pag-ampo ug ang ilang hangyo alang sa pabor ug maghukom ka alang kanila.+

36 “Kon sila makasala kanimo (kay walay tawo nga dili makasala),+ ug masuko ka kanila ug itugyan nimo sila sa kaaway, ug sila bihagon sa ilang mga mamimihag ug dad-on ngadto sa layo o duol nga yuta,+ 37 ug makaamgo sila didto sa yuta diin sila gidalang binihag, ug sila mobalik kanimo ug mohangyo alang sa pabor didto sa yuta diin sila mga binihag, nga mag-ingon, ‘Kami nakasala ug nakahimog sayop; daotan ang among gihimo,’+ 38 ug sila mobalik kanimo sa tibuok nilang kasingkasing+ ug sa tibuok nilang kalag* didto sa yuta diin sila gidala ingong binihag,+ ug sila moampo paatubang sa ilang yuta nga imong gihatag sa ilang mga katigulangan ug sa siyudad nga imong gipili+ ug sa balay nga akong gitukod alang sa imong ngalan, 39 hinaot nga maminaw ka gikan sa kalangitan, ang imong puloy-anan, sa ilang pag-ampo ug sa ilang hangyo alang sa pabor, ug maghukom ka alang kanila+ ug magpasaylo sa imong katawhan nga nakasala kanimo.

40 “Karon, Oh akong Diyos, hinaot nga imong bukhon ang imong mga mata ug mamati ang imong igdulungog sa pag-ampo nga gitanyag dinhi* niining dapita.+ 41 Oh Jehova nga Diyos, pahulay karon dinhi niining dapita,+ ikaw ug ang Kaban sa imong kusog. Hinaot nga ang imong mga saserdote, Oh Jehova nga Diyos, mabestihan sa kaluwasan, ug hinaot nga ang imong mga maunongon magsadya sa pagkamaayo.+ 42 Oh Jehova nga Diyos, ayawg isalikway ang* imong dinihogan.*+ Hinaot nga hinumdoman nimo ang imong maunongong gugma ngadto kang David nga imong alagad.”+

7 Pagkahuman gayod ug ampo ni Solomon,+ dihay kalayo nga nanaog gikan sa langit+ ug miut-ot sa halad nga sinunog ug sa mga halad, ug ang balay napuno sa himaya ni Jehova.+ 2 Ang mga saserdote wala makasulod sa balay ni Jehova kay ang balay ni Jehova napuno sa himaya ni Jehova.+ 3 Ug ang tibuok katawhan sa Israel nagtan-aw dihang ang kalayo nanaog ug ang himaya ni Jehova anaa ibabaw sa balay, ug sila nangyukbo diha sa salog ug nanghapa ug nagpasalamat kang Jehova, “kay siya maayo; ang iyang maunongong gugma molungtad hangtod sa hangtod.”

4 Karon ang hari ug ang tibuok katawhan nagtanyag ug mga halad sa atubangan ni Jehova.+ 5 Si Haring Solomon naghalad ug 22,000 ka baka ug 120,000 ka karnero. Busa giinagurahan sa hari ug sa tibuok katawhan ang balay sa matuod nga Diyos.+ 6 Ang mga saserdote nagtindog diha sa ilang mga puwesto, ingon man ang mga Levihanon nga may mga instrumento alang sa pagduyog sa pag-awit kang Jehova.+ (Gihimo ni Haring David kini nga mga instrumento sa pagpasalamat kang Jehova​—⁠“kay ang iyang maunongong gugma molungtad hangtod sa hangtod”⁠—​dihang si David magdayeg uban kanila.*) Ug ang mga saserdote nagpalanog sa mga trompeta+ diha sa ilang atubangan, samtang ang tanang Israelinhon nagtindog.

7 Unya gibalaan ni Solomon ang tunga sa hawanan nga diha sa atubangan sa balay ni Jehova, kay didto niya ihalad ang mga halad nga sinunog+ ug ang mga tambok sa mga halad sa panag-ambit, kay ang mga halad nga sinunog, mga halad nga lugas,+ ug ang mga tambok+ dili maarang diha sa halaran nga tumbaga+ nga gihimo ni Solomon. 8 Nianang panahona, gihimo ni Solomon ang pista sulod sa pito ka adlaw+ uban sa tibuok Israel, usa ka dako kaayong kongregasyon gikan sa Lebo-hamat* hangtod sa Walog* sa Ehipto.+ 9 Apan sa ikawalong adlaw* sila naghimo ug solemneng panagkatigom,+ kay ang inagurasyon sa halaran gihimo nila sulod sa pito ka adlaw ug ang pista sulod sa pito ka adlaw. 10 Unya sa ika-23 nga adlaw sa ikapitong bulan, iyang gipapauli ang katawhan sa ilang mga balay nga nagsadya+ ug malipayon ang kasingkasing tungod sa pagkamaayo nga gipakita ni Jehova kang David ug kang Solomon ug sa Israel nga iyang katawhan.+

11 Busa nahuman ni Solomon ang balay ni Jehova ug ang balay* sa hari;+ ug ang tanang giplano ni Solomon nga buhaton labot sa balay ni Jehova ug sa iyang kaugalingong balay iya gayong nahimo.+ 12 Unya si Jehova nagpakita kang Solomon+ sa pagkagabii ug miingon: “Nadungog nako ang imong pag-ampo, ug akong napili kining dapita alang sa akong kaugalingon ingong balay sa paghalad.+ 13 Dihang akong takpan ang kalangitan ug unya dili moulan ug dihang akong sugoon ang mga dulon sa paglamoy sa yuta ug kon magpadala kog kamatay sa akong katawhan, 14 kon ang akong katawhan nga ginatawag sa akong ngalan+ magpaubos sa ilang kaugalingon+ ug mag-ampo ug mangita kanako ug talikdan nila ang ilang daotang mga dalan,+ ako maminaw gikan sa kalangitan ug akong pasayloon ang ilang sala ug ayohon ang ilang yuta.+ 15 Karon ang akong mga mata mabuka ug ang akong igdulungog mamati sa pag-ampo niining dapita.+ 16 Ug karon akong gipili ug gibalaan kining balaya aron ang akong ngalan maanaa niini hangtod sa hangtod,+ ug ang akong mga mata ug ang akong kasingkasing kanunayng maanaa niini.+

17 “Ug ikaw, kon molakaw ka sa akong atubangan sama sa paglakaw ni David nga imong amahan pinaagi sa pagbuhat sa tanan nakong gisugo kanimo, ug imong tumanon ang akong mga regulasyon ug mga hukom,+ 18 akong palig-onon ang trono sa imong pagkahari,+ sumala sa akong pagpakigsaad kang David nga imong amahan,+ nga nag-ingon, ‘Kanunay nga dunay kaliwat nimo nga magmando sa Israel.’+ 19 Apan kon inyong talikdan ug isalikway ang akong mga lagda ug mga sugo nga akong gihatag kaninyo ug moalagad mo sa ubang mga diyos ug moyukbo kanila,+ 20 akong lukahon ang Israel gikan sa akong yuta nga akong gihatag kanila,+ ug kining balaya nga gibalaan nako alang sa akong ngalan akong isalikway, ug ipahinabo nako nga kini mahimong talamayon* ug biaybiayon sa tanang katawhan.+ 21 Ug kining balaya mahimong kagun-oban. Ang tanang moagi niini motutok sa kahibulong+ ug moingon, ‘Nganong gibuhat kini ni Jehova niining yutaa ug niining balaya?’+ 22 Unya sila moingon, ‘Tungod kini kay sila mibiya kang Jehova+ nga Diyos sa ilang mga katigulangan, kinsa nagpagawas kanila gikan sa yuta sa Ehipto,+ ug sila nagbaton ug ubang mga diyos ug nangyukbo ug nag-alagad kanila.+ Kini ang hinungdan nga gipadangat niya kanila kining tanan nga katalagman.’”+

8 Gitukod ni Solomon ang balay ni Jehova ug ang iyang kaugalingong balay* sulod sa 20 ka tuig.+ 2 Human niana, gitukod pag-usab ni Solomon ang mga siyudad nga gihatag ni Hiram+ kang Solomon ug gipapuyo ang mga Israelinhon* didto. 3 Dugang pa, si Solomon miadto sa Hamat-zoba ug giilog kini. 4 Unya iyang gipalig-on* ang Tadmor diha sa kamingawan ug ang tanang siyudad nga tipiganan+ nga iyang gitukod sa Hamat.+ 5 Gipalig-on usab niya ang Ibabaw nga Bet-horon+ ug ang Ubos nga Bet-horon,+ mga siyudad nga lig-on ug depensa nga may mga paril, mga ganghaan,* ug mga trangka, 6 ug ang Baalat+ ingon man ang tanang siyudad nga tipiganan ni Solomon, ang tanang siyudad sa mga karo,+ ang mga siyudad alang sa mga mangangabayo, ug bisan unsa nga gustong tukoron ni Solomon sa Jerusalem, sa Lebanon, ug sa tanang yuta nga sakop niya.

7 Kon bahin sa tanang katawhan nga nahibilin sa mga Hitihanon, Amorihanon, Perizihanon, Hivihanon, ug Jebusihanon,+ nga dili bahin sa Israel,+ 8 ang ilang mga kaliwat nga nahibilin sa nasod​—⁠kadtong wala laglaga sa mga Israelinhon+⁠—​gipailalom ni Solomon sa pinugos nga pagtrabaho hangtod niining adlawa.+ 9 Apan walay usa sa mga Israelinhon ang gihimo ni Solomon nga ulipon alang sa iyang buluhaton,+ kay sila iyang mga manggugubat, mga pangulo sa iyang luyoluyong mga komandante, ug mga pangulo sa iyang mga magkakaro ug mga mangangabayo.+ 10 Si Haring Solomon dunay 250 ka pangulo sa mga tigdumala, ang mga porman sa mga trabahador.+

11 Gidala usab ni Solomon ang anak sa Paraon+ gikan sa Siyudad ni David ngadto sa balay nga iyang gitukod alang kaniya,+ kay siya miingon: “Bisag asawa nako siya, dili siya angayng mopuyo sa balay ni David nga hari sa Israel, kay ang mga dapit diin gidala ang Kaban ni Jehova maoy balaan.”+

12 Unya si Solomon nagtanyag ug mga halad nga sinunog+ alang kang Jehova diha sa halaran+ ni Jehova nga iyang gihimo atubangan sa portiko.*+ 13 Iyang gisunod ang adlaw-adlawng rutina ug siya nagtanyag ug mga halad sumala sa sugo ni Moises alang sa mga Igpapahulay,+ sa mga bag-ong bulan,+ ug sa gitakdang mga pista katulo sa usa ka tuig+​—⁠Pista sa Tinapay nga Walay Pangpatubo,*+ Pista sa mga Semana,+ ug Pista sa mga Balongbalong.*+ 14 Dugang pa, iyang gitudlo ang mga dibisyon sa mga saserdote+ alang sa ilang mga pag-alagad sumala sa lagda ni David nga iyang amahan, ug ang mga Levihanon alang sa ilang mga buluhaton, sa pagdayeg+ ug sa pag-alagad diha sa presensiya sa mga saserdote sumala sa adlaw-adlawng rutina, ug ang mga magbalantay sa ganghaan diha sa ilang mga dibisyon alang sa lainlaing ganghaan,+ kay mao kadto ang sugo ni David nga tawo sa matuod nga Diyos. 15 Ug wala sila motipas sa sugo sa hari ngadto sa mga saserdote ug sa mga Levihanon labot sa bisan unsang butang o labot sa mga balay-tipiganan. 16 Busa ang tanang buluhaton ni Solomon organisado kaayo,* sukad sa adlaw nga gipahimutang ang pundasyon sa balay ni Jehova+ hangtod nga kini natapos. Busa ang balay ni Jehova nahuman.+

17 Unya si Solomon miadto sa Ezion-geber+ ug sa Elot+ sa baybayon sa yuta sa Edom.+ 18 Si Hiram+ nagpadala kaniyag mga barko ug eksperyensiyadong mga marinero pinaagi sa iyang mga alagad. Sila nangadto sa Opir+ uban sa mga alagad ni Solomon ug nakakuha didto ug 450 ka talanton* nga bulawan+ ug gidala kini kang Haring Solomon.+

9 Karon ang rayna sa Sheba+ nakabalita bahin kang Solomon, busa siya miadto sa Jerusalem sa pagsulay kang Solomon pinaagig lisod kaayong mga pangutana.* Siya giubanan ug makapahinganghang panon, uban ang mga kamelyo nga gikargahag lana sa balsamo ug daghan kaayong bulawan+ ug bililhong mga bato. Siya miadto kang Solomon ug nakigsulti kaniya bahin sa tanan nga anaa sa iyang kasingkasing.+ 2 Unya gitubag ni Solomon ang tanan niyang pangutana. Bisan unsay iyang gipangutana, wala gayod malisdi si Solomon sa pagpatin-aw niini kaniya.

3 Dihang nakita sa rayna sa Sheba ang kaalam ni Solomon,+ ang balay nga iyang gitukod,+ 4 ang pagkaon diha sa iyang lamesa,+ ang pagkapahimutang sa iyang mga alagad sa ilang lingkoranan, ang pag-alagad sa iyang mga tigsilbi ug ang ilang besti, ang iyang mga tig-ipis* ug ang ilang besti, ug ang iyang mga halad nga sinunog nga regular niyang gihalad diha sa balay ni Jehova,+ siya nahingangha pag-ayo. 5 Busa siya miingon sa hari: “Tinuod ang balita nga akong nadunggan didto sa akong yuta bahin sa imong mga kalamposan* ug sa imong kaalam. 6 Apan wala ko motuo sa mga balita hangtod nga mianhi ko ug nakita mismo kini.+ Ug ania! Wala ra sa katunga ang gisulti kanako bahin sa imong dakong kaalam.+ Labaw pa kaayo ka kay sa akong nabalitaan.+ 7 Malipayon ang imong mga tawo, ug malipayon ang imong mga alagad nga kanunay nimong kauban, nga nagapamati sa imong kaalam! 8 Madayeg unta si Jehova nga imong Diyos, kinsa may kalipay kanimo mao nga iya kang gibutang sa iyang trono ingong hari alang kang Jehova nga imong Diyos. Kay gihigugma sa imong Diyos ang Israel,+ aron magpabilin kini hangtod sa hangtod, iya kang gitudlo ingong hari niini sa pagpatuman sa hustisya ug pagkamatarong.”

9 Unya iyang gihatagan ang hari ug 120 ka talanton* nga bulawan+ ug daghan kaayong lana sa balsamo ug bililhong mga bato. Maylabot sa lana sa balsamo nga gihatag sa rayna sa Sheba kang Haring Solomon, wala nay sama niini nga gidala didto.+

10 Dugang pa, ang mga alagad ni Hiram ug ang mga alagad ni Solomon nga nagdalag bulawan gikan sa Opir+ nagdala usab ug mga kahoyng algum ug bililhong mga bato.+ 11 Ang hari naghimog mga hagdanan gikan sa mga kahoyng algum alang sa balay ni Jehova+ ug alang sa balay* sa hari,+ ingon man mga alpa ug dekuwerdas nga mga instrumento alang sa mga mag-aawit.+ Wala pay nakita sukad nga sama niini sa yuta sa Juda.

12 Gihatag usab ni Haring Solomon sa rayna sa Sheba ang tanan niyang gitinguha ug gihangyo, nga mas labaw pa* sa iyang gidala sa hari. Unya siya migikan ug mipauli sa iyang yuta, uban ang iyang mga alagad.+

13 Ug ang gibug-aton sa bulawan nga madawat ni Solomon sa usa ka tuig maoy 666 ka talanton nga bulawan,+ 14 gawas pa nianang gidala sa nagapanawng mga negosyante ug sa uban pang negosyante ug sa tanang hari sa mga Arabo ug sa mga gobernador sa yuta nga nagdalag bulawan ug plata kang Solomon.+

15 Si Haring Solomon naghimog 200 ka dagkong taming nga sinubong nga bulawan+ (600 ka siklo* nga sinubong nga bulawan ang gibutang sa matag taming)+ 16 ug 300 ka gagmayng taming* nga sinubong nga bulawan (tulo ka mina* nga bulawan ang gibutang sa matag gamayng taming). Unya gibutang kini sa hari didto sa Balay sa Lasang sa Lebanon.+

17 Ang hari naghimo usab ug dakong trono nga garing* ug gihaklapan kinig purong bulawan.+ 18 Dihay unom ka ang-ang paingon sa trono, ug dihay bulawang tumbanan sa tiil nga gitaod sa trono, ug dihay mga patonganan sa bukton sa isigkakilid sa lingkoranan, ug duha ka leyon+ ang nagbarog tapad sa mga patonganan sa bukton. 19 Ug dihay 12 ka leyon+ nga nagbarog sa unom ka ang-ang, usa sa isigkakilid sa unom ka ang-ang. Walay laing gingharian ang nakahimo ug sama niini. 20 Ang tanang imnanan ni Haring Solomon hinimo sa bulawan, ug ang tanang galamiton sa Balay sa Lasang sa Lebanon hinimo sa purong bulawan. Walay butang nga hinimo sa plata, kay ang plata giisip nga walay bili sa mga adlaw ni Solomon.+ 21 Tungod kana kay ang mga barko sa hari mag-adtoan sa Tarsis+ uban sa mga alagad ni Hiram.+ Kausa sa matag tulo ka tuig, ang mga barko sa Tarsis modunggo nga may kargang mga bulawan, plata, garing,+ aliwas, ug peacock.*

22 Busa si Haring Solomon milabaw sa tanang hari sa yuta sa bahandi ug kaalam.+ 23 Ug ang mga hari sa tibuok yuta gustong moadto kang* Solomon aron maminaw sa iyang kaalam nga gihatag sa matuod nga Diyos kaniya.+ 24 Ang matag usa kanila magdalag gasa​—⁠mga butang nga gama sa plata, mga butang nga gama sa bulawan, mga besti,+ mga hinagiban, lana sa balsamo, mga kabayo, ug mga mula⁠—​ug ginabuhat kini tuigtuig. 25 Ug si Solomon dunay 4,000 ka kuwadra alang sa iyang mga kabayo ug mga karo ug 12,000 ka kabayo,*+ ug iya kining gibutang sa mga siyudad sa mga karo ug sa Jerusalem duol sa hari.+ 26 Ug siya nagmando ibabaw sa tanang hari gikan sa Suba* hangtod sa yuta sa mga Filistehanon ug hangtod sa utlanan sa Ehipto.+ 27 Ang hari nakabaton ug plata sa Jerusalem nga sama ka daghan sa mga bato, ug kahoyng sedro nga sama ka daghan sa mga kahoyng sikomoro sa Sepela.+ 28 Ug sila magdalag mga kabayo kang Solomon gikan sa Ehipto+ ug gikan sa tanang ubang kayutaan.

29 Kon bahin sa ubang kasaysayan ni Solomon,+ sukad sa sinugdan hangtod sa kataposan, dili ba nasulat kini lakip sa mga pulong ni propetang* Natan,+ sa tagna ni Ahias+ nga Shilonhon, ug sa talaan sa mga panan-awon ni Ido+ nga bisyonaryo* maylabot kang Jeroboam+ nga anak ni Nebat? 30 Si Solomon nagmando sa Jerusalem ibabaw sa tibuok Israel sulod sa 40 ka tuig. 31 Unya si Solomon mipahulay sa kamatayon.* Busa ilang gilubong siya sa Siyudad ni David nga iyang amahan;+ ug ang iyang anak nga si Rehoboam nahimong hari puli kaniya.+

10 Si Rehoboam miadto sa Sekem,+ kay ang tibuok Israel miadto sa Sekem aron himoon siyang hari.+ 2 Pagkadungog gayod niini ni Jeroboam+ nga anak ni Nebat (siya didto pa sa Ehipto kay siya mikalagiw man tungod kang Haring Solomon),+ si Jeroboam mipauli gikan sa Ehipto. 3 Unya gipatawag nila siya, ug si Jeroboam ug ang tibuok Israel miadto kang Rehoboam ug miingon: 4 “Gipabug-at sa imong amahan ang among yugo.+ Apan kon imong pasayonon ang lisod nga pag-alagad ug pagaanon ang bug-at* nga yugo nga gisangon sa imong amahan kanamo, kami moalagad kanimo.”

5 Siya miingon kanila: “Balik kanako human sa tulo ka adlaw.” Busa ang katawhan nanglakaw.+ 6 Unya si Haring Rehoboam mikonsulta sa mga ansiyano nga nag-alagad kang Solomon nga iyang amahan sa buhi pa siya, nga nag-ingon: “Unsay inyong ikatambag nga akong itubag niini nga katawhan?” 7 Sila mitubag: “Kon maayo ka niini nga katawhan ug imo silang pahimut-an ug maayo ang imong itubag kanila, magpabilin silang imong mga alagad.”

8 Apan gisalikway niya ang tambag sa mga ansiyano, ug mikonsulta siya sa mga batan-ong lalaki nga iyang katalirongan nga karon iya nang mga tig-alagad.+ 9 Siya nangutana kanila: “Unsay inyong ikatambag nga atong itubag niining katawhan nga miingon kanako, ‘Pagaana ang yugo nga gisangon sa imong amahan kanamo’?” 10 Ang mga batan-ong lalaki nga iyang katalirongan miingon: “Kini ang imong isulti sa katawhan nga miingon kanimo, ‘Gipabug-at sa imong amahan ang among yugo, apan angay nimo kining pagaanon alang kanamo’; kini ang isulti kanila, ‘Ang akong kumingking mahimong mas baga pa kay sa bat-ang sa akong amahan. 11 Ang akong amahan nagpapas-an kaninyo ug bug-at nga yugo, apan akong dugangan ang inyong yugo. Ang akong amahan nagsilot kaninyo pinaagig mga latigo, apan ako magsilot kaninyo pinaagig tunokong mga panglapdos.’”

