Usa ka Linain nga Okasyon—Motambong Ka Ba?

INGONG dinaogdaog nga mga ulipon sa Ehipto kapin sa 3,500 ka tuig kanhi, ang mga Israelinhon nanginahanglan gayod ug kagawasan. Apan si Paraon midumili sa pagpalakaw sa iyang mga ulipon. Busa gisugo ni Jehova nga Diyos nga mag-ihaw ug karnero ang mga Israelinhon ug iwisik ang dugo niini diha sa mga poste ug mga balabag sa pultahan sa ilang mga balay. Nianang gabhiona mismo ang Iyang manulonda milabay sa mga balay nga may dugo diha sa mga poste sa pultahan apan gipatay ang mga anak nga panganay diha sa mga balay sa tanang mga Ehiptohanon. Tungod niana gipalakaw ni Paraon ang mga Israelinhon. Sukad niadto, sa anibersaryo sa petsa dihang ang manulonda milabay sa mga balay sa mga Israelinhon, ginasaulog sa mga Hudiyo kining hitaboa.

Sa ulahi, mitungha si Jesu-Kristo sa talan-awon sa yuta. Usa ka adlaw si Juan Bawtista, nga maoy nagbawtismo kang Jesus, gitudlo kaniya ug miingon: “Tan-awa, ang Kordero sa Diyos nga nagakuha sa sala sa kalibotan!” (Juan 1:29) Ingon nga ang dugo sa karnero sa Paskuwa nagkahulogan ug kaluwasan alang sa panganay sa mga Israelinhon, mao man usab ang giula-nga-dugo ni Kristo makaluwas gikan sa sala ug kamatayon.

Gisugdan ni Jesus ang usa ka pagpangaon sa paghandom sa iyang haladnong kamatayon. Iyang gitunolan ang iyang matinumanong mga apostol ug tinapay ug miingon: “Kumoha ug kumaon kamo. Kini nagkahulogan sa akong lawas.” Unya gihatagan niya silag kopa sa bino ug miingon: “Uminom kamo niini; kay kini nagkahulogan sa akong ‘dugo sa pakigtugon,’ nga igabubo alang sa daghan sa kapasayloan sa mga sala.” Usab, si Jesus miingon: “Padayona sa pagbuhat kini sa paghandom kanako.” (Mateo 26:26-28; Lucas 22:19, 20) Busa buot ipasabot ni Jesus nga kini maoy usa ka tinuig nga pagsaulog sa iyang kamatayon.

Ang mga Saksi ni Jehova mainitong nagadapit kanimo sa pagduyog kanila sa pagsaulog niining selebrasyon sa Memoryal. Ikaw makatambong sa Kingdom Hall nga labing duol sa imong balay. Pakigsusi sa mga Saksi ni Jehova sa inyong lugar alang sa eksaktong oras ug dapit. Ang petsa alang sa selebrasyon sa 1992 maoy Biyernes, Abril 17.