IKADUHANG SULAT PARA SA MGA TAGA-CORINTO

1 Gikan kang Pablo, nga apostol ni Kristo Jesus pinaagi sa kabubut-on sa Diyos, ug kang Timoteo+ nga atong igsoon, para sa kongregasyon sa Diyos nga anaa sa Corinto, lakip sa tanang balaan nga anaa sa tibuok Acaya:+

2 Hinaot maanaa kaninyo ang dili hitupngang pagkamaayo* ug ang kalinaw gikan sa Diyos nga atong Amahan ug ni Ginoong Jesu-Kristo.

3 Madayeg unta ang Diyos ug Amahan sa atong Ginoong Jesu-Kristo,+ ang Amahan nga malumo ug maluluy-on+ ug ang Diyos sa tanang paghupay,+ 4 kinsa nagahupay* kanato sa tanan natong pagsulay*+ aron makahupay ta sa uban+ nga nag-atubang ug bisan unsang matang sa pagsulay* pinaagi sa paghupay nga atong nadawat sa Diyos.+ 5 Kay sama nga daghan ang atong pag-antos alang sa Kristo,+ daghan usab ang atong nadawat nga paghupay pinaagi sa Kristo. 6 Karon kon nag-atubang mig mga pagsulay,* alang kini sa inyong kahupayan ug kaluwasan; ug kon ginahupay mi, alang kini sa inyong kahupayan, nga motabang kaninyo sa paglahutay sa samang mga pag-antos nga ginaantos usab namo. 7 Ug lig-on gayod ang among pagsalig kaninyo, kay nahibalo mi nga ingon nga ginaantos ninyo ang sama sa among mga pag-antos, hupayon usab mo sama kanamo.+

8 Kay gusto namong mahibalo mo, mga igsoon, sa kasakitan nga among naagoman sa probinsiya sa Asia.+ Nakaagom mig hilabihang pagpit-os nga dili namo maantos sa kaugalingon namong kusog, nga tungod niana mibati mi nga wala nay kasegurohan ang among kinabuhi.+ 9 Sa pagkatinuod, gibati namo nga amo nang nadawat ang sentensiya sa kamatayon, aron mosalig mi, dili sa among kaugalingon, kondili sa Diyos+ nga nagabanhaw sa mga patay. 10 Siya nagluwas kanamo ug magluwas kanamo gikan sa ingon ka dakong hulga sa kamatayon, ug nagasalig mi nga siya usab padayong magluwas kanamo.+ 11 Makatabang usab mo kanamo pinaagi sa pagpangamuyo alang kanamo.+ Moresulta kinig daghang pag-ampo sa pagpasalamat alang kanamo tungod sa tabang nga among nadawat ingong tubag sa mga pag-ampo sa daghan.*+

12 Kay ang among gipanghambog mao kini: Ang among konsensiya nagpamatuod nga kami nagkinabuhi sa kalibotan, ug ilabina gayod sa inyong taliwala, uban ang pagkabalaan ug ang pagkasinsero nga gitudlo sa Diyos. Wala mi magdepende sa kaalam sa kalibotan+ kondili sa dili hitupngang pagkamaayo sa Diyos. 13 Kay sa pagkatinuod wala mi magsulat kaninyo ug bisan unsa gawas sa inyong mabasa* ug masabtan, ug naglaom ko nga padayon ninyo kining masabtan sa bug-os,* 14 sama nga ang pipila kaninyo nakasabot niini; oo, ang pipila kaninyo nakasabot nga kamo makapanghambog tungod kanamo, sama nga makapanghambog usab mi kaninyo sa adlaw sa atong Ginoong Jesus.

15 Busa uban niini nga pagsalig, nagplano ko nga mounag anha kaninyo, aron malipay mo sa ikaduhang higayon;* 16 kay nagplano kong moduaw kaninyo inigpaingon nako sa Macedonia, mobalik kaninyo gikan sa Macedonia, ug unya pagikanon ko ninyo paingon sa Judea.+ 17 Buweno, dihang giplano nako kini, giisip nako kining seryoso, dili ba? O giplano ba nako ang mga butang sumala sa tawhanong panghunahuna, mao nga moingon ko ug “Oo, oo” ug unya “Dili, dili”? 18 Sama nga ang Diyos kasaligan, ang among mga pulong kasaligan usab. Dili mi moingon ug “oo” apan “dili” diay. 19 Kay ang Anak sa Diyos, si Jesu-Kristo, nga giwali taliwala kaninyo pinaagi kanamo, nga mao, pinaagi kanako ug ni Silvano* ug ni Timoteo,+ wala mahimong “oo” apan “dili” diay, apan ang “oo” nahimong “oo” sa iyang kahimtang. 20 Kay bisag unsa pa ka daghan ang saad sa Diyos, kini nahimong “oo” pinaagi kaniya.+ Busa pinaagi usab kaniya ang “Amen” ginaingon ngadto sa Diyos,+ nga naghimaya kaniya pinaagi kanato. 21 Apan ang usa nga naggarantiya nga kamo ug kami iya sa Kristo ug ang usa nga nagdihog kanato mao ang Diyos.+ 22 Siya nagbutang usab sa iyang selyo kanato+ ug naghatag kanato sa timaan sa kon unsay moabot,* nga mao, ang espiritu,+ diha sa atong mga kasingkasing.

23 Karon wala pa ko moanha sa Corinto kay gusto nakong makalingkawas mo, ug himoon nakong saksi ang Diyos batok kanako. 24 Wala ko mag-ingon nga mga agalon mi sa inyong pagtuo,+ apan mga isigkamagbubuhat mi alang sa inyong kalipay, kay nagabarog mo tungod sa inyong pagtuo.

2 Kay nakadesisyon ko nga dili moanha kaninyo pag-usab sa kasubo. 2 Kay kon pasub-on mo nako, kinsay molipay kanako gawas sa usa nga akong gipasubo? 3 Gisulat nako kadto, aron nga dihang moabot ko dili ko masubo tungod kaninyo, hinuon magsadya, kay may pagsalig ko nga ang makapalipay kanako makapalipay usab kaninyo. 4 Kay gikan sa daghang kasakitan ug grabeng kaguol sa kasingkasing nagsulat ko kaninyo uban ang daghang luha, dili aron pasub-on mo,+ kondili aron mahibalo mo kon unsa ka lawom ang akong gugma kaninyo.

