‘Nagtubag sa Tanang Pangutana’

Sa pagkomento bahin sa serye nga “Usa ka Mas Maayong Pagsabot sa Menopos,” sa Pebrero 22, 1995, nga Pagmata!, usa ka magbabasa nga taga-Kentucky, T.B.A., misulat: “Di pa dugay mitambong ako ug tulo-ka-oras nga seminar bahin niining ulohana. Gipasiugda kadto sa mga departamento sa edukasyon sa duha ka dagkong mga ospital. Ang programa impormatibo kaayo, apan nakakat-on ako ug mas labaw pa sulod sa 30 minutos pinaagi sa pagbasa sa Pagmata! kay sa akong nakat-onan sulod sa tulo ka oras sa seminar (ug ang bili niana wala moabot ug $15).”

Ang laing magbabasa sa Pagmata! nag-ingon: “Nakabasa ako ug daghang libro ug mga artikulo bahin sa menopos sa milabayng tulo ka tuig. Human niadto kanunay akong may mga pangutanang wala matubag. Ang inyong mga artikulo nagtubag sa tanan nakong mga pangutana maylabot niining ulohana.”

Ang Pagmata! nagtagana ug impormasyon nga nagtabang sa mga magbabasa niini sa pagsagubang sa mga suliran karong adlawa. Labi pang hinungdanon, nagpauswag kini sa pagsalig sa saad sa Maglalalang sa usa ka malinawong bag-ong kalibotan. Kon buot nimong makakat-on ug dugang bahin sa mga pagtulon-an ug mga kalihokan sa mga Saksi ni Jehova, ang mga magpapatik niining magasina, palihog kontaka sila sa ilang lokal nga Kingdom hall, o pagsulat sa direksiyon nga labing duol kanimo nga nalista sa panid 5.