Astrolohiya, mga Adlawng-Natawhan, ug ang Bibliya

Sumala sa mga awtor si Ralph ug Adelin Linton, dunay tinong koneksiyon sa astrolohiya ug sa mga adlawng-natawhan. Sila nagpahayag diha sa ilang librong The Lore of Birthdays: “Ang Mesopotamia ug Ehipto, ang mga duyan sa sibilisasyon, mao usab ang unang mga yuta diin ang mga tawo naghinumdom ug nagsaulog sa ilang mga adlawng-natawhan. Ang paghupot sa mga talaan sa adlawng-natawhan hinungdanon sa karaang panahon tungod ilabina kay ang petsa sa pagkatawo hinungdanon sa paghan-ay sa usa ka horoskopyo.”

Matuod, ang mga Israelinhon naghupot usab ug mga talaan sa adlaw sa pagkatawo. Apan kadto gibuhat sa pagtino sa mga edad sa mga lalaki alang sa saserdotehanon, militaryo, ug ubang mga serbisyo. (Numeros 1:2, 3; 4:2, 3; 2 Hari 11:21) Ugaling, ang Bibliya wala magtala sa mga petsa sa pagkatawo sa ilado ganing mga tawo, sama kang Noe, Abraham, Moises, David—o kang Jesu-Kristo! “Tinuod,” miangkon ang mga awtor sa ibabaw, “adunay mga pagsaulog sa adlawng-natawhan nga gihisgotan sa Bibliya, apan aron sa pagsaulog lamang sa adlawng natawhan sa daotang mga erehes sama kang Paraon ug Herodes. Sa gisulayan sa unang mga Kristohanon ang pagtino sa petsa sa pagkatawo ni Kristo, giisip kadto sa daghang Amahan sa Iglesya nga makapasipala . . . Ilang gipahayag nga angay dili nila sulayan ang pagsaulog niana, kay kana usa ka dili-balaan paganong batasan.”