5 Karon kon duna may nagpahinabog kasubo,+ siya nagpasubo, dili kanako, kondili kaninyong tanan sa usa ka sukod. Apan dili ko gustong magsultig daghan pa bahin niini. 6 Igo na ang pagbadlong nga inyong gihatag sa maong tawo; 7 hinuon kinahanglang andam mong magpasaylo kaniya ug maghupay kaniya,+ aron dili siya malumsan* sa hilabihang kasubo.+ 8 Busa awhagon mo nako nga inyong pamatud-an ang inyong gugma kaniya.+ 9 Kay tungod usab niini nga misulat ko kaninyo: aron mapamatud-an ninyo kon masinugtanon ba mo sa tanang butang. 10 Kon duna moy gipasaylo sa bisan unsa, gipasaylo usab nako siya. Sa pagkatinuod, bisan unsa nga akong gipasaylo (kon may bisan unsa man kong gipasaylo) maoy alang kaninyo sa atubangan sa Kristo, 11 aron dili ta madaog* ni Satanas,+ kay dili ta walay alamag sa iyang mga laraw.*+

12 Karon pag-abot nako sa Troas+ aron ipahayag ang maayong balita bahin sa Kristo ug dihang nabuksan ang usa ka pultahan alang kanako sa buluhaton sa Ginoo, 13 nabalaka gihapon ko kay wala nako makaplagi si Tito+ nga akong igsoon. Busa nanamilit ko kanila ug migikan paingon sa Macedonia.+

14 Apan salamat sa Diyos, nga kanunayng nanguna kanato diha sa parada sa kadaogan kauban ang Kristo ug nagsabwag sa* alimyon sa kahibalo bahin kaniya pinaagi kanato diha sa tanang dapit! 15 Kay alang sa Diyos kita maoy humot nga alimyon sa Kristo taliwala niadtong ginaluwas ug taliwala niadtong nagpadulong sa kalaglagan; 16 sa mga nagpadulong sa kalaglagan usa ka alimyon sa kamatayon nga moresultag kamatayon,+ sa mga ginaluwas usa ka alimyon sa kinabuhi nga moresultag kinabuhi. Ug kinsa gayod ang kuwalipikado niining mga butanga? 17 Kami, kay dili mi mga tigbaligya sa* pulong sa Diyos+ sama sa daghang tawo, apan sinsero ming nagsulti ingong mga pinadala sa Diyos, oo, sa panan-aw sa Diyos ug kauban sa Kristo.

3 Kinahanglan ba namong ipailaila pag-usab ang among kaugalingon kaninyo? O sama sa pipila ka tawo, kinahanglan pa ba ming mohatag kaninyog mga sulat sa rekomendasyon o nanginahanglan ba mi niini gikan kaninyo? 2 Kamo mismo ang among sulat,+ nga nasulat sa among mga kasingkasing ug naila ug ginabasa sa tanang tawo. 3 Kay dayag nga kamo maoy sulat sa Kristo nga gisulat namo ingong mga ministro,+ nga nasulat dili pinaagig tinta kondili pinaagi sa espiritu sa buhing Diyos, dili diha sa papan nga mga bato+ kondili diha sa unodnong mga papan, diha sa mga kasingkasing.+

4 Nabatonan namo kini nga matang sa pagsalig ngadto sa Diyos pinaagi sa Kristo. 5 Wala mi mag-ingon nga kuwalipikado mi sa paghimo niini nga buluhaton sa amo lang kaugalingon, apan ang among pagkakuwalipikado naggikan sa Diyos,+ 6 kinsa sa pagkatinuod naghimo kanamong kuwalipikado ingong mga ministro sa usa ka bag-ong pakigsaad,+ dili sa sinulat nga mga lagda,+ kondili sa espiritu; kay ang sinulat nga mga lagda maghukom ngadto sa kamatayon,+ apan ang espiritu maghatag ug kinabuhi.+

7 Karon kon ang mga lagda nga nagpahamtang ug kamatayon ug gikulit diha sa mga bato+ gihatag uban ang dakong himaya nga tungod niana ang mga anak ni Israel dili makasud-ong sa nawong ni Moises tungod sa himaya sa iyang nawong,+ usa ka himaya nga wagtangon ra, 8 dili ba dunay mas dakong himaya ang paghatag sa espiritu?+ 9 Kay kon ang mga lagda nga nagpahamtang ug paghukom+ mahimayaon,+ labaw na nga mahimayaon ang pagpahamtang sa pagkamatarong!+ 10 Sa pagkatinuod, bisan ang mahimayaon kanhi nahukasan sa himaya tungod kay may himaya nga mas labaw pa niini.+ 11 Kay kon ang wagtangon ra gihatag uban ang himaya,+ nan ang nagpabilin makadawat ug mas dakong himaya!+

12 Kay nabatonan namo ang dakong paglaom,+ kami may dakong kagawasan sa pagsulti, 13 ug wala magbuhat sa gibuhat ni Moises dihang gitaptapan niya ang iyang nawong+ aron ang mga anak ni Israel dili makasud-ong sa kataposan nianang wagtangon ra. 14 Apan ang ilang mga hunahuna nahabol.+ Kay hangtod niining adlawa, ang samang taptap wala gihapon matangtang dihang gibasa ang daang pakigsaad,+ kay kini makuha lang pinaagi sa Kristo.+ 15 Gani, hangtod niining adlawa dihang ginabasa ang mga basahon ni Moises,+ may taptap ang ilang kasingkasing.+ 16 Apan dihang ang usa modangop kang Jehova,* ang taptap makuha.+ 17 Karon si Jehova* maoy Espiritu,+ ug kon asa gani ang espiritu ni Jehova,* dunay kagawasan.+ 18 Ug samtang walay taptap ang atong nawong ug gibanaag nato ang himaya ni Jehova* samag salamin, kitang tanan ginausab ngadto sa samang larawan gikan sa usa ka sukod sa himaya ngadto sa lain,* sumala gayod sa ginabuhat ni Jehova* nga Espiritu.*+

4 Busa, kay nabatonan man namo kini nga ministeryo sumala sa kaluoy nga gipakita kanamo, kami wala moundang. 2 Apan among gibiyaan ang makauulaw ug malimbongong mga butang, nga wala magalakaw pinaagig lipatlipat o magtuis sa pulong sa Diyos;+ apan pinaagi sa pagpadayag sa kamatuoran, among girekomendar ang among kaugalingon ngadto sa konsensiya sa matag tawo atubangan sa Diyos.+ 3 Sa pagkatinuod, kon ang maayong balita nga among ginapahayag gitaptapan, kini gitaptapan taliwala niadtong mga nagpadulong sa kalaglagan, 4 taliwala kanilang ang diyos niini nga sistema sa mga butang*+ nagbuta sa hunahuna sa mga dili magtutuo,+ aron nga ang kahayag sa mahimayaong maayong balita bahin sa Kristo, ang larawan sa Diyos,+ dili makadan-ag.+ 5 Kay kami nagawali, dili bahin sa among kaugalingon, kondili bahin kang Jesu-Kristo ingong Ginoo ug sa among kaugalingon ingong inyong mga ulipon tungod kang Jesus. 6 Kay ang Diyos mismo ang nag-ingon: “Mosidlak ang kahayag gikan sa kangitngit,”+ ug siya misidlak sa among kasingkasing aron madan-agan kini+ sa mahimayaong kahibalo sa Diyos pinaagi sa nawong sa Kristo.