12 Si Jeroboam ug ang tibuok katawhan namalik kang Rehoboam sa ikatulo ka adlaw, sumala sa gisulti sa hari: “Balik kanako sa ikatulo ka adlaw.”+ 13 Apan dili maayo ang tubag sa hari kanila. Busa gisalikway ni Haring Rehoboam ang tambag sa mga ansiyano. 14 Siya misulti kanila sumala sa tambag sa mga batan-ong lalaki, nga nag-ingon: “Pabug-aton pa nako ang inyong yugo, ug dugangan pa nako kini. Ang akong amahan nagsilot kaninyo pinaagig mga latigo, apan ako magsilot kaninyo pinaagig tunokong mga panglapdos.” 15 Busa ang hari wala mamati sa katawhan, kay kini nga mga panghitabo gipahinabo sa matuod nga Diyos,+ aron matuman ang gisulti ni Jehova pinaagi ni Ahias+ nga Shilonhon ngadto kang Jeroboam nga anak ni Nebat.

16 Kon bahin sa tibuok Israel, kay ang hari wala man mamati kanila, ang katawhan mitubag sa hari: “Unsa may labot namo kang David? Kami walay panulondon sa anak ni Jese. Balik ang matag usa sa iyang mga diyos, Oh Israel! Karon atimana ang imong kaugalingong panimalay, Oh David!”+ Busa ang tibuok Israel namauli sa ilang mga balay.*+

17 Apan si Rehoboam nagpadayon sa pagmando sa mga Israelinhon nga nagpuyo sa mga siyudad sa Juda.+

18 Unya gipadala ni Haring Rehoboam si Hadoram,+ nga tigdumala niadtong mga gipailalom sa pinugos nga pagtrabaho, apan gibato siya sa mga Israelinhon hangtod nga siya namatay. Si Haring Rehoboam nakahimo sa pagsakay sa iyang karo aron mokalagiw ngadto sa Jerusalem.+ 19 Ug ang mga Israelinhon nagpadayon sa pagrebelde batok sa panimalay ni David hangtod niining adlawa.

11 Pag-abot ni Rehoboam sa Jerusalem, iya dayong gitigom ang panimalay ni Juda ug Benjamin,+ 180,000 ka binansay* nga mga manggugubat, sa pagpakig-away sa Israel aron mabalik ang gingharian kang Rehoboam.+ 2 Unya si Semaias+ nga tawo sa matuod nga Diyos nakadawat ug mensahe gikan kang Jehova, nga nag-ingon: 3 “Sultihi si Rehoboam nga anak ni Solomon nga hari sa Juda ug ang tibuok Israel nga anaa sa Juda ug Benjamin, 4 ‘Kini ang giingon ni Jehova: “Ayaw gayod mog tungas aron makig-away sa inyong mga igsoon. Pauli mo sa inyong tagsatagsa ka balay, kay ako ang nagpahinabo niini.”’”+ Busa ilang gisunod ang pulong ni Jehova ug sila namauli ug wala moadto batok kang Jeroboam.

5 Si Rehoboam nagpuyo sa Jerusalem ug nagtukod sa Juda ug mga siyudad nga lig-on ug depensa. 6 Busa iyang gipalig-on ang Betlehem,+ Etam, Tekoa,+ 7 Bet-zur, Soco,+ Adulam,+ 8 Gat,+ Maresah, Zip,+ 9 Adoraim, Lakis,+ Azeka,+ 10 Zora, Aijalon,+ ug Hebron,+ mga siyudad nga lig-on ug depensa nga didto sa Juda ug Benjamin. 11 Dugang pa, gipalig-on pa gyod niya ang mga dapit nga lig-on nag depensa ug gibutangan kinig mga komandante ug gitagan-an ug pagkaon ug lana ug bino, 12 ug iyang gitagan-an ug dagkong taming ug mga bangkaw ang tanang siyudad; iya kining gipalig-on pag-ayo. Ug ang Juda ug Benjamin nagpabiling iyaha.

13 Ug ang mga saserdote ug ang mga Levihanon sa tibuok Israel nanglakaw gikan sa ilang mga teritoryo ug midapig kaniya. 14 Gibiyaan sa mga Levihanon ang ilang mga sibsibanan ug ang ilang mga gipanag-iya+ ug sila nangadto sa Juda ug Jerusalem, kay sila gitangtang ni Jeroboam ug sa iyang mga anak gikan sa pag-alagad ingong mga saserdote ni Jehova.+ 15 Unya si Jeroboam nagtudlog kaugalingon niyang mga saserdote alang sa tag-as nga dapit+ ug alang sa pormag kanding nga mga demonyo*+ ug alang sa mga nating baka nga iyang gihimo.+ 16 Ug kadtong gikan sa tanang tribo sa Israel kansang mga kasingkasing determinado sa pagpangita kang Jehova nga Diyos sa Israel misunod kanila sa Jerusalem sa paghalad kang Jehova nga Diyos sa ilang mga katigulangan.+ 17 Sulod sa tulo ka tuig ilang gipalig-on ang gingharian sa Juda ug gipaluyohan si Rehoboam nga anak ni Solomon, kay sila naglakaw sa dalan ni David ug ni Solomon sulod sa tulo ka tuig.

18 Unya gipangasawa ni Rehoboam si Mahalat nga anak ni Jerimot, nga anak ni David, ug ni Abihail nga anak nga babaye ni Eliab+ nga anak ni Jese. 19 Paglabay sa panahon, sila nakabaton ug mga anak: si Jeus, Semarias, ug Zaham. 20 Dayon iyang gipangasawa si Maaca nga apo ni Absalom.+ Paglabay sa panahon, sila nakabaton ug mga anak: si Abias,+ Atai, Ziza, ug Selomit. 21 Si Rehoboam mas nahigugma kang Maaca nga apo ni Absalom kay sa tanan niyang asawa ug puyopuyo,*+ kay 18 ang iyang asawa ug 60 ang iyang puyopuyo,* ug 28 ang iyang anak nga lalaki ug 60 ang iyang anak nga babaye. 22 Busa sa mga magsoon, si Abias nga anak ni Maaca ang gitudlo ni Rehoboam ingong pangulo ug lider, kay gusto niya nga himoon siyang hari. 23 Hinuon, siya milihok nga maalamon* ug iyang gipadala* ang uban niyang anak ngadto sa tanang rehiyon sa Juda ug Benjamin, ngadto sa tanang siyudad nga lig-on ug depensa,+ ug iyang gihatagan silag dagayang probisyon ug daghang asawa.

12 Human gayod nga nalig-on ang pagkahari ni Rehoboam+ ug nahimo siyang gamhanan, iyang gibiyaan ang Balaod ni Jehova,+ ug ang tibuok Israel misunod usab kaniya. 2 Sa ikalimang tuig sa pagmando ni Haring Rehoboam, si Haring Sisak+ sa Ehipto mitungas batok sa Jerusalem, kay sila wala magmatinumanon kang Jehova. 3 Duna siyay 1,200 ka karo, 60,000 ka mangangabayo, ug dili maihap nga kasundalohan nga miuban kaniya gikan sa Ehipto​—⁠mga Libyanhon, Sukiim, ug Etiopianhon.+ 4 Iyang nailog ang pinarilang mga siyudad sa Juda ug sa kataposan nakaabot siya sa Jerusalem.

5 Si propetang Semaias+ miadto kang Rehoboam ug sa mga prinsipe sa Juda nga nagtigom sa Jerusalem tungod kang Sisak, ug siya miingon kanila: “Kini ang giingon ni Jehova, ‘Gibiyaan ko ninyo, busa gitugyan usab mo nako+ sa kamot ni Sisak.’” 6 Tungod niana ang mga prinsipe sa Israel ug ang hari nagpaubos sa ilang kaugalingon+ ug miingon: “Si Jehova matarong.” 7 Dihang nakita ni Jehova nga sila nagpaubos, si Semaias nakadawat ug mensahe gikan kang Jehova, nga nag-ingon: “Sila nagpaubos sa ilang kaugalingon. Dili nako sila laglagon,+ ug sa dili madugay ako silang luwason. Dili nako ipahamtang ang akong kasuko sa Jerusalem pinaagi kang Sisak. 8 Apan sila mahimong iyang mga alagad, aron mahibalo sila sa kalainan tali sa pag-alagad kanako ug sa pag-alagad sa mga hari* sa ubang kayutaan.”

9 Busa si Haring Sisak sa Ehipto mitungas batok sa Jerusalem. Iyang gikuha ang mga bahandi sa balay ni Jehova+ ug ang mga bahandi sa balay* sa hari. Gikuha niya ang tanan, lakip ang mga taming nga bulawan nga gihimo ni Solomon.+ 10 Busa si Haring Rehoboam naghimog mga taming nga tumbaga puli niini, ug iya kining gitugyan sa mga pangulo sa mga bantay,* kinsa nagbantay sa entrada sa balay sa hari. 11 Matag higayon nga ang hari moadto sa balay ni Jehova, ang mga bantay mosulod nga magdala niini, unya ila kining ipamalik ngadto sa lawak sa mga bantay. 12 Kay ang hari nagpaubos, si Jehova wala na masuko kaniya,+ ug wala niya sila bug-os laglaga.+ Dugang pa, dihay maayong mga butang nga nakita diha sa Juda.+

13 Gipalig-on ni Haring Rehoboam ang iyang pagmando sa Jerusalem ug siya nagpadayon sa pagmando; si Rehoboam 41 anyos dihang nahimo siyang hari, ug siya nagmando sulod sa 17 ka tuig sa Jerusalem, ang siyudad nga gipili ni Jehova gikan sa tanang tribo sa Israel diin didto ibutang ang iyang ngalan. Ang inahan sa hari mao si Naama nga Ammonhanon.+ 14 Apan siya nagbuhat ug daotan, kay siya dili determinado diha sa iyang kasingkasing nga pangitaon si Jehova.+

15 Kon bahin sa kasaysayan ni Rehoboam, sukad sa sinugdan hangtod sa kataposan, wala ba kini masulat lakip sa mga pulong ni propetang Semaias+ ug ni Ido+ nga bisyonaryo* diha sa talaan sa kagikan? Ug kanunayng maggubatay si Rehoboam ug si Jeroboam.+ 16 Unya si Rehoboam mipahulay sa kamatayon* ug gilubong didto sa Siyudad ni David;+ ug si Abias+ nga iyang anak nahimong hari puli kaniya.

13 Sa ika-18 nga tuig sa pagmando ni Haring Jeroboam, si Abias nahimong hari sa Juda.+ 2 Tulo ka tuig siyang nagmando sa Jerusalem. Ang iyang inahan mao si Micaias+ nga anak ni Uriel sa Gibea.+ Ug dihay paggubatay tali kang Abias ug Jeroboam.+

3 Busa si Abias miadto sa pagpakiggubat uban ang 400,000 ka banggiitan ug binansay* nga mga manggugubat.+ Ug si Jeroboam mihan-ay sa pagpakiggubat batok kaniya uban ang 800,000 ka binansay* ug banggiitang mga manggugubat. 4 Karon si Abias mitindog sa Bukid sa Zemaraim, nga anaa sa kabukiran sa Epraim, ug miingon: “Paminaw kanako, Oh Jeroboam ug tibuok Israel. 5 Wala ba mo mahibalo nga si Jehova nga Diyos sa Israel naghatag kang David ug usa ka gingharian ibabaw sa Israel hangtod sa hangtod,+ ngadto kaniya ug sa iyang mga anak,+ pinaagig permanenteng pakigsaad?*+ 6 Apan si Jeroboam+ nga anak ni Nebat, ang alagad ni Solomon nga anak ni David, mirebelde sa iyang ginoo.+ 7 Ang mga tawong walay buhat ug walay silbi miuban kaniya. Ug nagmalamposon sila sa pagrebelde kang Rehoboam nga anak ni Solomon dihang si Rehoboam batan-on pa ug huyang, ug siya wala makabarog batok kanila.

8 “Ug karon naghunahuna mo nga makabarog mo batok sa gingharian ni Jehova diha sa kamot sa mga anak ni David kay daghan kaayo mo ug anaa kaninyo ang mga nating baka nga bulawan nga gihimo ni Jeroboam ingong inyong mga diyos.+ 9 Dili ba giabog man ninyo ang mga saserdote ni Jehova,+ ang mga kaliwat ni Aaron, ug ang mga Levihanon, ug dili ba nagtudlo man mog inyong mga saserdote sama sa mga katawhan sa ubang kayutaan?+ Bisan kinsa nga mianhi nga nagdalag usa ka toreyong baka ug pito ka laking karnero nahimong saserdote sa mini nga mga diyos. 10 Sa among bahin, si Jehova mao ang among Diyos,+ ug wala mi mobiya kaniya; ang among mga saserdote nga mga kaliwat ni Aaron nag-alagad kang Jehova ug ang mga Levihanon nagtabang sa buluhaton. 11 Sila nagapaaso ug mga halad nga sinunog alang kang Jehova matag buntag ug matag gabii+ uban ang humot nga insenso,+ ug ang mga halad nga tinapay*+ anaa sa lamesa nga purong bulawan, ug ilang pasigahon ang mga tangkawan* nga bulawan+ ug ang mga lampara niini matag gabii,+ kay gituman namo ang among responsibilidad kang Jehova nga atong Diyos; apan kamo mibiya kaniya. 12 Karon tan-awa! ang matuod nga Diyos nagauban ug nagapanguna kanamo, uban ang iyang mga saserdote nga maoy magpatingog sa mga trompeta sa pagpakiggubat kaninyo. Oh mga lalaki sa Israel, ayaw mo pagpakig-away kang Jehova nga Diyos sa inyong mga katigulangan, kay dili mo molampos.”+

13 Apan si Jeroboam nagpadalag mga sundalo aron molipot kanila, mao nga ang uban niyang sundalo didto sa atubangan sa Juda ug ang uban didto sa ilang luyo. 14 Paglingi sa mga lalaki sa Juda, ilang nakita nga kinahanglan silang makig-away sa atubangan ug sa luyo. Busa sila mituaw kang Jehova,+ samtang ang mga saserdote nagpalanog sa mga trompeta. 15 Ang mga lalaki sa Juda misinggit ug singgit sa pakiggubat, ug pagsinggit nila, gipildi sa matuod nga Diyos si Jeroboam ug ang tibuok Israel atubangan ni Abias ug sa Juda. 16 Ang mga Israelinhon mikalagiw gikan sa kalalakin-an sa Juda, ug sila gitugyan sa Diyos ngadto sa ilang kamot. 17 Grabe kaayo ang pagpamatay nga gihimo ni Abias ug sa iyang katawhan, ug 500,000 ka binansay* nga mga lalaki sa Israel ang nangamatay. 18 Busa ang mga lalaki sa Israel napakaulawan niadtong panahona, apan ang mga lalaki sa Juda nagmadaogon kay sila misalig* kang Jehova nga Diyos sa ilang mga katigulangan.+ 19 Si Abias nagpadayon sa paggukod kang Jeroboam ug nakailog ug mga siyudad gikan kaniya, ang Bethel+ ug ang mga lungsod nga sakop* niini, ang Jesana ug ang mga lungsod nga sakop niini, ug ang Eprain+ ug ang mga lungsod nga sakop niini. 20 Ug wala na gyod mabawi ni Jeroboam ang iyang gahom sa panahon ni Abias; unya si Jehova naghampak kaniya ug siya namatay.+

21 Apan ang gingharian ni Abias mas milig-on. Sa ulahi, siya nakabaton ug 14 ka asawa,+ 22 ka anak nga lalaki, ug 16 ka anak nga babaye. 22 Ug ang uban pa sa kasaysayan ni Abias, ang iyang mga buhat ug mga pulong, narekord sa mga sinulat* ni propetang Ido.+

14 Unya si Abias mipahulay sa kamatayon,* ug ila siyang gilubong sa Siyudad ni David;+ ug si Asa nga iyang anak nahimong hari puli kaniya. Sa iyang mga adlaw ang yuta nakapahulay sulod sa 10 ka tuig.

2 Gibuhat ni Asa kon unsay maayo ug husto sa mga mata ni Jehova nga iyang Diyos. 3 Iyang gipanguha ang mga halaran sa langyawng mga diyos+ ug ang tag-as nga dapit, gidugmok ang sagradong mga haligi,+ ug giputol ang sagradong mga poste.*+ 4 Dugang pa, iyang giingnan ang Juda nga pangitaon si Jehova nga Diyos sa ilang mga katigulangan ug tumanon ang Balaod ug ang kasugoan. 5 Busa iyang gipanguha gikan sa tanang siyudad sa Juda ang tag-as nga dapit ug ang mga tungtonganan sa insenso,+ ug ubos sa iyang pagmando, ang gingharian padayong nagmalinawon. 6 Nagtukod siyag pinarilang mga siyudad sa Juda+ sanglit ang yuta may kalinaw ug walay nakiggubat kaniya niadtong mga tuiga, kay si Jehova naghatag kaniyag kalinaw.+ 7 Siya miingon sa Juda: “Atong tukoron kining mga siyudara ug palibotan kinig mga paril ug mga torre,+ mga ganghaan* ug mga trangka; kay kita pa ang nanag-iya sa yuta tungod sa atong pagpangita kang Jehova nga atong Diyos. Kita nangita, ug gihatagan ta niyag pahulay gikan sa tanan natong kaaway sa palibot.” Busa milampos ang ilang pagtukod.+

8 Si Asa may 300,000 ka sundalo gikan sa Juda, nga nagdalag dagkong taming ug mga bangkaw. Ug gikan sa Benjamin dihay 280,000 ka banggiitang mga manggugubat nga nagdalag gagmayng taming* ug armadog mga pana.*+

9 Sa ulahi, si Zera nga Etiopianhon miadto batok kanila uban ang 1,000,000 ka sundalo ug 300 ka karo.+ Pag-abot niya sa Maresah,+ 10 si Asa migula batok kaniya ug sila mihan-ay sa pagpakiggubat didto sa Walog sa Zepata sa Maresah. 11 Unya si Asa mitawag kang Jehova nga iyang Diyos+ ug miingon: “Oh Jehova, dili nimo igsapayan kon ang imong tabangan daghan ba o huyang.+ Tabangi mi, Oh Jehova nga among Diyos, kay kami nagasalig* kanimo,+ ug sa imong ngalan kami mianhi batok niini nga katawhan.+ Oh Jehova, ikaw ang among Diyos. Ayawg tugoti nga ang tawo modaog batok kanimo.”+

12 Busa gitabangan ni Jehova si Asa ug ang Juda sa pagpildi sa mga Etiopianhon, ug ang mga Etiopianhon nangalagiw.+ 13 Sila gigukod ni Asa ug sa katawhan nga uban niya hangtod sa Gerar,+ ug ang mga Etiopianhon nangapukan hangtod nga wala nay nabiling buhi kanila, kay sila bug-os nga gipildi ni Jehova ug sa iyang kasundalohan. Human niana, sila nakadalag daghan kaayong inilog. 14 Dugang pa, ilang giatake ang tanang siyudad palibot sa Gerar, kay ang maong mga siyudad nahadlok pag-ayo kang Jehova; ug ilang gipanguhaag butang ang tanang siyudad, kay daghan man ang mga butang nga makuha gikan niini. 15 Giatake usab nila ang mga tolda niadtong may mga kahayopan, ug ilang giilog ang daghan kaayong karnero ug kamelyo, ug human niana sila namalik sa Jerusalem.

15 Karon ang espiritu sa Diyos milihok kang Azarias nga anak ni Oded. 2 Busa iyang giadto si Asa ug giingnan siya: “Paminaw kanako, Oh Asa ug tibuok Juda ug Benjamin! Si Jehova magauban kaninyo basta dili mo mobiya kaniya;+ ug kon kamo mangita kaniya, itugot niya nga inyo siyang makaplagan,+ apan kon inyo siyang biyaan, siya mobiya kaninyo.+ 3 Sa dugayng panahon* ang matuod nga Diyos wala mag-uban sa Israel, ug sila walay saserdote nga nagtudlo ug walay balaod.+ 4 Apan dihang sila mibalik kang Jehova nga Diyos sa Israel ug nangita kaniya kay anaa sila sa kasakit, iyang gitugot nga siya ilang makaplagan.+ 5 Niadtong mga panahona delikado ang pagbiyahe,* kay grabe ang kasamok sa tanang molupyo sa kayutaan. 6 Ang usa ka nasod laglagon sa laing nasod ug ang usa ka siyudad laglagon sa laing siyudad, kay wala sila hatagig kalinaw sa Diyos tungod sa tanang matang sa kalisdanan.+ 7 Apan magmaisogon kamo ug ayawg kaluya,*+ kay ang inyong buluhaton pagagantihan.”

