Gikan sa Among mga Magbabasa

Kabos sa Kasadpan Sa inyong isyu sa Disyembre 22, 1992, usa ka ulohan diha sa “Pagpaniid sa Kalibotan” (“Kabos nga mga Bata sa Amerika”) nag-ingon: “Ang Tinipong Bansa, nga usa sa labing adunahang mga nasod sa kalibotan, usab maoy pinuy-anan sa pipila sa labing kabos nga mga bata.” Kini sayop. Adunay kabos nga mga bata sa daghang nasod nga nag-isip sa kadaghanang kabos nga mga bata sa Amerika nga adunahan. Tinuod gayod nga usa ka trahedya nga daghang bata sa Amerika ang nagaantos. Apan uban sa tanang kahinguhaan nga mabatonan, kana maoy tungod sa makauulaw nga pagpasagad sa ilang mga ginikanan.

W. H., Tinipong Bansa

Samtang daghang grabeng mga kaso sa kakabos ang makita sa Tinipong Bansa, wala gayod kami magpasabot nga ang sukdanan sa pagkinabuhi taliwala niadtong giisip nga kabos nianang nasora sa katibuk-an parehas nianang mga kabos sa ubang kayutaan. Ang kamatuoran nga kaylap ang kakabos sa bisan unsang matang sa ingon niana ka adunahang nasod makapakurat. Tinuod, ang ubang mga bata mag-antos tungod sa pagpasagad sa mga ginikanan. Apan, daghang ginikanan walay katakos nga gikinahanglan aron mapauswag ang ilang kahimtang ni may kahinguhaan nga ginatagamtam sa uban.​—ED.

Kapintasan sa Panimalay Buot ko nga pasalamatan kamog daghan tungod sa mga seryal nga “Matapos ba Gayod ang Kapintasan sa Panimalay?” (Pebrero 8, 1993) Sa kataposang 10 ka tuig sa akong 22-anyos nga kaminyoon, giantos ko ang kapintasan sa panimalay. Ang pag-abuso sa hunahuna maoy labing grabe. Inanay, apan sistematiko, madaot ang imong personalidad sa sukod nga dili ka makapangayo ug tabang. Nakaabot ako sa punto nga nakahunahuna gani ako sa paghikog. Sa kataposan gibulagan ko ang akong bana, ug ako nagkinaugalingon. Apan ako napalig-on ug gilipay sa mga artikulo sa inyong magasin.

B. S., Alemanya

Ang akong inahan maoy usa ka biktima sa pisikal nga pag-abuso sa akong amahan, ug kaming tulo ka bata naguol kaayo niana. Sa matag panahong kulatahon niya ang akong inahan, maorag kami ang iyang gikulata. Pipila lamang gayod ang nakasabot kon unsa ka lisod ang pagpuyo diha sa panimalay nga giharian sa kapintasan ug kasilag, diin walay pagsinabtanay o gugma. Kami nadasig sa kahibalo nga adunay usa nga nakasabot kanamo.

T. G. D. A., Italya

Makapadasig gayod nga makita nga prangkang gihisgotan kining sulirana. Giantos ko ang 14 ka tuig uban sa abusadong kapikas nga nag-angkong usa ka Kristohanon. Kanunay akong sultihan nga kinahanglang likayan ko ang pagpasuko kaniya. Gihangyo niana ang imposible! Sa kataposan, napugos ako sa pagbiya kaniya. Salamat sa inyong mga artikulo; kini makapadasig ug makatabang sa uban nga wala pa makaagig suntok, patid, o kalud-i sa pagsabot sa emosyonal nga mga ulat nga among ginaantos.

L. T., Tinipong Bansa

Ang mga artikulo modiretso gayod sa kasingkasing sa daghang babaye nga mibating nag-inusara ug nahilain; ang mga pagbati sa kahadlok ug kaulaw nagpahilom kanamo. Gitabangan ninyo kami sa pagsabot nga lahi sa gipatuo kanamo, dili kami ang nakaingon niini.

B. A., Tinipong Bansa

Mga semana na ang miagi sukad nga miabot ang akong kopya sa Pagmata! diha sa buson. Daghang pag-ampo una ang akong nahimo aron lang sa pagkuha sa magasin gikan sa iyang putos ug daghang adlaw una pa nga napugos nako ang kaugalingon sa pagbasa niana. Daghang salamat sa paghisgot niining isyuha! Ako biktima sa kapintasan sa panimalay. Kas-a mapintasong gikulata ako sa akong bana samtang ako natulog; nagkinahanglan ug plastic surgery aron mauli ang akong bukog sa aping. Nakalingkawas ako kaniya pinaagi sa tabang sa kapolisan ug sa usa ka malulotong Kristohanong pamilya nga nagpuyo sa duol. Siya gisentensiyahan sa daghang bulan sa bilanggoan. Ako karon minyo na pag-usab uban sa usa ka buotan Kristohanong lalaki.

P. H., Tinipong Bansa