7 Hinuon, nabatonan namo kini nga bahandi+ diha sa mga sudlanang kulonon,+ aron ang gahom nga labaw sa kasarangan maggikan sa Diyos ug dili kanamo.+ 8 Kami ginapiit pag-ayo sa tanang paagi, apan dili kay dili na makalihok; kami nangalibog, apan dili kay wala na gyoy kalingkawasan;*+ 9 kami ginalutos, apan wala biyai;+ kami nangatumba, apan wala malaglag.+ 10 Ginaantos kanunay sa among lawas ang makamatay nga pagtratar nga giantos ni Jesus,+ aron ang kinabuhi ni Jesus madayag usab sa among lawas. 11 Kay bisag buhi mi, kanunay ming nag-atubang sa kamatayon+ tungod kang Jesus, aron ang kinabuhi ni Jesus madayag usab sa among may kamatayong lawas. 12 Busa bisag kanunay ming nag-atubang sa kamatayon, nagadala kinig kinabuhi kaninyo.

13 Karon kay kami dunay espiritu sa pagtuo nga sama nianang sa nasulat: “Duna koy pagtuo, busa misulti ko”;+ kami usab may pagtuo ug busa kami nagasulti, 14 nga nahibalo nga ang Usa nga nagbanhaw kang Jesus magbanhaw usab kanamo uban kang Jesus ug magpresentar kanamo uban kaninyo.+ 15 Kay kining tanang butang maoy alang kaninyo, aron nga mas daghan pang tawo ang makadawat sa dili hitupngang pagkamaayo* sa Diyos kay nagkadaghan ang nagpasalamat kaniya. Pinaagi niana siya mahimaya.+

16 Busa wala mi moundang, apan bisan kon ang among pagkatawo sa gawas nagkahugo, seguradong ang among pagkatawo sa sulod ginabag-o sa adlaw-adlaw. 17 Kay bisan tuod ang kasakitan* kadiyot lang ug gaan, kini magdala kanamog himaya nga hilabihan gayod ka dako* ug walay kataposan;+ 18 samtang gitutok namo ang among mga mata, dili sa mga butang nga makita, kondili sa mga butang nga dili makita.+ Kay ang mga butang nga makita lumalabay lang, apan ang mga butang nga dili makita walay kataposan.

5 Kay nahibalo kita nga kon magun-ob* ang atong yutan-ong balay, kini nga tolda,+ kita makabaton ug tinukod gikan sa Diyos, balay nga molungtad hangtod sa hangtod didto sa kalangitan ug dili hinimog mga kamot.+ 2 Kay sa pagkatinuod, niini nga balay* kita nag-agulo, nga sinserong nagtinguha nga isul-ob kanang alang kanato* nga gikan sa langit,*+ 3 aron nga dihang isul-ob na nato kini, dili ta mahimong hubo. 4 Sa pagkatinuod, kita nga ania niini nga tolda nag-agulo, nga nabug-atan, kay dili nato kini gustong hukason, apan gusto natong isul-ob ang lain,+ aron nga ang may kamatayon lamyon sa kinabuhi.+ 5 Karon ang usa nga nag-andam kanato alang niini mismong butanga mao ang Diyos,+ nga naghatag kanato sa espiritu ingong timaan sa kon unsay moabot.*+

6 Busa kanunay kitang masaligon ug nahibalo nga samtang nagpuyo kita* niining lawasa, kita wala didto sa Ginoo,+ 7 kay kita nagalakaw pinaagi sa pagtuo, dili pinaagi sa makita. 8 Apan kita masaligon ug mas mopili nga mopuyo uban sa Ginoo kay sa niining lawasa.+ 9 Busa nagpuyo man ta uban kaniya o wala, tumong nato nga mahimong dalawaton kaniya. 10 Kay kitang tanan kinahanglang moatubang* sa lingkoranan sa paghukom sa Kristo, aron ang matag usa magantihan sumala sa iyang ginabuhat samtang anaa sa lawas, maayo man o daotan.+

11 Busa, kay nahibalo man mi kon unsay kahulogan sa pagkahadlok sa Ginoo, padayon ming nangombinsir sa mga tawo, apan nailhan mi pag-ayo* sa Diyos. Ug naglaom ko nga nailhan usab mi pag-ayo* sa inyong konsensiya. 12 Wala namo ginarekomendar pag-usab ang among kaugalingon nganha kaninyo apan giawhag mo namo sa pagpanghambog bahin kanamo, aron duna moy ikatubag niadtong mga nanghambog sa panggawas nga panagway+ apan dili sa kon unsay anaa sa kasingkasing. 13 Kay kon wala miy maayong panghunahuna,+ kadto maoy alang sa Diyos; kon maayo mig panghunahuna, kini maoy alang kaninyo. 14 Kay ang gugma nga gipakita sa Kristo nagpalihok kanamo, kay kini ang among nasabtan: Ang usa ka tawo namatay alang sa tanan+ kay ang tanan namatay. 15 Ug siya namatay alang sa tanan aron kadtong nagkinabuhi dili na magkinabuhi alang sa ilang kaugalingon,+ kondili alang kaniya nga namatay alang kanila ug gibanhaw.

16 Busa sukad karon dili na namo lantawon si bisan kinsa sumala sa unodnong panglantaw.+ Bisan pag kaniadto nakaila mi sa Kristo sumala sa unod, dili na gyod ingon niana ang among pagkaila kaniya karon.+ 17 Busa kon si bisan kinsa nahiusa sa Kristo, siya usa ka bag-ong linalang;+ ang daang mga butang nahanaw na; tan-awa! ang bag-ong mga butang mitungha na. 18 Apan ang tanang butang gikan sa Diyos, kinsa nagpasig-uli kanamo ngadto kaniya pinaagi sa Kristo+ ug naghatag kanamo sa ministeryo sa pagpasig-uli,+ 19 nga mao, gipasig-uli sa Diyos ang kalibotan ngadto kaniya pinaagi sa Kristo,+ nga wala na maghunahuna sa ilang kalapasan,+ ug iyang gitugyan kanamo ang mensahe sa pagpasig-uli.+

20 Busa mga embahador+ mi kapuli sa Kristo,+ nga daw ang Diyos naghangyo pinaagi kanamo. Ingong kapuli sa Kristo, nagpakiluoy mi: “Pasig-uli mo sa Diyos.” 21 Ang usa nga wala gyod makasala+ gihimo sa Diyos ingong halad sa sala* alang kanato, aron pinaagi kaniya mahimo tang pagkamatarong sa Diyos.+

6 Ingong mga isigkamagbubuhat sa Diyos,+ giawhag usab mo namo nga dili dawaton ang dili hitupngang pagkamaayo* sa Diyos ug unya pakyason ang katuyoan niini.+ 2 Kay siya miingon: “Gidungog ka nako sa dalawatong panahon, ug gitabangan ka nako sa adlaw sa kaluwasan.”+ Tan-awa! Karon na ang panahon nga ilabinang dalawaton. Tan-awa! Karon na ang adlaw sa kaluwasan.