8 Pagkadungog gayod ni Asa niining mga pulonga ug sa tagna ni propetang Oded, siya nagmaisogon ug iyang gipanguha ang makaluod nga mga idolo gikan sa tibuok yuta sa Juda+ ug Benjamin ug gikan sa mga siyudad nga iyang nailog diha sa kabukiran sa Epraim, ug iyang gibalik ang halaran ni Jehova nga diha sa atubangan sa portiko* ni Jehova.+ 9 Ug iyang gitigom ang tibuok Juda ug Benjamin ug ang langyawng mga residente nga uban nila gikan sa Epraim ug Manases ug Simeon,+ kay daghan kaayo silang miadto kaniya gikan sa Israel dihang nakita nila nga si Jehova nga iyang Diyos nag-uban kaniya. 10 Busa sila nagtigom sa Jerusalem sa ikatulong bulan sa ika-15 nga tuig sa pagmando ni Asa. 11 Nianang adlawa sila naghalad kang Jehova gikan sa ilang mga inilog sa gubat, 700 ka baka ug 7,000 ka karnero. 12 Dugang pa, sila naghimog pakigsaad nga pangitaon si Jehova nga Diyos sa ilang mga katigulangan sa bug-os nilang kasingkasing ug sa bug-os nilang kalag.*+ 13 Bisan kinsa nga dili mangita kang Jehova nga Diyos sa Israel pagapatyon, bata man o tigulang,* lalaki man o babaye.+ 14 Busa sila nanumpa kang Jehova uban sa kusog nga tingog, singgit sa kalipay, mga trompeta, ug mga budyong. 15 Ug ang tibuok Juda nagsadya tungod sa ilang gipanumpa, kay sila nanumpa sa bug-os nilang kasingkasing ug gipangita gayod nila siya ug gitugot niya nga siya ilang makaplagan,+ ug si Jehova nagpadayon sa paghatag kanilag pahulay gikan sa tanan nilang kaaway sa palibot.+

16 Gitangtang pa gani ni Haring Asa si Maaca+ nga iyang apohan gikan sa pagkarayna,* kay siya naghimog makaluod nga idolo alang sa pagsimba sa sagradong poste.*+ Giputol ni Asa ang iyang makaluod nga idolo ug gipulpog kini ug gisunog kini sa Walog sa Kidron.+ 17 Apan wala kuhaa ang tag-as nga dapit+ sa Israel.+ Bisan pa niana, ang kasingkasing ni Asa bug-os nga matinumanon* sa tibuok niyang kinabuhi.+ 18 Ug ang mga butang nga gibalaan niya ug sa iyang amahan iyang gidala ngadto sa balay sa matuod nga Diyos​—⁠plata, bulawan, ug lainlaing galamiton.+ 19 Walay nahitabong gubat hangtod sa ika-35 nga tuig sa pagmando ni Asa.+

16 Sa ika-36 nga tuig sa pagmando ni Asa, si Haring Baasa+ sa Israel misulong sa Juda ug iyang gitukod* ang Rama+ aron walay makagula o makasulod sa teritoryo ni Haring Asa sa Juda.+ 2 Busa gipagawas ni Asa ang plata ug bulawan gikan sa mga tipiganag bahandi sa balay ni Jehova+ ug sa balay* sa hari ug gipadala kini ngadto kang Haring Ben-hadad sa Sirya,+ nga nagpuyo sa Damasco, nga nag-ingon: 3 “Kitang duha dunay kasabotan,* ug duna usay kasabotan ang atong mga amahan. Ako nagpadala kanimog plata ug bulawan. Karon bungkaga ang inyong kasabotan* ni Haring Baasa sa Israel, aron moatras siya gikan kanako.”

4 Si Ben-hadad namati kang Haring Asa ug nagpadalag mga pangulo sa iyang kasundalohan batok sa mga siyudad sa Israel, ug ilang gisakop ang Ijon,+ Dan,+ Abel-maim, ug ang tanang tipiganan sa mga siyudad sa Neptali.+ 5 Pagkadungog ni Baasa bahin niini, iya dayong giundangan ang pagtukod* sa Rama ug gibiyaan ang iyang buluhaton. 6 Unya gidala ni Haring Asa ang tibuok Juda, ug gipanguha nila ang mga bato ug mga kahoy sa Rama+ nga gigamit ni Baasa sa pagtukod,+ ug iyang gigamit kini sa pagtukod* sa Geba+ ug Mizpa.+

7 Nianang panahona si Hanani+ nga tawo nga makakitag panan-awon miadto kang Haring Asa sa Juda ug miingon kaniya: “Kay ikaw misalig* sa hari sa Sirya ug wala mosalig* kang Jehova nga imong Diyos, ang kasundalohan sa hari sa Sirya nakaikyas sa imong kamot.+ 8 Dili ba ang mga Etiopianhon ug ang mga Libyanhon dako man kaayo nga panon sa kasundalohan nga may daghang karo ug mangangabayo? Apan kay misalig ka kang Jehova, iyang gitugyan sila sa imong kamot.+ 9 Kay ang mga mata ni Jehova nagalibotlibot sa tibuok yuta+ aron ipakita ang iyang kusog* alang niadtong kansang kasingkasing bug-os alang* kaniya.+ Binuang ang imong gihimo; sukad karon dunay mga gubat batok kanimo.”+

10 Apan nasuko si Asa sa tawo nga makakitag panan-awon. Grabe ang iyang kasuko mao nga iya siyang gipabilanggo.* Ug nianang panahona usab, gidaogdaog ni Asa ang uban pa sa katawhan. 11 Karon ang kasaysayan ni Asa, sukad sa sinugdan hangtod sa kataposan, nasulat sa mga Basahon sa mga Hari sa Juda ug sa Israel.+

12 Sa ika-39 nga tuig sa pagmando ni Asa, siya nakaagom ug sakit sa tiil hangtod nga migrabe ang iyang sakit. Bisan pa niana, wala siya modangop kang Jehova apan sa mga mananambal. 13 Unya si Asa mipahulay sa kamatayon;*+ siya namatay sa ika-41 nga tuig sa iyang pagmando. 14 Busa gilubong nila siya sa halangdong lubnganan nga iyang gipahimo alang sa iyang kaugalingon didto sa Siyudad ni David,+ ug ilang gipahiluna siya sa teheras sa patay nga gibutangag lana sa balsamo ug espesyal nga pahumot nga gama sa lainlaing sangkap.+ Dugang pa, sila naghimog dako kaayong daob* alang kaniya.

17 Ug si Jehosapat+ nga iyang anak nahimong hari puli kaniya, ug gipalig-on niya ang iyang pagmando sa Israel. 2 Nagbutang siyag mga sundalo sa tanang pinarilang siyudad sa Juda. Nagbutang usab siyag mga kampo sa yuta sa Juda ug sa mga siyudad sa Epraim nga nailog sa iyang amahan nga si Asa.+ 3 Si Jehova padayong nag-uban kang Jehosapat kay siya misubay sa dalan ni David+ nga iyang katigulangan ug wala moalagad* sa mga Baal. 4 Kay siya nag-alagad* sa Diyos sa iyang amahan+ ug nagsubay sa iyang kasugoan, dili sa mga buhat sa Israel.+ 5 Padayong gipalig-on ni Jehova ang gingharian diha sa iyang kamot;+ ug ang tibuok Juda padayong naghatag ug mga regalo kang Jehosapat, ug siya nakabatog daghan kaayong bahandi ug nahimong dungganon kaayo.+ 6 Siya nagmaisogon sa pagsubay sa mga dalan ni Jehova, ug iyang gipanguha sa Juda ang tag-as nga dapit+ ug ang sagradong mga poste.*+

7 Sa ikatulo nga tuig sa iyang pagmando, iyang gipatawag ang iyang mga prinsipe, si Ben-hail, Abdias, Zacarias, Netanel, ug Micaias, aron magtudlo diha sa mga siyudad sa Juda. 8 Diha silay kauban nga mga Levihanon: si Semaias, Netanias, Zebadias, Asahel, Semiramot, Jehonatan, Adonias, Tobiyas, ug Tob-adonias, ug kauban nila ang mga saserdote nga si Elisama ug Jehoram.+ 9 Sila nanudlo sa Juda dala ang basahon sa Balaod ni Jehova,+ ug sila milibot sa tanang siyudad sa Juda nga nanudlo sa katawhan.

10 Ug gipahinabo ni Jehova nga mahadlok pag-ayo ang tanang gingharian sa kayutaan palibot sa Juda, ug sila wala makig-away kang Jehosapat. 11 Ug ang mga Filistehanon nagdalag mga regalo ug salapi ingong buhis* ngadto kang Jehosapat. Ang mga Arabo nagdala kaniyag 7,700 ka laking karnero ug 7,700 ka laking kanding gikan sa ilang kahayopan.

12 Si Jehosapat misamot ka gamhanan,+ ug siya nagpadayon sa pagtukod ug mga kuta+ ug mga siyudad nga tipiganan+ diha sa Juda. 13 Daghan siyag gihimong proyekto sa mga siyudad sa Juda, ug diha siyay mga sundalo, banggiitang mga manggugubat, didto sa Jerusalem. 14 Sila gibahin sumala sa ilang banay:* gikan sa Juda, sa mga pangulo sa kada 1,000, si Adna nga pangulo, ug kauban niya ang 300,000 ka banggiitang manggugubat.+ 15 Ug ubos sa iyang pagdumala si Jehohanan nga pangulo, ug diha siyay kauban nga 280,000. 16 Ug ubos usab sa iyang pagdumala si Amasias nga anak ni Zikri, kinsa miboluntaryo sa pag-alagad kang Jehova, ug kauban niya ang 200,000 ka banggiitang manggugubat. 17 Gikan sa Benjamin+ diha si Eliada nga banggiitang manggugubat, ug kauban niya ang 200,000 ka lalaki nga armadog pana ug taming.+ 18 Ug ubos sa iyang pagdumala si Jehozabad, ug kauban niya ang 180,000 ka sundalo. 19 Kini sila nag-alagad sa hari gawas pa niadtong gibutang sa hari diha sa pinarilang mga siyudad sa tibuok Juda.+

18 Si Jehosapat nakabatog daghan kaayong bahandi ug nahimong dungganon kaayo,+ apan siya nakig-alyansa kang Ahab+ pinaagig kaminyoon. 2 Busa katuigan sa ulahi iyang giadto si Ahab sa Samaria,+ ug si Ahab nag-ihaw* ug daghan kaayong karnero ug baka alang kaniya ug sa iyang mga tawo. Ug gikombinsir* siya ni Ahab nga makiggubat sa Ramot-gilead.+ 3 Unya si Haring Ahab sa Israel miingon kang Haring Jehosapat sa Juda: “Mouban ba ka nako sa Ramot-gilead?” Siya mitubag: “Kon unsay akoa imoha usab, ug ang akong katawhan imong katawhan ug kami mosuportar nimo sa gubat.”

4 Apan si Jehosapat miingon sa hari sa Israel: “Palihog pagpakisayod una sa pulong ni Jehova.”+ 5 Busa gitigom sa hari sa Israel ang 400 ka propeta ug giingnan sila: “Makiggubat ba mi sa Ramot-gilead o dili?” Sila mitubag: “Adto, kay kini itugyan sa matuod nga Diyos sa kamot sa hari.”

6 Unya si Jehosapat miingon: “Wala bay propeta ni Jehova dinhi?+ Magpakisayod sab ta pinaagi niya.”+ 7 Ang hari sa Israel miingon kang Jehosapat: “Duna pay usa ka tawo+ nga pinaagi kaniya mahimo tang magpakisayod kang Jehova; apan gidumtan nako siya kay dili maayo ang iyang ginapanagna bahin kanako, pulos lang daotan.+ Siya si Micaias nga anak ni Imla.” Apan si Jehosapat miingon: “Dili angayng mosulti ang hari ug ingon niana.”

8 Busa gitawag sa hari sa Israel ang usa ka opisyal sa palasyo ug giingnan siya: “Dad-a dayon dinhi si Micaias nga anak ni Imla.”+ 9 Karon ang hari sa Israel ug si Jehosapat nga hari sa Juda naglingkod sa ilang tagsatagsa ka trono, nga nagsul-ob sa ilang harianong besti; atua sila sa giokanan didto sa entrada sa ganghaan sa Samaria, ug ang tanang propeta nanagna sa ilang atubangan. 10 Unya si Zedekias nga anak ni Kenaana naghimog mga sungay nga puthaw ug miingon: “Kini ang giingon ni Jehova, ‘Pinaagi niini inyong sungagon* ang mga Siryanhon hangtod nga mapuo ninyo sila.’” 11 Mao usab kana ang gitagna sa tanang ubang propeta, nga nag-ingon: “Adto sa Ramot-gilead kay modaog ka;+ itugyan kini ni Jehova sa kamot sa hari.”

12 Busa ang mensahero nga mitawag kang Micaias miingon kaniya: “Ang tanang gitagna sa mga propeta pabor sa hari. Palihog panagna nga pabor sa hari+ sama kanila.”+ 13 Apan si Micaias miingon: “Ingon nga si Jehova buhi, isulti nako kon unsay isulti sa akong Diyos.”+ 14 Unya siya miadto sa hari, ug ang hari miingon kaniya: “Micaias, makiggubat ba mi sa Ramot-gilead o dili?” Dihadiha siya mitubag: “Adto kay modaog ka; sila itugyan sa inyong kamot.” 15 Ang hari miingon: “Kapila ba ka nako papanumpaon nga kamatuoran lang ang imong isulti nako sa ngalan ni Jehova?” 16 Busa siya miingon: “Nakita nako ang tanang Israelinhon nga nagkatibulaag sa kabukiran, samag mga karnero nga walay magbalantay.+ Si Jehova miingon: ‘Sila walay agalon. Papaulia sila nga malinawon sa ilang mga balay.’”

17 Unya ang hari sa Israel miingon kang Jehosapat: “Dili ba giingnan ka nako nga dili maayo ang iyang ipanagna bahin kanako, pulos lang daotan?”+

18 Unya si Micaias miingon: “Busa paminawa ang pulong ni Jehova: Nakita nako si Jehova nga naglingkod sa iyang trono+ ug ang tanang panon sa kalangitan+ nagbarog diha sa iyang tuo ug sa iyang wala.+ 19 Unya si Jehova miingon, ‘Kinsay mohaylo kang Haring Ahab sa Israel aron siya mosulong ug mapukan sa Ramot-gilead?’ Managlahi ang giingon sa matag usa. 20 Unya dihay anghel*+ nga miduol sa atubangan ni Jehova ug miingon, ‘Ako ang mohaylo kaniya.’ Gipangutana siya ni Jehova, ‘Unsa may imong himoon?’ 21 Siya mitubag, ‘Moadto ko ug akong ipahinabo nga bakak ang isulti* sa tanan niyang propeta.’ Busa siya miingon, ‘Ikaw ang mohaylo kaniya ug ikaw molampos gayod. Lakaw ug buhata kana.’ 22 Ug karon gipahinabo ni Jehova nga mosultig bakak kining* imong mga propeta,+ apan si Jehova nagpahayag nga modangat kanimo ang katalagman.”

23 Unya si Zedekias+ nga anak ni Kenaana miduol kang Micaias+ ug gisagpa+ siya ug miingon: “Buot ba nimong ipasabot nga mibiya kanako ang espiritu ni Jehova* aron makigsulti kanimo?”+ 24 Si Micaias mitubag: “Mahibaloan unya nimo kana dihang mosulod ka sa kinasulorang lawak aron motago.” 25 Unya ang hari sa Israel miingon: “Dad-a si Micaias ug itugyan siya kang Amon nga pangulo sa siyudad ug kang Joas nga anak sa hari. 26 Sultihi sila, ‘Kini ang giingon sa hari: “Bilanggoa+ kining tawhana ug kunhori ang iyang rasyon sa tinapay ug tubig hangtod nga makabalik ko nga luwas.”’”* 27 Apan si Micaias miingon: “Kon luwas* kang makabalik, nan dili tinuod nga nakigsulti si Jehova kanako.”+ Unya siya midugang: “Timan-i kini, kamong tanan.”

28 Busa ang hari sa Israel ug si Jehosapat nga hari sa Juda misulong sa Ramot-gilead.+ 29 Karon ang hari sa Israel miingon kang Jehosapat: “Moadto ko sa gubat nga magtakoban, apan ikaw, pagsul-ob ug harianong besti.” Busa ang hari sa Israel nagtakoban ug sila nangadto sa gubat. 30 Karon gimandoan sa hari sa Sirya ang iyang mga pangulo sa mga magkakaro: “Ayaw mo pakig-away sa mga sundalo o sa mga opisyal, apan sa hari lang sa Israel.” 31 Pagkakita gayod sa mga pangulo sa mga magkakaro kang Jehosapat, sila naghunahuna: “Mao kana ang hari sa Israel.” Busa giatake nila siya; ug si Jehosapat nagpakitabang,+ ug siya gitabangan ni Jehova, ug dihadiha gipahinabo sa Diyos nga mapahilayo sila gikan kaniya. 32 Pagkakita sa mga pangulo sa mga magkakaro nga dili diay kadto ang hari sa Israel, wala na nila siya gukda.

33 Apan dihay usa ka tawo nga nagtira sa iyang pana ug sa wala tuyoa, naigo niya ang hari sa Israel diha sa dinugtongan sa iyang kotamaya. Busa ang hari miingon sa iyang magkakaro: “Mamalik ta ug dad-a ko pahilayo sa gubat,* kay grabe kong nasamdan.”+ 34 Grabe ang gubat ug kini nagpadayon sa tibuok adlaw, ug ang hari sa Israel kinahanglang tabangan nga makapabiling nagbarog diha sa karo nga nag-atubang sa mga Siryanhon hangtod sa pagkagabii; ug siya namatay sa pagsalop sa adlaw.+

19 Unya si Haring Jehosapat sa Juda mipauli sa iyang balay* sa Jerusalem nga luwas.*+ 2 Gisugat siya ni Jehu+ nga anak ni Hanani+ nga bisyonaryo* ug iyang giingnan si Haring Jehosapat: “Husto ba nga tabangan nimo ang daotan+ ug higugmaon kadtong nagdumot kang Jehova?+ Tungod niini nasuko si Jehova kanimo. 3 Bisan pa niana, dunay maayo nga nakita kanimo,+ kay imong giwagtang ang sagradong mga poste* gikan sa yuta ug imong giandam ang imong kasingkasing* sa pagpangita sa matuod nga Diyos.”+

4 Si Jehosapat nagpadayon sa pagpuyo sa Jerusalem, ug iyang giadto pag-usab ang katawhan gikan sa Beer-seba ngadto sa kabukiran sa Epraim+ aron pabalikon sila kang Jehova, ang Diyos sa ilang mga katigulangan.+ 5 Nagtudlo usab siyag mga maghuhukom sa tibuok nga yuta sa tanang pinarilang mga siyudad sa Juda, sa matag siyudad.+ 6 Ug iyang giingnan ang mga maghuhukom: “Tagda pag-ayo ang inyong himoon, kay kamo maghukom dili alang sa tawo kondili alang kang Jehova, ug siya magauban kaninyo sa inyong paghukom.+ 7 Busa kahadloki ninyo si Jehova.+ Pag-amping mo kon unsay inyong himoon, kay si Jehova nga atong Diyos dili gustog inhustisya,+ pagpihigpihig,+ o pagdawat ug hiphip.”+

8 Didto usab sa Jerusalem, gitudlo ni Jehosapat ang ubang mga Levihanon, mga saserdote, ug mga pangulo sa mga banay* sa Israel sa pag-alagad ingong mga maghuhukom alang kang Jehova ug sa paghusay sa mga kaso sa mga molupyo sa Jerusalem.+ 9 Ug siya nagsugo kanila: “Uban ang kahadlok kang Jehova, pagkamatinumanon, ug bug-os nga kasingkasing, himoa kini: 10 Dihang ang inyong mga igsoon nga nagpuyo sa ilang mga siyudad magpahusay ug kaso maylabot sa pag-ulag dugo+ o mangutana bahin sa usa ka balaod, sugo, mga regulasyon, o mga hukom, angay ninyo silang pasidan-an aron dili sila makasala batok kang Jehova; kay kon dili, siya masuko kaninyo ug sa inyong mga igsoon. Mao kini ang angay ninyong himoon aron dili mo mahimong sad-an. 11 Ania si Amarias nga pangulong saserdote nga maoy magdumala kaninyo bahin sa mga butang maylabot kang Jehova.+ Si Zebadias nga anak ni Ismael mao ang pangulo sa panimalay ni Juda alang sa mga butang maylabot sa hari. Ug ang mga Levihanon mag-alagad ingong inyong mga opisyal. Magmalig-on kamo ug lihok, ug hinaot nga si Jehova magauban niadtong mga naghimog maayo.”+

20 Human niana ang mga Moabihanon,+ mga Ammonhanon,+ ug ang ubang mga Ammonim* miadto aron makiggubat kang Jehosapat. 2 Busa giingnan si Jehosapat: “Dunay dakong panon sa katawhan nga miabot batok kanimo gikan sa rehiyon sa dagat,* gikan sa Edom,+ ug atua sila sa Hazazon-tamar, nga mao ang En-gedi.”+ 3 Tungod niana nahadlok si Jehosapat, ug siya mihukom* sa pagpangita kang Jehova.+ Busa gisugo niya ang tibuok Juda sa pagpuasa. 4 Unya ang katawhan sa Juda nagtigom aron magpakisayod kang Jehova;+ gikan sa tanang siyudad sa Juda, sila nangadto aron mokonsulta kang Jehova.

