Ang Nagkadaot nga Silinganan

‘Gawas kon may pagabuhaton sa madali, makadahom kitag kaylap ekonomikanhong pag-us-os ug sosyal nga kagubot’

KANA ang mensahe ni Lester Brown, presidente sa Worldwatch Institute, usa ka grupong tigdukiduki sa silinganan. Ang iyang mga komento mitungha diha sa tinuig “kahimtang-sa-kalibotang” taho.

Ang silinganan sa yuta, matud ni Brown, nagpadayon sa pagkadaot. Gawas nga masumpo ang mga hulga sa pagkahurot sa ozone, hulaw, pagkapuril sa lasang, pagkakankan sa yuta, ug pag-uswag sa populasyon, “ang ekonomikanhong pag-us-os tingali dili kalikayan.” Siya miingon nga ang produksiyon sa pagkaon sa kalibotan mius-os ug 14 porsiento matag tawo sukad sa 1984 ug ang pondo sa trigo labing ubos sa 15 ka tuig.

Si Brown miingon usab: “Ang panahon dili pabor nato. . . . Kinahanglang buhaton nato kini sulod sa katuigang 1990. Lapas niana maoy ulahi na kaayo. . . . Ang makapapugwat nato maoy sa dihang kita makabaton sa ani nga gidaot sa hulaw. Unya hisayran nato nga wala nay trigo nga ikapaangkat, ug modoble o motulo ka pilo ang mga prisyo sa trigo. Ang ekonomikanhong kaylap nga kakurat mohimo sa mga kanihit sa aseite nga samag kataw-anang kasinatian.” Siya miingon usab: “Ulahi na kaayo kini alang sa bahin sa Aprika. Walay paagi sa pagbalit-ad niini didto. . . . Tingali ang Latin Amerika mao ang sunod.”

Ang maong mga kiling nahiuyon sa mga tagna sa Bibliya nga nagahisgot sa kagutmanan, sakit, gubat, ug kamatayon, uban sa tawo nga “nagalaglag sa yuta” sa atong panahon. Gitagna ni Jesus nga kini mosangko sa “usa ka dakong kasakitan nga wala pa sukad mahitabo sukad sa sinugdanan sa kalibotan.” Kana magkahulogan sa kataposan niining presenteng sistema sa mga butang, nga magahatag dalan alang sa usa ka bag-ong kalibotan nga binuhat sa Diyos.​—Pinadayag 6:1-8; 11:18; Mateo 24:21; 2 Pedro 3:10-13.