3 Wala gyod mi maghatag ug bisan unsang hinungdan sa pagkapandol, aron dili makitaag sayop ang among ministeryo;+ 4 apan sa tanang paagi ginarekomendar namo ang among kaugalingon ingong mga ministro sa Diyos,+ pinaagi sa paglahutay sa daghang pagsulay, pinaagi sa mga kasakitan, mga kawalad-on, mga kalisdanan,+ 5 mga pagbunal, mga pagbilanggo,+ mga kagubot, mga kahago, mga gabiing walay tulog, mga panahong walay pagkaon;+ 6 pinaagi sa kaputli, kahibalo, pailob,+ pagkamaayo,+ balaang espiritu, gugma nga dili salingkapaw,+ 7 matinud-anong sinultihan, gahom sa Diyos;+ pinaagi sa mga hinagiban sa pagkamatarong+ diha sa tuong kamot* ug sa wala,* 8 sa himaya ug kaulawan, sa pagsaway ug pagdayeg. Giisip mi ingong limbongan apan matinud-anon mi, 9 ingong wala mailhi apan nailhan mi, ingong himalatyon* apan tan-awa! buhi mi,+ ingong sinilotan* apan wala mi itugyan sa kamatayon,+ 10 ingong masulub-on apan nagsadya mi pag-ayo, ingong pobre apan nagpadato mi sa daghan, ingong walay gipanag-iya apan nanag-iya mi sa tanang butang.+

11 Prangka ming nakigsulti* kaninyo, mga taga-Corinto, ug gibuksan namo pag-ayo ang among kasingkasing. 12 Wala namo limitahe ang among gugma kaninyo,+ apan gilimitahan ninyo ang inyong gugma kanamo. 13 Busa mosulti ko samag ngadto sa akong mga anak, palihog buhata usab kana kanamo, buksi pag-ayo ang inyong kasingkasing.*+

14 Ayaw pagpayugo nga dili timbang* sa mga dili magtutuo.+ Kay duna bay panag-ubanay ang pagkamatarong ug kalapasan?+ O duna bay panag-ambitay ang kahayag ug kangitngit?+ 15 Dugang pa, duna bay panag-uyon ang Kristo ug si Belial?*+ O duna bay panag-ambitay ang magtutuo* ug dili magtutuo?+ 16 Ug duna bay panag-uyon ang templo sa Diyos ug ang mga idolo?+ Kay kita maoy templo sa buhing Diyos;+ sumala sa gisulti sa Diyos: “Mopuyo ko sa ilang taliwala+ ug molakaw sa ilang taliwala, ug ako mahimong ilang Diyos, ug sila mahimong akong katawhan.”+ 17 “‘Busa gula mo gikan sa ilang taliwala, ug ilain ang inyong kaugalingon,’ miingon si Jehova,* ‘ug hunong na sa paghikap sa hugawng butang’”;+ “‘ug pasudlon mo nako.’”+ 18 “‘Ug ako mahimong inyong amahan,+ ug kamo mahimong akong mga anak nga lalaki ug babaye,’+ miingon si Jehova,* ang Labing Gamhanan.”

7 Busa mga hinigugma, kay nabatonan man nato kini nga mga saad,+ hinloan nato ang atong kaugalingon sa tanang kahugawan sa unod ug espiritu,+ aron mahimo tang mas balaan samtang nahadlok ta sa Diyos.

2 Hatagi mi ninyog luna diha sa inyong kasingkasing.+ Wala miy gibuhatag sayop, wala miy gihimoag kadaot, wala miy gipahimuslan.+ 3 Wala nako kini isulti aron hukman mo. Kay giingon na nako kaniadto nga ania mo sa among kasingkasing, mamatay man kita o mabuhi. 4 Duna koy dakong kagawasan sa pagsulti kaninyo. Gipanghambog mo nako pag-ayo. Napuno ko sa paghupay; hilabihan ang akong kalipay sa tanan namong kasakitan.+

5 Sa pagkatinuod, dihang miabot mi sa Macedonia,+ wala mi makabatog kahupayan, apan padayon ming gisakit sa tanang paagi​—⁠dihay mga panag-away sa gawas, mga kahadlok sa sulod. 6 Apan ang Diyos, kinsa nagahupay niadtong mga magul-anon,+ naghupay kanamo pinaagi sa presensiya ni Tito; 7 apan dili lang pinaagi sa iyang presensiya, kondili pinaagi usab sa paghupay nga iyang nadawat tungod kaninyo. Gisultihan mi niya nga gusto ko ninyong makita, nga naguol mo pag-ayo, ug nabalaka mo pag-ayo* kanako; maong mas nalipay ko.

8 Kay bisan kon napasubo mo nako pinaagi sa akong sulat,+ wala ko magmahay niini. Bisan kon sa sinugdan nagmahay ko niini (kay nakita nako nga ang sulat nakapasubo kaninyo, bisag kadiyot lang), 9 karon ako nalipay, dili kay basta lang nasubo mo, kondili kay nasubo mo nga miresultag paghinulsol. Kay nasubo mo sa paaging nakapalipay sa Diyos, mao nga wala mo makaagom ug kadaot tungod namo. 10 Kay ang kasubo nga makapalipay sa Diyos moresultag paghinulsol nga motultol sa kaluwasan, nga dili kamahayan;+ apan ang kasubo sa kalibotan moresultag kamatayon. 11 Kay tan-awa kon unsa ka dako ang epekto kaninyo sa inyong kasubo nga nakapalipay sa Diyos, oo, paghinlo sa inyong kaugalingon, oo, kasuko, oo, kahadlok, oo, sinserong tinguha, oo, kadasig, oo, pagtul-id sa sayop!+ Sa tanang paagi inyong gipasundayag nga putli* mo niining butanga. 12 Bisan tuod misulat ko kaninyo, wala nako ni gibuhat alang sa nakahimog sayop+ o sa gihimoan ug sayop, apan aron ang inyong tinuod nga pagkamasinugtanon kanamo madayag taliwala kaninyo atubangan sa Diyos. 13 Mao nga nahupayan mi.

