“Kini Nagwagtang sa Akong mga Pagduhaduha”

KANA ang giingon sa usa ka tin-edyer gikan sa Mexico bahin sa mga artikulo nga iyang nabasa diha sa Pagmata! Siya misulat: “Ako 17 anyos, ug anaa na ako sa ikaduhang semestre sa accounting sa usa ka teknikal nga hayskul. Nagustohan ko pag-ayo ang inyong mga magasin. Ginabasa ko kini sulod na sa tulo ka tuig ug nangolekta pa gani niini.

“Tungod kay ako dili usa sa mga Saksi ni Jehova ug ang akong tibuok pamilya Katoliko man, wala ko mangahas sa pag-adto sa mga tigom. Dili nako mabatonan sa regular ang mga magasin, tungod kay ang mga Saksi dili kanunay moduaw sa akong balay o kon sila moduaw, wala ako sa balay, ug ang akong pamilya dili mokuha niini. Maoy hinungdan nga ako nagsulat sa paghangyo kaninyo nga padalhan ako ug mga magasin sa Ingles ug ingon man sa Kinatsila.

“Ang inyong mga artikulo nakatabang kanako sa eskuylahan, lakip na niadtong bahin sa pag-agas sa aseite (Septiyembre 22, 1989), sa mga dili-yutan-on (Abril 8, 1990), sa mga dinosaur (Pebrero 8, 1990), ug daghan pang uban. Gihatagan ako niini sa impormasyon nga akong gikinahanglan, ug kini nagwagtang sa akong mga pagduhaduha.

“Malingaw kaayo akong mobasa sa artikulo sa Pagmata! nga ‘Mga Batan-on Nangutana . . . ,’ sanglit kini nagatabang kanako sa akong matag adlaw nga kinabuhi ug sa mga pagpakiglabot sa ubang mga batan-on.”

Kon buot ka ug kopya sa Pagmata! nga ipadala sa imong balay, palihog pagsulat sa Watch Tower, P.O. Box 2044, 1099 Manila, o ngadto sa nahiangay nga direksiyon nga gilista sa panid 5.