Ang mga Buhat sa Kalulot Nakapahinay sa mga Paghaguros sa Bagyong Gilbert

SA SAYONG mga oras sa buntag sa Septiyembre 14, 1988, giigo sa bagyong Gilbert ang Caribeano sa baybayon sa Mexico. Kini mihuros sa mga estado sa Quintana Roo ug Yucatán. Sa ika-15 ug ika-16, ang amihanang mga estado sa Tamaulipas ug Nuevo León mao ang gimakmakan. Ang iyang tanang giagian, gilumpag sa Gilbert. Ang kusog nga hangin ug unos mipahinabog kusog nga baha. Sa habagatang-sidlakan, 50,000 ka pamilya ang nawad-ag mga balay. Sa amihanan, 30,000 ka pamilya ang napildihan sa ilang mga balay. Duolan sa 250 ka tawo ang nangamatay sa pag-agi sa hangin sa bagyo nga 1,600 ka kilometro.

Dihadiha, ang sangang buhatan sa mga Saksi ni Jehova milihok dayon. Sa pagka Sabado, sa Septiyembre 17, ang unang mga trak nga puno sa pagkaon, sapot, ug mga materyales para sa atop mipaingon sa Yucatán Peninsula. Duha ka hawas nga gikan sa sanga mibiyahe didto aron sa pagsusi ug sa pagtukod ug lokal nga mga komite aron sa pag-apod-apod sa suplay nga mga hinabang. Dihadiha, daghang mga trak gipadala nga nagdalag pagkaon ug mga materyales para sa atop. Milihok usab ang mga awtoridad sa kagamhanan sa paghatag gipabilhang tabang.

Ang unang miabot sa nahitaboan, hinoon, mao ang mga gipadala sa mga Saksi ni Jehova gikan sa Siyudad sa Mexico. Kini nakahatag sa mga Saksi ug dakong kahupayan ug kalipay. Gawas sa materyales para sa atop nga gipadala sa mga Saksi, walay laing butang ang mabatonan sa maong lugar, ug walay moabot kapin sa usa ka bulan. Makalipay ang pagtan-aw sa unsang paagi ang mga balay sa mga igsoon natukod pag-usab. Ang balay sa pagsimba sa mga Saksi ni Jehova sa Colony Yucatán mao ang unang tinukod nga naatopan. Didto sa Mérida ang tinukod nga gigamit alang sa sirkitong mga asembliya ug distritong mga kombensiyon sa mga Saksi nalumpag, ug may gihikay dayon aron matukod ang bag-ong dapit nga tigomanan.

Dako kaayo ang kadaot diha sa mga estado sa Nuevo León ug sa Tamaulipas. Ang lokal nga mga Saksi nakadawat ug dihadihang hinabang pinaagi sa komite nga gitukod sa Monterrey. Ang mga kasangkapan sa balay, sama sa mga katre, lamesa, mga lingkoranan, sug-ang, ug mga gamit sa pagluto, gihatag. Sa Monterrey mismo, 32 ka pamilya sa mga Saksi ni Jehova ang nawad-an sa tanang butang nga ilang nabatonan, apil ang ilang mga balay. Duyog sa duol-sero nga temperatura tungod sa taliabot nga tingtugnaw, kinahanglang may himoon sa madali.

Duha ka Saksi, ang usa arkitekto, milupad gikan sa Siyudad sa Mexico. Sila nakigtagbo sa mga ansiano ug sa nagapanawng mga hawas. Wala magdugay, ang mga kalihokan sa pagtukod gisugdan aron sa pagtaganag bag-ong mga balay alang sa 32 ka pamilya. Apil niini ang pagpalit ug yuta ug mga gamit sa pagtukod aron sa paggamag-daang gambalay sa gikinahanglang mga balay. Sa dihang ang pagkaon, sapot, ug mga katre gihatag dayon alang sa mga Saksi, ang mga silingan nakadayeg kaayo sa gugma ug pagkamahinatagon nga gipakita sa ubang mga Saksi sa ilang nagkinahanglang mga igsoon. Ilabinang makadayeg sila kon makakita pa sila sa 32 ka pamilya sa dihang mobalhin na ngadto sa ilang bag-o duhay-lawak nga mga balay!

Kini mao ang larawan sa tibuok-kalibotang panag-igsoonay sa mga Saksi ni Jehova. Dili lamang ang mga Saksi sa Mexico ang misanong sa paghatag mga materyales, kahago, ug salapi sa pagtabang sa ilang mga igsoon kondili ang mga Saksi usab sa ubang bahin sa kalibotan. Sa dihang gipakita sa balita sa TV ang kalumpagan nga gipahinabo sa bagyong Gilbert, ang mga hinabang misugod sa pagpangabot sa hedkuwarter sa kalibotan sa mga Saksi ni Jehova sa Brooklyn, New York. Usa ka gamayng pananglitan mosunod:

“Palihog gamita kining gamayng amot sa pagtabang sa paghimo sa atong mga igsoon nga komportable kinsa naigo sa bagyo. Buot ko untang mopadala ug dakodako, apan trabahoon pa nako ang makina sa awto sa akong asawa karong semanaha. Mopadala ra unya ako inig-abot sa akong sunod nga suweldo.”

“Among giamot kini aron sa pagtabang sa atong mga igsoon sa dapit nga giagian sa bagyo. Buot namong ipahibalo kanila ang among gugma ug kabalaka. Sama sa gipamulong ni Pedro: ‘Pagbaton ug mainit nga gugma sa usa ug usa.’”—1 Pedro 4:8.

“Ingong gamayng amot alang sa mga paningkamot sa pagtabang, palihog dawata kining tseke nga $1,000. Maayo unta ug makapadala akog dakodako, apan ang gitugotan ni Jehova kanako nga mabatonan buot kong ipaambit.”

“Palihog dawata kining hiro postal nga $20. Gikinahanglan ko ang tanan nakong tseke ug dili makaarang sa pagtabang hangtod nga akong naamgohan nga ang uban sa atong mga igsoon nawad-an sa tanang butang.”

“Gisukip mao ang tseke nga $25. Buot namong iamot kini sa pundo alang sa katalagman. Gamay ra ang maong gasa, apan ang among kasingkasing misangkad ngadto sa atong minahal nga mga igsoong babaye ug lalaki niining lugara.”

Makahanduraw ka ba nga nagpahulam kang Jehova, ang Tag-iya sa tibuok nga uniberso? Bisan pa, mao kana ang gihimo sa maong mga tig-amot, kay ang Proverbio 19:17 nag-ingon: “Siya nga nagapakitag kaluoy sa kabus nagapahulam kang Jehova, ug ang iyang maayong buhat Iyang pagabayran.”