Pagpasidungog sa Usa ka Maglalalang

“ANG kabulakan maoy alang sa katahom, ug ang mga prutas maoy alang sa paggamit. Apan daghan sa prutas ang matahom. Tinguha sa langitnon natong Amahan nga ang katahom iduyog sa butang nga mapuslanon.” Ang maong kinutlo dili gikan sa usa ka relihiyosong teksbok. Gikan kini sa usa ka libro sa siyensiya nga nag-ulohang The Child’s Book of Nature. Gisulat niadtong 1887, ang awtor niini, si Worthington Hooker, M.D., nagtuyo nga ang libro gamiton sa mga pamilya ug mga tunghaan aron tudloan ang mga bata.

Ang estilo sa pagsulat niining libroha naghatag ug ebidensiya sa pagtuo ug kahingangha sa awtor sa usa ka Maglalalang. Si Dr. Hooker dugang misulat: “Nagkadaiya kaayo ang maayong mga lami sa mga prutas sa yuta, sumala sa imong makita kon maghunahuna ka sa labing daghan kutob sa imong mahimo. Pagkadako kining ebidensiya sa tugob nga pagkamaayo sa Diyos! Siya wala lamang magtagbaw kanato sa pipila ka butang, apan sa daghang butang. Ang nindot nga mga butang niining kalibotana halos di-maihap sa kadaiyahan niini. Pagkakatingad-an nga may tawo nga mahimong nasayod niining tanan, ug magkinabuhi sa adlaw-adlaw nga dili magpasalamat sa iyang Magbubuhat!”

Sa dihang ang The Child’s Book of Nature unang napatik, ang mga teoriya ni Darwin nasabwag na kaayo sulod sa halos tulo ka dekada. Bisan pa niana, ang libro ni Dr. Hooker nagpakita nga bisan sa hinapos sa ika-19ng siglo, ang usa ka teksbok dayag nga makapasidungog sa Diyos, inay sa way-pasikaranang sulagma, tungod sa mga kahibulongan sa kinaiyahan.​—Itandi ang Isaias 40:26.