Kinsa ang Tinuod nga mga Mamumuhat ug Daotan

ANG Bibliya nagaingon nga ang kabakakan mao ang ilhanan ni Satanas. Sa adlaw ni Jesus gimugna sa Hudiyong klero ang kabakakan batok kaniya. Ang kapanahonan wala mausab.—Juan 8:44.

Ang mga kaaway sa mga Saksi ni Jehova kanunayng nagagamit sa kabakakan ug sa madaotong mga taktika sa paninguha nga mapukgo ang buluhatong pagwali sa mga Saksi. Sa Sosyalistang kanasoran ang bakak mao nga ang mga Saksi maoy daotang mga ahente sa Tinipong Bansa nga CIA! Usa ka Katolikong tigpaluyo sa Sandinista, sa usa ka biyahe sa ayroplano gikan sa London paingon sa New York, misinghag nianang waypasikaranang akusasyon ngadto sa usa ka koresponsal sa Pagmata! nga tapad niya sa lingkoran. Bisan pa niana, ang tanang nahibalong tawo nasayod nga ang mga Saksi bug-os nga neyutral sa politika.—Juan 17:16; 18:36.

Sa laing bahin, sa Katolikong kanasoran ang ubang kabakakan gigamit sa pagdaot sa dungog sa mga Saksi. Sa nangagi giakusar sila nga daotang Komunistang mga ahente. Karong bag-o sa duol sa Caracas, Venezuela, ang usa ka katingad-ang sumbong gipahamtang batok sa pila ka Saksi. Sa binakak kadto gitaho sa mantalaang Ultimas Notícias nga ang usa ka Saksi gilugos ug gipatay sa tulo pa ka Saksi diha sa usa ka satanasnong rituwal! Ang lokal nga pari nagsugnod sa kalayo sa eskandalo pinaagi sa pagsulti sa iyang mga parokyano, ‘Kini nagapakita kaninyo kon unsang matanga sa mga tawo ang mga Saksi ni Jehova.’ Unsa ba ang tinuod nga nahitabo?

Ang babayeng gitumong namatay sa hemoreds sa utok ug ang mga magsusupak nagmugna sa estorya sa panglugos. Sa ulahi, ang usa ka interbiyo ug bug-os nga pagbakwi gipatik sa samang mantalaan.

Apan unsay nahitabo sa pari nga mipahimulos sa maong bakak? Niadtong adlawa mismo sa pagpatik sa panghimakak, siya gikuwestiyon sa telebisyon. Ang ulohan? Siya nadakpang misulay sa pagyuhot ug 21 kilong cocaine ngadto sa Espanya. Dili kadto ang una niyang sala. Miangkon siyang nalangkit sa pagyuhot ug droga sa sinugdan niadtong 1984 pinaagi sa iyang pakigkontak sa usa ka kanhi-pari nga usa usab ka magpapatigayon sa droga. Ang taho sa magasing Auténtico miingon nga nahadlok ang kapolisan nga pagawason ang pari ug palayason gikan sa nasod sama sa laing pari, kinsa “gitugotan nga moikyas ngadto sa usa ka balay nga napalit niya sa Miami [Florida, U.S.A.] dala ang kuwarta sa droga.”

Unsay giingon sa arsobispo sa Caracas, si Kardinal Lebrún, bahin sa iyang kriminal nga pari? “Akong katungdanan ang pag-ingon nga si padre José Luis Gil dili usa ka mamumuhat ug daotan.” Bisan pa niana, ang kabatbatan sa balaod sa usa ka mamumuhat ug daotan maoy lahi kay nianang sa arsobispo, ug ang pari gisilotag 20 anyos sa prisohan. Ang Bibliya may tin-aw usab nga kabatbatan sa usa ka mamumuhat ug daotan: “Kamo sa hingpit nahibalo nga ang mga tawo nga nagabuhat ug daotan dili magapanunod sa gingharian sa Diyos: ang mga tawong imoral ug kinabuhi, . . . mga kawatan, mga tigpatanto, . . . ug mga tikasan dili gayod magapanunod sa gingharian sa Diyos.” “Walay mausa kaninyo ang angay magaantos tungod sa pagkamamumuno, kawatan, kriminal.”—1 Corinto 6:9, 10; 1 Pedro 4:15; The Jerusalem Bible (Katoliko).

Sa dihang ang usa ka pari makasala, siya kasagarang ibalhin ngadto sa laing parokya, sumala sa nahitabo sa bag-ong mga kaso sa mga paring nangabusar sa bata sa Tinipong Bansa. Ang sukdanan sa Bibliya alang sa dili-mahinulsolon, walay-pagbag-o, imoral nga mga tawo mao ang pagpalagpot, o ekskomunikasyon. Sa mao lamang nga paagi ang Kristohanong kongregasyon mahigawas sa tinuyong mga mamumuhat ug daotan.—1 Corinto 5:11, 12.

Ang usa ka magpapatigayon sa droga maoy magpapatigayon sa droga bisan pag siya usa ka pari

Usa ka paring nadakpan nga may kargadang cocaine

Si Kardinal Lebrún miingon, “Akong katungdanan ang pag-ingon nga si padre José Luis Gil dili mamumuhat ug daotan”