5 Unya si Jehosapat mitindog atubangan sa kongregasyon sa Juda ug Jerusalem diha sa balay ni Jehova atubangan sa bag-ong hawanan, 6 ug siya miingon:

“Oh Jehova nga Diyos sa among mga katigulangan, dili ba ikaw ang Diyos nga anaa sa kalangitan;+ dili ba kontrolado nimo ang tanang gingharian sa kanasoran?+ Anaa sa imong kamot ang gahom ug kusog, ug walay makabarog batok kanimo.+ 7 Oh among Diyos, dili ba imong gipapahawa ang mga molupyo niining yutaa sa atubangan sa imong katawhang Israel ug dayon gihatag kini ngadto sa kaliwat* sa imong higala nga si Abraham+ aron panag-iyahon hangtod sa panahong walay tino? 8 Ug sila mipuyo niini, ug niana sila nagtukod alang kanimo ug sangtuwaryo alang sa imong ngalan,+ nga nag-ingon, 9 ‘Kon dunay modangat kanamo nga katalagman, pinaagi man sa espada, paghukom, kamatay, o gutom, kami motindog atubangan niining balaya ug sa imong atubangan (kay ang imong ngalan ania niining balaya)+ ug magpakitabang kanimo panahon sa kasakit, ug hinaot nga ikaw maminaw ug magluwas kanamo.’+ 10 Karon ania ang mga lalaki sa Ammon, Moab, ug sa kabukiran sa Seir,+ nga wala nimo ipasulong sa Israel pagbiya nila sa Ehipto. Sila mipahilayo gikan kanila ug wala nila sila laglaga.+ 11 Karon mao kini ang ilang gibalos kanamo. Nanganhi sila aron papahawaon mi sa imong yuta nga imong gihatag kanamo ingong panulondon.+ 12 Oh among Diyos, dili ba nimo sila silotan?+ Kay kami walay mahimo batok niining dakong panon nga misulong kanamo; ug wala mi mahibalo kon unsay among himoon,+ apan kami nagasalig kanimo.”+

13 Niadtong higayona, ang tanan sa Juda nagtindog atubangan ni Jehova, uban ang ilang kabataan, mga asawa, ug mga anak.

14 Unya sa taliwala sa kongregasyon, ang espiritu ni Jehova midangat kang Jahaziel nga anak ni Zacarias nga anak ni Benaias nga anak ni Jeiel nga anak ni Matanias nga Levihanon gikan sa mga anak ni Asap. 15 Siya miingon: “Pamati kamo, tibuok Juda ug kamong mga molupyo sa Jerusalem ug Haring Jehosapat! Kini ang giingon ni Jehova kaninyo, ‘Ayaw mog kahadlok o kalisang tungod niining dakong panon, kay ang gubat dili inyo kondili iya sa Diyos.+ 16 Ugma lugsong mo batok kanila. Manungas sila sa agianan sa Ziz, ug inyong makita sila sa tumoy sa walog* atbang sa kamingawan sa Jeruel. 17 Dili mo kinahanglang makig-away niini nga gubat. Pahimutang mo, pabiling nagbarog,+ ug tan-awa ang kaluwasan nga ihatag ni Jehova kaninyo.*+ Oh Juda ug Jerusalem, ayawg kahadlok o kalisang.+ Ugma gula mo batok kanila, ug si Jehova mag-uban kaninyo.’”+

18 Dihadiha si Jehosapat miluhod ug miyukbo, ug ang tibuok Juda ug ang mga molupyo sa Jerusalem nangyukbo sa atubangan ni Jehova sa pagsimba kang Jehova. 19 Dayon ang mga Levihanon nga kaliwat sa mga Kohatnon+ ug mga Korehanon nanindog aron dayegon si Jehova nga Diyos sa Israel sa kusog kaayong tingog.+

20 Pagkaugma, namangon silag sayo ug nangadto sa kamingawan sa Tekoa.+ Samtang sila nagpaingon, si Jehosapat mibarog ug miingon: “Paminaw, Oh Juda ug kamong mga molupyo sa Jerusalem! Pagbaton ug pagtuo kang Jehova nga inyong Diyos aron lig-on mong makabarog.* Tuohi ang iyang mga propeta,+ ug kamo magmalamposon.”

21 Human siya makighisgot sa katawhan, nagtudlo siyag mga lalaki sa pag-awit+ ug mga pagdayeg kang Jehova. Sila magsul-ob ug balaang mga besti ug mag-una sa mga sundalo ug mag-awit: “Magpasalamat kamo kang Jehova, kay ang iyang maunongong gugma molungtad hangtod sa hangtod.”+

22 Pagsugod sa ilang malipayong pag-awit ug mga pagdayeg, gipahinabo ni Jehova nga kalit nga atakehon ang mga lalaki sa Ammon, Moab, ug sa kabukiran sa Seir nga misulong sa Juda, ug sila nagpinatyanay.+ 23 Ug giatake sa mga Ammonhanon ug Moabihanon ang mga molupyo sa kabukiran sa Seir+ aron laglagon ug puohon sila; ug sa dihang napuo na nila ang mga molupyo sa Seir, sila nagpinatyanay sa usag usa.+

24 Apan pag-abot sa mga taga-Juda sa bantayanang torre sa kamingawan+ aron tan-awon ang katawhan, ilang nakita ang nagbuy-od nga mga patayng lawas;+ walay usa nga nakaikyas. 25 Busa si Jehosapat ug ang iyang mga tawo miadto aron kuhaon ingong inagaw ang ilang mga butang, ug ilang nakita nga daghan kaayo silag butang, besti, ug bililhong mga gamit. Ila kining gipanguha hangtod nga dili na sila makaarang sa pagdala niini.+ Miabot ug tulo ka adlaw ang ilang pagpanguha tungod sa kadaghan. 26 Sa ikaupat ka adlaw sila nagtigom sa Walog* sa Beraca aron dayegon* si Jehova didto. Mao nga ilang gitawag kadtong dapita nga Walog sa Beraca*+​—⁠hangtod karon.

27 Unya ang tanang lalaki sa Juda ug Jerusalem, uban kang Jehosapat nga nag-una kanila, sadya nga namalik sa Jerusalem, kay gihatagan sila ni Jehova ug kadaogan batok sa ilang mga kaaway.+ 28 Busa sila nangabot sa Jerusalem nga nagdalag dekuwerdas nga mga instrumento, mga alpa,+ ug mga trompeta+ ug nangadto sila sa balay ni Jehova.+ 29 Ug pagkadungog sa tanang gingharian sa kayutaan nga si Jehova nakig-away sa mga kaaway sa Israel, gipahinabo sa Diyos nga sila mangahadlok.+ 30 Busa ang gingharian ni Jehosapat nagmalinawon, ug ang iyang Diyos nagpadayon sa paghatag kaniyag pahulay gikan sa tanan nilang kaaway sa palibot.+

31 Ug si Jehosapat nagpadayon sa pagmando sa Juda. Siya 35 anyos dihang nahimo siyang hari, ug siya nagmando sa Jerusalem sulod sa 25 ka tuig. Ang iyang inahan mao si Azuba nga anak ni Silhi.+ 32 Siya padayong nagsubay sa dalan sa iyang amahan nga si Asa.+ Wala siya motipas gikan niini ug iyang gibuhat kon unsay husto sa mga mata ni Jehova.+ 33 Apan ang tag-as nga dapit wala kuhaa,+ ug wala pa maandam sa katawhan ang ilang kasingkasing alang sa Diyos sa ilang mga katigulangan.+

34 Kon bahin sa ubang kasaysayan ni Jehosapat, sukad sa sinugdan hangtod sa kataposan, kini nasulat lakip sa mga pulong ni Jehu+ nga anak ni Hanani,+ nga gilakip diha sa Basahon sa mga Hari sa Israel. 35 Human niini, si Haring Jehosapat sa Juda nakig-alyansa sa daotang hari sa Israel nga si Ahazias.+ 36 Busa siya nakigsosyo kaniya sa paghimog mga barko nga mobiyahe paingon sa Tarsis,+ ug ang mga barko ilang gihimo sa Ezion-geber.+ 37 Apan si Eliezer nga anak ni Dodavahu sa Maresa nanagna batok kang Jehosapat, nga nag-ingon: “Kay nakig-alyansa man ka kang Ahazias, gun-obon ni Jehova ang imong gipanghimo.”+ Busa ang mga barko nangaguba,+ ug sila wala makaadto sa Tarsis.

21 Unya si Jehosapat mipahulay sa kamatayon ug gilubong uban sa iyang mga katigulangan sa Siyudad ni David; ug ang iyang anak nga si Jehoram nahimong hari puli kaniya.+ 2 Ang iyang mga igsoon, nga mga anak ni Jehosapat, mao si Azarias, Jehiel, Zacarias, Azarias, Miguel, ug Sepatias; silang tanan mga anak ni Jehosapat nga hari sa Israel. 3 Ug gihatagan sila sa ilang amahan ug daghang gasa nga plata ug bulawan, mahalong mga butang, ug kinutaang mga siyudad sa Juda;+ apan ang gingharian iyang gihatag kang Jehoram,+ kay siya ang panganay.

4 Sa dihang si Jehoram nay hari sa gingharian sa iyang amahan, iyang gipalig-on ang iyang pagmando pinaagi sa pagpatay sa tanan niyang igsoon+ pinaagig espada, ingon man ang ubang prinsipe sa Israel. 5 Si Jehoram 32 anyos dihang nahimo siyang hari, ug siya nagmando sa Jerusalem sulod sa walo ka tuig.+ 6 Siya misubay sa dalan sa mga hari sa Israel,+ sama sa gibuhat sa mga sakop sa panimalay ni Ahab, kay naasawa niya ang anak ni Ahab;+ ug siya nagpadayon sa pagbuhat kon unsay daotan sa mga mata ni Jehova. 7 Apan dili gusto ni Jehova nga magun-ob ang panimalay ni David tungod sa iyang pakigsaad kang David,+ kay siya nagsaad nga padayong magmando ang iyang mga kaliwat.*+

8 Sa iyang mga adlaw, ang Edom mialsa batok sa Juda+ ug nagtudlog kaugalingon nilang hari.+ 9 Busa si Jehoram miadto uban ang mga pangulo sa iyang kasundalohan ug ang tanan niyang karo, ug siya miatake panahon sa kagabhion ug gipildi ang mga Edomhanon nga naglibot kaniya ug sa mga pangulo sa mga magkakaro. 10 Apan ang Edom nagpadayon sa pag-alsa batok sa Juda hangtod karon. Ang Libna+ nianang panahona mialsa usab batok kaniya kay siya mibiya kang Jehova nga Diyos sa iyang mga katigulangan.+ 11 Siya naghimo usab ug tag-as nga dapit+ sa kabukiran sa Juda aron impluwensiyahan ang mga molupyo sa Jerusalem sa paghimog espirituwal nga prostitusyon, ug iyang gipahisalaag ang Juda.

12 Sa ulahi, nakadawat siyag sinulat nga mensahe gikan kang propetang Elias,+ nga nag-ingon: “Mao kini ang giingon ni Jehova nga Diyos ni David nga imong katigulangan, ‘Wala nimo subaya ang dalan ni Jehosapat+ nga imong amahan o ang dalan ni Asa+ nga hari sa Juda. 13 Apan nagsubay ka sa dalan sa mga hari sa Israel+ ug imong giimpluwensiyahan ang Juda ug ang mga molupyo sa Jerusalem sa paghimog espirituwal nga prostitusyon+ sama sa prostitusyon sa panimalay ni Ahab,+ ug gipamatay pa gani nimo ang kaugalingon nimong mga igsoon,+ ang panimalay sa imong amahan, nga mas maayo kay kanimo. 14 Busa hampakon ni Jehova ang imong katawhan, ang imong mga anak, ang imong mga asawa, ug ang tanan nimong gipanag-iya. 15 Ug mag-antos kag daghang sakit, lakip na ang sakit sa imong mga tinai, ug adlaw-adlaw nga magkagrabe ang imong sakit hangtod nga molugwa ang imong mga tinai.’”

16 Unya giaghat ni Jehova+ nga mobatok kang Jehoram ang mga Filistehanon*+ ug mga Arabo+ nga didto duol sa mga Etiopianhon. 17 Busa gisulong nila ang Juda ug gisulod kini. Ilang gipanguha ang tanang kabtangan diha sa balay* sa hari,+ ingon man ang iyang mga anak ug mga asawa; ug ang nahibilin lang niyang anak mao ang iyang kamanghoran nga si Jehoahaz.*+ 18 Human niining tanan, gihampak siya ni Jehova ug sakit sa tinai nga walay pagkaayo.+ 19 Sa ulahi, paglabay ug duha ka tuig, ang iyang mga tinai milugwa tungod sa iyang sakit, ug siya namatay nga nag-antos pag-ayo sa iyang sakit; ug ang iyang katawhan wala maghimog daob sa pagpasidungog kaniya sama sa daob nga gihimo alang sa iyang mga katigulangan.+ 20 Siya 32 anyos dihang nahimo siyang hari, ug nagmando siya sa Jerusalem sulod sa walo ka tuig. Pagkamatay niya, wala gyoy naguol. Busa gilubong nila siya sa Siyudad ni David,+ apan dili sa mga lubnganan sa mga hari.+

22 Unya ang mga molupyo sa Jerusalem naghimo sa iyang kamanghorang anak nga si Ahazias ingong hari puli niya, kay ang mga bandido nga miatake sa kampo uban sa mga Arabo nagpatay sa tanang magulang.+ Busa si Ahazias nga anak ni Jehoram misugod sa pagmando ingong hari sa Juda.+ 2 Si Ahazias 22 anyos dihang nahimo siyang hari, ug siya nagmando sa Jerusalem sulod sa usa ka tuig. Ang iyang inahan mao si Atalia+ nga apo* ni Omri.+

3 Siya misubay usab sa dalan sa panimalay ni Ahab,+ kay ang iyang inahan nahimong iyang magtatambag sa pagbuhat ug daotan. 4 Ug siya nagpadayon sa pagbuhat kon unsay daotan sa mga mata ni Jehova, sama sa panimalay ni Ahab, kay sila nahimong iyang mga magtatambag human mamatay ang iyang amahan, nga miresulta sa iyang kalaglagan. 5 Iyang gisunod ang ilang tambag ug siya miuban kang Jehoram nga anak ni Ahab nga hari sa Israel aron makiggubat kang Haring Hazael+ sa Sirya sa Ramot-gilead,+ diin si Jehoram naigo sa mga magpapana. 6 Siya mipauli sa Jezreel+ aron magpaayo sa mga samad nga iyang naagoman sa Rama dihang nakig-away siya kang Haring Hazael sa Sirya.+

Si Ahazias* nga anak ni Jehoram+ nga hari sa Juda miadto sa Jezreel aron duawon si Jehoram+ nga anak ni Ahab, kay siya nasamdan.*+ 7 Apan gipahinabo sa Diyos nga mapukan si Ahazias pinaagi sa iyang pag-adto kang Jehoram; ug pag-abot niya didto, siya miuban kang Jehoram sa pagsugat kang Jehu+ nga apo* ni Nimsi, nga gidihogan ni Jehova sa paglaglag* sa panimalay ni Ahab.+ 8 Dihang gihukman ni Jehu ang panimalay ni Ahab, iyang nakita ang mga prinsipe sa Juda ug ang mga anak sa mga igsoon ni Ahazias, nga mga alagad ni Ahazias, ug iyang gipamatay sila.+ 9 Unya iyang gipangita si Ahazias; ilang nadakpan siya sa iyang gitagoan sa Samaria, ug ilang gidala siya kang Jehu. Unya ilang gipatay siya ug gilubong,+ kay sila miingon: “Apo siya ni Jehosapat, nga nangita kang Jehova sa bug-os niyang kasingkasing.”+ Walay usa sa panimalay ni Ahazias ang dunay gahom sa pagmando sa gingharian.

10 Pagkahibalo ni Atalia,+ inahan ni Ahazias, nga ang iyang anak namatay, iyang gipamatay ang tanang kaliwat sa hari* sa panimalay ni Juda.+ 11 Apan gikawat ni Jehosabet, nga anak nga babaye sa hari, si Jehoas+ nga anak ni Ahazias gikan sa mga anak sa hari nga patyonon, ug iyang gitago siya ug ang yaya niini sa sulod nga kuwarto. Si Jehosabet nga anak ni Haring Jehoram+ (asawa siya ni Jehoiada+ nga saserdote ug igsoon ni Ahazias) nakahimo sa pagtago kaniya gikan kang Atalia, busa wala niya siya mapatay.+ 12 Siya kauban nila sulod sa unom ka tuig, nga gitagoan diha sa balay sa matuod nga Diyos, samtang si Atalia nagmando sa yuta.

23 Sa ikapito ka tuig, si Jehoiada milihok nga maisogon ug naghimog kasabotan* uban sa mga pangulo sa kada 100+ nga si Azarias nga anak ni Jeroham, si Ismael nga anak ni Jehohanan, si Azarias nga anak ni Obed, si Maaseias nga anak ni Adaia, ug si Elisapat nga anak ni Zikri. 2 Unya ilang gilibot ang tibuok Juda ug gitigom ang mga Levihanon+ gikan sa tanang siyudad sa Juda ug ang mga pangulo sa mga banay* sa Israel. Pag-abot nila sa Jerusalem, 3 ang tibuok kongregasyon nakigsaad+ sa hari diha sa balay sa matuod nga Diyos, ug siya miingon kanila:

“Tan-awa! Ang anak sa hari magmando, sumala sa gisaad ni Jehova maylabot sa mga anak ni David.+ 4 Kini ang inyong buhaton: Bahina sa tulo ka grupo ang mga saserdote ug mga Levihanon nga moalagad+ panahon sa Igpapahulay. Ang usa ka grupo maoy mga magbalantay sa pultahan;+ 5 ang laing grupo adto sa balay* sa hari,+ ug ang usa pa ka grupo adto sa Ganghaan sa Pundasyon, ug ang tanang katawhan adto sa mga hawanan sa balay ni Jehova.+ 6 Ayawg pasudla sa balay ni Jehova si bisan kinsa gawas sa mga saserdote ug mga Levihanon nga nag-alagad.+ Sila makasulod kay balaan sila nga grupo, ug ang tanang katawhan magtuman sa obligasyon kang Jehova. 7 Kinahanglang palibotan sa mga Levihanon ang hari, nga ang matag usa magdalag mga hinagiban. Si bisan kinsa nga mosulod sa balay patyon. Ubani ang hari bisan asa siya moadto.”*

8 Gibuhat sa mga Levihanon ug sa tibuok Juda ang tanang gisugo ni Jehoiada nga saserdote. Busa ang matag usa kanila nagdala sa iyang mga tawo nga nag-alagad panahon sa Igpapahulay,+ lakip kadtong wala mag-alagad panahon sa Igpapahulay, kay gipaalagad ni Jehoiada nga saserdote ang mga dibisyon+ bisag dili nila turno. 9 Unya gihatag ni Jehoiada nga saserdote ngadto sa mga pangulo sa kada 100+ ang mga bangkaw, ang gagmayng mga taming,* ug ang lingin nga mga taming nga iya kaniadto ni Haring David,+ nga didto sa balay sa matuod nga Diyos.+ 10 Unya iyang gipahimutang ang tibuok katawhan palibot sa hari, nga ang matag usa nagdalag hinagiban,* gikan sa tuo nga bahin sa balay hangtod sa wala nga bahin sa balay, dapit sa halaran ug sa balay. 11 Unya ilang gidala sa gawas ang anak sa hari+ ug gibutang kaniya ang korona* ug ang Pamatuod*+ ug gihimo siyang hari, ug gidihogan siya ni Jehoiada ug sa iyang mga anak. Dayon sila miingon: “Mabuhi ang hari!”+

12 Pagkadungog ni Atalia sa tingog sa katawhan nga nagdagan ug nagdayeg sa hari, siya miadto dayon sa katawhan didto sa balay ni Jehova.+ 13 Unya iyang nakita ang hari nga nagtindog sa may haligi* sa entrada. Kauban sa hari ang mga prinsipe+ ug ang mga tigtrompeta, ug ang tanang katawhan sa yuta nagsadya+ ug naghuyop sa mga trompeta, ug ang mga mag-aawit nga nagdalag mga instrumento sa musika mao ang nanguna* sa pagdayeg. Dihadiha gigisi ni Atalia ang iyang mga besti ug misinggit: “Dunay panagkunsabo! Dunay panagkunsabo!” 14 Apan gipagawas ni Jehoiada nga saserdote ang mga pangulo sa kada 100, kadtong gitudlo sa pagdumala sa kasundalohan, ug giingnan sila: “Kuhaa ninyo siya taliwala sa katawhan, ug si bisan kinsa nga mosunod kaniya patyon pinaagig espada!” Kay ang saserdote miingon: “Ayaw siyag patya sa balay ni Jehova.” 15 Busa ilang gidakop siya ug gidala sa entrada sa Ganghaan sa Kabayo sa balay* sa hari, ug ila dayon siyang gipatay didto.

16 Unya si Jehoiada naghimog pakigsaad tali kaniya ug sa tibuok katawhan ug sa hari, nga sila magpabiling katawhan ni Jehova.+ 17 Human niana ang tibuok katawhan miadto sa balay* ni Baal ug gilumpag kini,+ ug ilang gipulpog ang iyang mga halaran ug mga imahen,+ ug ilang gipatay si Matan nga saserdote ni Baal+ atubangan sa mga halaran. 18 Unya gipadumala ni Jehoiada ang balay ni Jehova sa mga saserdote ug mga Levihanon, nga gitudlo ni David sa mga dibisyon aron mag-alagad sa balay ni Jehova sa pagtanyag sa mga halad nga sinunog ni Jehova+ sumala sa nasulat sa Balaod ni Moises,+ uban ang pagsadya ug pag-awit, sumala sa instruksiyon* ni David. 19 Gibutang usab niya ang mga magbalantay sa ganghaan+ didto sa ganghaan sa balay ni Jehova, aron walay usa nga hugaw sa bisan unsang paagi ang makasulod. 20 Karon iyang gidala ang mga pangulo sa kada 100,+ ang mga halangdon, ang mga magmamando sa katawhan, ug ang tibuok katawhan sa yuta ug giubanan ang hari gikan sa balay ni Jehova. Unya miagi sila sa ibabaw nga ganghaan paingon sa balay* sa hari ug gipalingkod ang hari sa trono+ sa gingharian.+ 21 Busa ang tanang katawhan sa yuta nagsadya ug ang siyudad nagmalinawon, kay si Atalia ilang gipatay pinaagig espada.

24 Si Jehoas siyete anyos dihang nahimo siyang hari,+ ug siya nagmando sa Jerusalem sulod sa 40 ka tuig. Ang iyang inahan mao si Zibia nga taga-Beer-seba.+ 2 Si Jehoas padayong nagbuhat kon unsay husto sa mga mata ni Jehova sa tanang adlaw ni Jehoiada nga saserdote.+ 3 Si Jehoiada mipilig duha ka asawa alang kaniya, ug siya nakabaton ug mga anak nga lalaki ug babaye.