Apan gawas pa sa among kahupayan, mas nalipay mi tungod sa kalipay ni Tito, kay gidasig ninyong tanan ang iyang espiritu. 14 Kay kon gipanghambog man mo nako kaniya, wala ko maulawi; apan sama nga tinuod ang tanan namong gisulti kaninyo, tinuod usab ang among pagpanghambog ngadto kang Tito. 15 Dugang pa, mas midako ang iyang malumong pagmahal kaninyo samtang iyang gihinumdoman ang pagkamasinugtanon ninyong tanan,+ kon giunsa ninyo siya pagdawat uban ang lawom nga pagtahod. 16 Nalipay ko nga sa tanang paagi makasalig ko ninyo.*

8 Karon gusto namong mahibalo mo, mga igsoon, bahin sa dili hitupngang pagkamaayo* sa Diyos nga gipakita ngadto sa mga kongregasyon sa Macedonia.+ 2 Panahon sa dakong pagsulay ilalom sa kasakitan, ang kadako sa ilang kalipay ug ang ilang grabeng kakabos nagpadagaya* sa ilang pagkamahinatagon. 3 Kay gihatag nila ang tanan nilang maarangan,+ oo, makapamatuod ko nga mas labaw pa kadto sa ilang maarangan,+ 4 samtang sila mismo ang naghangyo namo nga ihatag kanila ang pribilehiyo sa mahigugmaong pagpanghatag, nga makigbahin sa pagpanghatag ug hinabang alang sa mga balaan.+ 5 Ug gihimo nila ang labaw pa sa among gidahom, kay una sa tanan gihatag nila ang ilang kaugalingon sa Ginoo ug kanamo pinaagi sa kabubut-on sa Diyos. 6 Busa gidasig namo si Tito+ nga taposon niya ang buluhaton nga iyang gisugdan sa inyong taliwala, ang mahigugmaong pagpanghatag. 7 Bisan pa niana, sama nga dagaya mo sa tanang butang, sa pagtuo ug sa pulong ug sa kahibalo ug sa tanang kadasig ug sa among gugma kaninyo, hinaot nga ingon usab niana ka dagaya ang inyong mahigugmaong pagpanghatag.+

8 Ginasulti nako kini, dili aron sugoon mo, kondili aron mahibalo mo sa kadasig sa uban ug aron masulayan kon unsa ka tinuod ang inyong gugma. 9 Kay nahibalo mo sa dili hitupngang pagkamaayo sa atong Ginoong Jesu-Kristo, nga bisan tuod dato siya, nahimo siyang kabos alang ninyo,+ aron mahimo mong dato pinaagi sa iyang kakabos.

10 Ug kini ang akong opinyon bahin niini:+ Alang kini sa inyong kaayohan, kay usa na ka tuig ang milabay kamo mismo ang nagsugod niini. Apan dili lang kana, gipakita sab ninyo nga gusto gyod ninyo kining buhaton. 11 Busa karon taposa sab ninyo ang inyong nasugdan, aron mabug-os ang inyong pagkaandam nga mobuhat sumala sa inyong nabatonan. 12 Kay kon naa na daan ang pagkaandam, ang paghatag mas dalawaton, sa ato pa, paghatag nga sumala sa kon unsay nabatonan sa usa,+ dili sa kon unsay wala niya. 13 Kay dili nako gusto nga mahimo kining sayon para sa uban, apan lisod para ninyo; 14 kondili nga pinaagi sa pag-angay-angay, ang inyong sobra sa pagkakaron mohulip sa ilang panginahanglan, aron nga ang ilang sobra makahulip sab sa inyong kakulangan, ug busa dunay pag-angay-angay. 15 Sumala sa nasulat: “Ang tawong dunay daghan wala makabaton ug sobra ka daghan, ug ang tawong dunay diyutay wala makabaton ug sobra ka diyutay.”+

16 Karon nagpasalamat mi sa Diyos nga ang kabalaka ni Tito+ kaninyo sama sa among kabalaka kaninyo, 17 kay gawas nga misanong siya sa pagdasig, gusto pa gyod kaayo niyang buhaton ang among gipabuhat kaniya, mao nga siya mismo ang moanha kaninyo. 18 Apan among ipadala uban kaniya ang igsoong lalaki nga dinayeg diha sa tanang kongregasyon kon bahin sa maayong balita. 19 Dili lang kana, kondili gitudlo sab siya sa mga kongregasyon nga mahimong among kauban sa pagpanaw samtang among gidumala kining mahigugmaong gasa alang sa kahimayaan sa Ginoo ug ingong pamatuod sa among kaandam motabang. 20 Busa naglikay mi nga makitaan mig sayop ni bisan kinsa bahin niining dakong amot nga among gidumala.+ 21 Kay kami ‘matinud-anong nag-atiman niining tanan, dili lang sa panan-aw ni Jehova* kondili sa panan-aw sab sa mga tawo.’+

22 Dugang pa, ipadala namo uban nila ang atong igsoon nga kadaghan nang nasulayan ug napamatud-ang kugihan sa daghang butang, apan mas kugihan siya karon kay nahibalo siya nga buhaton ninyo kon unsay husto. 23 Kon ugaling dunay mokuwestiyon bahin kang Tito, siya akong kauban* ug isigkamagbubuhat alang sa inyong kaayohan; o kon dunay mokuwestiyon bahin sa atong mga igsoon, sila mga apostoles sa mga kongregasyon ug himaya sa Kristo. 24 Busa pamatud-i ang inyong gugma niining mga igsoona,+ ug ipakita sa mga kongregasyon kon nganong gipanghambog mo namo.

9 Karon kon bahin sa ministeryo nga alang sa mga balaan,+ dili na gyod unta kinahanglang sulatan pa mo nako, 2 kay nahibalo ko sa inyong pagkaandam nga akong gipanghambog sa mga Macedonianhon, nga usa ka tuig nang andam ang Acaya, ug ang inyong kasibot nakadasig sa kadaghanan nila. 3 Apan ipadala nako ang mga igsoong lalaki, aron ang among pagpanghambog bahin ninyo dili mahimong walay pulos niining bahina ug aron maandam na gyod mo, sumala sa akong giingon nga andam na mo. 4 Kay kon dili, kon ang mga Macedonianhon manganha uban kanako ug makita nila nga dili pa diay mo andam, maulawan mi kay misalig mi ninyo; ug maulawan sab mo. 5 Busa naghunahuna ko nga kinahanglang dasigon ang mga igsoon nga mounag anha kaninyo ug andamon daan ang dagayang gasa nga inyong gisaad, aron maandam na kini ingong gasa tungod sa pagkamahinatagon ug dili ingong butang nga kinilkil.

