Gikan sa Among mga Magbabasa
Muscular Dystrophy Salamat kaninyo sa pagpatik sa makapadasig nga kasinatian “Ako Nagakinabuhing May Muscular Dystrophy.” (Enero 8, 1990) Ako usa ka quadriplegic ug nagadepende sa uban sa akong adlaw-adlaw nga pagkinabuhi. Apan uban sa pagpaluyo sa akong asawa ug sa uban diha sa kongregasyon, ako nakaarang sa pag-alagad nga auxiliary payunir nga ministro. Pinaagi sa paggamit sa direktoryo sa telepono nga nagatala sa mga tawo sumala sa adres sa kalye (nga mabatonan sa usa ka publikong librarya), ako makasangyaw pinaagi sa telepono sa mga tawo nga nagapuyo sa mga apartment nga may magbalantay.
B. W., Tinipong Bansa
Karera sa Pagkamodel Ako naikag sa artikulong “Mga Batan-on Nangutana . . . Unsay Ikasulti Bahin sa mga Karera sa Pagkamodel ug mga Bangga sa Kaanyag?” (Enero 8, 1990) Tungod lang sa kusog ni Jehova nga ako nakabiya sa maong karera. Hangtod sa pila lang ka bulan una sa akong bawtismo, ako niadto usa ka model sa letrato. Apan bisan pag ang daotan kong pakig-uban akong gilimitahan kaayo, ang pagpiit labihan. Ang usa ka model kataw-an, dili pakabanaon, ug pugson pa sa paglakawlakaw nga katunga hubo tungod sa kakulang sa ilisanan. Idugang niana mao ang kamingaw sa dihang magpuyo sa usa ka hotel sa daghang semana. Ang kalibotan sa moda daw nindot tan-awon, apan kini puno sa kadalo, panag-indig, imoralidad, materyalismo, ug mga droga.
J. Y. A. M., Pederal Republika sa Alemanya
Paglikay sa Okulto Ang inyong artikulo, “Mga Batan-on Nangutana . . . Nganong Angay Kong Likayan ang Okulto?” (Marso 8, 1990) mas nakapaamgo nako sa gahom nga nabatonan ni Satanas ibabaw sa mga tawo ug sa malalangong mga taktika nga iyang gigamit sa pagpukaw sa kamausisaon. Gibati ko niadto nga basin may diyutayng pagkamaayo nga nabilin diha sa mga demonyo, sanglit sila sa nangagi mga manulonda. Ang artikulo tin-awng nagpadayag kanako nga sila takos lamang sa ilang umaabot nga kalaglagan. Salamat pag-usab.
R. S., Tinipong Bansa
Mga Suliran sa Prostate Ang inyong artikulo bahin sa mga suliran sa prostate (Abril 8, 1990) nakaikag nako, kay ang akong amahan nagkinahanglan sa operasyon sa prostate. Bisan pag ang artikulo matulon-anon kaayo, ang hinapos nga mga komento nakatugaw nako. Kamo nagaingon nga daghang lalaki nagapangita sa seksuwal nga pagkapukaw pinaagig pornograpikong mga basahon. Kini nagapasabot nga ang tanang lalaki nga may mga suliran sa prostate nagatan-aw sa mga pelikula o mga basahon nga pornograpiko.
N. R., Pederal Republika sa Alemanya
Wala namo tuyoa nga ipasabot nga ang mga suliran sa prostate resulta gayod sa dili-Kristohanong kagawian. Ang mga suliran sa prostate kasagaran sa mga tigulang—apil ang matinumanong mga Kristohanon—tungod sa ubay-ubayng mga hinungdan. Apan sanglit ang wala-matagbawng pagkapukaw sa sekso daw nalangkit sa pagpahinabo o labing menos pagpagrabe sa suliran diha sa pila ka lalaki, giisip nga nahiangay ang pagpasidaan sa among mga magbabasa batok sa lit-ag sa pornograpiya.—ED.
Pinaagi sa Panan-aw sa Usa ka Bata Ang inyong artikulo (Enero 22, 1990) gisulat uban ang dako kaayong pagkamasinabtanon nga gibati kong natukmod sa pagpahimutang sa labing daghang kopya diha sa mga eskuylahan ug mga ospital ug sa tanang inahan nga akong kaila. Ang prinsipal sa eskuylahan nga gitunghaan sa akong mga anak lalaki nakaangay kaayo sa artikulo, ug usa sa mga magtutudlo sa akong mga anak may mga pulong sa pagdayeg sa paagi sa paghisgot sa ulohan. Ako usab may upat ka anak ug nasayod unsa ka lisod ang pagkahimong ginikanan. Ang mga artikulong sama niini nagatabang kanamo sa pagtabang sa among mga anak.
M. P. R., Italya
Ang Dalunggan Sanglit gusto ko ang mga artikulong nagahisgot sa lawas sa tawo, ako nahimuot kaayo sa inyong artikulo bahin sa dalunggan. (Enero 22, 1990) Ako nagatuon sa inyong mga magasin sa dugay nang panahon kay sila nagaapil sa tanang butang buot masayran sa usa ka tawo—ang tawong dili eksperto ug kadtong may silid nga doctorate.
H. V., Brazil