Aborsiyon—Kang Kinsang Katungod ang Nalangkit?
ANG mga doktor sa medisina sila si P. M. A. Nicholls ug Carlos del Campo sa Halifax, Nova Scotia, misulat ug mabutyagong sulat ngadto sa Canadian Medical Association Journal mahitungod sa kang kinsang desisyon ang nalangkit sa aborsiyon. Ilang unang gipahayag nga ang uban miingon nga “ang desisyon kon magpaaborsiyon ba nasandig panguna sa babaye,” ug nga “daghang mga babaye nangitag aborsiyon ug ang kadaghanang mga grupo nga midapig sa aborsiyon nagtuo nga ang babaye may katungod sa paghukom sa kapalaran sa iyang kaugalingong ‘lawas’ ug nga mahimong tugotan ang aborsiyon niining mga katarongana.” Apan, ang mosunod nga mga obserbasyon nga gihimo niining mga doktora nakahatag sa tawo ug rason sa paghunong ug sa pagpalandong.
“Bisag tataw sa tanang mga mananambal, ang mosunod sa kasagaran wala lamang tagda ug kinahanglang ipasiugda. Tapos sa pertilisasyon ang haploid nga mga selula mohiusa sa diploid nga mga selula. Gikan niining puntoha paunahan ang nagatubong binhi naglungtad ingong binuhat nga lahi gikan sa genes sa inahan; sa ato pa, kini adunay tagsaon, organisadong tighatag ug impormasyong mga chromosome. Ang dili-malalis nga pamatuod niini makita sa kamatuoran nga kon dili pa sa hanig nga inunlan mahitabo ang seryosong dili pagdawat sa lawas niini.
“Nan, nganong gitagad nato ang aborisyon sama sa atong pagtangtang sa apendiks, pantog o ubang mga organo? (Siyempre, kita nahibalo sa mas dakong sikolohikal nga mga sangpotanan sa aborsiyon.) Kataw-anan, mas masayon pang ipakuha sa obstetrician ang mabuhi nga bata sa tagoangkan kay sa pagkakitag siruhano nga mosugot sa pagkuha sa usa ka himsog nga pantog. Apan, dili sama sa bata sa tagoangkan, kanang organoha tino maoy usa ka bahin sa pasyente. Makadawat ba kita sa komung dapig-sa-aborsiyong ‘akong lawas’ nga tinamdan ug mouyon nga ang desisyon sa pagkuha sa kinabuhi sa bata sa tagoangkan nasandig sa babaye ug sa iyang doktor? Sa makausa pa, kon atong susihon kini sa makataronganong paagi dili kini, sa pagkatinuod, isyu sa lawas sa babaye kondili usa ka dili-ikalimod lahi nga kinabuhi nga may iyang kaugalingong genetikong mga kodigo.”
Sa pagtapos kining maong mga doktor mipasidaan: “Dihang makaatubang ug ingon niini nga isyu mas masayon ang pagsalikway sa atong nahibaloang tinuod alang lamang sa kasayon kun ‘kahangawa.’ Bisan pa, katungdanan sa tanang mga mananambal sa paglikay sa pagsugot o sa pagtago sa likod sa opinyon ug sa mga pagtuo sa nagkamatugotong katilingban.”
[Tinubdan sa Letrato sa panid 20]
S. J. Allen/Int’l Stock Photo Ltd.