4 Sa ulahi, gitinguha* ni Jehoas nga ayohon ang balay ni Jehova.+ 5 Busa iyang gitigom ang mga saserdote ug mga Levihanon ug giingnan sila: “Pangadto mo sa mga siyudad sa Juda ug pangolektag salapi gikan sa tibuok Israel alang sa pag-ayo sa balay sa inyong Diyos+ kada tuig; ug lihoka dayon ninyo kini.” Apan wala dayon molihok ang mga Levihanon.+ 6 Busa gipatawag sa hari si Jehoiada nga pangulo ug giingnan siya:+ “Nganong wala man nimo sugoa ang mga Levihanon sa pagkuha sa sagradong buhis gikan sa Juda ug sa Jerusalem sumala sa gisugo ni Moises+ nga alagad ni Jehova, ang sagradong buhis sa kongregasyon sa Israel, alang sa tolda sa Pamatuod?+ 7 Kay gilungkab sa mga anak sa daotang babaye nga si Atalia+ ang balay sa matuod nga Diyos,+ ug ilang gigamit ang tanang balaang butang sa balay ni Jehova alang sa mga Baal.” 8 Unya, sa sugo sa hari, gibuhat ang usa ka kahon+ ug gibutang kini sa gawas diha sa ganghaan sa balay ni Jehova.+ 9 Human niana, gipagula ang usa ka proklamasyon sa tibuok Juda ug Jerusalem nga dad-on kang Jehova ang sagradong buhis+ nga gisugo ni Moises nga alagad sa matuod nga Diyos ngadto sa Israel didto sa kamingawan. 10 Ang tanang prinsipe ug ang tanang katawhan nagsadya,+ ug sila nagdalag mga amot ug naghulog niini sa kahon hangtod nga kini napuno.*

11 Dihang makita sa mga Levihanon nga daghan nag salapi ang kahon, ila kining dad-on aron itugyan ngadto sa hari. Dayon ang sekretaryo sa hari ug ang representante sa pangulong saserdote moadto ug habwaan ang kahon,+ ug unya ibalik nila kini sa butanganan niini. Mao kadto ang ilang ginabuhat kada adlaw, ug sila nakatigom ug daghang salapi. 12 Unya ihatag kini sa hari ug ni Jehoiada ngadto sa mga nagdumala sa buluhaton sa pag-alagad sa balay ni Jehova, ug sila magsuhol ug mga magtatabas ug bato ug mga artesano* sa pagtrabaho sa balay ni Jehova.+ Magsuhol usab silag mga panday sa puthaw ug tumbaga aron ayohon ang balay ni Jehova. 13 Ug gisugdan sa mga nagdumala sa buluhaton ang pagpatrabaho, ug ang pagpang-ayo miuswag ubos sa ilang pagdumala, ug ilang gipasig-uli ang balay sa matuod nga Diyos sa maayong kahimtang ug gipalig-on kini. 14 Ug pagkahuman gyod nila, ilang gidala ang nahibiling salapi ngadto sa hari ug kang Jehoiada, ug ila kining gigamit sa paghimog mga galamiton sa balay ni Jehova, mga galamiton alang sa pag-alagad ug sa paghalad, mga kopa, ug mga galamiton nga bulawan ug plata.+ Ug regular silang magtanyag ug mga halad nga sinunog+ sa balay ni Jehova sa tanang adlaw ni Jehoiada.

15 Dihang si Jehoiada tigulang na, siya namatay nga tagbaw sa iyang kinabuhi; 130 anyos siya pagkamatay niya. 16 Busa ilang gilubong siya sa Siyudad ni David uban sa mga hari,+ kay siya nagbuhat ug maayo sa Israel+ maylabot sa matuod nga Diyos ug sa Iyang balay.

17 Human sa kamatayon ni Jehoiada, ang mga prinsipe sa Juda miadto ug miyukbo sa hari, ug ang hari namati kanila. 18 Sila mibiya sa balay ni Jehova nga Diyos sa ilang mga katigulangan ug mialagad sa sagradong mga poste* ug sa mga idolo, mao nga ang Diyos nasuko* sa Juda ug Jerusalem tungod sa ilang pagkasad-an. 19 Siya padayong nagpadala kanilag mga propeta aron mobalik sila kang Jehova, ug sila nagsigeg pasidaan* kanila, apan wala sila maminaw.+

20 Ug ang espiritu sa Diyos milihok kang Zacarias nga anak ni Jehoiada+ nga saserdote, ug siya mitindog atubangan sa katawhan ug miingon: “Kini ang giingon sa matuod nga Diyos, ‘Nganong inyong gilapas ang mga sugo ni Jehova? Dili mo molampos! Kay mibiya mo kang Jehova, biyaan sab mo niya.’”+ 21 Apan sila nagkunsabo batok kaniya,+ ug sa sugo sa hari ilang gibato siya sa hawanan sa balay ni Jehova.+ 22 Busa wala hinumdomi ni Haring Jehoas ang maunongong gugma nga gipakita kaniya sa iyang amahan* nga si Jehoiada, ug gipatay niya ang anak niini, kinsa miingon dihang himalatyon na: “Hinaot nga silotan ka ni Jehova sa imong gihimo.”+

23 Sa sinugdanan sa misunod nga tuig, ang kasundalohan sa Sirya nakig-away kang Jehoas, ug ilang gisulong ang Juda ug Jerusalem.+ Unya ilang gipamatay ang tanang prinsipe+ sa katawhan, ug ang tanan nilang nailog sa gubat ilang gipadala ngadto sa hari sa Damasco. 24 Bisag diyutay ra ang kasundalohan sa mga Siryanhon nga misulong, gitugyan ni Jehova kanila ang dakong panon sa kasundalohan,+ kay sila mibiya kang Jehova nga Diyos sa ilang mga katigulangan; busa ilang* gipahamtang ang hukom kang Jehoas. 25 Ug pagbiya nila kaniya (kay ilang gibiyaan siya nga grabeng nasamdan*), ang iyang kaugalingong mga alagad nagkunsabo batok kaniya kay iyang gipatay ang mga anak* ni Jehoiada+ nga saserdote. Ila siyang gipatay diha sa iyang higdaanan.+ Siya namatay ug gilubong sa Siyudad ni David,+ apan wala nila siya ilubong sa mga lubnganan sa mga hari.+

26 Kini sila ang nagkunsabo+ batok kaniya: si Zabad nga anak ni Simeat nga babayeng Ammonhanon ug si Jehozabad nga anak ni Simrit nga babayeng Moabihanon. 27 Kon bahin sa iyang mga anak ug sa daghang pahayag batok kaniya+ ug sa pag-ayo* sa balay sa matuod nga Diyos,+ kining tanan narekord sa mga sinulat* sa Basahon sa mga Hari. Ug ang iyang anak nga si Amazias nahimong hari puli niya.

25 Si Amazias 25 anyos dihang nahimo siyang hari, ug siya nagmando sa Jerusalem sulod sa 29 ka tuig. Ang iyang inahan mao si Jehoadan nga taga-Jerusalem.+ 2 Siya padayong nagbuhat kon unsay husto sa mga mata ni Jehova, apan dili sa bug-os nga kasingkasing. 3 Dihang lig-on na ang iyang pagmando sa gingharian, iyang gipamatay ang iyang mga alagad nga nagpatay sa iyang amahan nga hari.+ 4 Apan wala niya patya ang ilang mga anak, kay iyang gisunod ang nasulat sa Balaod, sa basahon ni Moises, diin si Jehova nagsugo: “Ang mga amahan dili angayng mamatay tungod sa ilang mga anak, ug ang mga anak dili angayng mamatay tungod sa ilang mga amahan; apan ang matag usa mamatay tungod sa iyang kaugalingong sala.”+

5 Ug gitigom ni Amazias ang Juda ug gipatindog sila sumala sa ilang banay,* sumala sa mga pangulo sa kada 1,000 ug sumala sa mga pangulo sa kada 100 alang sa tibuok Juda ug Benjamin.+ Iyang girehistro kadtong 20 anyos pataas,+ ug iyang nakaplagan nga dihay 300,000 ka binansay* nga mga manggugubat nga mahimong magsundalo, nga makamaong mogamit ug bangkaw ug dakong taming. 6 Dugang pa, siya nagkuhag 100,000 ka banggiitang manggugubat gikan sa Israel ug gisuholan silag 100 ka talanton* nga plata. 7 Apan dihay tawo sa matuod nga Diyos nga miadto kaniya ug miingon: “Oh hari, ayawg paubana ang kasundalohan sa Israel kanimo, kay si Jehova wala mag-uban sa Israel,+ sa bisan kinsang Epraimnon. 8 Apan adto nga ikaw ra, lihok, ug magmaisogon ka sa gubat kay ang matuod nga Diyos dunay gahom sa pagtabang+ kanimo. Kay kon dili, mahimo niyang tugotan nga mapildi ka sa imong kaaway.” 9 Si Amazias miingon sa tawo sa matuod nga Diyos: “Apan unsaon na lang ang 100 ka talanton nga akong gihatag sa kasundalohan sa Israel?” Ang tawo sa matuod nga Diyos mitubag: “Si Jehova makahatag kanimo ug mas daghan pa kay niana.”+ 10 Busa ang kasundalohan nga nangabot gikan sa Epraim gipapauli ni Amazias ngadto sa ilang dapit. Apan sila nangasuko pag-ayo sa Juda, mao nga sila namauli nga puwerteng sukoa.

11 Unya si Amazias nagmaisogon ug iyang gidala ang iyang kasundalohan sa Walog sa Asin,+ ug gipatay niya ang 10,000 ka lalaki sa Seir.+ 12 Ug 10,000 ang nadakpan sa kalalakin-an sa Juda. Unya ilang gidala sila sa pangpang ug gipanghulog, ug silang tanan nagkagutaygutay. 13 Apan ang mga sakop sa kasundalohan nga gipabalik ni Amazias ug wala paubana sa gubat+ misulong sa mga siyudad sa Juda, gikan sa Samaria+ hangtod sa Bet-horon;+ sila nakapatay ug 3,000 ka tawo ug nakailog ug daghang butang.

14 Apan pagbalik ni Amazias gikan sa pagpatay sa mga Edomhanon, iyang gidala ang mga diyos sa mga tawo sa Seir ug gihimo kining iyang mga diyos.+ Iya kining giyukboan ug naghimo siyag gipaaso nga halad alang niini. 15 Busa si Jehova nasuko pag-ayo kang Amazias, ug nagpadala siyag propeta kinsa miingon kaniya: “Nganong nagsimba ka sa mga diyos sa katawhan nga wala makaluwas sa ilang katawhan gikan sa imong kamot?”+ 16 Samtang nagsulti siya, ang hari miingon: “Gitudlo ba ka namo ingong magtatambag sa hari?+ Paghilom+ kon dili ka gustong mamatay!” Unya ang propeta mihilom, apan siya midugang: “Nahibalo ko nga ang Diyos nakahukom na sa paglaglag kanimo, kay imo kining gibuhat ug wala ka maminaw sa akong tambag.”+

17 Human mokonsulta sa iyang mga magtatambag, si Haring Amazias sa Juda nagpadalag mensahe ngadto kang Jehoas nga anak ni Jehoahaz nga anak ni Jehu nga hari sa Israel, nga nag-ingon: “Dali, magsangka ta sa gubat.”*+ 18 Si Haring Jehoas sa Israel nagpadala niini nga mensahe ngadto kang Haring Amazias sa Juda: “Ang tunokong sagbot sa Lebanon nagpadalag mensahe ngadto sa kahoyng sedro sa Lebanon, ‘Ipaasawa ang imong anak sa akong anak.’ Apan dihay ihalas nga mananap sa Lebanon nga miagi ug giyatakan niini ang tunokong sagbot. 19 Miingon ka, ‘Ania! Akong* gihampak ang Edom.’+ Busa nahimo kang mapahitas-on ug gusto nimong mabayaw. Apan pagpuyo na lang sa imong balay.* Nganong mangita man kag samok, nga mapildi ra man ka ug ang Juda?”

20 Apan si Amazias wala maminaw,+ kay gikan kadto sa matuod nga Diyos aron ikatugyan sila ngadto sa ilang kaaway,+ kay nagsimba sila sa mga diyos sa Edom.+ 21 Busa si Haring Jehoas sa Israel miadto, ug nagsangka sila ni Amazias nga hari sa Juda didto sa Bet-semes,+ nga sakop sa Juda. 22 Ang Juda napildi sa Israel, mao nga sila nangalagiw ngadto sa ilang mga balay.* 23 Nadakpan ni Jehoas nga hari sa Israel didto sa Bet-semes si Haring Amazias sa Juda, nga anak ni Jehoas nga anak ni Jehoahaz.* Unya iyang gidala siya sa Jerusalem ug gilumpag ang paril sa Jerusalem gikan sa Ganghaan ni Epraim+ hangtod sa Ganghaan sa Eskina,+ 400 ka maniko.* 24 Iyang gikuha ang tanang bulawan ug plata ug ang tanang butang nga diha sa balay sa matuod nga Diyos nga ubos sa pagdumala ni Obed-edom ug diha sa mga tipiganag bahandi sa balay* sa hari,+ ug nagdala siyag mga binihag. Unya mibalik siya sa Samaria.

25 Si Amazias+ nga anak ni Jehoas nga hari sa Juda nabuhi pag 15 ka tuig human mamatay si Jehoas nga anak ni Jehoahaz+ nga hari sa Israel.+ 26 Kon bahin sa ubang kasaysayan ni Amazias, sukad sa sinugdan hangtod sa kataposan, dili ba nasulat kini sa Basahon sa mga Hari sa Juda ug sa Israel? 27 Sukad nga si Amazias mibiya kang Jehova, sila nagkunsabo+ batok kaniya sa Jerusalem, ug siya mikalagiw ngadto sa Lakis, apan gipasundan nila siyag mga tawo didto sa Lakis ug gipatay siya didto. 28 Busa ilang gisakay siya sa mga kabayo ug gidalag balik ug gilubong siya uban sa iyang mga katigulangan sa siyudad sa Juda.

26 Unya si Uzzias,+ nga 16 anyos, gikuha sa tibuok katawhan sa Juda ug gihimong hari puli sa iyang amahan nga si Amazias.+ 2 Iyang gitukod pag-usab ang Elot+ ug gibalik kini sa Juda human nga ang hari* mipahulay sa kamatayon.*+ 3 Si Uzzias+ 16 anyos dihang nahimo siyang hari, ug siya nagmando sa Jerusalem sulod sa 52 ka tuig. Ang iyang inahan mao si Jecolias nga taga-Jerusalem.+ 4 Siya nagpadayon sa pagbuhat kon unsay husto sa mga mata ni Jehova, sama sa gibuhat ni Amazias nga iyang amahan.+ 5 Ug padayon siyang nangita sa Diyos sa mga adlaw ni Zacarias, kinsa nagtudlo kaniya sa pagkahadlok sa matuod nga Diyos. Sa panahon nga nangita siya kang Jehova, ang matuod nga Diyos naghimo kaniyang mauswagon.+

6 Siya misulong ug nakig-away sa mga Filistehanon+ ug iyang gilumpag ang paril sa Gat,+ paril sa Jabne,+ ug paril sa Asdod.+ Dayon nagtukod siyag mga siyudad sa teritoryo sa Asdod ug sa teritoryo sa mga Filistehanon. 7 Ang matuod nga Diyos padayong nagtabang kaniya batok sa mga Filistehanon, sa mga Arabiano+ nga nagpuyo sa Gurbaal, ug sa Meunim. 8 Ang mga Ammonhanon+ misugod sa paghatag ug buhis* kang Uzzias. Ang iyang kabantog miabot hangtod sa Ehipto, kay siya nahimong gamhanan kaayo. 9 Dugang pa, si Uzzias nagtukod ug mga torre+ sa Jerusalem dapit sa Ganghaan sa Eskina,+ sa Ganghaan sa Walog,+ ug sa Tukod, ug iyang gipalig-on kini. 10 Nagtukod usab siyag mga torre+ didto sa kamingawan ug nagkalot* ug daghang gahong nga pondohanag tubig (kay daghan kaayo siyag kahayopan); gihimo usab niya kana sa Sepela ug sa kapatagan.* Diha siyay mga mag-uuma ug mga tig-atiman sa ubasan sa kabukiran ug sa Carmelo, kay ganahan siyag pagpanguma.

11 Dugang pa, si Uzzias dunay kasundalohan nga andam sa pagpakiggubat. Bahinbahinon sila sa mga dibisyon dihang sila mosulong. Sila giihap ug girehistro+ ni Jeiel nga sekretaryo+ ug ni Maaseias nga opisyal ubos sa pagdumala ni Hananias, nga usa sa mga prinsipe sa hari. 12 Ang katibuk-ang gidaghanon sa mga pangulo sa mga banay* nga nagdumala niining banggiitang mga manggugubat maoy 2,600. 13 Ang gidaghanon sa kasundalohan nga ilang gidumala maoy 307,500 nga andam sa pagpakiggubat, usa ka gamhanang puwersa militar nga motabang sa hari batok sa kaaway.+ 14 Gitagan-an ni Uzzias ang tibuok kasundalohan ug mga taming, bangkaw,+ helmet, kotamaya,+ pana, ug mga bato alang sa lambuyog.+ 15 Naghimo usab siya sa Jerusalem ug mga hinagiban sa gubat nga gidisenyo sa mga inhenyero; gibutang kini ibabaw sa mga torre+ ug sa mga kanto sa paril ug gigamit kini sa pagtira sa mga udyong ug sa dagkong mga bato. Busa ang iyang kabantog mikaylap hangtod sa lagyong mga dapit, kay siya nakadawat ug dakong tabang ug nahimong gamhanan.

16 Apan dihang gamhanan na siya, siya nahimong mapahitas-on nga miresulta sa iyang ikadaot, ug siya wala magmatinumanon kang Jehova nga iyang Diyos pinaagi sa pagsulod sa templo ni Jehova aron magsunog ug insenso sa halaran sa insenso.+ 17 Dihadiha gisundan siya ni Azarias nga saserdote ug sa 80 ka isog nga saserdote ni Jehova. 18 Ilang gibadlong si Haring Uzzias, nga nag-ingon: “Dili nimo buluhaton, Uzzias, ang pagsunog ug insenso kang Jehova!+ Mga saserdote lang ang angayng magsunog ug insenso, kay sila mga kaliwat ni Aaron,+ ang mga gibalaan. Gula sa sangtuwaryo, kay wala ka magmatinumanon ug tungod niini dili ka pasidunggan ni Jehova nga Diyos.”

19 Apan si Uzzias, nga naggunit ug insensaryo alang sa pagsunog ug insenso, nasuko;+ ug sa iyang pagkasuko sa mga saserdote, kalit nga mitungha ang sanla+ sa iyang agtang atubangan sa mga saserdote tapad sa halaran sa insenso sa balay ni Jehova. 20 Pagtan-aw ni Azarias nga pangulong saserdote ug sa tanang saserdote kaniya, ilang nakita nga nataptan ug sanla ang iyang agtang! Busa gidali nila siyag dala pagawas, ug siya mismo nagdalig gawas, kay si Jehova naghampak kaniya.

21 Ang sanla ni Haring Uzzias wala maayo hangtod nga siya namatay, ug siya padayong nagpuyo sa laing balay tungod sa iyang sanla,+ kay wala na siya tugti sa pagsulod sa balay ni Jehova. Ang iyang anak nga si Jotam maoy nagdumala sa balay* sa hari, nga maoy tigpakanaog ug hukom sa katawhan sa yuta.+

22 Ug ang ubang kasaysayan ni Uzzias, sukad sa sinugdan hangtod sa kataposan, gisulat ni propetang Isaias+ nga anak ni Amoz. 23 Unya si Uzzias mipahulay sa kamatayon ug ilang gilubong siya uban sa iyang mga katigulangan, apan didto siya gilubong sa lubnganan sa gawas sa lubnganan sa mga hari, kay sila miingon: “Siya sanlahon.” Ug si Jotam+ nga iyang anak nahimong hari puli niya.

27 Si Jotam+ 25 anyos dihang nahimo siyang hari, ug siya nagmando sa Jerusalem sulod sa 16 ka tuig. Ang iyang inahan mao si Jerusa nga anak ni Zadok.+ 2 Siya nagpadayon sa pagbuhat kon unsay husto sa mga mata ni Jehova, sama sa gibuhat sa iyang amahan nga si Uzzias,+ gawas lang sa pagpangahas ug sulod sa templo ni Jehova.+ Apan ang katawhan naghimo pa gihapon ug daotan. 3 Iyang gihimo ang ibabaw nga ganghaan sa balay ni Jehova,+ ug daghan siyag gitukod sa paril sa Opel.+ 4 Nagtukod usab siyag mga siyudad+ sa kabukiran sa Juda,+ ug nagtukod siyag mga kuta+ ug mga torre+ sa mga dapit nga daghag kahoy. 5 Siya nakiggubat sa hari sa mga Ammonhanon+ ug sa ulahi midaog batok kanila, mao nga ang mga Ammonhanon naghatag kaniya nianang tuiga ug 100 ka talanton* nga plata, 10,000 ka cor* nga trigo, ug 10,000 ka cor nga sebada. Ingon usab niini ang gibayad kaniya sa mga Ammonhanon sa ikaduha ug sa ikatulo ka tuig.+ 6 Busa si Jotam nag-anam ka gamhanan, kay siya determinado sa pagsubay sa mga dalan ni Jehova nga iyang Diyos.

