“Mas Maayo nga Mokonsulta Ka sa Pagmata!”
KANAY gisulti kang Pasquale, usa ka batan-ong Saksi ni Jehova nga nagtungha sa kolehiyo sa Bari, Italya, sa dihang nangayo siya sa iyang magtutudlo sa sikolohiya ug pila ka impormasyon nga iyang nabatonan bahin sa adiksiyon sa droga. Apan, sa nangagi ang maong magtutudlo nagpakitag pagkamapihigon batok sa mga Saksi ni Jehova. Unsay nakapausob sa iyang tinamdan?
Si Pasquale mipatin-aw: “Sa pagkatapos sa usa ka leksiyon, ang magtutudlo nangayog tabang sa iyang mga estudyante sa pagpangitag impormasyon bahin sa pag-abusar sa bata, ang ulohan nga bahin niana nag-andam siyag usa ka postgraduate thesis. Ako nahinumdom ug pipila ka isyu sa Pagmata! nga naghisgot niini ug sa may-kalangkitan nga mga ulohan, sama sa ‘Edukasyon Bahin sa Sekso—Kinsay Angay Motudlo Niini?’ (Pebrero 22, 1992). Hinuon, kay nahibalo sa pagkamapihigon sa akong magtutudlo batok sa mga Saksi, akong gihangyo ang usa ka klasmet sa paghatag kaniya sa mga magasin.”
Gibatbat ni Pasquale kon unsay nahitabo sa dihang, pila ka adlaw sa ulahi, iyang gisukna ang iyang magtutudlo bahin sa pagkabaton sa mga impormasyong gitinguha niya bahin sa adiksiyon sa droga: “Wala dayon siya motubag. Hinunoa, mitindog siya ug gilamano ako. Siya miingon nga dili niya gustong modawat sa mga magasin sa mga Saksi ni Jehova sa nangagi tungod kay giisip niya nga sila yano kaayo ug para sa mga bata. Ugaling, human sa iyang pagbasa kanila, nausob ang iyang hunahuna. Siya miingon nga iyang nadiskobrehang ang mga unod sa mga magasin labing mapuslanon gikan sa katilingbanong punto de bista. Siya miingon nga iyang ilakip ang mga punto gikan sa Pagmata! diha sa iyang thesis.”
Komosta ang hangyo ni Pasquale alang sa mga impormasyon bahin sa adiksiyon sa droga? “Ihatag ko kana kanimo nga kinabubut-on kaayo,” mitubag siya, “apan mas maayo nga mokonsulta ka sa Pagmata! Usa kini ka magasin nga naghisgot ug mapuslanong mga ulohan, ug mapuslanon kini, bisan alang sa mga nagtungha sa unibersidad.”
Ang Pagmata! naghisgot sa mga suliran karon ug naningkamot sa paghatag ug praktikal nga tabang ngadto niadtong nag-atubang ug dagko o gagmayng mga hagit sa matag-adlawng kinabuhi. Kon buot kang masayod kon unsang tabang ang ikatagana sa Bibliya, pakigkita sa mga Saksi ni Jehova, kinsa nag-apod-apod sa Pagmata!, o pagsulat sa nahiangayng adres nga nalista sa panid 5.