Tabang sa Hustong Panahon
Ang usa ka babaye misulat sa sangang buhatan sa mga Saksi ni Jehova sa Australia aron sa pagpasalamat kanila alang sa magasing Pagmata! mahitungod sa “Pag-ayo sa mga Kadaot sa Pag-abusar sa Bata.” Siya misaysay:
“Sa panuigong 12, ako giamong-amongan sa sekso sa hinigugma sa akong inahan. Nasayod ako nga sayop ang nahitabo. Ugaling, niadtong panahona ako naghunahuna nga ako daotan ug nakahimog usa ka mangil-ad nga butang ug nga mao kini ang paagi sa Diyos sa pagsilot kanako. Ang akong kasingkasing mahugno sa paghunahuna sa pagduaw niining tawhana, kay nasayod kaayo kon unsay mahitabo. Apan kinahanglang moadto ako, kay ang akong inahan mitugot kaniya nga himoon diha kanako ang iyang hiwi nga kalipay tungod sa salapi. Nganong nakaako ang akong inahan sa pagtulod kanako sa pagbuhat niana? Nakakat-on ako sa pagpalong sa akong mga pagbati ug sa pagkahimong mayugtanon sa kinabuhi ug sa Diyos.
“Niadtong 1992 lamang nga ako nakapakig-estorya sa usa sa mga Saksi ni Jehova. Daghang butang ang akong nakat-onan. Ang labing hinungdanon mao nga si Jehova nga Diyos nahigugma kanatong tanan ug nga siya wala magsilot kanako.
“Busa kining sulata maoy pagpasalamat kaninyo tungod sa inyong mga artikulo sa Pagmata! bahin sa ‘Mga Kadaot sa Pag-abusar sa Bata’ sa Oktubre 8, 1991, nga isyu.
“Akong gipahinungod na ang akong kinabuhi kang Jehova ug nagplano nga magpabawtismo sa sunod tuig.”
Sulod sa duha ka bulan ang Pagmata! nakadawat ug kapin sa usa ka libong sulat sa pagpasalamat alang sa ibabaw nga isyu sa Pagmata! lamang. Hinuon, labaw pang hinungdanon kay sa pagpakita sa mga magbabasa kon unsaon sa pagsagubang sa mga suliran karong adlawa, ang Pagmata! nagatukod ug pagsalig sa tagana sa Maglalalang, nga gipasukad sa halad-lukat ni Jesus, bahin sa usa ka malinawon ug may-kasegurohang bag-ong kalibotan nga magaayo sa tanang balatian. Kon buot kang makabaton ug dugang impormasyon mahitungod sa bag-ong kalibotan, o usa ka libre nga pagtuon sa Bibliya, pagsulat sa Watch Tower, P.O. Box 2044, 1099 Manila, o sa nahiangay nga direksiyon nga gilista sa panid 5.
[Mga hulagway sa panid 32]
Awake!
Awake!
Awake!
Children UNDER STRESS How Can They Be Helped?