‘Kulang ang Pagkarelihiyoso sa mga Iglesya’

“Nadiskobrehan sa daghang tawo nga ang mga iglesya yanong nakulangan sa pagkarelihiyoso,” mao ang sumbong ni Edward Norman, Dekano sa Peterhouse, Cambridge, nagtaho ang The Times sa London. Iyang nasabtang ang mga iglesya nagalihok “labaw pa ingong mga ahensiya sa moral ug mga propagandista dapig sa sosyal nga kausaban inay matuod nga mga behikulo sa espirituhanong mga misteryo.“ Ang mga iglesya sa Tinipong Bansa nalangkit usab nga aktibo sa sosyal nga kausaban. Sa unang panahon niining sigloha, ang relihiyosong mga pundok nagapit-os sa negosyo pinaagi sa pagpatungha sa “sosyal ug etikal nga mga isyu sulod sa korporasyon,” nagpahayag si David E. Anderson sa United Press International. Sanglit daghang iglesya ug relihiyosong mga orden nagbaton sa aksiyon sa negosyo, ilang magamit ang stockholder proxy resolusyon ingong gahom sa pagdani sa mga negosyo nganha sa ilang relihiyosong mga pagtuo.

Bisan tuod ang relihiyosong mga pundok tingali dunay maayong mga tuyo sa pagpasiugdag sosyal nga kausaban, gigamit ni Jesu-Kristo ang iyang kusog sa “pagwali ug pagpahayag sa maayong balita sa gingharian sa Diyos.” (Lucas 8:1) Ginadahom ni Jesus nga buhaton ang sama sa iyang mga sumusunod tungod kay siya nasayod nga ang Gingharian sa Diyos lamang ang mopatungha sa sosyal nga kausaban.—Isaias 32:1; Buhat 1:8.