Ang Daghag Gamit nga Furoshiki

SINULAT SA KORESPONSAL SA PAGMATA! SA HAPON

Ang furoshiki maoy usa ka panaptong igpuputos sa Hapon​—usa ka panaptong igpuputos nga adunay kalainan. Kini nindot tan-awon. Kini nindot hikapon. Ug kini ibugkos sa maanindot nga paagi. Ang pagpili ug pagbugkos sa furoshiki nahimong usa ka arte, nga gipasa gikan sa kaliwatan ngadto sa laing kaliwatan sa kapin sa usa ka libo ka tuig.

DILI mahimo ang bisan unsa lang nga panapton. Ang kolor, desinyo, ug ang materyal kinahanglang tagdon. Depende usab sa okasyon kon unsa nga furoshiki ang gamiton. Pananglitan, ang regalo tingali ihatod nga giputos sa sida nga furoshiki nga niini ang kasagarang mga desinyo, sama sa mga bulak nga serali o plum, ang napatik. Usahay ang tighatag moinsister pa nga iya na sa tagdawat ang putos ingong bahin sa regalo.

Siyempre, ang mga panaptong igpuputos mabatonan sa lainlaing mga gidak-on ug magamit sa lainlaing mga katuyoan. Ang lingin nga mga watermelon mahimong maputos niini, o bisan ang taas nga mga botelya sa rice-wine. Ang ubang furoshiki dagko kaayo nga tulo o upat ka linukot nga mga gamit sa higdaanan maputos niini. Algodon kasagaran kining dagkong furoshiki ug gusto kaayong gamiton kini sa gagmayng mga bata ingong mga sinina kunohay. Kon bahin sa laing gidak-on, gamiton sa mga bata ang gagmay kaayong mga panapton. Gani, kon tan-awon ang mga balonan sa mga bata ang mga labakara ug mga panyo gigamit usab ingong gagmayng furoshiki. Sa dihang badbaron sa mga bata ang ilang gagmayng furoshiki aron kaonon ang ilang mga balon, ang limpiyong mga panapton nagsilbing mga serbilyeta. Hinuon, ang kadaghanang furoshiki sama kadakoa sa kuwadrado nga bandana.

Ang naandang paagi sa paggamit sa furoshiki sa Hapon mao ang pagpahimutang sa butang nga pagapuston pahandag diha sa panapton, sa tunga. Kon initlog nga pagkalingin ang pakete, ang sobrang panapton sa kilid piloon ug maayo libot sa pakete, una sa usa ka kilid unya sa pikas aron ang matag kilid niini magsugat. Mabilin ang duha ka eskina sa panapton nga maglabaw. Karon himoon nimo ang malisod nga bahin sa pagpilo. Kining duha ka kilid bugkoson ibabaw sa pakete nga baligtoson makaduha. Labing maayo, gagmayng mga baligtos lang nga kon matapos morag gamayng kabakaba nga tan-awon. Apan, depende sa gidak-on sa pakete, ang “mga pako” sa kabakaba kon tan-awon daw usa ka parisan sa nagyongyong nga dalunggan sa kuneho. Apan dili kay wala nay mahimo niini! Sa pipila ka segundo kini mahimong maandinot nga laso.

Alang sa kuwadrado nga pakete, ang magkaatbang nga mga eskina sa furoshiki ibaligtos sa ibabaw sa pakete, nga ang usa ka baligtos sapawan ug laing baligtos aron usa lang ka baligtos ang makita. Birahog hugot sa mga Hapon ang panapton ug himoon kining matahom nga pungpong ibabaw sa pakete. Ang simple nga porma nindot tan-awon. Bisan tuod ang bangan madala pinaagi sa pagkapot sa bugkos, kon kini usa ka regalo, kini kasagaran kuptan sa ilalom aron dili madaot ang porma.

Ang pulong furoshiki sa literal nagkahulogang “panaptong ibuklad sa pagkaligo,” usa ka ngalan nga napopular sa ika-17ng siglo. Niadtong panahona, nahupngan tungod sa kahadlok sa kalayo, ang mga tawo naningkamot nga dili gayod maghaling diha sa ilang mga balay aron sa pagpainit ug tubig nga ikaligo. Sila wala kaayoy kapilian gawas sa pag-adto sa publikong mga kaligoanan. Didto ilang bukharon ang ilang kuwadrado nga panapton, maghubo, ug gamiton kini sa pagputos sa ilang mga sinina samtang sila maligo. Ang publikong mga kaligoanan hapit nang mangawagtang, apan ang ngalang furoshiki, ang “panaptong ibuklad sa pagkaligo,” nagpabilin gihapon.

Karong panahona diin ang mga tradisyon kusog nga nagakawala, ang furoshiki, wala mawagtang. Daghang pamilya ang gikataho nga adunay mga walo ka furoshiki ug ang mga sang-atanan sa kusog kaayong modagan nga tren sa Hapon daw nagpamatuod sa ilang pangangkon. Alang sa kasayon gikombinar sa mga pasahero nga Kasadpanhon ug pamesti ang karaan ug ang bag-o, ang tradisyonal uban ang moderno.

Ang halin sa furoshiki mius-os makadiyut sa dihang ang mga tindahan misugod sa paghatag sa ilang mga kustomer ug plastik nga mga bag ug dagkong mga bulsita. Apan, baliskad na ang kahimtang karon. Ang mahalong mga etikita ug ang modernong mga desinyo naghimo sa furoshiki nga madanihon kaayo sa maurogong mga batan-ong babaye sa Hapon. Ang furoshiki moangay sa kimono apan dili moangay sa panit nga bag. Busa iniggula sa kimono sa espesyal nga mga okasyon, mogula usab ang furoshiki alang sa dagkong mga pakete.

Matuod, ang panaptong igpuputos takos sa pagdayeg. Ang furoshiki nga hinimo sa natural nga mga lanot dili mohatag kadaot sa kalikopan. Kini balikbalik nga magamit. Kini gamay. Kini gaan. Kini dali nga madala. Kini mahimong mga bag sa bisan unsang porma o gidak-on dihadiha. Diha sa mga kamot sa ginindotan nga mga turista nga wala mahibalo kon unsa ang furoshiki, kini mahimong matahom nga mga panwelo sa liog ug mga dekorasyon sa talad. Ug dili pa dugay misugod ang mga Hapon sa pagsundog sa mga langyaw ug misugod sa pagsundog sa paggamit sa furoshiki sa samang paagi, maingon man ingong mga place mat, mga tinapak nga kobrekama, mga epron, mga adorno sa bungbong, ug bisan unsa nga ilang mahunahunaan. Gani, nadiskobrehan sa mga tawo kon unsa ka daghag gamit ang furoshiki.