7 Kon bahin sa ubang kasaysayan ni Jotam, ang tanan niyang pagpakiggubat ug kalihokan, kini nasulat sa Basahon sa mga Hari sa Israel ug Juda.+ 8 Siya 25 anyos dihang nahimo siyang hari, ug siya nagmando sa Jerusalem sulod sa 16 ka tuig.+ 9 Unya si Jotam mipahulay sa kamatayon,* ug ilang gilubong siya sa Siyudad ni David.+ Ug si Ahaz nga iyang anak nahimong hari puli niya.+

28 Si Ahaz+ 20 anyos dihang nahimo siyang hari, ug siya nagmando sa Jerusalem sulod sa 16 ka tuig. Wala niya buhata kon unsay husto sa mga mata ni Jehova, dili sama sa gibuhat ni David nga iyang katigulangan.+ 2 Hinuon, siya misubay sa mga dalan sa mga hari sa Israel,+ ug naghimo pa gani siyag metal nga mga estatuwa*+ sa mga Baal. 3 Naghimo usab siyag gipaaso nga halad didto sa Walog sa Anak ni Hinnom* ug iyang gisunog ang iyang mga anak,+ nga nagsunod sa dulumtanang mga buhat sa mga nasod+ nga gipang-abog ni Jehova sa atubangan sa mga Israelinhon. 4 Kanunay usab siyang maghalad ug maghimog gipaaso nga halad didto sa tag-as nga dapit,+ sa mga bungtod, ug sa ilalom sa matag labong nga kahoy.+

5 Busa gitugyan siya ni Jehova nga iyang Diyos ngadto sa kamot sa hari sa Sirya,+ mao nga ila siyang napildi ug daghan kaayo silag nabihag nga gidala nila sa Damasco.+ Gitugyan usab siya sa kamot sa hari sa Israel, kinsa daghag napatay sa iyang mga sakop. 6 Si Peka+ nga anak ni Remalias nakapatay sa Juda ug 120,000 sa usa ka adlaw, ang tanan isog nga mga lalaki, kay sila mibiya kang Jehova, ang Diyos sa ilang mga katigulangan.+ 7 Ug si Zikri nga Epraimnong manggugubat nagpatay kang Maaseias nga anak sa hari, kang Azrikam nga nagdumala sa palasyo,* ug kang Elkana nga ikaduha sa hari. 8 Dugang pa, gibihag sa mga Israelinhon ang 200,000 sa ilang mga igsoon​—⁠mga babaye, anak nga lalaki, ug anak nga babaye; daghan usab kaayo silag nailog sa gubat, ug gidala nila kini sa Samaria.+

9 Apan dihay propeta ni Jehova didto nga ginganlag Oded. Iyang giadto ang kasundalohan nga nagpaingon sa Samaria ug giingnan sila: “Ania! Kay si Jehova nga Diyos sa inyong mga katigulangan nasuko sa Juda, iya silang gitugyan sa inyong kamot.+ Apan inyo silang gipamatay nga may dakong kasuko mao nga kini nakita sa Diyos. 10 Ug karon gusto ninyong himoon ang katawhan sa Juda ug Jerusalem ingong inyong sulugoong lalaki ug babaye.+ Apan dili ba usab mo sad-an kang Jehova nga inyong Diyos? 11 Karon pamati kanako ug ibalik ang mga binihag nga inyong gikuha gikan sa inyong mga igsoon, kay si Jehova nasuko pag-ayo ninyo.”

12 Busa kadtong nangabot gikan sa gubat gibadlong sa ubang pangulo sa mga Epraimnon nga si Azarias nga anak ni Jehohanan, si Berekias nga anak ni Mesilemot, si Jehizkias nga anak ni Salum, ug si Amasa nga anak ni Hadlai, 13 ug ilang giingnan sila: “Ayaw ninyog dad-a dinhi ang mga binihag, kay mahimo tang sad-an kang Jehova. Ang gusto ninyong himoon makadugang lang sa atong mga sala, kay sad-an na kaayo ta, ug nagsilaob ang kasuko sa Diyos batok sa Israel.” 14 Busa gitugyan sa armadong kasundalohan ang mga binihag ug ang mga inilog+ ngadto sa mga prinsipe ug sa tibuok kongregasyon. 15 Unya gikuha sa tinudlong mga lalaki ang mga binihag, ug gihatagan nilag besti gikan sa mga inilog kadtong walay tarong nga besti. Busa ilang gibestihan sila ug gihatagag mga sandalyas, pagkaon ug ilimnon, ug lana alang sa ilang panit. Gipasakay usab nila sa asno kadtong mga luya ug gidala sila ngadto sa ilang mga igsoon sa Jerico, ang siyudad sa mga kahoyng palma. Human niana, sila namalik sa Samaria.

16 Nianang panahona, si Haring Ahaz nangayog tabang sa mga hari sa Asirya.+ 17 Ug gisulong ug giatake na usab sa mga Edomhanon ang Juda ug nakadala silag mga binihag. 18 Gisulong usab sa mga Filistehanon+ ang mga siyudad sa Sepela+ ug Negeb sa Juda ug nailog nila ang Bet-semes,+ Aijalon,+ Gederot, ang Soco ug ang mga lungsod nga sakop* niini, ang Timnah+ ug ang mga lungsod nga sakop niini, ug ang Gimzo ug ang mga lungsod nga sakop niini; ug sila mipuyo didto. 19 Gipaubos ni Jehova ang Juda tungod kang Haring Ahaz sa Israel, kay iyang gitugotan nga magpatuyang ang Juda, nga miresulta sa grabeng pagpakasala* kang Jehova.

20 Sa ulahi, si Haring Tilgat-pilneser+ sa Asirya misulong kaniya ug gihatagan siyag kasakit+ imbes tabangan. 21 Kay gipanguha ni Ahaz ang mga butang sa balay ni Jehova ug sa balay* sa hari+ ug sa mga balay sa mga prinsipe ug mihatag ug gasa sa hari sa Asirya; apan wala kadto makatabang kaniya. 22 Ug panahon sa iyang kasakitan, misamot pa ang pagpakasala ni Haring Ahaz kang Jehova. 23 Siya naghalad ngadto sa mga diyos sa Damasco+ nga nagpildi kaniya,+ ug siya miingon: “Kay ang mga diyos sa mga hari sa Sirya nagtabang kanila, ako maghalad kanila aron ila kong tabangan.”+ Apan nahimo kining hinungdan sa pagkapukan niya ug sa tibuok Israel. 24 Gipanguha usab ni Ahaz ang mga galamiton sa balay sa matuod nga Diyos; unya iyang giputolputol ang mga galamiton sa balay sa matuod nga Diyos,+ ug gisirhan ang mga pultahan sa balay ni Jehova,+ ug naghimo siyag mga halaran alang sa iyang kaugalingon sa matag suok sa Jerusalem. 25 Ug sa tanang siyudad sa Juda, siya naghimog tag-as nga dapit aron maghimog gipaaso nga halad ngadto sa ubang mga diyos.+ Busa iyang gipasuko si Jehova nga Diyos sa iyang mga katigulangan.

26 Kon bahin sa uban pa niyang kasaysayan, ang tanan niyang kalihokan sukad sa sinugdan hangtod sa kataposan, kini nasulat sa Basahon sa mga Hari sa Juda ug Israel.+ 27 Unya si Ahaz mipahulay sa kamatayon,* ug ilang gilubong siya sa siyudad sa Jerusalem apan dili sa lubnganan sa mga hari sa Israel.+ Ug si Ezequias nga iyang anak nahimong hari puli kaniya.

29 Si Ezequias+ 25 anyos dihang nahimo siyang hari, ug siya nagmando sa Jerusalem sulod sa 29 ka tuig. Ang iyang inahan mao si Abias nga anak ni Zacarias.+ 2 Siya nagpadayon sa pagbuhat kon unsay husto sa mga mata ni Jehova,+ sama sa gibuhat ni David nga iyang katigulangan.+ 3 Sa unang bulan sa unang tuig sa iyang pagmando, iyang gibuksan ang mga pultahan sa balay ni Jehova ug giayo kini.+ 4 Unya iyang gitigom ang mga saserdote ug mga Levihanon didto sa plasa dapit sa sidlakan. 5 Iyang giingnan sila: “Mga Levihanon, pamati kanako. Karon balaana ang inyong kaugalingon+ ug balaana ang balay ni Jehova nga Diyos sa inyong mga katigulangan, ug kuhaa sa balaang dapit ang hugaw nga mga butang.+ 6 Kay ang atong mga amahan wala magmatinumanon ug naghimo kon unsay daotan sa mga mata ni Jehova nga atong Diyos.+ Sila mibiya kaniya ug wala nila tahora ang tabernakulo ni Jehova ug gitalikdan siya.+ 7 Gisirhan usab nila ang mga pultahan sa portiko*+ ug wala na pasigaha ang mga lampara.+ Mihunong sila sa pagsunog ug insenso+ ug sa pagtanyag ug mga halad nga sinunog+ sa balaang dapit alang sa Diyos sa Israel. 8 Busa si Jehova nasuko sa Juda ug Jerusalem,+ mao nga gipahinabo niya nga ang ubang katawhan mahadlok ug mahibulong ug magbiaybiay* kanila, sumala mismo sa inyong nakita.+ 9 Tungod niini, ang atong mga katigulangan nangapukan pinaagig espada,+ ug ang atong mga anak nga lalaki, mga anak nga babaye, ug mga asawa gipamihag.+ 10 Karon tinguha gyod sa akong kasingkasing nga makigsaad kang Jehova nga Diyos sa Israel,+ aron mawala ang iyang dakong kasuko kanato. 11 Mga anak ko, dili na panahon karon nga pasagdan ninyo ang inyong buluhaton,* kay gipili mo ni Jehova sa pag-alagad sa iyang atubangan+ ug sa paghimog gipaaso nga mga halad alang kaniya.”+

12 Busa milihok dayon ang mga Levihanon: si Mahat nga anak ni Amasai ug si Joel nga anak ni Azarias sa mga Kohatnon;+ sa mga Merarihanon,+ si Kis nga anak ni Abdi ug si Azarias nga anak ni Jehalelel; sa mga Gersonhon,+ si Joa nga anak ni Zima ug si Eden nga anak ni Joa; 13 sa mga anak ni Elizapan, si Simri ug Jeuel; sa mga anak ni Asap,+ si Zacarias ug Matanias; 14 sa mga anak ni Heman,+ si Jehiel ug Simei; sa mga anak ni Jedutun,+ si Semaias ug Uziel. 15 Unya ilang gitigom ang ilang mga igsoon ug gibalaan ang ilang kaugalingon ug nangadto sila sa balay ni Jehova aron hinloan kini, sumala sa sugo sa hari pinasukad sa mga pulong ni Jehova.+ 16 Unya ang mga saserdote misulod sa balay ni Jehova aron manghinlo ug ilang gigawas ang tanang hugaw nga butang nga ilang nakaplagan sa templo ni Jehova ug gidala kini sa hawanan+ sa balay ni Jehova. Dayon gidala kini sa mga Levihanon sa gawas, didto sa Walog sa Kidron.+ 17 Busa ilang gisugdan ang pagbalaan sa unang adlaw sa unang bulan, ug sa ikawalong adlaw sa bulan sila nakaabot sa portiko ni Jehova.+ Ilang gibalaan ang balay ni Jehova sulod sa walo ka adlaw, ug sila nahuman sa ika-16 nga adlaw sa unang bulan.

18 Unya miadto sila kang Haring Ezequias ug miingon: “Nahinloan na namo ang tibuok balay ni Jehova, ang halaran sa halad nga sinunog+ ug ang tanang galamiton niini,+ ug ang lamesa sa halad nga tinapay*+ ug ang tanang galamiton niini. 19 Ug ang tanang galamiton nga gipanguha ni Haring Ahaz sa templo panahon sa iyang pagmando dihang wala siya magmatinumanon+ giandam na namo ug gibalaan;+ anaa kini sa atubangan sa halaran ni Jehova.”

20 Ug si Haring Ezequias mibangon ug sayo ug iyang gitigom ang mga prinsipe sa siyudad, ug sila nangadto sa balay ni Jehova. 21 Nagdala silag pito ka torong baka, pito ka laking karnero, pito ka laki nga nating karnero, ug pito ka laking kanding ingong halad sa sala alang sa gingharian, sa sangtuwaryo, ug sa Juda.+ Busa iyang giingnan ang mga saserdote nga mga kaliwat ni Aaron sa pagtanyag niini sa halaran ni Jehova. 22 Unya ilang giihaw ang mga baka,+ ug gikuha sa mga saserdote ang dugo ug giwisik kini sa halaran;+ dayon ilang giihaw ang mga laking karnero ug giwisik ang dugo sa halaran, ug ilang giihaw ang mga laki nga nating karnero ug giwisik ang dugo sa halaran. 23 Unya ilang gidala atubangan sa hari ug sa kongregasyon ang mga laking kanding alang sa halad sa sala ug gipatong nila niini ang ilang mga kamot. 24 Giihaw kini sa mga saserdote ug gitanyag ingong halad sa sala. Gibutang nila ang dugo niini diha sa halaran aron sa pagtabon sa sala sa tibuok Israel, kay ang hari miingon nga ang halad nga sinunog ug ang halad sa sala maoy alang sa tibuok Israel.

25 Sa kasamtangan, iyang gipapuwesto sa balay ni Jehova ang mga Levihanon nga may mga simbal, dekuwerdas nga mga instrumento, ug mga alpa,+ sumala sa sugo ni David+ ug ni Gad+ nga bisyonaryo* sa hari ug ni propetang Natan,+ kay ang sugo naggikan kang Jehova pinaagi sa iyang mga propeta. 26 Busa ang mga Levihanon nagtindog nga may mga instrumento ni David, ug ang mga saserdote may mga trompeta.+

27 Unya si Ezequias nagsugo nga itanyag ang halad nga sinunog diha sa halaran.+ Dihang gisugdan ug tanyag ang halad nga sinunog, gisugdan usab ang pag-awit kang Jehova ug ang pagpalanog sa mga trompeta, nga miduyog sa mga instrumento ni Haring David sa Israel. 28 Ug ang tibuok kongregasyon nangyukbo samtang giawit ang awit ug gipalanog ang mga trompeta​—⁠kining tanan nagpadayon hangtod nahuman ang pagtanyag sa halad nga sinunog. 29 Ug pagkahuman gayod nilag tanyag, ang hari ug ang tanang uban kaniya nangyukbo ug nanghapa. 30 Unya giingnan ni Haring Ezequias ug sa mga prinsipe ang mga Levihanon nga dayegon si Jehova pinaagi sa mga awit ni David+ ug ni Asap+ nga bisyonaryo. Busa sila nanagdayeg nga masadyaon kaayo, ug sila nangyukbo ug nanghapa.

31 Unya si Ezequias miingon: “Karon nga gilain na mo alang kang Jehova, pagdala mog mga halad ug mga halad sa pagpasalamat ngadto sa balay ni Jehova.” Busa ang kongregasyon nagdalag mga halad ug mga halad sa pagpasalamat, ug ang tanan nga may kasingkasing nga andam mohatag nagdalag mga halad nga sinunog.+ 32 Ang mga halad nga sinunog nga gidala sa kongregasyon maoy 70 ka baka, 100 ka laking karnero, 200 ka laki nga nating karnero​—⁠kining tanan maoy halad nga sinunog alang kang Jehova+— 33 ug ang uban pang balaang mga halad maoy 600 ka baka ug 3,000 ka karnero. 34 Apan kulang ang mga saserdote nga mopanit sa tanang halad nga sinunog, busa gitabangan sila sa ilang mga igsoon nga mga Levihanon+ hangtod nga nahuman ang buluhaton ug hangtod nga ang mga saserdote nakabalaan na sa ilang kaugalingon,+ kay ang mga Levihanon mas mahunahunaon* sa pagbalaan sa ilang kaugalingon kay sa mga saserdote. 35 Daghan usab ang halad nga sinunog,+ ingon man ang mga tambok sa halad sa panag-ambit+ ug ang mga halad nga ilimnon alang sa mga halad nga sinunog.+ Busa ang pag-alagad sa balay ni Jehova gipasig-uli.* 36 Ug si Ezequias ug ang tanang katawhan nagsadya tungod sa gihimo sa matuod nga Diyos alang sa katawhan,+ kay kining tanan paspas nga nahitabo.

30 Si Ezequias nagpadalag mensahe sa tibuok Israel+ ug Juda, ug gisulatan pa gani niya ang Epraim ug Manases,+ nga moadto sa balay ni Jehova sa Jerusalem aron saulogon ang Paskuwa alang kang Jehova nga Diyos sa Israel.+ 2 Apan ang hari, ang iyang mga prinsipe, ug ang tibuok kongregasyon sa Jerusalem midesisyon nga saulogon ang Paskuwa sa ikaduhang bulan,+ 3 kay wala nila kini masaulog sa unang bulan,+ kay kulang ang mga saserdote nga nagbalaan sa ilang kaugalingon+ ug ang katawhan wala usab magtigom sa Jerusalem. 4 Kini nga kahikayan nauyonan sa hari ug sa tibuok kongregasyon. 5 Busa sila midesisyon nga ipahibalo sa tibuok Israel, gikan sa Beer-seba hangtod sa Dan,+ nga paadtoon ang katawhan sa Jerusalem ug saulogon ang Paskuwa alang kang Jehova nga Diyos sa Israel, kay wala pa nila kana buhata ingong usa ka pundok sumala sa nahisulat.+

6 Unya ang mga mensahero* nangadto sa tanang dapit sa Israel ug Juda dala ang mga sulat sa hari ug sa iyang mga prinsipe, sumala sa sugo sa hari, nga nag-ingon: “Katawhan sa Israel, balik kang Jehova nga Diyos ni Abraham, Isaac, ug Israel, aron mobalik siya sa mga nanghibilin nga nakaikyas sa kamot sa mga hari sa Asirya.+ 7 Ayawg sundoga ang inyong mga katigulangan ug mga igsoon nga wala magmatinumanon kang Jehova nga Diyos sa ilang mga katigulangan, mao nga nagpahinabo siyag kalaglagan kanila, sumala sa inyong nakita.+ 8 Karon ayaw mo pagginahig ulo sama sa inyong mga katigulangan.+ Pagpasakop mo kang Jehova ug adto sa iyang sangtuwaryo+ nga gihimo niyang balaan hangtod sa hangtod ug alagara si Jehova nga inyong Diyos, aron mawala ang iyang nagsilaob nga kasuko kaninyo.+ 9 Kay kon mobalik mo kang Jehova, ang inyong mga igsoon ug mga anak kaluy-an sa nagbihag kanila+ ug tugotang makabalik niining yutaa,+ kay si Jehova nga inyong Diyos mabination* ug maluluy-on,+ ug dili mo niya talikdan kon mobalik mo niya.”+

10 Busa ang mga mensahero* nangadto sa matag siyudad sa yuta sa Epraim ug Manases,+ bisan sa Zabulon, apan gikataw-an ug giyagayagaan sila sa mga tawo.+ 11 Apan dihay gikan sa Aser, Manases, ug Zabulon nga nagpaubos sa ilang kaugalingon ug nangadto sa Jerusalem.+ 12 Gipanalanginan sa matuod nga Diyos ang Juda aron mahiusa sila* sa pagbuhat sa sugo sa hari ug sa mga prinsipe sumala sa pulong ni Jehova.

13 Daghan ang nagtigom sa Jerusalem aron saulogon sa ikaduhang bulan+ ang Pista sa Tinapay nga Walay Pangpatubo;*+ dako kaayo kini nga kongregasyon. 14 Ilang gipanguha ang mga halaran didto sa Jerusalem,+ ug gipanguha usab nila ang tanang halaran sa insenso+ ug gilabay kini sa Walog sa Kidron. 15 Unya ilang giihaw ang halad sa Paskuwa sa ika-14 nga adlaw sa ikaduhang bulan. Ang mga saserdote ug mga Levihanon naulaw, mao nga ilang gibalaan ang ilang kaugalingon ug nagdala silag mga halad nga sinunog sa balay ni Jehova. 16 Sila mitindog sa ilang puwesto sumala sa Balaod ni Moises nga tawo sa matuod nga Diyos; unya giwisik sa mga saserdote ang dugo+ nga ilang nadawat gikan sa mga Levihanon. 17 Daghan sa kongregasyon ang wala makabalaan sa ilang kaugalingon, ug ang mga Levihanon gitugyanan sa pag-ihaw sa mga halad sa Paskuwa alang sa tanan nga mahugaw,+ aron balaanon sila alang kang Jehova. 18 Kay daghan kaayo sa katawhan, ilabina kadtong gikan sa Epraim, Manases,+ Isacar, ug Zabulon, ang wala makahinlo sa ilang kaugalingon, apan mikaon gihapon sila sa Paskuwa nga supak sa nahisulat. Apan si Ezequias miampo alang kanila, nga nag-ingon: “Hinaot si Jehova, kinsa maayo,+ maghatag ug konsiderasyon 19 sa matag usa nga nakaandam sa iyang kasingkasing sa pagpangita sa matuod nga Diyos,+ si Jehova, ang Diyos sa iyang mga katigulangan, bisag wala siya mahinloi sumala sa sukdanan sa pagkabalaan.”+ 20 Ug si Jehova namati kang Ezequias ug gipasaylo* ang katawhan.

21 Busa ang mga Israelinhon nga didto sa Jerusalem masadyaong nagsaulog sa Pista sa Tinapay nga Walay Pangpatubo+ sulod sa pito ka adlaw,+ ug ang mga Levihanon ug mga saserdote nagdayeg kang Jehova adlaw-adlaw, nga kusog nga nagpatugtog sa ilang mga instrumento alang kang Jehova.+ 22 Dugang pa, si Ezequias misulti ug nagdasig* sa tanang Levihanon nga maalamong nag-alagad kang Jehova. Ug sila nangaon panahon sa pista sulod sa pito ka adlaw,+ nga naghalad sa mga halad sa panag-ambit+ ug nagpasalamat kang Jehova nga Diyos sa ilang mga katigulangan.

23 Unya ang tibuok kongregasyon midesisyon sa pagsaulog niini ug dugang pito ka adlaw, busa masadyaon nilang gisaulog kini sa pito pa ka adlaw.+ 24 Ug si Haring Ezequias sa Juda nag-amot alang sa kongregasyon ug 1,000 ka torong baka ug 7,000 ka karnero, ug ang mga prinsipe nag-amot alang sa kongregasyon ug 1,000 ka torong baka ug 10,000 ka karnero;+ ug daghan kaayong saserdote ang nagbalaan sa ilang kaugalingon.+ 25 Ug ang tibuok kongregasyon sa Juda, mga saserdote, mga Levihanon, ang tibuok kongregasyon nga nangabot gikan sa Israel,+ ug ang langyawng mga residente+ nga nangabot gikan sa yuta sa Israel ug kadtong namuyo sa Juda padayong nagsadya. 26 Ug dihay dakong kasadya sa Jerusalem, kay sukad sa mga adlaw ni Solomon nga anak ni David nga hari sa Israel walay sama niini nga nahitabo sa Jerusalem.+ 27 Sa kataposan, ang Levihanong mga saserdote mitindog ug gipanalanginan ang katawhan.+ Gidungog sa Diyos ang ilang tingog, ug ang ilang pag-ampo nakaabot sa iyang balaang puloy-anan, sa kalangitan.

