“Samag Nagtan-awg Sine Bahin sa Kinabuhi ni Jesus”

Gipakasama sa usa ka babaye sa Pransiya ang pagbasa sa librong Ang Labing Bantogang Tawo nga Nabuhi Sukad nga nagtan-aw sa maong sine. Ang libro naningkamot sa paghisgot sa matag hitabo sa kinabuhi ni Jesus sa yuta nga gihisgotan diha sa mga Ebanghelyo. Ug kutob sa maarangan, ang matag usa niining mga hitaboa giasoy sumala sa sunodsunod nga pagkahitabo niini. Ang babaye mibatbat:

“Sa dihang nakaabot ako sa kataposan sa libro, gibati ko nga daw gidapit ako ni Jesus sa pagpakig-uban kaniya, sa pagkinabuhi diha sa iyang kiliran, sa pagpakig-ambit sa iyang mga kalipay, sa iyang mga emosyon, sa laktod, sa tanang bahin sa iyang ministeryo. Ang nindot nga mga ilustrasyon tinuod nga nagpadayag sa mga pagbati ug mga personalidad sa tanan niadtong nakig-uban kang Jesus ug bisan kang Jesus mismo. Ang pagbasa sa libro gikan sa sinugdan hangtod sa kataposan sa usa ka higayon samag nagtan-awg sine bahin sa kinabuhi ni Jesus.”

Kon buot ka nga makadawat ug usa ka kopya niining 448-panid nga gahig-haping libro o makabaton ug usa ka libre nga pagtuon sa Bibliya sa balay, palihog pagsulat sa Watch Tower, P.O. Box 2044, 1099 Manila, o ngadto sa nahiangay nga direksiyon nga gilista sa panid 5.