6 Apan bahin niini, ang nagapugas ug ginagmay moani sab ug ginagmay, ug ang nagapugas ug dinaghan moani sab ug dinaghan.+ 7 Ipabuhat sa matag usa kon unsay gihukom sa iyang kasingkasing, dili kontragusto* o pinugos,+ kay gihigugma sa Diyos ang nagahatag nga malipayon.+

8 Dugang pa, ang Diyos makapadagaya sa tanan niyang dili hitupngang pagkamaayo* diha kaninyo, aron dili mo makulangan sa bisan unsa; makabaton hinuon mog kadagaya aron mahimo ninyo ang tanang maayong buhat.+ 9 (Sumala gayod sa nasulat: “Siya dagayang* nanagtag; siya nanghatag sa mga kabos. Ang iyang pagkamatarong magpadayon hangtod sa hangtod.”+ 10 Karon ang Usa nga dagayang nagataganag binhi sa tigpugas ug tinapay aron kaonon magtagana ug magpadaghan sa binhi nga inyong ipugas ug magpauswag sa abot sa inyong pagkamatarong.) 11 Sa tanang butang gipanalanginan mo aron dagaya mong makapanghatag, nga pinaagi sa among mga paningkamot ang maong pagkamahinatagon magpalihok sa mga tawo sa pagpasalamat sa Diyos; 12 kay ang pagbuhat niini nga publikong pag-alagad dili lang magtagana sa mga panginahanglan sa mga balaan+ kondili mahimo pong abundang tinubdan sa mga pasalamat ngadto sa Diyos. 13 Tungod sa inyong pagpanghatag ug hinabang, ilang gihimaya ang Diyos kay mapinasakopon mo sa maayong balita bahin sa Kristo, sumala sa mensahe nga inyong gisangyaw, ug kay mahinatagon mo sa inyong amot ngadto kanila ug sa tanan.+ 14 Ug sila mangamuyo alang kaninyo kay gimahal mo nila tungod sa dili hitupngang pagkamaayo sa Diyos kaninyo.

15 Salamat sa Diyos tungod sa iyang dili mahubit nga walay bayad nga gasa.

10 Karon ako mismo, si Pablo, nangaliyupo kaninyo pinaagi sa kalumo ug pagkamaayo sa Kristo.+ Bisan tuod ubos ko tan-awon dihang naa ko uban kaninyo,+ apan prangka kaayo ko sa akong mga sulat kaninyo.+ 2 Nanghinaot ko nga inig-abot nako, kadtong mga naghunahuna nga nagkinabuhi mi sa unodnong paagi nagbag-o na, aron dili na nako sila kinahanglang badlongon pag-ayo. 3 Kay bisan tuod nagkinabuhi mi sama sa ubang tawo, wala mi makiggubat sumala sa unodnong paagi. 4 Kay ang mga hinagiban sa among pagpakiggubat dili unodnon,+ kondili gamhanan tungod sa Diyos+ aron sa pagpukan sa lig-ong naparilan nga mga butang. 5 Kay gipukan namo ang mga pangatarongan ug ang tanang tag-as nga butang nga batok sa kahibalo sa Diyos,+ ug gibihag namo ang tanang hunahuna aron himoon kining masinugtanon sa Kristo; 6 ug dihang mapamatud-an ninyo nga bug-os ang inyong pagkamasinugtanon, andam ming mopahamtang ug silot sa tanang magpakitag bisan unsang matang sa pagkadili-masinugtanon.+

7 Ginalantaw ninyo ang mga butang base sa ilang panggawas nga panagway. Kon ang usa segurado nga siya iya sa Kristo, kinahanglang pamalandongon niya kini pag-usab: Sama nga siya iya sa Kristo, mao man usab kami. 8 Kay bisag masobrahag diyutay ang akong pagpanghambog bahin sa awtoridad nga gihatag sa Ginoo kanamo sa pagpalig-on kaninyo ug dili sa pagpaluya kaninyo,+ dili ko maulawan. 9 Kay dili nako gustong masaypan nga ginahadlok mo nako pinaagi sa akong mga sulat. 10 Kay sila miingon: “Ang iyang mga sulat undanon ug puwersado, apan sa personal siya luya ug walay pulos ang iyang gipanulti.” 11 Angayng tagdon sa maong tawo, nga kon unsa ang among ginasulti* diha sa mga sulat, mao sab ang among buhaton kon naa na mi diha.+ 12 Kay wala mi mangahas sa pag-ingon nga pareho mi niadtong mga nagrekomendar sa ilang kaugalingon,+ ug wala namo itandi ang among kaugalingon kanila. Ilang giisip ang ilang kaugalingon sumala sa ilang sukdanan sa maayo. Kini nagpakita nga wala silay pagsabot.+

13 Apan dili mi manghambog nga gawas na sa mga utlanan nga gihatag kanamo kondili sulod lang sa utlanan sa teritoryo nga gihatag sa Diyos kanamo, mao nga nakaabot mi hangtod kaninyo.+ 14 Sa pagkatinuod, wala miy gibuhat nga gawas na sa mga utlanan nga gihatag sa Diyos kanamo dihang miabot mi kaninyo, apan kami ang unang nakaabot diha kaninyo uban ang maayong balita bahin sa Kristo.+ 15 Wala, wala mi manghambog nga gawas na sa mga utlanan nga gihatag kanamo pinaagi sa pagpanghambog sa mga paghago sa uban, apan naglaom mi nga samtang ang inyong pagtuo padayong molambo, ang among nahimo padayon pong molambo, sulod sa among teritoryo. Sa ingon kami makabuhat ug dugang pa, 16 ug mapahayag namo ang maayong balita ngadto sa kayutaan saylo kaninyo, aron dili namo ipanghambog ang nahimo sa uban sa ilang teritoryo. 17 “Apan ang usa nga nagapanghambog, papanghamboga siya diha kang Jehova.”*+ 18 Kay dili ang nagrekomendar sa iyang kaugalingon ang inuyonan+ kondili ang ginarekomendar ni Jehova.*+

11 Hinaot nga mapasensiyahan ko ninyo bisag daw dili ko makataronganon. Apan, sa pagkatinuod, ginapasensiyahan na ko ninyo! 2 Kay ang akong pagtagad kaninyo sama sa pagtagad nga iya sa Diyos,* kay gisaad mo nako sa kaminyoon ngadto sa usa ka bana, sa Kristo, ug gusto mo nakong ipresentar kaniya ingong ulay.*+ 3 Apan nahadlok ko nga sa unsa mang paagi, sama nga ang halas nagdaldal kang Eva pinaagi sa lipatlipat niini,+ basig ang inyong kaisipan mapahisalaag gikan sa kasinsero ug kaputli nga angay sa Kristo.+ 4 Kay sa pagkatinuod, dali ra mong modawat kon dunay moabot ug magwali ug Jesus nga lahi kay sa usa nga among giwali, o modawat ug espiritu nga lahi kay sa inyong nadawat, o modawat ug maayong balita nga lahi kay sa inyong nadawat.+ 5 Kay giisip nako nga dili ko ubos kay sa inyong maayong laki nga mga apostoles bisan sa usa ka butang.+ 6 Apan bisan kon dili ko batid sa pagsulti,+ seguradong dili ko ingon niana maylabot sa kahibalo; sa pagkatinuod gipakita namo kana kaninyo sa tanang paagi ug sa tanang butang.