31 Pagkahuman gayod sa pista, ang tanang Israelinhon nga presente didto nangadto sa mga siyudad sa Juda, ug ilang gipulpog ang sagradong mga haligi,+ giputol ang sagradong mga poste,*+ ug gitumpag ang tag-as nga dapit+ ug mga halaran+ sa tibuok Juda ug Benjamin, ingon man sa Epraim ug Manases,+ hangtod nga nalaglag nila kining tanan; dayon ang tanang Israelinhon namalik sa ilang mga siyudad, ang matag usa ngadto sa iyang gipanag-iya.

2 Unya gitudlo ni Ezequias ang mga saserdote sumala sa ilang dibisyon+ ug ang mga Levihanon sumala sa ilang mga dibisyon,+ ang matag saserdote ug Levihanon sumala sa ilang pag-alagad.+ Sila magtanyag sa mga halad nga sinunog ug sa mga halad sa panag-ambit, ug sila mag-alagad, magpasalamat, ug magdayeg diha sa mga ganghaan sa mga hawanan* ni Jehova.+ 3 Ang usa ka bahin sa gipanag-iya sa hari gihatag alang sa mga halad nga sinunog,+ lakip sa mga halad sa buntag ug sa gabii,+ ingon man sa mga halad nga sinunog alang sa mga Igpapahulay,+ sa mga bag-ong bulan,+ ug sa mga pista,+ sumala sa nasulat sa Balaod ni Jehova.

4 Siya nagsugo usab sa katawhan nga nagpuyo sa Jerusalem nga ihatag ang bahin sa mga saserdote ug mga Levihanon,+ aron masunod gayod nila ang balaod ni Jehova. 5 Sa paggula gayod sa maong sugo, ang mga Israelinhon naghatag ug daghan kaayong unang bunga sa lugas, bag-ong bino, lana,+ dugos, ug sa tanang abot sa uma;+ nagdala silag daghan kaayong ikapulo sa tanang butang.+ 6 Ug ang katawhan sa Israel ug Juda nga nagpuyo sa mga siyudad sa Juda nagdala usab ug ikapulo sa mga baka ug karnero ug sa ikapulo sa balaang mga butang,+ nga gibalaan alang kang Jehova nga ilang Diyos. Sila nagdalag daghan kaayong amot. 7 Gisugdan nilag tapok ang ilang mga amot sa ikatulong bulan;+ ug nahuman sila sa ikapitong bulan.+ 8 Pag-abot ni Ezequias ug sa mga prinsipe ug pagkakita nila sa mga tinapok, ilang gidayeg si Jehova ug gipanalanginan ang iyang katawhang Israel.

9 Gipangutana ni Ezequias ang mga saserdote ug mga Levihanon bahin sa mga tinapok, 10 ug si Azarias nga pangulong saserdote sa balay ni Zadok mitubag: “Sukad nga gisugdan nilag dala ang mga amot ngadto sa balay ni Jehova,+ ang mga tawo natagbaw sa pagpangaon ug duna pay daghang sobra, kay gipanalanginan ni Jehova ang iyang katawhan, ug tan-awa kon unsa ka daghan ang sobra.”+

11 Busa giingnan sila ni Ezequias nga mag-andam ug mga lawak-tipiganan*+ sa balay ni Jehova, mao nga giandam nila kana. 12 Sila padayong nagmatinumanon sa pagdalag mga amot, mga ikapulo,+ ug balaang mga butang; si Conanias nga Levihanon ang gitudlo nga tigdumala niini, ug si Simei nga iyang igsoon maoy ikaduha kaniya. 13 Si Jehiel, Azazias, Nahat, Asahel, Jerimot, Jozabad, Eliel, Ismakias, Mahat, ug Benaias maoy mga opisyal nga nagtabang kang Conanias ug Simei nga iyang igsoon, sumala sa mando ni Haring Ezequias, ug si Azarias mao ang tigdumala sa balay sa matuod nga Diyos. 14 Ug si Kore nga anak ni Imnah, nga Levihanong magbalantay sa ganghaan dapit sa sidlakan,+ mao ang gisaligan sa kinabubut-ong mga halad+ sa matuod nga Diyos, ug iyang giapod-apod ang amot alang kang Jehova+ ug ang labing balaang mga butang.+ 15 Ug ubos sa iyang pagdumala mao si Eden, Miniamin, Jesua, Semaias, Amarias, ug Secanias, sa mga siyudad sa mga saserdote,+ nga maoy sinaligan sa pag-apod-apod ngadto sa ilang mga igsoon diha sa mga dibisyon.+ Parehas ug gidaghanon ang ilang ihatag sa mga batan-on ug tigulang. 16 Wala pay labot niini ang pag-apod-apod ngadto sa mga lalaki nga tres anyos pataas nga nalista sa talaan sa kaliwatan, nga adlaw-adlawng moadto sa balay ni Jehova aron mag-alagad ug maghimo sa mga buluhaton sa ilang mga dibisyon.

17 Ang mga saserdote gilista sa talaan sa kaliwatan sumala sa ilang banay.*+ Ingon usab niana ang mga Levihanon nga nag-edad ug 20 pataas,+ sumala sa mga buluhaton sa ilang mga dibisyon.+ 18 Nalakip sa talaan sa kaliwatan ang tanan nilang kabataan, mga asawa, mga anak nga lalaki, ug mga anak nga babaye, ang tibuok nilang kongregasyon​—⁠kay gihuptan nilang balaan ang ilang kaugalingon alang sa balaang pag-alagad kay kini nga katungdanan gisalig kanila— 19 ingon man ang mga kaliwat ni Aaron, ang mga saserdote nga nagpuyo sa mga sibsibanan palibot sa ilang mga siyudad.+ Sa tanang siyudad, dihay mga lalaki nga gitudlo sa pag-apod-apod ug pagkaon ngadto sa tanang lalaki sa pamilya sa mga saserdote ug ngadto sa tanang nalista sa talaan sa kaliwatan sa mga Levihanon.

20 Gihimo kini ni Ezequias sa tibuok Juda, ug siya nagpadayon sa pagbuhat kon unsay maayo ug husto sa mga mata ni Jehova nga iyang Diyos, ug siya nagmatinumanon kaniya. 21 Bug-os kasingkasing niyang gihimo ang matag buluhaton sa iyang pagsimba sa iyang Diyos, labot man kini sa pag-alagad sa balay sa matuod nga Diyos+ o sa Balaod ug kasugoan, ug siya nagmalamposon.

32 Human nga matinumanong gibuhat ni Ezequias kining tanan,+ si Haring Senakerib sa Asirya misulong sa Juda. Gilikosan niya ang pinarilang mga siyudad kay gusto niyang sudlon ug sakopon kini.+

2 Pagkakita ni Ezequias nga si Senakerib miabot ug gustong makiggubat sa Jerusalem, 3 siya mikonsulta sa iyang mga prinsipe ug mga manggugubat ug midesisyon nga tak-opan ang mga tubod nga atua sa gawas sa siyudad,+ ug ila siyang gisuportahan. 4 Daghang tawo ang nagtigom, ug ilang gitak-opan ang tanang tubod ug sapa nga nag-agos sa maong yuta. Sila miingon: “Dili nato gusto nga ang mga hari sa Asirya makakaplag ug daghan kaayong tubig inig-anhi nila.”

5 Dugang pa, maisogon niyang gitukod ang tibuok paril nga nalumpag ug nagpatindog siyag mga torre sa ibabaw niana, ug sa gawas naghimo siyag laing paril. Giayo usab niya ang Bungdo*+ sa Siyudad ni David, ug naghimo siyag daghang hinagiban* ug taming. 6 Unya nagtudlo siyag mga pangulo sa kasundalohan sa pagdumala sa katawhan ug gitigom sila sa plasa sa ganghaan sa siyudad ug gidasig sila,* nga nag-ingon: 7 “Magmaisogon kamo ug magmalig-on. Ayaw mog kahadlok o kalisang tungod sa hari sa Asirya+ ug sa dakong panon nga kauban niya, kay mas daghan ang kauban nato kay sa kauban niya.+ 8 Siya nagasalig sa kusog sa tawo,* apan kita nagasalig kang Jehova nga atong Diyos nga motabang kanato ug makig-away sa atong mga gubat.”+ Ug ang katawhan nalig-on sa giingon ni Ezequias nga hari sa Juda.+

9 Human niini, samtang si Senakerib nga hari sa Asirya didto sa Lakis+ uban ang tibuok puwersa sa iyang imperyo,* iyang gipadala ang iyang mga alagad ngadto sa Jerusalem, ngadto kang Haring Ezequias sa Juda ug ngadto sa tanang Judeanhon sa Jerusalem,+ nga nag-ingon:

10 “Kini ang giingon ni Haring Senakerib sa Asirya, ‘Unsa may inyong gisaligan nga nagpabilin man mo sa Jerusalem bisag gilikosan na kini?+ 11 Dili ba gilimbongan lang mo ni Ezequias aron mangamatay mo sa gutom ug kauhaw, pinaagi sa pag-ingon: “Luwason ta ni Jehova nga atong Diyos gikan sa kamot sa hari sa Asirya”?+ 12 Dili ba kini usab ang Ezequias nga nagtangtang sa tag-as nga dapit+ sa inyong Diyos ug sa Iyang mga halaran+ ug unya miingon siya sa Juda ug Jerusalem: “Kinahanglan mong mangyukbo sa usa ka halaran ug maghimog gipaaso nga halad diha niana”?+ 13 Wala ba mo mahibalo kon unsay akong gihimo ug sa akong mga katigulangan ngadto sa tanang mga katawhan sa kayutaan?+ Naluwas ba sa mga diyos sa kanasoran ang ilang yuta gikan sa akong kamot?+ 14 Kinsa ba sa tanang diyos niini nga mga kanasoran nga gilaglag sa akong mga katigulangan ang nakaluwas sa iyang katawhan gikan sa akong kamot, aron makaingon mo nga ang inyong Diyos makaluwas kaninyo gikan sa akong kamot?+ 15 Ayaw mog palimbong o patonto kang Ezequias!+ Ayaw siyag tuohi, kay walay diyos sa bisan unsang nasod o gingharian ang nakaluwas sa iyang katawhan gikan sa akong kamot ug gikan sa kamot sa akong mga katigulangan. Labaw na gyod nga dili makaluwas kaninyo ang inyong Diyos gikan sa akong kamot!’”+

16 Ang iyang mga alagad misulti pag dugang nga pagtamay kang Jehova nga matuod nga Diyos ug kang Ezequias nga iyang alagad. 17 Nagpadala usab siyag mga sulat+ aron insultohon si Jehova nga Diyos sa Israel+ ug mosulti batok kaniya, nga nag-ingon: “Sama sa mga diyos sa kanasoran nga dili makaluwas sa ilang katawhan gikan sa akong kamot,+ ang Diyos ni Ezequias dili usab makaluwas sa iyang katawhan gikan sa akong kamot.” 18 Padayon silang nagsultig kusog sa pinulongan sa mga Hudiyo sa paghadlok ug paglisang sa katawhan sa Jerusalem nga diha sa ibabaw sa paril, aron ilang mabihag ang siyudad.+ 19 Ilang gitamay ang Diyos sa Jerusalem sama sa ilang pagtamay sa mga diyos sa mga katawhan sa yuta, nga binuhat ra sa tawo. 20 Apan si Haring Ezequias ug si propetang Isaias+ nga anak ni Amoz nagpadayon sa pag-ampo bahin niini ug sa pagtuaw sa kalangitan alang sa tabang.+

21 Unya si Jehova nagpadalag usa ka anghel ug iyang gilaglag ang matag banggiitang manggugubat,+ lider, ug pangulo sa kampo sa hari sa Asirya, mao nga siya mipauli sa iyang kaugalingong yuta nga naulawan. Sa ulahi, siya misulod sa balay* sa iyang diyos, ug didto ang uban sa iya mismong mga anak mipatay kaniya pinaagig espada.+ 22 Busa giluwas ni Jehova si Ezequias ug ang mga molupyo sa Jerusalem gikan sa kamot ni Haring Senakerib sa Asirya ug gikan sa kamot sa uban pang kaaway ug gihatagan niya silag pahulay gikan sa tanan nilang kaaway sa palibot. 23 Ug daghan ang nagdalag mga gasa alang kang Jehova sa Jerusalem, ingon man bililhong mga butang ngadto kang Haring Ezequias sa Juda,+ ug siya gitahod pag-ayo sa tanang kanasoran human niana.

24 Niadtong mga adlawa, si Ezequias nasakit ug himalatyon na, ug siya miampo kang Jehova,+ kinsa mitubag kaniya ug naghatag kaniyag ilhanan.*+ 25 Apan wala pabilhi ni Ezequias ang maayong gihimo kaniya, kay ang iyang kasingkasing nahimong mapahitas-on, mao nga ang Diyos nasuko kaniya ug sa Juda ug Jerusalem. 26 Apan gipaubos ni Ezequias ang iyang mapahitas-ong kasingkasing,+ ug nagpaubos usab ang mga molupyo sa Jerusalem, ug wala ipahamtang ni Jehova ang iyang kasuko kanila sa mga adlaw ni Ezequias.+

27 Ug si Ezequias nakabaton ug daghang bahandi ug nahimong dungganon;+ ug naghimo siyag iyang mga balay-tipiganan+ alang sa plata, bulawan, bililhong mga bato, lana sa balsamo, mga taming, ug sa tanang tilinguhaong butang. 28 Naghimo usab siyag mga tipiganan alang sa abot sa lugas ug bag-ong bino ug lana, ingon man mga kuwadra alang sa tanang nagkalainlaing matang sa mga mananap ug mga kuwadra alang sa mga panon sa kahayopan. 29 Nagtukod usab siyag kaugalingon niyang mga siyudad, ug nakabaton siyag daghan kaayong kahayopan, mga karnero, ug mga baka, kay gihatagan siya sa Diyos ug daghan kaayong kabtangan. 30 Si Ezequias mao ang nagtak-op sa ibabawng tuboran sa mga tubig+ sa Gihon+ ug gipatipas kini ngadto sa kasadpan paingon sa Siyudad ni David,+ ug si Ezequias nagmalamposon sa tanan niyang buhat. 31 Apan dihang ang mga tigpamaba sa mga prinsipe sa Babilonya gipaadto kaniya aron mangutana bahin sa ilhanan*+ nga nahitabo sa yuta,+ gitugotan sa matuod nga Diyos nga molihok siya nga siyasiya ra sa pagsulay kaniya,+ aron mahibaloan ang tanang anaa sa iyang kasingkasing.+

32 Kon bahin sa ubang kasaysayan ni Ezequias ug sa iyang mga buhat nga nagpakita sa iyang maunongong gugma,+ kini nasulat sa panan-awon ni propetang Isaias+ nga anak ni Amoz, diha sa Basahon sa mga Hari sa Juda ug Israel.+ 33 Unya si Ezequias mipahulay sa kamatayon,* ug ilang gilubong siya sa bakilid nga paingon sa mga lubnganan sa mga anak ni David;+ ug gipasidunggan siya sa tibuok Juda ug sa mga molupyo sa Jerusalem sa iyang kamatayon. Ug si Manases nga iyang anak nahimong hari puli kaniya.

33 Si Manases+ 12 anyos dihang nahimo siyang hari, ug siya nagmando sa Jerusalem sulod sa 55 ka tuig.+

2 Siya nagbuhat kon unsay daotan sa mga mata ni Jehova, nga nagsunod sa dulumtanang mga buhat sa mga nasod nga gipang-abog ni Jehova sa atubangan sa katawhan sa Israel.+ 3 Iyang gitukod pag-usab ang tag-as nga dapit nga gitumpag ni Ezequias nga iyang amahan+ ug naghimo siyag mga halaran alang sa mga Baal ug naghimog sagradong mga poste.* Miyukbo usab siya sa tanang panon sa kalangitan ug mialagad niini.+ 4 Naghimo usab siyag mga halaran sa balay ni Jehova,+ nga bahin niini si Jehova miingon: “Ang akong ngalan maanaa sa Jerusalem hangtod sa hangtod.”+ 5 Ug naghimo siyag mga halaran alang sa tanang panon sa kalangitan diha sa duha ka hawanan sa balay ni Jehova.+ 6 Ug ang kaugalingon niyang mga anak iyang gisunog* sa kalayo+ didto sa Walog sa Anak ni Hinnom;+ siya naggamit ug salamangka,+ nagapanag-an, nagapamarang, ug nagtudlog mga espiritista ug mananag-an.+ Siya nagbuhat ug grabeng pagkadaotan sa atubangan ni Jehova sa pagpasuko kaniya.

7 Ang kinulit nga larawan nga iyang gihimo gibutang niya sa balay sa matuod nga Diyos,+ nga bahin niana ang Diyos miingon kang David ug kang Solomon nga iyang anak: “Niining balaya ug sa Jerusalem, nga akong gipili gikan sa tanang tribo sa Israel, ibutang nako ang akong ngalan hangtod sa hangtod.+ 8 Ug dili na nako abogon pag-usab ang Israel gikan sa yuta nga akong gihatag sa ilang mga katigulangan, kon ila lang gyong tumanon ang tanan nakong gisugo kanila, ang katibuk-ang Balaod, ang mga regulasyon, ug ang hudisyal nga mga hukom nga gihatag pinaagi kang Moises.” 9 Gipahisalaag ni Manases ang Juda ug ang mga molupyo sa Jerusalem, nga tungod niana sila naghimog mas daotan pa kay sa kanasoran nga gilaglag ni Jehova sa atubangan sa mga Israelinhon.+

10 Si Jehova nagpadayon sa pagsulti kang Manases ug sa iyang katawhan, apan wala sila mamati.+ 11 Busa gidala ni Jehova batok kanila ang mga pangulo sa kasundalohan sa hari sa Asirya, ug ilang gidakop si Manases pinaagig mga kaw-it* ug gigapos siya pinaagig duha ka tumbaga nga kadena ug gidala sa Babilonya. 12 Panahon sa iyang kasakitan, siya nagpakiluoy kang* Jehova nga iyang Diyos ug nagpaubos pag-ayo sa iyang kaugalingon atubangan sa Diyos sa iyang mga katigulangan. 13 Siya nagpadayon sa pag-ampo Kaniya, ug Siya natandog sa iyang pagpakiluoy ug Iyang gidungog ang iyang hangyo alang sa pag-uyon, ug gipasig-uli Niya ang iyang pagkahari sa Jerusalem.+ Unya naila ni Manases nga si Jehova mao ang matuod nga Diyos.+

14 Human niini siya nagtukod ug paril sa gawas sa Siyudad ni David+ sa kasadpan sa Gihon+ didto sa walog* hangtod sa Ganghaan sa Isda.+ Gilahos niya kini sa Opel+ ug gipatas-an kini pag-ayo. Nagtudlo usab siyag mga pangulo sa kasundalohan sa tanang pinarilang siyudad sa Juda. 15 Unya iyang gipanguha ang langyawng mga diyos ug ang imahen nga idolo gikan sa balay ni Jehova+ ug ang tanang halaran nga iyang gihimo sa bukid sa balay ni Jehova+ ug sa Jerusalem, ug gipalabay niya kini sa gawas sa siyudad. 16 Giandam usab niya ang halaran ni Jehova+ ug naghalad diha niana ug mga halad sa panag-ambit+ ug mga halad sa pagpasalamat,+ ug giingnan niya ang Juda nga alagaron si Jehova nga Diyos sa Israel. 17 Bisan pa niana, ang katawhan naghalad gihapon sa tag-as nga dapit, apan ngadto lang kang Jehova nga ilang Diyos.

18 Kon bahin sa ubang kasaysayan ni Manases, sa iyang pag-ampo sa iyang Diyos, ug sa mga pulong sa mga bisyonaryo* nga nakigsulti kaniya sa ngalan ni Jehova nga Diyos sa Israel, kini nasulat sa kasaysayan sa mga hari sa Israel. 19 Dugang pa, ang iyang pag-ampo+ ug kon giunsa pagdungog ang iyang pagpakiluoy, ang tanan niyang sala ug pagkadili-matinumanon,+ ang mga dapit diin gitukod niya ang tag-as nga dapit ug ang sagradong mga poste*+ ug ang kinulit nga mga larawan sa wala pa siya magpaubos sa iyang kaugalingon, kini nasulat lakip sa mga pulong sa iyang mga bisyonaryo. 20 Unya si Manases mipahulay sa kamatayon,* ug ilang gilubong siya sa iyang balay; ug si Amon nga iyang anak nahimong hari puli niya.+

21 Si Amon+ 22 anyos dihang nahimo siyang hari, ug siya nagmando sa Jerusalem sulod sa duha ka tuig.+ 22 Ug siya nagpadayon sa pagbuhat kon unsay daotan sa mga mata ni Jehova, sama sa gibuhat ni Manases nga iyang amahan;+ ug si Amon naghalad ngadto sa tanang kinulit nga larawan nga gihimo ni Manases,+ ug siya padayong nagsimba niini. 23 Apan wala siya magpaubos sa iyang kaugalingon sa atubangan ni Jehova+ sama sa pagpaubos ni Manases nga iyang amahan;+ hinuon gipagrabe pag-ayo ni Amon ang iyang pagkasad-an. 24 Sa ulahi ang iyang mga alagad nagkunsabo+ ug gipatay nila siya sa iya mismong balay. 25 Apan gipamatay sa katawhan sa yuta ang tanang nagkunsabo batok kang Haring Amon,+ ug gihimo nilang hari ang iyang anak nga si Josias+ puli kaniya.

34 Si Josias+ otso anyos dihang nahimo siyang hari, ug siya nagmando sa Jerusalem sulod sa 31 ka tuig.+ 2 Siya nagbuhat kon unsay husto sa mga mata ni Jehova ug nagsubay sa mga dalan ni David nga iyang katigulangan, ug wala siya motipas sa tuo o sa wala.

