Gikan sa Among mga Magbabasa

Nameligrong Planeta Ako nagsulat bahin sa seryal nga “Atong Nameligrong Planeta​—Maluwas ba Kini?” (Enero 8, 1996) Maayo nga adunay mabasa nga makapadasig. Ang ikatulong artikulo diha sa seryal naghatag kanatog paglaom sa Paraiso, diin dili na kita mabalaka bahin sa sistema sa ekolohiya o sa mga lungag sa ozone layer! Naglaom ako nga makapuyo niana nga Paraiso uban sa akong pamilya ug mga higala.

A. C., Tinipong Bansa

Nagustohan namo ang matulon-anong kahon sa panid 8 ug 9 nga naghisgot bahin sa maong mga problema sama sa pagpuril sa kalasangan, kanihit sa tubig, ug nameligrong mga espisye. Ang mga artikulo nagpasabot kanamo sa makuyaw nga kahimtang nga naagoman karon sa atong planeta. Gibati namo nga may kasegurohan sa pagkahibalo nga ang bugtong sulbad niining grabeng problema anaa sa atong Maglalalang.

O. P. ug F. J. O., Espanya

Report ni Jessica Mao pay pagkatapos nako pagbasa sa “Ang Report ni Jessica” diha sa Enero 8, 1996, nga isyu. Makapadasig kaayo kadto kanako! Sa dihang makita ko ang usa ka sadyang batan-on nga nag-alagad kang Jehova nga malipayon kaayo ug matinumanon, mapasigarbohon kaayo ako niini. Ang sugilanon ni Jessica nagpahinumdom kanako sa panginahanglan sa pagtaganag pamatuod sa tanang higayon.

A. H., Tinipong Bansa

Nakakaplag ug Katuyoan sa Kinabuhi Ang artikulong “Ako Walay Tumong Apan Nakakaplag ug Katuyoan sa Kinabuhi” (Enero 8, 1996) sa pagkatinuod nakatandog sa akong kasingkasing. Samtang gibasa ko kini, ingon sa daw ang artikulo naghisgot bahin kanako. Ako usab walay tumong nga may mangitngit nga panglantaw sa umaabot. Apan gidapit ako ngadto sa Kingdom Hall sa mga Saksi ni Jehova ug nagsugod sa pagtuon sa Bibliya. Karon ako malipayon nga nagapakig-ambit sa bug-os-panahong pagsangyaw nga buluhaton, nga nagatabang sa uban nga makita ang kahibulongang paglaom nga gipakita ni Jehova kanako.

C. R., Tinipong Bansa

Pagtambal sa Dili-Makapanganak Ang tipik nga taho sa “Pagpaniid sa Kalibotan” nga “Bag-ong Paglaom Alang sa Dili-Makapanganak nga mga Magtiayon?” nakakuha sa akong pagtagad. (Septiyembre 22, 1995) Gipakita ko kini sa usa ka biologo, ug siya miingon nga siya wala pa sukad makadungog sa paagi nga gihubit, diin ang pag-ineksiyon ilalom sa mikroskopyo sa usa ka binhi sa lalaki himoon diha sa binhi “sulod sa babaye.”

E. K., Alemanya

Ang among tipik nga taho gipasukad sa usa ka report sa Pranses nga buhatan sa balita nga France-Presse nga naghisgot sa usa ka pakigpulong nga gihatag sa usa ka doktor nga taga-Denmark nga si Anders Nyboe Andersen. Ikasubo, ang pipila ka butang di-husto ang pagkataho. Gisultihan ni Dr. Andersen ang “Pagmata!” nga ang pagpaturok ug binhi ginamit ang mikroskopyo sa pagkatinuod gihimo diha sa test tube, sa ato pa, gawas sa lawas sa babaye. Dayon ang pertilisadong binhi ipasulod ngadto sa lawas sa babaye. Husto ang among pag-ingon nga ang paagi makagamit sa “binhi sa bana imbes sa ubang wala hiilhing tigdonar​—sa ingon malikayan ang sensitibong moral ug relihiyosong mga isyu.” Sa maong kahimtang, ang Kristohanong magtiayon angay maghimog personal nga desisyon mahitungod niining paagiha. (Tan-awa ang “The Watchtower” sa Hunyo 1, 1981, panid 31.)​—ED.

Nahisalaag nga Higala Ako nagsulat bahin sa artikulong “Mga Batan-on Nangutana . . . Unsay Akong Buhaton kon Magkaproblema ang Usa ka Higala?” (Enero 22, 1996) Usa sa akong labing suod nga mga higala napalagpot usa ka tuig na nga milabay. Ako naguol pag-ayo. Gibati ko nga nagkulang ako sa pagtabang kaniya, nagkulang ako ug panahon alang kaniya, ug dili usa ka maayo kaayong higala. Sa dihang nabasa ko nga dili kadto akong sayop nga siya mibiya sa kamatuoran, gibati ko nga usa ka dakong luwan ang nahulog gikan sa akong mga abaga!

L. T., Tinipong Bansa

Sa akong kahimtang ang tawong suod kanako nga misugod sa “pagsunod sa usa ka kuwestiyonableng estilo-sa-kinabuhi” dili lamang akong higala kondili akong dili-kapulihan ug buotang inahan. Sa kadugayan gibutyag ko sa mga ansiyano sa kongregasyon ang bahin sa iyang kahimtang, ug siya napalagpot. Gibasol ko ang akong kaugalingon sa pagsumbong sa mga ansiyano. Karon naningkamot ako sa pagbuntog sa akong sayop nga mga pagbati sa pagkasad-an pinaagi sa pagpadapat sa mga sugyot diha sa artikulo.

I. Y., Hapon