Malaglagong Lunop sa Yuta sa Ubos

HANDURAWA ang usa ka lunop nga misalanap sa luna nga ang gidak-on sama sa Gran Britanya, Pransiya, ug Alemanya nga iponon. Aw, kanay nahitabo sa miaging tuig sa Queensland, Australia. Ang Charleville, usa ka lungsod duol sa tunga sa dapit nga gilunopan, giebakwet. Tulo ka libong molupyo ang nagdasok sa mga tolda sa habog nga dapit sa lokal nga tugpahanan. Ang pipila giluwas gikan sa mga atop pinaagig helicopter.

Ang usa ka gamayng pundok sa 35 ka tawo nga nakig-uban sa Charleville nga Kongregasyon sa mga Saksi ni Jehova midangop sa usa ka Saksi kansang propiedad nahimutang sa habog nga bahin 10 kilometros sa gawas sa lungsod. Kadto nahimong pasukaranan sa mga kahikayan sa pagtabang sa mga nawad-ag balay.

Sa madali, ang mga Saksi misugod sa pagpalihok sa tabang. Sa Dalby, 550 kilometros ang kalayo, giporma ang usa ka tem sa mga boluntaryo aron sa paghinlo sa gilunopang mga balay. Sa Roma, 270 kilometros ang kalayo, ang mga Saksi nangolektag pagkaon ug ubang suplay pang-emerhensiya, sama sa mga habol ug sinina. Tapos sa pasiunang surbi sa kahanginan aron sa pagbanabana sa kadaot, nangabot ang mga boluntaryo​—kapin sa usa ka gatos nga malig-on.

Gibatbat nila ang dapit sa katalagman nga “dili mahanduraw.” Ang 5 sentimetros nga lapok ug binanlas mitabon sa tanang butang. Ang nabungkag nga muwebles nangakatag sa mga kuwarto, ang mga alpombra nadaot, ang dekoryenteng mga kasangkapan natuslob sa tubig, ang mga kotse nalintuwad. Ang baho sa napan-os nga pagkaon, nasuhopang mga kahoy, ug mga hugaw nahadiindiin.

Misugod sa pagtrabaho ang mga boluntaryo. Sa pagka Sabado, Abril 28, kapin ra sa semana tapos sa lunop, ang mga balay ug mga tugkaran sa mga Saksi sa Charleville limpiyo ug respektable nang tan-awon. Hinuon, labaw pa sa panglimpiyo ang gikinahanglan. Ang mga tem sa boluntaryo misugod sa pagpasig-uli sa koryente ngadto sa kabalayan ug pag-ayo sa mga kotse ug mga kasangkapan sa balay. Ang mga tigbutang ug alpombra nagpahimutang sa bag-ong mga alpombra; ang mga tagbuhat ug kabinet nagbuhat ug nagtaod sa bag-ong mga kabinet; ang mga panday, mga tigpintal, ug mga tubero mihimog mga pagpang-ayo.

Ang resulta: Duha ka semana tapos sa lunop, ang tanang Saksi nahibalik na sa ilang giayong mga balay. Hinuon, ang mga boluntaryo wala lang magtabang sa kaubang mga Saksi. Sa dihang ang usa ka tem naglimpiyo sa balay sa usa ka Katoliko, siya balikbalik nga nagpahayag ug kahingangha.

Sa Brisbane ang mga Saksi gidayeg sa radyo tungod sa ilang trabaho panahon sa lunop. Ug sa Charleville, daghang tagalungsod ang natingala unsa ka daling milihok ang mga Saksi. Usa ka tawo nga sa nangagi nagsupak kanila nadunggan nga miingon: “Ug kita nangahas uroy sa pag-abog kanila gikan sa ganghaan.”