“Kini Mopasuod Kanimo Kang Kristo”

MAO kanay gisulti sa kadaghanan bahin sa libro nga dili pa dugay nga gipatik sa mga Saksi ni Jehova, Ang Labing Bantogang Tawo nga Nabuhi Sukad. Usa ka babaye gikan sa Pransiya miingon: “Bisag dako kaayo ang akong apresasyon sa mga publikasyon sa Watch Tower Society, wala pay libro sukad ang nakahatag kanakog dako kaayong epekto.” Diha sa usa ka sulat ngadto sa sangang-buhatan sa Sosyedad sa Pransiya, siya miingon:

“Kining malukpanong kasaysayan sa kinabuhi ni Kristo nakahimo kanamo sa dugang nga paghigugma sa iyang madanihong personalidad. Nahibaloan ko usab ang hinungdanong mga bahin sa iyang kinabuhi, bisag daghang higayon na nakong nabasa ang mga asoy sa Ebanghelyo. Sa tanang mga panid niining libroha, nabuhi kita sa mahinuklogong mga panahon nga nabuhi si Kristo, nakita siya nga mahangawaon ug malumo, apan maisogon ug malig-on.

“Ang kataposang mga kapitulo ilabinang makapatandog. Midangat ako sa punto nga dili ako makapugong sa akong mga luha samtang namalandong nianang labing hinungdanong linalang sa tibuok uniberso nga andam sa pag-antos sa mga kamot sa mapintas nga mga ahente sa Yawa. Pagkagamhanang pananglitan! Ikaingon ko nga karon mibati akong mas suod sa atong ‘Walay-kataposang Amahan,’ oo, ang atong nagamandong Hari.”​—Isaias 9:6.

Ang mga Saksi ni Jehova maoy usa ka internasyonal nga organisasyon nga may kapin sa upat ka milyong estudyante sa Bibliya, ang tanan kombinsido nga si Jesu-Kristo dili lamang mao ang labing bantogang tawo nga nabuhi sukad kondili mao usab ang bugtong paagi nga makabaton ang mga tawo ug kinabuhing dayon.​—Buhat 4:12.

Kon buot ka ug dugang impormasyon o usa ka libreng pagtuon sa Bibliya diha sa balay, palihog pagsulat sa Watch Tower Society, P.O. Box 2044, 1099 Manila, o ngadto sa nahiangay nga direksiyon nga gilista sa panid 5.