7 O nakasala ba ko kay gipaubos nako ang akong kaugalingon aron mabayaw mo, kay malipayon nakong gipahayag kaninyo nga walay bayad ang maayong balita sa Diyos?+ 8 Ang ubang mga kongregasyon gihikawan* nako pinaagi sa pagdawat ug mga tagana* aron maalagaran mo.+ 9 Apan dihang uban ko kaninyo ug nanginahanglan ko, wala ko magpabug-at kang bisan kinsa, kay ang mga igsoong nangabot gikan sa Macedonia madagayaong nagtagana sa akong mga panginahanglan.+ Oo, sa tanang paagi wala gyod ko magpabug-at kaninyo ug padayon nako kining buhaton.+ 10 Hangtod nga anaa kanako ang kamatuoran sa Kristo, dili nako undangon kini nga pagpanghambog+ diha sa mga rehiyon sa Acaya. 11 Unsa may rason? Tungod ba kay wala ko mahigugma ninyo? Nahibalo ang Diyos nga gihigugma mo nako.

12 Apan dihay pipila nga nanghambog ug nag-ingon nga mga apostoles sila sama namo. Busa ipadayon nako ang akong ginabuhat+ aron dili sila makabaton ug bisan unsang rason sa pagpanghambog. 13 Kay ang maong mga tawo bakak nga mga apostoles, nga nanglimbong sa uban ug nagpakaaron-ingnong mga apostoles sa Kristo.+ 14 Ug dili kini ikatingala, kay si Satanas kanunayng nagpakaaron-ingnong anghel sa kahayag.+ 15 Busa dili ikatingala kon ang iyang mga ministro usab kanunayng magpakaaron-ingnong ministro sa pagkamatarong. Apan ang ilang kataposan maoy sumala unya sa ilang binuhatan.+

16 Mosulti ko pag-usab: Ayaw paghunahuna nga dili ko makataronganon. Apan bisan kon naghunahuna mo niana, dawata ko ingong dili makataronganon, aron makapanghambog sab kog gamay. 17 Nagsulti ko karon sama sa mga hambogiro nga sobrag pagsalig sa kaugalingon, dili ingong pagsunod sa panig-ingnan sa Ginoo kondili ingong tawong dili makataronganon. 18 Kay daghag nanghambog sa mga butang niining kalibotana, manghambog sab ko. 19 Kay “makataronganon” man kaayo mo, malipayon ninyong gipasensiyahan ang mga dili makataronganon. 20 Gani, inyong gipasensiyahan ang nag-ulipon ninyo, ang nagkuha sa inyong mga gipanag-iya, ang nagsakmit kon unsay naa ninyo, ang nagbayaw sa iyang kaugalingon ibabaw ninyo, ug ang nagsagpa ninyo.

21 Makauulaw ang pagsulti niini, kay mogawas nga huyang mi.

Apan kon ang uban dili maulawng manghambog, dili sab ko maulawng manghambog, bisag isipon ko sa uban nga dili makataronganon. 22 Hebreohanon ba sila? Ako sab.+ Israelinhon ba sila? Ako sab. Kaliwat* ba sila ni Abraham? Ako sab.+ 23 Ministro ba sila sa Kristo? Labaw na gyod ko. Mosulti ko nga samag buang: Mas daghan kog gibuhat,+ mas kadaghan kong nabilanggo,+ nag-antos kog daghang pagbunal, ug kadaghan kong hapit mamatay.+ 24 Kalima ko nakadawat ug 39* ka hampak gikan sa mga Hudiyo,+ 25 katulo ko gibunalan,+ kausa ko gibato,+ katulo ko nakasinatig pagkalunod,+ usa ka gabii ug usa ka adlaw ko sa lawod; 26 sa daghan nakong panaw, nakasinati kog kapeligrohan sa mga suba, sa mga tulisan, sa kaugalingon nakong katawhan,+ sa kanasoran,+ sa siyudad,+ sa kamingawan, sa dagat, sa taliwala sa dili tinuod nga mga igsoon. 27 Nakasinati sab kog kahago ug kabudlay, daghang gabiing walay tulog,+ kagutom ug kauhaw,+ kanunay kong walay kaon,+ ug nakasinati kog katugnaw ug walay igong sinina.*

28 Gawas pa niining mga butanga, kada adlaw pa gyod kong nabalaka alang sa tanang kongregasyon.+ 29 Maluya ko kon dunay maluya, ug masuko ko kon dunay makapandol sa uban.

30 Kon kinahanglan kong manghambog, akong ipanghambog ang mga butang nga nagpakitang huyang ko. 31 Ang Diyos ug Amahan ni Ginoong Jesus, ang Usa nga pagadayegon hangtod sa hangtod, nahibalo nga wala ko mamakak. 32 Sa Damasco ang gobernador ilalom ni Aretas nga hari nagbantay sa mga ganghaan* sa siyudad aron dakpon ko, 33 apan gitunton ko pinaagig bukag agi sa usa ka bentana sa paril sa siyudad,+ ug nakaikyas ko.

12 Kinahanglan kong manghambog. Dili kini mapuslanon, apan karon mosulti ko bahin sa milagrosong mga panan-awon+ ug mga pinadayag sa Ginoo.+ 2 Duna koy nailhang tawo nga nahiusa sa Kristo. Ug 14 ka tuig kanhi siya gisakgaw ngadto sa ikatulong langit​—⁠kon diha ba sa lawas o gawas sa lawas wala ko mahibalo, apan ang Diyos nahibalo. 3 Oo, nakaila ko sa maong tawo​—⁠kon diha ba sa lawas o bulag sa lawas wala ko mahibalo, apan ang Diyos nahibalo⁠— 4 nga gisakgaw ngadto sa paraiso ug nakadungog ug mga pulong nga dili angayng isulti ug dili subay sa balaod nga isulti sa tawo. 5 Ipanghambog nako ang maong tawo, apan dili nako ipanghambog ang akong kaugalingon gawas sa akong mga kahuyangon. 6 Kay bisag gusto kong manghambog, dili ko mahimong dili makataronganon, kay tinuod ang akong isulti. Apan dili nako kana himoon, aron walay modayeg nako nga labaw kay sa iyang nakita o nadungog gikan nako, 7 tungod lang kay nakadawat ko niining talagsaong mga pinadayag.