3 Sa ika-8 nga tuig sa iyang pagmando, samtang siya batan-on pa, siya misugod sa pagpangita sa Diyos ni David nga iyang katigulangan;+ ug sa ika-12 nga tuig, gisugdan niyag hinlo ang Juda ug Jerusalem.+ Iyang gipanguha ang tag-as nga dapit+ ug sagradong mga poste,* kinulit nga mga larawan,+ ug metal nga mga estatuwa.* 4 Dugang pa, gitumpag nila sa iyang atubangan ang mga halaran sa mga Baal, ug gipamutol niya ang mga butanganan sa insenso nga diha niini. Gipulpog usab niya ang sagradong mga poste,* kinulit nga mga larawan, ug metal nga mga estatuwa* ug gipolbos kini ug gisabwag sa mga lubnganan niadtong mga nagahalad niini kaniadto.+ 5 Ug iyang gisunog ang mga bukog sa mga saserdote diha sa ilang mga halaran.+ Busa nahinloan niya ang Juda ug Jerusalem.

6 Ug sa mga siyudad sa Manases, Epraim,+ Simeon, ug hangtod sa Neptali, sa gun-ob nga mga dapit sa ilang palibot, 7 iyang gitumpag ang mga halaran ug gipulpog ang sagradong mga poste* ug ang kinulit nga mga larawan+ ug gipolbos kini; ug iyang gipamutol ang tanang butanganan sa insenso sa tibuok yuta sa Israel,+ ug unya siya mibalik sa Jerusalem.

8 Sa ika-18 nga tuig sa iyang pagmando, dihang iya nang nahinloan ang yuta ug ang templo,* iyang gipadala si Sapan+ nga anak ni Azalias, si Maaseias nga pangulo sa siyudad, ug si Joa nga tigrekord nga anak ni Joahaz aron ayohon ang balay ni Jehova nga iyang Diyos.+ 9 Sila nangadto kang Hilkias nga hataas nga saserdote ug gihatag kaniya ang salapi nga gidala ngadto sa balay sa Diyos, nga nakolekta sa mga Levihanon nga nag-alagad ingong mga magbalantay sa pultahan. Naggikan kini sa Manases, Epraim, ug sa tanang uban pa sa Israel,+ ingon man sa Juda, Benjamin, ug sa mga molupyo sa Jerusalem. 10 Unya ilang gihatag kini ngadto sa mga gitudlo nga magdumala sa buluhaton sa balay ni Jehova. Gigamit kini sa mga trabahador sa balay ni Jehova sa pag-ayo sa balay. 11 Gihatag nila kini sa mga artesano* ug sa mga magtutukod aron ipalit ug sinapsapan nga mga bato ug mga kahoy nga gamitong mga tukod ug aron ilisan ang mga sagbayan sa mga balay nga gipasagdan sa mga hari sa Juda nga maguba.+

12 Ug matinumanong gibuhat sa mga tawo ang trabaho.+ Gitudlo nga magdumala kanila ang mga Levihanon nga si Jahat ug Abdias nga mga Merarihanon,+ ug si Zacarias ug Mesulam nga mga Kohatnon.+ Ug ang mga Levihanon, nga ang tanan maayo kaayong mga musikero,+ 13 mao ang nagdumala sa mga trabahador* ug sa tanang nagabuhat sa lainlaing pag-alagad; ug ang ubang Levihanon maoy mga sekretaryo, opisyal, ug magbalantay sa ganghaan.+

14 Samtang ilang gigawas ang salapi nga gidala sa balay ni Jehova,+ nakit-an ni Hilkias nga saserdote ang basahon sa Balaod ni Jehova+ nga gihatag pinaagi ni Moises.+ 15 Busa giingnan ni Hilkias si Sapan nga sekretaryo: “Nakit-an nako sa balay ni Jehova ang basahon sa Balaod.” Ug ang basahon gihatag ni Hilkias kang Sapan. 16 Unya gidala ni Sapan ang basahon ngadto sa hari ug miingon: “Ginahimo sa imong mga alagad ang tanan nga imong gipabuhat kanila. 17 Ilang gikuha* ang salapi nga diha sa balay ni Jehova, ug gihatag kini ngadto sa tinudlong mga lalaki ug sa mga nagabuhat sa buluhaton.” 18 Giingnan usab ni Sapan nga sekretaryo ang hari: “Dunay basahon nga gihatag ni Hilkias nga saserdote kanako.”+ Unya gibasa kini ni Sapan atubangan sa hari.+

19 Pagkadungog gayod sa hari sa mga pulong sa Balaod, iyang gigisi ang iyang besti.+ 20 Unya gisugo sa hari si Hilkias, si Ahikam+ nga anak ni Sapan, si Abdon nga anak ni Miqueas, si Sapan nga sekretaryo, ug si Asaias nga alagad sa hari, nga nag-ingon: 21 “Pagpakisayod mo kang Jehova alang kanako ug alang niadtong mga nahibilin sa Israel ug Juda bahin sa mga pulong sa basahon nga nakit-an; kay ang dakong kasuko ni Jehova iyang ipahamtang kanato sanglit wala tumana sa atong mga katigulangan ang pulong ni Jehova. Wala nila buhata ang tanang nasulat niining basahona.”+

22 Busa si Hilkias, kauban ang mga gipadala sa hari, nangadto kang propetang Hulda.+ Siya ang asawa ni Salum nga anak ni Tikva nga anak ni Harhas, ang sinaligan sa mga besti, ug siya nagpuyo sa Ikaduhang Distrito sa Jerusalem; ug sila nakigsulti kaniya didto.+ 23 Siya miingon kanila: “Kini ang giingon ni Jehova nga Diyos sa Israel, ‘Sultihi ninyo ang tawong nagpadala kaninyo nganhi kanako: 24 “Kini ang giingon ni Jehova, ‘Magpahamtang kog katalagman niining dapita ug sa mga molupyo niini;+ ipahinabo nako ang tanang tunglo nga nasulat sa basahon+ nga ilang gibasa atubangan sa hari sa Juda. 25 Kay ila kong gibiyaan+ ug naghimo silag gipaaso nga halad ngadto sa ubang mga diyos aron pasuk-on ko+ pinaagi sa tanang buhat sa ilang mga kamot, akong ipahamtang niining dapita ang akong nagsilaob nga kasuko ug kini dili mapalong.’”+ 26 Apan ngadto sa hari sa Juda nga nagpadala kaninyo aron magpakisayod kang Jehova, isulti kini kaniya, “Kini ang giingon ni Jehova nga Diyos sa Israel: ‘Bahin sa mga pulong nga imong nadunggan,+ 27 kay madinawaton* kag kasingkasing ug nagpaubos ka sa imong kaugalingon atubangan sa Diyos pagkadungog nimo sa iyang mga pulong bahin niining dapita ug sa mga molupyo niini ug nagpaubos ka sa imong kaugalingon sa akong atubangan ug gigisi nimo ang imong besti ug mihilak ka sa akong atubangan, gipaminawan ka nako,+ miingon si Jehova. 28 Tungod niini, dad-on ka nako sa imong mga katigulangan,* ug ilubong ka sa imong lubnganan panahon sa kalinaw, ug ang imong mga mata dili makakita sa tanang katalagman nga akong ipahamtang niining dapita ug sa mga molupyo niini.’”’”+

Unya ilang gidala ang tubag ngadto sa hari. 29 Busa ang hari nagpadalag mensahe ug iyang gipatawag ang tanang ansiyano sa Juda ug Jerusalem.+ 30 Human niana, ang hari miadto sa balay ni Jehova uban ang tanang lalaki sa Juda, ang mga molupyo sa Jerusalem, ang mga saserdote, ang mga Levihanon​—⁠ang tanang katawhan, bata ug tigulang. Iyang gibasa kanila ang tanang pulong sa basahon sa pakigsaad nga nakit-an sa balay ni Jehova.+ 31 Ang hari mibarog sa iyang dapit ug naghimog pakigsaad*+ sa atubangan ni Jehova nga sundon niya si Jehova ug tumanon ang iyang mga sugo, mga pahinumdom, ug mga regulasyon sa bug-os niyang kasingkasing ug kalag*+ pinaagi sa pagtuman sa mga pulong sa pakigsaad nga nasulat niining basahona.+ 32 Giawhag usab niya ang tanan sa Jerusalem ug Benjamin nga mouyon niini. Ug ang mga molupyo sa Jerusalem nagkinabuhi sumala sa pakigsaad sa Diyos, ang Diyos sa ilang mga katigulangan.+ 33 Unya gipanguha ni Josias ang tanang dulumtanang butang* sa tanang kayutaan nga gipanag-iya sa mga Israelinhon,+ ug ang tanan sa Israel iyang gitabangan nga moalagad kang Jehova nga ilang Diyos. Sa tibuok niyang kinabuhi,* sila wala motipas sa pagsunod kang Jehova nga Diyos sa ilang mga katigulangan.

35 Si Josias nagsaulog ug Paskuwa+ alang kang Jehova sa Jerusalem, ug ilang giihaw ang halad sa Paskuwa+ sa ika-14 nga adlaw sa unang bulan.+ 2 Iyang gitudlo ang mga saserdote sa ilang mga buluhaton ug gidasig sila sa paghimo sa ilang buluhaton sa balay ni Jehova.+ 3 Unya siya miingon sa mga Levihanon, ang mga magtutudlo sa tibuok Israel,+ kadtong mga balaan alang kang Jehova: “Ibutang ang balaang Kaban diha sa balay nga gitukod ni Solomon nga anak ni David nga hari sa Israel;+ dili na ninyo kini pas-anon.+ Karon pag-alagad mo kang Jehova nga inyong Diyos ug sa iyang katawhang Israel. 4 Ug pangandam mo alang sa pag-alagad sumala sa inyong mga banay* sumala sa inyong mga dibisyon, sumala sa gisulat ni Haring David+ sa Israel ug sa iyang anak nga si Solomon.+ 5 Tindog mo sa balaang dapit nga ginurupo sumala sa inyong banay,* aron nga dunay grupo sa mga Levihanon nga mag-alagad sa matag banay* sa katawhan. 6 Ihawa ang halad sa Paskuwa+ ug balaana ang inyong kaugalingon ug pangandam mo alang sa inyong mga igsoon aron matuman ninyo ang pulong ni Jehova pinaagi ni Moises.”

7 Si Josias miamot ug mga hayop alang sa katawhan, mga laki nga nating karnero ug mga laki nga nating kanding, aron ihalad sa Paskuwa alang sa tanang presente, 30,000 tanan, ingon man 3,000 ka baka. Kini gikan mismo sa mga gipanag-iya sa hari.+ 8 Ang iyang mga prinsipe miamot usab ingong kinabubut-ong halad alang sa katawhan, sa mga saserdote, ug sa mga Levihanon. Si Hilkias,+ Zacarias, ug Jehiel, nga mga pangulo sa balay sa matuod nga Diyos, naghatag sa mga saserdote ug 2,600 ka halad sa Paskuwa ug 300 ka baka. 9 Si Conanias ug ang iyang mga igsoong si Semaias ug Netanel, lakip si Hasabias, Jeiel, ug Jozabad, nga mga pangulo sa mga Levihanon, miamot sa mga Levihanon ug 5,000 ka halad sa Paskuwa ug 500 ka baka.

10 Ang pagpangandam natapos, ug ang mga saserdote mitindog sa ilang mga puwesto, ingon man ang mga Levihanon sumala sa ilang mga dibisyon,+ sumala sa sugo sa hari. 11 Ilang giihaw ang mga halad sa Paskuwa,+ ug giwisik sa mga saserdote ang dugo nga ilang nadawat gikan kanila,+ samtang ang mga Levihanon nagpanit sa mga hayop.+ 12 Dayon ilang giandam ang mga halad nga sinunog aron iapod-apod kini ngadto sa katawhan, nga gigrupo sumala sa ilang banay,* aron matanyag kini kang Jehova sumala sa nasulat sa basahon ni Moises; ug gihimo usab nila kini sa mga baka. 13 Ilang giluto sa kalayo* ang halad sa Paskuwa sumala sa nabatasan;+ ug ilang giluto ang balaang mga halad diha sa mga kulon, kaldero, ug kalaha, ug human niana gidala dayon nila kini sa katawhan. 14 Unya sila nangandam alang sa ilang kaugalingon ug sa mga saserdote, kay ang mga saserdote, nga mga kaliwat ni Aaron, nagtanyag sa mga halad nga sinunog ug sa mga tambok hangtod sa pagkilumkilom, mao nga ang mga Levihanon nangandam alang sa ilang kaugalingon ug sa mga saserdote, nga mga kaliwat ni Aaron.

15 Ug ang mga mag-aawit, nga mga anak ni Asap,+ didto sa ilang mga puwesto sumala sa sugo ni David,+ Asap,+ Heman, ug Jedutun+ nga bisyonaryo* sa hari; ug ang mga magbalantay sa ganghaan didto sa lainlaing ganghaan.+ Dili na sila kinahanglang mobiya sa ilang buluhaton, kay ang ilang mga igsoon nga mga Levihanon nangandam alang kanila. 16 Busa ang tanang pag-alagad kang Jehova giandam nianang adlawa sa pagsaulog sa Paskuwa+ ug sa pagtanyag sa mga halad nga sinunog diha sa halaran ni Jehova, sumala sa sugo ni Haring Josias.+

17 Gisaulog sa mga Israelinhon nga presente didto ang Paskuwa niadtong panahona ug ang Pista sa Tinapay nga Walay Pangpatubo* sulod sa pito ka adlaw.+ 18 Wala pa mahitabo sukad sa mga adlaw ni propetang Samuel nga gisaulog ang Paskuwa sama niini; ug walay bisan kinsang hari sa Israel ang nagsaulog ug Paskuwa sama sa pagsaulog ni Josias,+ sa mga saserdote, sa mga Levihanon, sa tibuok Juda ug Israel nga presente, ug sa mga molupyo sa Jerusalem. 19 Kini nga Paskuwa gisaulog sa ika-18 nga tuig sa pagmando ni Josias.

20 Human niining tanan, dihang naandam na ni Josias ang templo,* si Haring Neko+ sa Ehipto miadto aron makig-away didto sa Carkemis dapit sa Euprates. Unya si Josias miadto sa pagpakigsangka kaniya.+ 21 Busa nagpadala siyag mga mensahero kaniya, nga nag-ingon: “Nganong mianhi ka batok kanako, Oh hari sa Juda? Ako wala moanhi batok kanimo karong adlawa, apan mianhi ko batok sa laing nasod, ug ang Diyos miingon nga kinahanglan kong magdali. Alang sa imong kaayohan, ayawg supaka ang Diyos, kinsa nag-uban kanako, aron dili ka niya laglagon.” 22 Apan desidido gyod si Josias, mao nga siya nagtakoban+ aron makig-away kaniya ug wala siya mamati sa mga pulong ni Neko, nga gikan mismo sa Diyos. Busa siya miadto sa pagpakig-away didto sa Patag sa Megido.+

23 Ug naigo sa mga magpapana si Haring Josias, mao nga ang hari miingon sa iyang mga alagad: “Dad-a ko palayo dinhi, kay grabe kong nasamdan.” 24 Busa gikanaog siya sa iyang mga alagad gikan sa karo ug gipasakay sa iyang ikaduhang karong panggubat ug gidala sa Jerusalem. Ug siya namatay ug gilubong sa lubnganan sa iyang mga katigulangan,+ ug ang tibuok Juda ug Jerusalem nagbangotan tungod kang Josias. 25 Ug si Jeremias+ miawit tungod kang Josias, ug ang tanang lalaki ug babaye nga mag-aawit+ nagpadayon sa pag-awit bahin kang Josias diha sa ilang mga awit sa pagbangotan hangtod niining adlawa; ug gidesisyonan nga awiton kini sa Israel, ug kini gilakip sa mga awit sa pagbangotan.

26 Kon bahin sa ubang kasaysayan ni Josias ug sa iyang mga buhat nga nagpakitag maunongong gugma, sa pagsunod sa nasulat sa Balaod ni Jehova, 27 ug sa iyang gipangbuhat, sukad sa sinugdan hangtod sa kataposan, kini nasulat sa Basahon sa mga Hari sa Israel ug Juda.+

36 Unya gikuha sa katawhan sa yuta si Jehoahaz+ nga anak ni Josias ug gihimo siyang hari sa Jerusalem puli sa iyang amahan.+ 2 Si Jehoahaz 23 anyos dihang nahimo siyang hari, ug siya nagmando sa Jerusalem sulod sa tulo ka bulan. 3 Apan ang hari sa Ehipto nagtangtang kaniya sa iyang posisyon sa Jerusalem ug gimultahan ang yuta ug 100 ka talanton* nga plata ug usa ka talanton nga bulawan.+ 4 Unya gihimo sa hari sa Ehipto si Eliakim nga igsoon ni Jehoahaz ingong hari sa Juda ug Jerusalem ug giilisan ang iyang ngalan ug Jehoiakim; apan gidala ni Neko+ ang iyang igsoong si Jehoahaz sa Ehipto.+

5 Si Jehoiakim+ 25 anyos dihang nahimo siyang hari, ug siya nagmando sa Jerusalem sulod sa 11 ka tuig. Siya nagpadayon sa pagbuhat kon unsay daotan sa mga mata ni Jehova nga iyang Diyos.+ 6 Si Haring Nabucodonosor+ sa Babilonya miadto batok kaniya aron gaposon siyag duha ka tumbaga nga kadena ug dad-on sa Babilonya.+ 7 Ug gidala ni Nabucodonosor sa Babilonya ang ubang galamiton sa balay ni Jehova ug unya gibutang kini sa iyang palasyo sa Babilonya.+ 8 Kon bahin sa ubang kasaysayan ni Jehoiakim, ang dulumtanang mga butang nga iyang gihimo ug ang tanang daotang butang bahin kaniya, kini nasulat sa Basahon sa mga Hari sa Israel ug Juda; ug si Jehoiakin nga iyang anak nahimong hari puli kaniya.+

9 Si Jehoiakin+ 18 anyos dihang nahimo siyang hari, ug siya nagmando sa Jerusalem sulod sa 3 ka bulan ug 10 ka adlaw; ug siya nagpadayon sa pagbuhat kon unsay daotan sa mga mata ni Jehova.+ 10 Pagsugod sa tuig,* si Haring Nabucodonosor nagpasugo nga dad-on siya sa Babilonya,+ lakip ang bililhong mga butang sa balay ni Jehova.+ Ug gihimo niyang hari sa Juda ug Jerusalem si Zedekias nga igsoon sa iyang amahan.+

11 Si Zedekias+ 21 anyos dihang nahimo siyang hari, ug siya nagmando sa Jerusalem sulod sa 11 ka tuig.+ 12 Siya nagpadayon sa pagbuhat kon unsay daotan sa mga mata ni Jehova nga iyang Diyos. Wala siya magpaubos sa iyang kaugalingon sa atubangan ni propetang Jeremias,+ kinsa nagsulti sumala sa mando ni Jehova. 13 Siya usab mirebelde kang Haring Nabucodonosor,+ kinsa nagpapanumpa kaniya sa atubangan sa Diyos, ug padayon siyang nagginahi ug ulo* ug nagpatig-a sa iyang kasingkasing ug dili niya gustong mobalik kang Jehova nga Diyos sa Israel. 14 Grabe usab ang pagkadili-matinumanon sa tanang pangulo sa mga saserdote ug sa katawhan. Sila nagbuhat sa tanang dulumtanang mga butang sa kanasoran ug ilang gihugawan ang balay ni Jehova+ nga iyang gibalaan sa Jerusalem.

15 Si Jehova nga Diyos sa ilang mga katigulangan balikbalik nga nagpasidaan kanila pinaagi sa iyang mga mensahero kay siya naluoy sa iyang katawhan ug sa iyang puloy-anan. 16 Apan padayon nilang gibugalbugalan ang mga mensahero sa matuod nga Diyos,+ ug ilang gitamay ang iyang mga pulong+ ug giyagayagaan ang iyang mga propeta,+ hangtod nga wala na silay paglaom nga maulian; unya gipahamtang ni Jehova kanila ang iyang dakong kasuko.+

17 Busa iyang gidala batok kanila ang hari sa mga Caldeanhon,+ nga mipatay sa ilang batan-ong mga lalaki diha sa balay sa ilang sangtuwaryo+ pinaagig espada;+ wala siya maluoy sa batan-ong lalaki o babaye,* tigulang o luyahon.+ Gitugyan sa Diyos ang tanan ngadto sa iyang kamot.+ 18 Ang tanang galamiton sa balay sa matuod nga Diyos, dagko ug gagmay, ingon man ang mga bahandi sa balay ni Jehova ug ang mga bahandi sa hari ug sa iyang mga prinsipe, ang tanan iyang gidala sa Babilonya.+ 19 Iyang gisunog ang balay sa matuod nga Diyos,+ gitumpag ang paril sa Jerusalem,+ gisunog ang tanang lig-ong torre niini, ug gipangguba ang tanang bililhong butang.+ 20 Iyang gibihag ngadto sa Babilonya kadtong wala mamatay sa espada,+ ug sila nahimong mga alagad niya+ ug sa iyang mga anak hangtod nga ang gingharian sa Persia misugod sa pagmando,+ 21 aron matuman ang gisulti ni Jehova pinaagi kang Jeremias,+ hangtod nga mabayran sa yuta ang mga igpapahulay niini.+ Sa tanang adlaw nga nahimo kining biniyaan kini nagtuman sa igpapahulay, aron matuman ang 70 ka tuig.+

22 Sa unang tuig sa pagmando ni Haring Ciro+ sa Persia, gipalihok ni Jehova ang kasingkasing* sa hari aron matuman ang gisulti ni Jehova pinaagi kang Jeremias.+ Busa ang hari nagpasulat ug usa ka proklamasyon ug gipahibalo kini sa tibuok niyang gingharian,+ nga nag-ingon: 23 “Kini ang giingon ni Haring Ciro sa Persia, ‘Si Jehova nga Diyos sa kalangitan naghatag kanako sa tanang gingharian sa yuta,+ ug iya kong gisugo nga tukoran siyag balay sa Jerusalem, nga anaa sa Juda.+ Bisan kinsa kaninyo nga nag-alagad Kaniya, hinaot si Jehova nga iyang Diyos magauban kaniya, ug paadtoa siya didto.’”+