“Iyang Gipasulat Kini Diha sa Papel”

Mao kanay giingon sa usa ka mapabilhong batang babaye gikan sa Canada diha sa usa ka sulat-pasalamat ngadto sa Watch Tower Society. Siya miapil sa bangga sa pakigpulong publiko diha sa tunghaan, ug ang iyang presentasyon nakapahimuot kaayo sa usa sa mga maghuhukom diha sa grupo nga siya nangayog permiso sa pagpasulat niini diha sa lokal nga pamantalaan.

Giunsa pagpili sa batang babaye ang iyang ulohan? “Ang akong klase, ilabina ang mga babaye, may problema bahin sa tabi,” siya misaysay. Busa iyang gipasukad ang iyang presentasyon sa impormasyon nga iyang nabasa sa Pagmata! Ang mga bahin sa iyang pakigpulong gipatik sa The Review, usa ka lokal nga mantalaan sa Niagara Falls, Ontario, ubos sa ulohang “Ang Tabi Mahimong Makasakit; Unsay Imong Bation?”

Unsa may nakapadayeg kaayo sa maghuhukom diha sa grupo? Matikdi ang pipila ka kinutlo gikan sa pakigpulong sa batang babaye: “Karong adlawa diha sa katilingban ang tabi komon kaayo. Kini magpahinabog daghang labad sa ulo, mga gabiing walay tulog ug labaw sa tanan mga kasakit sa pagbati. . . .

“Ang paghunong sa tabi imposible tungod kay kanaiyanhon sa tawo nga mosulti. Ang usa ka butang nga atong mahimo mao ang padayong pagkontrolar niana. Ang pipila ka sugyot sa paghimo niini mao ang: 1. Ayaw pagduyog sa tabi. 2. Ayaw paminaw sa tabi. . . . Pinaagig pagpaminaw sa tabi, daw ikaw mouyon kon unsay ginaingon. 3. Ang makadaot nga tabi makapahimo usab kanimo nga bakakon. 4. Ang labing hinungdanong tambag sa tanan mao ang paghunahuna sa dili ka pa mosulti! Pangutan-a ang imong kaugalingon ‘Unsay akong bation kon kini giingon bahin kanako?’”

“Ipadapat an gupat ka sugyot,” mihinapos ang batang babaye, “ug ikaw lagmit gayod nga mahimong usa ka mas maayong tawo.”

Pagkamaayong tambag alang sa tanan, dili lamang sa mga batan-on sa tunghaan! Ang Pagmata! nanaingkamot sa pagtanyag sa tukma-sa-panahon ug bag-ong impormasyon diha sa nagkadaiyang mga ulohan. Kon buot kang makadawat niining basahona nga makanunayon, pangutana sa usa sa mga Saksi ni Jehova sa sunod nga panahong sila moduaw, o pagsulat sa tukmang adres nga gilista sa panid 5.