Aron dili ko manghambog pag-ayo, gihatagan kog tunok sa unod,+ nga samag anghel ni Satanas nga kanunayng nagsagpa* nako, aron dili ko manghambog pag-ayo. 8 Katulo ko mihangyo sa Ginoo bahin niini, nga mawala na unta kini kanako. 9 Apan siya miingon kanako: “Igo na kanimo ang akong dili hitupngang pagkamaayo,* kay mas kusgan* ang akong gahom dihang huyang ka.”+ Busa malipayon kaayo kong manghambog bahin sa akong mga kahuyangon, aron ang gahom sa Kristo magpabilin kanako nga samag tolda. 10 Busa nalipay ko sa mga kahuyangon, sa mga panginsulto, sa mga panahon sa panginahanglan, sa mga paglutos ug kalisdanan, alang sa Kristo. Kay dihang huyang ko, gamhanan hinuon ko.+

11 Nahimo kong dili makataronganon. Kamoy hinungdan niini, kay kamo untay angayng magrekomendar nako. Kay dili ko ubos kay sa inyong maayong laki nga mga apostoles bisan sa usa ka butang, bisag wala koy pulos.+ 12 Sa pagkatinuod, akong gipakita kaninyo ang mga ilhanan sa akong pagkaapostol uban ang grabeng paglahutay,+ lakip ang paghimog mga milagro ug katingalahang mga buhat* ug talagsaong mga butang.+ 13 Wala ko magpabug-at ninyo, ug niining paagiha lang mo nalahi sa ubang mga kongregasyon.+ Palihog pasayloa ko kon sayop kini.

14 Tan-awa! Kini ang ikatulong higayon nga andam kong moanha ninyo, apan dili ko magpabug-at. Kay dili ang inyong kabtangan ang akong ginatinguha+ kondili kamo; kay wala gidahom nga ang mga anak+ ang magtigom para sa ilang mga ginikanan, hinuon ang mga ginikanan para sa ilang mga anak. 15 Sa akong bahin, malipay kaayo kong ihatag kaninyo ang tanan ug gamiton sa bug-os para ninyo.+ Kon gihigugma mo nako pag-ayo, dili ba angayng higugmaon sab ko ninyo sama sa akong paghigugma kaninyo? 16 Bisag unsa pay kahimtang, wala ko magpabug-at ninyo.+ Bisan pa niana, miingon mo nga “limbongan” ko ug nadala mo nako “pinaagig lingla.” 17 Wala ko mamentaha ninyo pinaagi niadtong mga gipadala nako kaninyo, dili ba? 18 Giawhag nako si Tito nga moanha kaninyo ug nagpadala kog igsoon uban niya. Wala gyod mamentaha si Tito kaninyo, dili ba?+ Naglakaw mi sa samang espiritu, dili ba? Sa samang mga lakang, dili ba?

19 Hangtod karon naghunahuna ba mo nga gidepensahan namo ang among kaugalingon? Nagsulti mi nga nahiusa sa Kristo atubangan sa Diyos. Apan, mga hinigugma, ang tanan namong ginahimo maoy alang sa pagpalig-on kaninyo. 20 Kay nahadlok ko nga inig-abot nako, ang akong makita kaninyo dili sama sa akong gidahom ug ang inyong makita kanako dili sab sama sa inyong gidahom. Hinuon basig dunay panag-away, pagselosay, pagsilaob sa kasuko, panaglalis, pagpanglibak, pagpanabi, pagpanghambog, ug kasamok. 21 Tingali inigbalik nako diha, itugot sa akong Diyos nga maulaw ko sa inyong atubangan, ug kinahanglan kong magbangotan alang sa daghang nakasala apan wala maghinulsol sa ilang kahugawan ug seksuwal nga imoralidad* ug walay kaulaw nga paggawi* nga ilang ginabuhat.

13 Kini ang ikatulong higayon nga moanha ko kaninyo. “Pinaagi sa duha o tulo ka saksi mapamatud-an ang tanang butang.”+ 2 Bisag wala ko diha karon, mora gihapog naa ko diha sa ikaduhang higayon. Ug akong pasidan-an daan kadtong mga nakasala kaniadto ug ang tanang uban pa nga kon ugaling mobalik ko diha, wala gyoy makaikyas sa disiplina, 3 kay nangita man mog pamatuod nga nagasulti gyod pinaagi nako ang Kristo, kinsa wala magpakitag pagkahuyang taliwala ninyo hinuon gahom. 4 Kay sa pagkatinuod, gipatay siya diha sa estaka sa huyang nga kahimtang, apan buhi siya tungod sa gahom sa Diyos.+ Tinuod, huyang sab mi sama kaniya kaniadto, apan mabuhi mi uban niya+ tungod sa gahom sa Diyos nga naa ninyo.+

5 Padayong sulayi kon naa ba mo sa pagtuo; padayong pamatud-i kon unsa mo sa inyong kaugalingon.+ O wala ba mo mahibalo nga si Jesu-Kristo nahiusa kaninyo? Gawas lang kon dili mo inuyonan. 6 Naglaom gyod kong mahibalo mo nga inuyonan mi.

7 Karon nag-ampo mi sa Diyos nga dili unta mo mohimog sayop, dili aron mogawas nga inuyonan mi, kondili aron buhaton ninyo kon unsay maayo, bisan pag mogawas nga dili mi inuyonan. 8 Kay wala miy mahimo batok sa kamatuoran, apan naa miy mahimo para sa kamatuoran. 9 Malipay gyod mi dihang huyang mi apan kamo gamhanan. Ug kini ang among ginaampo, nga maghimo mog gikinahanglang mga kausaban. 10 Mao nga gisulat nako kining mga butanga aron nga dihang naa na ko diha, dili na kinahanglang mag-inestrikto ko ninyo, kay gihatagan ko sa Ginoo ug awtoridad+ sa pagpalig-on kaninyo ug dili sa paglumpag.

11 Sa kataposan, mga igsoon, padayon sa pagsadya, sa paghimog gikinahanglang mga kausaban, sa pagdawat ug paghupay,+ sa paghunahuna nga may panag-uyon,+ sa pagpuyo nga may pakigdait;+ ug ang Diyos sa gugma ug sa kalinaw+ mag-uban kaninyo. 12 Komostaha ang usag usa uban ang inigsoong halok. 13 Ang tanang balaan nangomosta ninyo.

14 Ang dili hitupngang pagkamaayo* ni Ginoong Jesu-Kristo ug ang gugma sa Diyos ug ang mga panalangin sa balaang espiritu maanaa kaninyong tanan.