Kinsa Ang Magapanunod sa Yuta?

Gitubag ni Jesus kining pangutanaha diha sa iyang Wali sa Bukid: ‘Ang mga maaghop ang magapanunod sa yuta.’ Sa mga kasiglohang milabay ang salmistang David miingon: ‘Ang mga maaghop magapanunod sa yuta.’ Mahitungod kang Jehova nga Diyos mismo kini nag-ingon: “Ang yuta iyang gihatag alang sa mga anak sa tawo.”—Mateo 5:5; Salmo 37:11; 115:16.

Sa dihang gilalang ni Jehova ang tawo, Iyang gibutang siya sa pagdumala sa yuta. Iyang gisugo sila “sa pagtikad ug sa pag-atiman niini.” (Genesis 2:15) Ugaling, gihugawan ug gilaglag kini sa tawo. Ang Pinadayag 11:18 nagtagna nga kini iyang hugawhugawan ug nga ang Diyos lamang ang makahunong niana. Ang Diyos mao ang “molaglag sa mga tawo nga nagalaglag sa yuta.” Ang tawo bungol sa singgit sa katahoman sa yuta aron sa pagprotesta, apan, siya makadungog kon ang salapi na ang mohunghong.—1 Timoteo 6:10.

Apan ang salapi mao usab ang kinataposang biktima. Ang usa ka editoryal diha sa U.S.News & World Report nagbangon ug hinungdanong pangutana:

“Kinsa ang mga realistiko karong adlawa? Sulod sa daghang katuigan, ang mga lungsoranon nga nabalaka bahin sa atong ginahimo sa atong planeta giyubit ingong mga idealistiko, mga manghahadlok ug mga hilabtanong tigbuhat-kunohayg maayo. Karong adlawa nagkatin-aw nga ang ‘dili-praktikal’ nga mga mabalak-on husto diay bahin sa asidong ulan, bahin sa pagkadaot sa ozone nga maoy salipod sa yuta ug sa tibuok kalibotang kausaban sa klima gikan sa atong paghugaw sa atmospera pinaagi sa carbon dioxide, nga nagpainit sa ibabaw sa yuta.

“Diha sa tulo ka kaso, kita ug ang atong mga anak mobayad ug mahal gumikan sa binutang pangandoy sa ginaingong praktikal nga mga tawo. Ang ilang ‘realismo’ nakapugong sa mga pagkontrolar sa polusyon nga niadto mokantidad lamang ug minilyon, apan atong ginaatubang karon ang galastohan nga binilyon alang sa dili-mabakwing mga resulta nga hayan mopahinabog tibuok-kalibotang katalagman.”

Ang mga tawo nga makatabang unta niini nagpakabuta-bungol ug wala motabang samtang ang mga tawo nagkasakit ug nagakamatay. Ug mao gihapon kini ang ilang gihimo. Ang unom ka libo ka tuig sa tawhanong kasaysayan nagpakita nga tinuod ang Bibliya, sa dihang kini nagaingon: “Ako nasayod, Oh Jehova, nga ang dalan sa tawo wala diha sa iyang kaugalingon. Kini wala sa tawo nga molakaw aron sa pagtultol sa iyang mga lakang.”—Jeremias 10:23.

Gihatagan sa Diyos ang tawo ug giya nga iyang gikinahanglan: “Ang imong pulong maoy lampara sa akong mga tiil, ug kahayag sa akong alagianan.” (Salmo 119:105) Kini motultol sa kalipay: “Ako mao si Jehova, nga imong Diyos, ang Usa nga nagatudlo kanimo sa pagpahimulos, ang Usa nga nagamando kanimo sa dalan diin ikaw angay moagi. Oh nga ikaw mamati lang unta sa akong mga sugo! Unya ang imong pakigdait mahisama sa usa ka suba, ug ang imong pagkamatarong maingon sa mga balod sa dagat.”—Isaias 48:17, 18.

Apan ang kinabag-an sa katawhan dili maaghop sa pagdawat sa pagtultol sa Diyos ug busa makaani sa mga kaayohan niini. Kini gusto nga magkinaugalingon, nagainsister sa paglakaw diha sa dalan sa kalaglagan. Ang mga maaghop lamang ang nagapangita sa “dalan nga nagatultol sa kinabuhi.”—Mateo 7:13, 14.

Ang mga tawo karong adlawa nangahimong dili-angay. Una ilang gihugawan ang ilang kaugalingon sa moral, dayon ilang gihugawan ang yuta sa literal. Kining moral nga kahugawan ang nakahimo kanilang dili-angay diha sa mga mata sa Diyos sa pagpanunod sa yuta. Ang sunod nga artikulo mohatag duha ka pananglitan kon sa unsang paagi ang imoralidad sa mga tawo nakahugaw ug dako sa yuta nga tungod niana gipagawas sila gikan niana. Ang duha ka kaso maoy balik pa sa karaang kasaysayan.